1. Kansi tufunika kucitanji cifukwa cakuti tili na mwai wolaŵila na Yehova m’pemphelo?

 TUYAMIKILA ngako kuti Nyamalenga wasu watipasa mwai wolaŵila naye kupitila m’pemphelo. Ganizilani tyala, tingapemphele kwa Yehova nomuuzhya zili mumtima mwasu pa nthawi iliyonse koma soti m’cilaŵilo ciliconse. Mwacisanzo, tingapemphele ngati tulwala m’cipatala koma soti ngati tili m’jele, apo tili na cidalilo cakuti Ausuwasu acikondi amvwishile mapemphelo ŵasu. Tetyo, tuyamikila ngako mwai wa pemphelo.

2. Kansi Mfumu Davide eonesha tyani kuti enzoyamikila mwai wa pemphelo?

² Mfumu Davide enzoona mwai wapemphelo kunkhala wofunika ngako. Eimbila Yehova kuti: “Pemphelo yangu inkhale monga zofukiza pamenso panu.” (Sal. 141:1, 2) M’nthawi ya Davide, ansembe enzopeleka zofukiza zonunkhila bwino. Zofukiza izi zenzonkhala zokonzewa bwino. (Eks. 30:34, 35) Monga ni mwamene ansembe enzokonzela bwino zofukiza akaliyozipeleka kwa Yehova, Davide enzoyamba waganizila mosamala zati alaŵile na Yehova m’pemphelo. Nase tufunika kucita cimozimozi tikaliyoyamba kupemphela.

3. Ngati tupemphela kwa Yehova, kansi tufunika kulaŵila naye tyani, ndipo ndaŵa yanji?

³ Nthawi zonse ngati tupemphela kwa Yehova, tufunika kulaŵila naye mwaulemu. Ganizilani za mensomphenya yosangalasa yeciona Yesaya, Ezekieli, Danieli na Yohane. Onse eona mensomphenya yolingana, koma yosiyanako m’mbali ziyakine. Yonse yofotokoza kuti Yehova ni Mfumu yolemekezeka. Mwacisanzo, Yesaya elaŵila kuti: “Neona Yehova wankhala pa mpando wacifumu wamene wenze pa malo okwezeka.” (Yes. 6:1-3)  Ezekieli eona Yehova wankhala pa mpando wake wacifumu ndipo pa malo onse omuzungulila penze powala. Penze soti “cinthu ciyakine . . . cooneka monga ni utawaleza.” (Ezek. 1:26-28) Danieli eona “Wamasiku Anyinji” ali pa mpando apo n’kuti wavwala vovwala vituŵa ndipo mpando wake wacifumu wenzoyaka mulilo. (Dan. 7:9, 10) Naye Yohane eona Yehova wankhala pa mpando wacifumu wozunguliliwa na utawaleza wooneka monga mwala wa emalodi. (Chiv. 4:2-4) Tetyo, kuganizila mensomphenya aŵa koma soti ulemelelo wa Yehova wosayelekezeleka, kutipangisha kuyamikila mwai watili nao wolaŵila naye m’pemphelo. Koma kansi tufunika kupemphela motyani?

4. Kansi tuphunzila cinji kufumila pa mau oyambilila a m’pemphelo yacisanzo yecilaŵila Yesu pa Mateyu 6:9, 10?

⁴ Ŵelengani Mateyu 6:9, 10. Pa ulaliki wake wa palupili, Yesu ephunzisa ophunzila ŵake mwaangapemphelele m’njila yokondwelesha Mulungu. Pavuli polaŵila kuti “mukopemphela teti,” Yesu etomola zinthu zatufunika kulaŵila m’mapemphelo ŵasu. Coyamba, tufunika kupemphelela kuti zina ya Mulungu ituŵishiwe na kuti Ufumu wake uwele. Ufumu uyu ukaononge adani onse a Mulungu ndipo ukalete madaliso ku mtundu wa ŵanthu. Ngati tufotokoza zinthu izi m’mapemphelo ŵasu, tuonesha kuti tuika zofuna za Yehova pa malo oyamba osati zasu.

5. Kansi ni zinthu zotyani zatingasenge Yehova seo pa seka?

⁵ Pavuli pofotokoza zinthu zatatomola, Yesu efotokoza kuti n’cinthu cofunika ngako kupemphelela zinthu zaumwini. Mwacisanzo, tingasenge Yehova kuti atipase cakulya, atikhululukile macimo ŵasu na kuti atiteteze ku mayeselo koma soti kuli Satana Maleŵania. (Mat. 6:11-13) Ngati tumusenga zinthu izi, tuonesha kuti tumudalila na kuti nise ofunishisha kumukondwelesha.

6. Ngati tupemphela, kansi tufunika kutomola ndendende mau a m’pemphelo ya cisanzo? Fotokozani.

⁶ Yesu enzoyembekezela lini ophunzila ŵake kutomola ndendende mau a m’pemphelo ya cisanzo. M’mapemphelo ayakine yecitwala Yesu, efotokoza zinthu zosiyanasiyana zamene zenze zofunika ngako pa nthawi yamene iyo. (Mat. 26:39, 42; Yoh. 17:1-26) Molingana  na Yesu, nase tingapemphelele cinthu ciliconse camene cutidesa nkhaŵa. Mwacisanzo, ngati tufuna kupanga cosankha, tingapemphe Yehova kuti atipase nzelu. (Sal. 119:33, 34) Ngati tapasiwa utumiki wamene ni wovuta ngako, tingamusenge kuti atiyavye kuukwanilisha. (Miy. 2:6) Makolo angapemphelele ŵana ŵao ndipo nao ŵana angapemphelele makolo ŵao. Kuyangizhyila apo, tufunika kupemphelela maphunzilo ŵasu a Baibo koma soti ŵanthu ŵatulalikila. Koma tufunika lini tyala kupempha Yehova kuti atiyavye. Pali soti mbali iyakine yatufunika lini kuluŵa patupemphela.

7. Ndaŵa yanji tufunika kuyamikila Yehova m’mapemphelo ŵasu?

⁷ Nthawi zonse, tufunika kukumbukila kuyamikila Yehova m’mapemphelo ŵasu. Paliye munthu aliyense watufunika kuyamikila ngako kupambana Yehova. Yove otikhululukila nthawi zonse ndipo ni “wacifundo, wacisomo, wosakalipa kamangu koma soti wozula na kuwama mtima kosasila na cendi.” (Sal. 86:5, 15) Kulaŵila cendi, tili na cifukwa comvwika coyamikilila Yehova cifukwa ca zinthu zakuticitila.

8. Kansi ni zinthu ziyakine zotyani zatingayamikile Yehova? (Salimo 104:12-15, 24)

⁸ Tufunika soti kuyamikila Yehova pa vinthu vabwino vakutipasa. Mwacisanzo, tingamuyamikile potipasa mitundu yosiyanasiyana ya maluŵa, vakulya vabwino vosiyanasiyana koma soti ayasu amene otikonda. Ausuwasu acikondi otipasa zinthu izi koma soti ziyakine na colinga cakuti tikosangalala. (Ŵelengani Salimo 104:12-15, 24.) Kupambana zonse, tuyamikila ngako Yehova cifukwa ca cakulya cauzimu ca pa nthawi yake na ciyembekezo cabwino catili naco ca msogolo.

9. Kansi n’cinji cingatiyavye kukumbukila kuyamikila Yehova? (1 Atesalonika 5:17, 18)

⁹ Cingankhale cosavuta kuluŵa kuyamikila Yehova pa zinthu zabwino zakuticitila. Kansi n’cinji cingatiyavye kuti tikokumbukila? Tingalembe m’ndandanda wa vinthu vatasenga kuti Yehova aticitile noona mwawayankhila mapemphelo ŵasu. Pavuli pake, tufunika kumuyamikila mofumila pansi pamtima. (Ŵelengani 1 Atesalonika 5:17, 18.) Tonse tusangalala ngako ngati ayakine atiyamikila pa zabwino zeteŵacitila. Naye Yehova osangalala  ngako ngati tumuyamikila pa zinthu zabwino zaakuticitila. (Akol. 3:15) Koma pali cifukwa ciyakine cofunika ngako camene cutipangisha kuyamikila Mulungu.

10. Molingana na 1 Petulo 2:21, ndaŵa yanji tili na cifukwa comvwika coyamikila Yehova cifukwa cotumizhya Mwana wake pacalo?

¹⁰ Ŵelengani 1 Petulo 2:21. Tufunika kuyamikila ngako Yehova cifukwa cotumizhya Mwana wake wokondeka kuti azetiphunzise. Tuphunzila zinyinji ngako zokhuza Yehova na mwatingamukondweleshele kufumila pa cisanzo cecitisiila Yesu peenze pacalo. Ngati tili na cikhulupililo mu nsembe ya dipo ya Yesu, tingankhale pa ushamwali wotang’a na Yehova.​—Aro. 5:1.

11. Ndaŵa yanji tufunika kupemphela m’zina ya Yesu?

¹¹ Tuyamikila ngako Yehova potipasa mwai wolaŵila naye kupitila muli Mwana wake wokondeka. Yesu ni njila yakuseŵenzesha Yehova poyankha mapemphelo ŵasu. Yehova omvwishila noyankha mapemphelo ŵasu ngati tupitila m’zina ya Yesu. Yesu efotokoza kuti: “Ciliconse camungasenge m’zina yangu, neo nicite kuti Atata alemekezeke kupitila mwa Mwana mwake.”​—Yoh. 14:13, 14.

12. Kansi tili na cifukwa ciyakine cotyani cotipangisha kuyamikila Yehova cifukwa ca Mwana wake?

¹² Cifukwa ca dipo ya Yesu, Yehova otikhululukila macimo ŵasu. Malemba ofotokoza kuti Yesu ni “mkulu wa ansembe ndipo [wankhala] kukwanja ya malendi ya mpando wacifumu wa Wolemekezeka kululu.” (Aheb. 8:1) Yesu “otiyavya pamozi na Ausuwake.” (1 Yoh. 2:1) Tuyamikila ngako Yehova cifukwa cotipasa Mkulu wa Ansembe wamene omvwisha zofooka zasu ndipo “ocondelela m’malo mwasu”! (Aro. 8:34; Aheb. 4:15) Olo kuti tiliye ungwilo, tukwanisha kulaŵila na Yehova m’pemphelo cifukwa ca dipo ya Yesu. Nise osangalala ngako kuziŵa kuti Yehova watipasa mphaso ya Mwana wake wokondeka monga nsembe ya dipo.

13. Usiku wakuti mailo akufwa, kansi Yesu eonesha tyani kuti enzodela nkhaŵa ophunzila ŵake?

¹³ Usiku wakuti mailo akufwa, Yesu etola nthawi itali kupemphelela ophunzila ŵake. Yove esenga Ausuwake kuti “aŵayanganile kuyopela muipa.” (Yoh. 17:15) Izi zuonesha kuti Yesu enzoŵakonda ngako ophunzila ŵake. Mosasamala kanthu kuti enzoyembekezela kukumana na mayeselo ovuta ngako, enzodela soti nkhaŵa ophunzila ŵake.

14. Kansi tingaoneshe tyani kuti tukonda akwasu na azilongosi?

¹⁴ Tingatolele cisanzo ca Yesu mwa kupewa kuganizila zofuna zasu zeka. M’malo mwake, tufunika kupemphelela akwasu na azilongosi. Ngati tucita izi, tuonesha kuti tumvwila lamulo yecipeleka Yesu yakuti tikokondana. (Yoh. 13:34) Mau a Mulungu Baibo olaŵila kuti “pemphelo ya munthu wolungama yukata nchito mwamphamvu.” Tetyo kupemphelela akwasu na azilongosi kungaŵayavye kuti ankhale otang’a.​—Yak. 5:16.

15. Ndaŵa yanji tufunika kupemphelela akwasu na azilongosi?

¹⁵ Tufunika kupemphelela akwasu na azilongosi cifukwa okumana na mavuto osiyanasiyana. Tingasenge Yehova kuti aŵayavye kupilila mavuto monga matenda, masoka acilengedwe, nkhondo, cinzunzo na mavuto ayakine. Tingapemphelele soti akwasu na azilongosi amene ozipeleka pa nchito yopeleka thandizo pakacitika masoka acilengedwe. Ngati muziŵako ayakine amene okumana na mavuto monga aŵa, mungacite bwino kuŵatomola m’mapemphelo ŵanu. Ngati tusenga Yehova kuti aŵayavye kupilila mavuto  yakukumana nayo, tuonesha kuti tili na cikondi cenecene.

16. Ndaŵa yanji tufunika kupemphelela akwasu amene otisogolela?

¹⁶ Akwasu amene osogolela mumpingo, oyamikila ngako ngati tuŵatomola m’mapemphelo ŵasu ndipo izi zuŵayavya ngako. Tupeza umboni wa mfundo iyi pa mau yecilaŵila mtumwi Paulo akuti: “Citani zamene izi kuti nikasegula pakamwa pangu kuti nilaŵile, nikokwanisha kulaŵila mwaufulu kuti nikwanishe kuziŵisha ayakine cisinsi copatulika ca uthenga uweme.” (Aef. 6:19) Masiku ŵano, tili na akwasu anyinji amene okata nchito mwakhama kuti akotisogolela. Tingaoneshe kuti tuŵakonda mwa kusenga Yehova kuti akodalisa kuyesayesa kwao.

17-18. Kansi ni pa vocitika votyani patingapasiwe mwai wopanamilako ayakine m’pemphelo, ndipo tufunika kukumbukila cinji?

¹⁷ Nthawi ziyakine tingapasiwe mwai wopeleka pemphelo mopanamilako ayakine. Mwacisanzo, kalongosi wamene osogoza phunzilo ya Baibo, angasenge kalongosi waali naye kuti apeleke pemphelo. Koma payakine kalongosi uyu omuziŵa lini bwino wophunzila Baibo. Tetyo angacite bwino kusenga kuti apeleke pemphelo yosilizhyila. Kucita izi, kungamuyavye kuziŵa zaangalaŵile m’pemphelo zokhuza wophunzila Baibo.

¹⁸ Mkwasu angasengewe kuti apeleke pemphelo pa msonkhano wokonzekela utumiki olo pa misonkhano ya mpingo. Ngati mwapasiwa mwai woteti, mufunika kukumbukila colinga ca msonkhano. Kuyangizhyila apo, mufunika lini kuona mwai wa pemphelo monga mpata wakuti mutwalilemo uphungu olo cilengezo. Pa misonkhano ya mpingo inyinji, maminesi 5 yeikiwa na colinga coimba nyimbo nopeleka pemphelo. Tetyo, mkwasu wamene wapasiwa mwai wopeleka pemphelo, ofunika lini kulaŵila mau anyinji makamaka ngati ni koyambilila kwa misonkhano.​—Mat. 6:7.

19. Kansi ni cinji cingatiyavye kukonzekela kuwela kwa siku ikulu ya ciweluzo ya Yehova

¹⁹ Cifukwa cakuti siku ikulu ya ciweluzo ya Yehova ili pafupi, tufunika kuona pemphelo  kunkhala cinthu cofunika ngako mu umoyo wasu. Mokatizhyana na mfundo iyi, Yesu elaŵila kuti: “Nkhalani menso ndipo mukopemphela nthawi zonse kuti mukwanishe kuutuka zinthu zamene zasala patontho kucitika.” (Luka 21:36) Tetyo ngati tupemphela nthawi zonse, cikhulupililo casu cutang’a ndipo tunkhala okonzeka kuwela kwa siku ya Mulungu.

20. Kansi mapemphelo ŵasu angankhale tyani monga ni zofukiza zonunkhila bwino?

²⁰ Kansi taphunzila cinji m’nkhani ino? Tuyamikila ngako mwai watili nao wa pemphelo. Zinthu zofunika ngako zatufunika kupemphelela ni zokhuza cifunilo ca Yehova. Tuyamikila soti Yesu na Ufumu wake ndipo tupemphelela soti Akhristu ayasu. Yehova ofuna kuti tikopemphelela zinthu zatufunikila pa umoyo na kuti atiyavye kutang’isha cikhulupililo casu. Ngati tuganizila mosamala pa zinthu zatulaŵila m’mapemphelo ŵasu, tuonesha kuti tuyamikila mwai wa pemphelo. Ndipo mau ŵasu ankhale monga zofukiza zonunkhila kwa Yehova “koma soti zomukondwelesha.”​—Miy. 15:8.