1. Σαρ πρέπει τι νιωθίνας σο μουκχέλα-αμέν ο Ιεχωβά τι προσευχίντιβας λέστε;

 ΟΝΤΟΥΒΑ σο λατσσαρντάς ο ουρανός ντα ι πφουβ ντινάς-αμέν εκ μπουτ σουκάρ προνόμιος​—μουκχέλα-αμέν τι προσευχίντιβας λέστε. Σκεφτίνεν: Μπορίνασα τι πουτράς αμαρό γκι κο Ιεχωβά κάνα μανγκάσα ντα καλέ τσσιμπάτε μανγκάσα, χωρίς τι κανονίνας-λες πο τζανγκλέ. Μπορίνασα τι προσευχίντιβας λέστε κατά κρεβάτι ι νοσοκομειόσκο ή κατά κελίς ι φυλακιάκο ντα ισινάμ σίγουροι ότι, αμαρό Ντατ σο μανγκέλα-αμέν, κα ασουνέλ-αμέν. Ανταβά προνόμιος τθερέλα αμένγκε μπαρί αξία.

2. Σαρ σικαντάς ο βασιλιάς Δαβίδ ότι τθερέλας λέσκε μπαρί αξία ο προνόμιος ι προσευχιάκο;

² Ι Δαβιδίσκε, τθερέλας μπαρί αξία ο προνόμιος ι προσευχιάκο. Γκιλιαντάς ι Ιεχωβάσκε: «Τι αβέλ μι προσευχή σαρ θυμίαμας σο κερντιλό ανγκλά-τούτε». (Ψαλμ. 141:1, 2) Κο μπρεσά κι Δαβιδίσκε, ο άγιος θυμίαμας σο πφαμπαρένας ι Ιεχωβάσκε ο ιερείς κερντιόλας μπουτ προσεκτικά. (Έξοδ. 30:​34, 35) Ο θυμίαμας σο βακερντάς ο Δαβίδ σικαβέλα ότι μανγκέλας τι σκεφτίνελ μπουτ λατσσές οντουλά σο κα βακερέλας πι Νταντέσκε, ι Ιεχωβάσκε. Ανταβά μανγκάσα αμέν-ντα σαρέ αμαρέ γκίσαρ. Μανγκάσα αμαρέ προσευχές τι κερέν ο γκι ι Ιεχωβάσκο.

3. Σαρ πρέπει τι αβάς κάνα προσευχίντιβασα κο Ιεχωβά, ντα σόσκε;

³ Κάνα προσευχίντιβασα κο Ιεχωβά, νανέ λατσσό τι αβάς σαρ τ’ αβέλ. Αλλά πρέπει τι σικαβάς μπαρό σεβασμός. Ανέν τουμαρέ γκοντιάτε ο εντυπωσιακές φαντασίες σο ντικχλέ ο Ησαΐας, ο Ιεζεκιήλ, ο Δανιήλ ντα ο Ιωάννης. Ανταλά φαντασίες ισί διαφορετικές η εκ κατά γιαβέρ, αλλά τθερένα εκ πράγμας σο ισί  ίδιος. Σαρέ σικαβένα ι Ιεχωβάς σαρ μπαρό Βασιλιάς. Ο Ησαΐας ντικχλάς ι Ιεχωβάς τι μπεσέλ εκχέ βουτσσέ θρονόστε. (Ησ. 6:​1-3) Ο Ιεζεκιήλ ντικχλάς ι Ιεχωβάς τι μπεσέλ πι αμαξάτε κο ουρανός, ντα ντονταλάι λέσταρ τι αβέλ κάτι σαρ ουράνιος τόξος σο λέλας-πες. (Ιεζ. 1:​26-28) Ο Δανιήλ ντικχλάς “ι Πουρανές ι Ντιβεσένγκο” ιριαντό παρνέ σεΐντζαρ, ντα γιακάσαρ τι νικιόλ λέσκε θρονόσταρ. (Δαν. 7:9, 10) Ντα ο Ιωάννης ντικχλάς ι Ιεχωβάς τι μπεσέλ εκχέ θρονόστε ντα ντονταλάι λέσταρ κάτι σαρ μπουτ σουκάρ σμαραγδοπράσινος ουράνιος τόξος. (Αποκ. 4:​2-4) Κάνα ανάσα αμαρέ γκοντιάτε ι μπουτ μπαρί δόξα ι Ιεχωβάσκι, ντάσα-αμέν γκοντί ο μπουτ μπαρό προνόμιος σο τθεράσα τι προσευχίντιβας λέστε ντα καζόμ σημαντικός ισί τι κεράς-λες ανταβά με σεβασμός. Αλλά σαρ πρέπει τι προσευχίντιβας;

4. Σο σικλιάσα κατά πρώτα λάφια σο βακερντάς ο Ιησούς κι προσευχή σο ισί κο εδάφια Ματθαίος 6:9, 10;

⁴ Διαβάνεν Ματθαίος 6:9, 10. Κι Επί του Όρους Ομιλία, ο Ιησούς σικλιαρντάς πι μαθητέν σαρ τι προσευχίντιβεν τροπόσαρ σο κερέλα ο γκι ι Ντεβλέσκο. Σοράν κατά λάφια «αντικάς πρέπει τι προσευχίντιβεν», ο Ιησούς βακερντάς πρώτα σημαντικά πράγματα σο τθερένα τι κερέν ι Ιεχωβάσκε σκοπόσαρ: τι αγιάντιβελ Λέσκο ναβ, τι αβέλ η Βασιλεία, σο κα καταστραφίνελ σαρέ ι Ντεβλέσκε ντουσμανίν, ντα τι αβέν ο σουκάρ πράγματα σο Βοβ τθερέλα πι γκοντιάτε ι πφουβιάκε ντα ι τζενένγκε. Κάνα βακεράσα ασακέ πράγματα αμαρέ προσευχιέντε, σικαβάσα ότι οντουβά σο μανγκέλα ο Ντεβέλ ισί σημαντικός αμένγκε.

5. Ισί λατσσό τι προσευχίντιβας πραγματένγκε σο τθερένα τι κερέν αμέντζαρ;

⁵ Ι λαφίντζαρ σο βακερντάς σοράν ο Ιησούς κι προσευχή, σικαντάς ότι ισί λατσσό τι προσευχίντιβας πραγματένγκε σο τθερένα τι κερέν αμέντζαρ. Μπορίνασα τι μανγκάς κατά Ιεχωβά τι ντελ-αμέν ο χαμπέ ι ντιβεσέσκο, τι συγχωρίνελ αμαρέ αμαρτίες, τι βοηθίνελ-αμέν μα τι περάς κο πειρασμός ντα τι ελευθερώνελ-αμέν κατά πφιρνό. (Ματθ. 6:​11-13) Κάνα μανγκάσα κατά Ιεχωβά ανταλά πράγματα, σικαβάσα καζόμ μπουτ χρειαζίντιβασα λέσκι βοήθεια ντα ότι μανγκάσα τι κεράς λέσκο γκι.

6. Αμαρέ προσευχιάτε, πρέπει τι βακεράς σάντε ο πράγματα κατά προσευχή σο σικλιαρντάς ο Ιησούς πι μαθητέν; Εξηγίνεν.

⁶ Κάνα ο Ιησούς σικλιαρντάς πι μαθητέν τι προσευχίντιβεν, να μπεκλεντίνελας λένταρ τι  βακερέν ντιπ οντουλά λάφια ντα οντουλέ σειράσαρ. Ισινέ φαρ σο ο Ιησούς προσευχισάλο γιαβερέ-ντα πραγματένγκε σο απασχολίνενας-λες. (Ματθ. 26:​39, 42· Ιωάν. 17:​1-26) Αντικάς αμέν-ντα, μπορίνασα τι προσευχίντιβας καλέ-ντα πραγματένγκε απασχολίνενα-αμέν. Κάνα τθεράσα τι λας εκ απόφαση, μπορίνασα τι μανγκάς κατά Ιεχωβά τι βοηθίνελ-αμέν τι αβάς γκοντιαβέρ ντα τι κερέλ-αμέν τι αγαβάς. (Ψαλμ. 119:​33, 34) Κάνα ισί τι κεράς εκ δύσκολος διορισμός, μπορίνασα τι προσευχίντιβας τι βοηθίνελ-αμέν τι αγαβάς σαρ τι κεράς-λες. (Παρ. 2:6) Ο νταντά ντα ο νταγιά μπορίνενα τι προσευχίντιβεν πουμαρέ τσσαβένγκε, ο τσσαβέ μπορίνενα τι προσευχίντιβεν πουμαρέ νταντέσκε ντα πουμαρέ νταγιάκε, ντα σαρέ αμέν μπορίνασα ντα πρέπει τι προσευχίντιβας ι τζενένγκε σο κεράσα-λεν μελέτη ντα οντουλένγκε σο βακεράσα λένγκε ο λατσσέ αμπέρια. Αλλά κάνα προσευχίντιβασα, νανέ λατσσό σάντε τι μανγκάς πράγματα κατά Ιεχωβά.

7. Σόσκε πρέπει τι δοξάνας ι Ιεχωβάς αμαρέ προσευχιέντε;

⁷ Πρέπει τι ντας-αμέν γκοντί τι δοξάνας ι Ιεχωβάς αμαρέ προσευχιέντε. Καέκ να αξίνελα-λες ανταβά πο μπουτ αμαρέ Ντεβλέσταρ. Βοβ ισί “λατσσό ντα έτοιμος τι συγχωρίνελ”. Επίσης, «τζιτζίνελα ντα πφαμπόλα ι γιαβερένγκε, να χολιάνελα εύκολα ντα ισί πφερντό αφοσιωμέ μανγκιπέ ντα μπέσα». (Ψαλμ. 86:5, 15) Σίγουρα, τθεράσα σημαντικούς λόγους τι δοξάνας ι Ιεχωβάς οντουλέσκε σο ισί ντα οντουλένγκε σο κερέλα.

8. Καλέ πραγματένγκε μπορίνασα τι βακεράς ευχαριστώ κο Ιεχωβά; (Ψαλμός 104:​12-15, 24)

⁸ Δοξάνασα ι Ιεχωβάς αμαρέ προσευχιέντε, αλλά μανγκάσα τι βακεράς λέσκε ευχαριστώ-ντα ι μπουτ σουκάρ πραγματένγκε σο ντέλα-αμέν. Για παράδειγμας, μπορίνασα τι βακεράς λέσκε ευχαριστώ ι μπουτ σουκάρ χρωματένγκε σο ντικχάσα κο λουλούδια, ι μπερεκέτι λατσσέ χαμπιματένγκε ντα αμαρέ αμαλένγκε σο μανγκένα-αμέν ντα ντένα-αμέν ζορ. Αμαρό λατσσό Ντατ ντέλα-αμέν σαρέ ανταλά ντα μπουτ γιαβερά για τι κερέλ-αμέν ευτυχισμέ. (Διαβάνεν Ψαλμός 104:​12-15, 24) Ατζέ πο σημαντικός ισί τι βακεράς ευχαριστώ κο Ιεχωβά ι μπουτ πνευματικέ χαμπέσκε σο ντέλα-αμέν ντα ι σουκάρ ντιβεσένγκε σο μπεκλεντίνασα τι τθεράς ανγκλ’ αμέντε.

9. Σο κα βοηθίνελ-αμέν μα τι μπιστράς τι βακεράς ευχαριστώ κο Ιεχωβά; (1 Θεσσαλονικείς 5:​17, 18)

 ⁹ Ισί μπουτ εύκολος τι μπιστράς-αμέν τι βακεράς ευχαριστώ κο Ιεχωβά σαρέ οντουλένγκε σο κερέλα αμένγκε. Σο κα βοηθίνελ-τουμέν μα τι μπιστρέν-τουμέν; Κα μπορίνενας τι γραφίνεν ο πράγματα σο μανγκλέν κατά Ιεχωβά ντα καέκ φαρ τι ντικχέν σαρ απαντιντάς τουμένγκε. Σοράν, κερέν προσευχή για τι βακερέν λέσκε ευχαριστώ σο βοηθιντάς-τουμέν. (Διαβάνεν 1 Θεσσαλονικείς 5:​17, 18) Σκεφτίνεν ακαβά: Κάνα ο γιαβερά βακερένα αμένγκε ευχαριστώ, χαιρίνασα μπουτ ντα νιωθίνασα ότι εκτιμίνενα-αμέν. Αντικάς αβέλα ο γκι ι Ιεχωβάσκο-ντα κάνα ντάσα-αμέν γκοντί τι βακεράς λέσκε ευχαριστώ σο απαντιντάς αμαρέ προσευχιέντε. (Κολ. 3:​15) Αλλά καβά γιαβέρ σημαντικός λόγος τθεράσα τι βακεράς ευχαριστώ αμαρέ Ντεβλέσκε;

10. Σόσκε τθεράσα σημαντικός λόγος τι βακεράς ευχαριστώ ι Ιεχωβάσκε σο μπουτσσαντάς ι Ιησούς κι πφουβ σαρ αγαβάσα κατά εδάφιος 1 Πέτρου 2:21;

¹⁰ Διαβάνεν 1 Πέτρου 2:​21. Πρέπει τι βακεράς ευχαριστώ κο Ιεχωβά σο μπουτσσαντάς πι αγαπημέ Τσσαβές τι σικλιαρέλ-αμέν. Κάνα διαβάνασα ι Ιησούσκε ζωγιάκε, σικλιάσα μπουτ πράγματα ι Ιεχωβάσκε ντα σαρ τι κεράς λέσκο γκι. Άμα σικαβάσα πίστη κι θυσία κι Χριστόσκι, μπορίνασα τι αβάς μπουτ λατσσέ αμαλά ι Ιεχωβά Ντεβλέσαρ ντα τι τθεράς ειρήνη λέσαρ.​—Ρωμ. 5:1.

11. Σόσκε προσευχίντιβασα κο ναβ κι Ιησούσκο;

¹¹ Βακεράσα ευχαριστώ κο Ιεχωβά σο μπορίνασα τι προσευχίντιβας λέστε αντράλ λέσκε Τσσαβέσταρ. Αντράλ κατά Ιησούς ντέλα-αμέν ο Ιεχωβά οντουβά σο μανγκλάμ λέσταρ. Ο Ιεχωβά ασουνέλα ο προσευχές σο βακέρντιβενα κο ναβ κι Ιησούσκο ντα απαντίνελα ανταλέντε. Ο Ιησούς βακερντάς: «Σο-ντα τι μανγκέν μι ναβέστε κα κεράβ-λες, για τι δοξάντιβελ ο Ντατ αντράλ κατά Τσσαβό».​—Ιωάν. 14:​13, 14.

12. Καβά ισί ατζέκ εκ λόγος για τι βακεράς ευχαριστώ κο Ιεχωβά λέσκε Τσσαβέσκε;

¹² Ο Ιεχωβά συγχωρίνελα αμαρέ αμαρτίες σόσκε ο Ιησούς ντινάς πι ζωή σαρ λύτρος. Η Γραφή βακερέλα ότι ο Ιησούς ισί αμαρό “αρχιερέας σο μπεσέλα δεξιά κατά θρόνος ι πο Μπαρέσκο κο ουρανός”. (Εβρ. 8:1) Ο Ιησούς ισί αμαρό «βοηθός σο ισί μαζί ι Νταντέσαρ». (1 Ιωάν. 2:1) Καζόμ μπαρί εκτίμηση τθεράσα ι Ιεχωβάσκε σο ντινάς-αμέν εκχέ Αρχιερεάς για τι αγαβέλ αμαρέ αδυναμίες ντα τι μολίνελ ι Ντεβλές μάξους αμένγκε! (Ρωμ. 8:​34· Εβρ. 4:​15) Αμέν ισινάμ ατελείς τζενέ, οτθάρ άμα να τθεράας ι θυσία ι Ιησούσκι, να κα ασουνέλας ο Ιεχωβά αμαρέ προσευχές. Σίγουρα, πακιάνα τουμέν-ντα ότι να ερεσένα ο λάφια για τι βακεράς καζόμ εκτιμίνασα ο πολύτιμος δώρος σο ντινάς-αμέν ο Ιεχωβά​—πι αγαπημέ Τσσαβές!

13. Ι ιράτ πριν τι μερέλ, σαρ σικαντάς ο Ιησούς ότι μανγκέλας πι μαθητέν;

¹³ Ι ιράτ πριν τι μερέλ, ο Ιησούς κερντάς προσευχή μπουτ σαάτι πι μαθητένγκε για τι μανγκέλ πι Νταντέσταρ “τι αρακχαβέλ-λεν κατά πφιρνό”. (Ιωάν. 17:​15) Ανταλέσαρ σο κερντάς, σικαντάς καζόμ μπουτ μανγκέλας-λεν. Παρόλο σο τζανέλας ότι ατζεχάνικ κα τσσίντελας μπουτ, τθερέλας πι γκοντί πι αποστολόντε.

14. Σαρ μπορίνασα τι σικαβάς ότι μανγκάσα αμαρέ πφραλέν ντα πφενίν;

¹⁴ Σαρ ο Ιησούς, να τθεράσα αμαρί γκοντί σάντε οντουλέντε σο χρειαζίντιβασα αμέν. Οκιά μπάνταρ, προσευχίντιβασα μπουτ φαρ αμαρέ πφραλένγκε ντα πφενίνγκε. Κάνα κεράσα-λες ανταβά, ντάσα καν κι εντολή κι Ιησούσκι τι μανγκάς ο εκ ι γιαβερές ντα σικαβάσα κο Ιεχωβά καζόμ μπουτ μανγκάσα ι πφραλέν. (Ιωάν. 13:​34) Ο σαάτι σο κεράσα προσευχή αμαρέ  πφραλένγκε ντα πφενίνγκε να τζάλα χαμέ. Ο Λάφι ι Ντεβλέσκο βακερέλα αμένγκε ότι «η προσευχή σο κερέλα εκ δίκαιος τζενό αντράλ πι γκίσταρ, τθερέλα μπουτ ζορ».​—Ιακ. 5:16.

15. Σόσκε ο πφραλά τθερένα ανάγκη αμαρέ προσευχές;

¹⁵ Ο πφραλά τθερένα ανάγκη αμαρέ προσευχές σόσκε τσσίντενα μπουτ. Μπορίνασα τι μανγκάς κατά Ιεχωβά τι βοηθίνελ-λεν τι νταϊντίνεν νασφαλίματα, φυσικές καταστροφές, τζένγκια, κόντρα κατά τζενέ ή γιαβερά δυσκολίες. Ντα μπορίνασα τι προσευχίντιβας αμαρέ πφραλένγκε ντα πφενίνγκε σο κερένα σο νακχέλα λένγκε βαστένταρ για τι βοηθίνεν οντουλέν σο τθερένα ανάγκη. Μπέκιμ τουμέν-ντα τζανένα τζενέν σο νακχένα ασακέ δυσκολίες. Κα μπορίνενας τι προσευχίντιβεν λένγκε οπράλ κο ναβ; Σικαβάσα μπαγιά μανγκιπέ ι πφραλένγκε κάνα μανγκάσα κατά Ιεχωβά τι βοηθίνελ-λεν τι νταϊντίνεν.

16. Σόσκε πρέπει τι προσευχίντιβας ι πφραλένγκε σο τθερένα ευθύνες αντρέ κι κχανγκιρί;

¹⁶ Ο πφραλά σο τθερένα ευθύνες αντρέ κι κχανγκιρί εκτιμίνενα μπουτ ι γιαβερένγκε προσευχές ντα ντικχένα λατσσιπέ λένταρ. Ανταβά αγαβέλας-λες ο απόστολος Παύλος-ντα, οτθάρ γραφιντάς: «Προσευχίντιβεν μάνγκε-ντα, για τι ντιντιόν-μαν ο λάφια κάνα πουτράβα μο μούι, ντα αντικάς τι κεράβ λάφι μπίνταρανες καζόμ μουτθαβάβα ο ιερός μυστικός ι λατσσέ αμπερίνγκο». (Εφεσ. 6:​19) Αντιβές-ντα, τθεράσα μπερεκέτι μπουτιαρνέ πφραλέν σο τθερένα ευθύνες αντρέ κι κχανγκιρί. Σικαβάσα λένγκε μανγκιπέ κάνα μανγκάσα κατά Ιεχωβά τι ευλογίνελ οντουλά σο κερένα.

17, 18. Κάνα μπέκιμ τι κεράς προσευχή ανγκλάλ γιαβερέντε, ντα σο πρέπει τι ντας-αμέν γκοντί;

¹⁷ Ισί φαρ σο κεράσα προσευχή ανγκλάλ γιαβερέντε. Για παράδειγμας, εκ πφεν σο κερέλα εκ μελέτη μπέκιμ τι μανγκέλ κατά πφεν σο ισί λάσαρ τι κερέλ προσευχή. Οντιά πφεν μπέκιμ μα τι τζανέλα λατσσές ι τζενιά σο κερέλα μελέτη, οτθάρ μπορεί τι μανγκέλ τι κερέλ προσευχή κο τέλος. Αντικάς, κα τζανέλ πο λατσσές σο τι βακερέλ κι προσευχή.

¹⁸ Εκ πφραλ μπέκιμ τι κερέλ προσευχή εκχέ συναθροισιάτε ι εργόσκε ή εκχέ γιαβερέ συναθροισιάτε. Ο πφραλά σο τθερένα ανταβά προνόμιος πρέπει τι ντεν-πες γκοντί σόσκε αβέλα-πες οντιά συνάθροιση. Η προσευχή δεν πρέπει τι αβέλ για τι ντιντιόλ συμβουλή κι κχανγκιρί  ή για τι βακέρντιβεν αμπέρια. Κο πο μπουτ συναθροίσεις, ο ύμνος ντα η προσευχή πρέπει τι ατσσικιαρέν παντς λεπτά, οτθάρ ο πφραλ δεν πρέπει τι κερέλ μπαρί προσευχή, ντα πο μπουτ κι αρχή κι συναθροισιάκι.​—Ματθ. 6:7.

19. Σο κα βοηθίνελ-αμέν τι αβάς έτοιμοι ι Ιεχωβάσκε ντιβεσέσκε;

¹⁹ Χρειαζίντιβελα τι κεράς ατζέ πο σημαντική η προσευχή αμαρέ ζωγιάτε καζόμ ερεσέλα ο ντιβές ι Ιεχωβάσκο. Ο Ιησούς βακερντάς οπράλ ανταλέστε: «Οτθάρ τι αβέν τζανγκαντέ, πάντα τι προσευχίντιβεν αντράλ τουμαρέ γκίσταρ για τι μπορίνεν τι σώντιβεν σαρέ οντουλένταρ σο πρέπει τι αβέν-πες». (Λουκ. 21:​36) Βα, άμα να τσσιναβάσα τι κεράς προσευχή, κα ατσσάς πνευματικά τζανγκαντέ ντα κα αβάς έτοιμοι ι Ντεβλέσκε ντιβεσέσκε.

20. Σαρ μπορίνενα αμαρέ προσευχές τι αβέν σαρ θυμίαμας σο κχάντελα μίσκι;

²⁰ Σο ντικχλάμ ανταλέ μαθημάστε; Τθερέλα αμένγκε μπουτ μπαρί αξία ο προνόμιος ι προσευχιάκο. Ο πο σημαντικά πράγματα σο πρέπει τι βακεράς αμαρέ προσευχιέντε τθερένα τι κερέν ι Ιεχωβάσκε σκοπόσαρ. Επίσης, βακεράσα ευχαριστώ κο Ντεβέλ λέσκε Τσσαβέσκε ντα λέσκε Βασιλειάκε, ντα προσευχίντιβασα ι πφραλένγκε. Ντα, σίγουρα, μπορίνασα τι προσευχίντιβας για τι τθεράς ο αναγκαία κάθε ντιβές ντα τι ατσσάς πασέ κο Ιεχωβά. Κάνα σκεφτίνασα λατσσές οντουλά σο βακεράσα αμαρέ προσευχιέντε, σικαβάσα ότι τθερέλα αμένγκε μπαρί αξία ανταβά μπουτ σουκάρ προνόμιος. Αμαρέ λάφια κα αβέν ι Ιεχωβάσκε σαρ θυμίαμας σο κχάντελα μίσκι ντα κα “κερέν λέσκο γκι”.​—Παρ. 15:8.