1. Sar trebulas te dichas o manglimos?

 FIESAVES anda amende si amen i bari pachiv te phenas manglimata amare Devlesche cai cărdea o cerii hai i phuv. Te gândisaras-ame: Daisaras te pâtras amaro ilo angla o Iehova oricana hai ande orisavi șib, bi te trebul te cheras amenghe iech programarea. Daisaras te mangas-ame cana sam nasfale ando spitalo sau cana sam ando phandaimos, pherde pachiamos că amaro Dad iubitorii așunel-ame. Cadea că, te avas zurales recunoscători anda cado șucar privilegio ca si amen, te mangas-ame le Iehovasche.

2. Sar sicadea o rege David că anda leste sas cuci o privilegio te manghel-pe?

² Anda o rege David, o privilegio te manghel-pe le Iehovasche sas zurales cuci. Vo phendea le Iehovasche: „Mânro manglimos te avel angla tute sar i tămâia mișto pregătime”. (Ps. 141:1, 2) Andel ghiesa le Davidosche, i tămâia sfânto, cai sas folosime andi închinarea uji catar le rașaia, trebulas te avel pregătime zurales atento. (Ex. 30:34, 35) Cana phendea anda o manglimos că si sar i tămâia, o David sicadea că camelas te gândil-pe atento de mai anglal so avelas te phenel pesche Dadesche cerisco ando manglimos. Cadea sar o David, vi amen camas ca amare manglimata te aven mișto pregătime caște aven cuci andel iacha le Iehovasche.

3. So atitudinea trebulas te avel-ame cana phenas manglimata le Iehovasche hai sostar?

³ Cana mangas-ame, trebul te avel amen iech atitudinea pherdi respecto hai te las sama te sicavas sea o timpo pachiv le Iehovasche. Te gândisaras-ame ca le bare viziuni cai dichle-le angla pende  o Isaia, o Ezechiel, o Daniel hai o Ioan. Chiar cana ande lende si sicade buchia diferime, si iech buchi cai apăril ande fiesavi viziunea hai sicavel le Iehovas sar iech baro Rege. O Isaia dichel le Iehovas sar beșelas pe iech baro hai ucio trono. (Is. 6:1-3) O Ezechiel dichel-les sar beșel pe lesco vurdon cerisco; peste sea pașa leste sas iech strălucirea sar codoia catar iech curcubeo. (Ezec. 1:26-28) O Daniel dichel „Codoles Phuro Ghiesendar” hureado ando hureaimos parno hai anda Lesco trono înclel iag. (Dan. 7:9, 10) O Ioan dichel le Iehovas sar beșel pe iech trono cai, peste sea pașa leste, si iech șucar curcubeo cai ameal sar o smaraldo. (Rev. 4:2-4) Cana gândisaras-ame ca i bari gloria le Iehovaschi, hachiaras că o manglimos si iech baro privilegio. Anda codoia, trebul te sicavas lesche iech bari pachiv. Tha so trebul te phenas ande amare manglimata?

4. So sichioas anda le dintune cuvintea cai phendea-le o Isus ando manglimos-modelo, cai arachas-les ando Matei 6:9, 10?

⁴ Citisar Matei 6:9, 10. Andi Predica pa o plain, o Isus sicadea pesche discipolen te manghen-pe ande iech modo cai si cuci andel iacha le Devlesche. Pala so phendea „tumen cadea te manghen tumen”, o Isus phendea mai anglal le buchia importanto anda save trebulas te mangas-ame, cai silen phanglimos directo le scopoia le Iehovasco. Vo manglea-pe ca o anav le Iehovasco te avel sfințome, te avel o Regato – cai va distrugila sea le dușmanen le Devlesche – hai anda le bare miștimata cai Vo va anela-le pe sea i phuv. Cana phenas vi amen ande amare manglimata cadal buchia, sicavas că i voința le Devleschi si importanto anda amende.

5. Si mișto te mangas-ame anda le buchia cai trebul amenghe?

⁵ Andi duito partea le manglimaschi, o Isus sicavel că si mișto te mangas-ame vi anda le buchia cai trebun amenghe. Cadea că, daisaras te mangas le Iehovas te del-ame haben ando fiesavo ghies, te iertil amare păcatea, te feril-ame caște na peras ando zumaimos hai te hastravel-ame le nasulestar. (Mat. 6:11-13) Cana phenas cadal manglimata le Iehovasche, sicavas că jianas că trebul amenghe lesco ajutorii hai că camas te avas cuci ande lesche iacha.

6. Trebulas te mangas-ame numai anda le buchia anda save phenel-pe ando manglimos-modelo? Explichin.

⁶ O Isus ci ajucărdea-pe ca lesche continuatori te phenen sa codol cuvintea anda o manglimos-modelo. Ande le manglimata cai cărdea-le  vi aver data, vo phendea vi aver buchia cai sas-le zurales importanto anda leste atunci. (Mat. 26:39, 42; Ioan 17:1-26) Sa cadea, vi amen daisaras te mangas-ame le Iehovasche anda orisavi buchi cai îngrijoril-ame. Cana trebul te alosaras so te cheras, daisaras te mangas-ame le Iehovas te del-ame goghiaverimos hai hachiarimos. (Ps. 119:33, 34) Cana si amenghe dini te cheras iech buchi phari, daisaras te mangas-ame anda perspicacitatea hai discernământo. (Prov. 2:6) Le dada daștin te manghen-pe anda penghe șiave, le șiave daștin te manghen-pe anda penghe dada hai savore daisaras hai trebul te mangas-ame anda codola savența studiisaras i Biblia hai anda codola savenghe phenas i vestea lași. Tha ande amare manglimata ci trebul numa te mangas le Iehovastar vareso.

7. Sostar trebulas te anas pachiv le Iehovasche hai te așaras-les cana mangas-ame?

⁷ Cana mangas-ame, ci trebulas te bâstras te anas pachiv le Iehovasche hai te așaras-les. Vo meritil cadaia mai but sar oricon. O Iehova silo ‘lașio hai gata te iertil’, „îndurătorii hai pherdo compasiunea”, „ci holiavel-pe sigo hai barvalo andi iubirea loialo hai ciacimos”. (Ps. 86:5, 15) Cadea că, si amen sea le motivea te așaras le Iehovas anda sar silo hai sea so cherel!

8. Anda so buchia daisaras te anas mulțumiri le Iehovasche cana mangas-ame? (Psalmo 104:12-15, 24)

⁸ Amen camas na numai te așaras le Iehovas, tha vi te mulțumisaras lesche anda le but șucar buchia cai del-le amenghe. Sar exemplo, daisaras te mulțumisaras lesche anda le but șucar lulughia, anda le but lașe habena hai anda amare lașe amala. Amaro Dad iubitorii del-ame cadal daruri hai but aver numai anda codoia că camel te cherel-ame fericime. (Citisar Psalmo 104:12-15, 24.) Hai vi mai importanto, mulțumisaras le Iehovasche anda o but haben spiritualo cai del-les amenghe caște încăras zuralo amaro pachiamos hai anda i șucar speranța cai si amen anda o viitorii.

9. So daisaras te cheras caște na bâstras te anas mulțumiri le Iehovasche? (1 Tesaloniceni 5:17, 18)

⁹ Daisaras te bâstras sigo te anas mulțumiri le Iehovasche anda sea so cherel anda amende. So daisaras te cheras ande cadai situația? Iech buchi si codoia te cheras amenghe iech lista le buchianța cai mangleam-le le Iehovastar hai te rodas te dichas sar vo dea amenghe răspunso lende. Pala codoia, te sicavas amari recunoștința  ando manglimos anda o ajutorii cai dea-les amenghe o Iehova. (Citisar 1 Tesaloniceni 5:17, 18.) Te gândisaras-ame: Sar simțosaras-ame cana aver sicaven penghi recunoștința caring amende? Si ciaces, sam zurales bucurime hai hachiaras că sam cuci anda lende. Sa cadea, o ilo le Iehovasco bariol bucuriatar cana amen ci bâstras te mulțumisaras lesche anda sar dea răspunso ca amare manglimata. (Col. 3:15) Tha mai si iech motivo importanto anda savo trebulas te anas mulțumiri le Devlesche.

10. Cadea sar phenel-pe ando 1 Petru 2:21, sostar daisaras te anas mulțumiri le Iehovasche anda o Isus?

¹⁰ Citisar 1 Petru 2:21. Daisaras te avas zurales recunoscători hai te mulțumisaras le Iehovasche vi anda codoia că bișaldea pi phuv pesche Șiaves iubime caște daisaras te sichioas lestar. Cana citisaras anda i viața le Isusoschi, sichioas but buchia anda o Iehova hai anda so daisaras te cheras caște avas cuci ande lesche iacha. Dacă sicavas pachiamos andi jertfa de răscumpărare le Cristososchi, daștil te avel amen iech amalimos chidino amare Devleia, Iehova, hai daisaras te avas andi pacea leia. (Rom. 5:1)

11. Sostar mangas-ame le Iehovasche ando anav le Isusosco?

¹¹ Anas mulțumiri le Iehovasche vi anda codoia că daisaras te mangas-ame lesche prin lesco Șiavo. Sea prin leste, o Iehova del-ame so mangas lestar. O Del așunel amare manglimata cărde ando anav le Isusosco hai del-ame răspunso lende. O Isus phendea: „Oriso va manghena ande mânro anav, va avela te cherav, anda codoia ca o Dad te avel glorifichime prin o Șiav”. (Ioan 14:13, 14)

12. Sostar mai daisaras te anas mulțumiri le Iehovasche anda lesco Șiav?

¹² O Iehova iertil amare păcatea prin i jertfa de răscumpărare le Isusoschi. Andi Biblia, anda o Isus phenel-pe că si Baro Rașai hai că beșel „ca i ciaci le tronoschi le Barimaschi, andel ceruri”. (Evr. 8:1) O Isus si ‘o ajutorii cai si amen co Dad’. (1 Ioan 2:1) Chichi de but bariol amaro ilo hai sam recunoscători le Iehovasche că dea-ame iech Baro Rașai pherdo empatia, cai hachiarel amare covlimata hai „del duma ande amaro miștimos”! (Rom. 8:34; Evr. 4:15) Anda codoia că sam imperfecți, dacă ci avileas i jertfa le Isusoschi, ci daisardeamas te pașioas le Iehovastar ando manglimos. Amen jianas mișto că niciechdata ci va daisaraia te sicavas recunoștința cu sea anda o cuci daro cai dea-les amenghe o Iehova: pesche Șiaves iubime!

13. Sar sicadea o Isus andi riat angla so te merel că iubilas but pesche discipolen?

¹³ Andi riat angla so te merel, o Isus manglea-pe but anda le discipoli hai manglea pesche Dades ‘te lel sama pe lende andai cauza le nasuleschi’. (Ioan 17:15) Cadaia sicadea chichi de but iubilas-le! Chiar cana jianglea că ande țâra timpo avelas te nachel prin iech pharo zumamimos, o Isus gândisardea-pe mai but ca o miștimos pesche apostolengo.

14. Sar daisaras te sicavas amari iubirea andal phrala hai pheia?

¹⁴ Cadea sar o Isus, amen ci gândisaras amen numai amende. Mai but, amen mangas-ame le Iehovasche ande fiesavo ghies anda amare phrala hai pheia. Cadea, cheras so phenel amenghe o Isus, te iubisaras-ame iech averes, hai sicavas le Iehovasche chichi de cuci si anda amende amare phrala. (Ioan 13:34) Ci camas te arăsas te pachias că hasaras amaro timpo cana mangas-ame anda amare phrala. Ande pesco Cuvânto, o Iehova phenel amenghe că „baro zuralimos si le manglimas cai cherel-les iech manuș orta”. (Iac. 5:16)

15. Sostar trebul te mangas-ame anda amare phrala?

¹⁵ Trebul te mangas-ame anda amare phrala anda codoia că nachen prin but zumaimata.  Daisaras te mangas le Iehovas te ajutil-le te așen zurale cana nachen prin nasfalimata, dezastrea naturalo, războaia, persecuții sau aver pharimata. Daisaras te cheras manglimata vi anda le phrala hai pheia cai cheren phares buchi andel operațiuni de ajutorare caște len sama pe codola cai sile andi nevoia. Prinjianes vi tu varecas cai nachel prin cadal zumaimata? Dacă da, daștis te phenes lesco anav ande chio manglimos? Cana mangas le Iehovas te ajutil cadale phralen te na mechen-pe hai te așen zurale, sicavas că iubisaras-le anda sea o ilo.

16. Sostar trebulas te mangas-ame anda le phrala cai silen responsabilități andi congregația?

¹⁶ Le phrala cai silen responsabilități andi congregația dichen cuci amare manglimata cai phenas-le ande lengo miștimos hai cadaia ajutil-le zurales but. Vi o apostolo Pavel jianglea că sas-les nevoia ca aver te cheren manglimata anda leste. O Pavel scriisardea: „Manghen tumen vi anda mande ca, atunci cana pâtrav mânro mui, te aven manghe dine lașe cuvintea caște daștiv te dav duma pherdo tromai hai te cherav prinjiando o secreto sfânto la vesteaco lași”. (Ef. 6:19) Vi aghies, si but phrala cai cheren phares buchi anda amende andi congregația. Amen sicavas amari iubirea anda lende cana mangas-ame le Iehovasche te del-le but miștimata anda i buchi cai cheren-la.

17, 18. Ande so situații daisaras te phenas manglimata ande averengo anav hai so trebul te încăras ande amari goghi?

¹⁷ Poiechdata, si amen i ocazia te cheras manglimata ande averengo anav. Sar exemplo, iech phei cai încărel iech studio biblico daștilas te manghel la pheia cai si ande iech than laia co studio te phenel iech manglimos. Cadai phei daștil-pe că ci prinjianel cadea de mișto la jiuvlia cai studiil, anda codoia daștilas te alosarel te phenel o manglimos catar o sfârșito le studiosco. Cadea, voi va jianela mai mișto so te phenel cana va manghela-pe anda i jiuvli cai studiil.

¹⁸ Iech phral daștilas te avel numime te phenel o manglimos ca iech întrunirea andai predicarea sau ca iech întrunirea la congregațiachi. Cana si lesche dino cado privilegio, si zurales importanto te încărel ande peschi goghi savo si o scopo la întrunireaco. Sa cadea, trebul te încărel conto că ando manglimos ci trebul te del sfaturi sau te cherel anunțuri. Butivar, ca le întruniri la congregațiache, anda i ghili hai o manglimos si dine  numai panji minutea. Anda codoia, o phral cai phenel o manglimos ci trebul te folosil „but cuvintea”, vi mai but dacă o manglimos si cărdo co începuto la întrunireaco. (Mat. 6:7)

19. So va ajutila-ame te avas pregătime anda o ghies le Iehovasco?

¹⁹ Dichas că o ghies le Iehovasco pașiol sea mai but hai, anda codoia, o manglimos trebul te avel vi mai importanto anda amende. Anda cadai buchi, o Isus phendea: „Cadea că, așen uștiade, cheren sea o timpo manglimata, caște daștin te hastran catar sea cadal buchia cai trebun te aven”. (Luca 21:36) Cana phenas manglimata le Iehovasche ande fiesavo ghies, cadaia va ajutila-ame te așias zurale ando pachiamos hai o ghies le Iehovasco ci va avela pe amende bi te ajucăras-ame.

20. Sar daștin te aven amare manglimata sar i tămâia cai chandel șucar?

²⁰ So dichleam ande cado articolo? Hachiardeam că o manglimos si iech baro privilegio. Dichleam că le mai importanto buchia anda save trebulas te mangas-ame si codola cai silen phanglimos directo le scopoia le Iehovasco. Sa cadea, si zurales importanto te sicavas amari recunoștința anda o Șiav le Devlesco hai anda o raimos lesche Regatosco. Daisaras te cheras manglimata anda amare phrala hai pheia hai vi anda le buchia cai trebun amenghe caște traisaras hai caște încăras zuralo amaro pachiamos. Cana gândisaras-ame atento so va avela te phenas le Iehovasche ando manglimos, sicavas că anda amende cado privilegio si zurales cuci. O Iehova va dichela cuci amare manglimata cana va avena sar i tămâia cai chandel șucar angla leste. (Prov. 15:8)