NKHANI YAKUSAMBIRA YA NAMBALA 31
Muwonengi Kuti Pempheru Ndakukhumbika Ukongwa
“Pempheru langu lije nge vakununkhira vo vaperekeka pa masu pinu.”—SALIMO 141:2.
SUMU 47 Mupempherengi Kwaku Yehova Zuŵa Lelosi
VO TISAMBIRENGI MU NKHANI IYI *
1. Kumbi titenere kuwuwona wuli mwaŵi wakupemphera kwaku Yehova?
YO Wakupanga kuchanya ndi charu chapasi, watipaska mphasu yakuzirwa ukongwa ya kupemphera kwaku iyu. Ŵanaŵaniyani fundu iyi: Tingamupunguliya Yehova vo ve mumtima mwidu nyengu yeyosi kweniso muchineneru chechosi, kwambula kumupempha dankha kuti tikambiskani nayu. Tingapemphera kwaku iyu atiko dimiti kuchipatala pamwenga te mujeri, tichiziŵa kuti Awusefwi achanju avwisiyengi. Titimuwonga ukongwa Yehova chifukwa chakutipaska mphasu yeniyi.
2. Kumbi Fumu Davidi yingulongo wuli kuti yawonanga kuti pempheru ndakukhumbika ukongwa pa umoyu waki?
2 Fumu Davidi yawonanga kuti pempheru ndakukhumbika ukongwa. Iyu yingumbiya Yehova kuti: “Pempheru langu lije nge vakununkhira vo vaperekeka pa masu pinu.” (Salimo 141:1, 2) Mu nyengu yaku Davidi, vakununkhira vakupaturika vo asembi avigwiriskiyanga ntchitu pakusopa kwauneneska, avinozganga mwakuphwere ukongwa. (Eki. 30:34, 35) Vo Davidi wangukamba kuti pempheru laki lakhumbikanga kuja nge vakununkhira, vilongo kuti wakhumbanga kuŵanaŵaniya mwakuphwere vo wakhumbanga kukambiya Awisi akuchanya. Venivi ndivu nasi tikhumbisiska kuchita. Tikhumba kuti mapempheru ngidu ngakondwesengi Yehova.
3. Kumbi titenere kupemphera wuli kwaku Yehova, nanga ntchifukwa wuli?
3 Asani tipemphera kwaku Yehova, tingachitanga vinthu mwadangu waka cha. Mumalu mwaki, timutumbikengi ukongwa. Aŵanaŵaniyani viwona vakuziziswa vo Yesaya, Ezekiyeli, Daniyeli ndi Yohane anguwona. Chinanga kuti viwona venivi vipambana, kweni viyanana pa chigaŵa chinyaki. Vosi vilongo kuti Yehova ndi Fumu ya unkhankhu. Yesaya ‘wanguwona Yehova waja pampandu waufumu wapachanya kweniso wakukwezeka.’ (Yesa. 6:1-3) Ezekiyeli wanguwona Yehova waja mugaleta laki ndipu posi po iyu wenga “paŵalanga ukongwa nge chiŵingavuwa.” (Ezeki. 1:26-28) Daniyeli wanguwona “Wamazuŵa Nganandi” wavwala vakuvwala vituŵa, ndipu ku mpandu Waki waufumu kwatuwanga milipu ya motu. (Dani. 7:9, 10) Ndipuso Yohane wanguwona Yehova waja pa mpandu waufumu wo unguzungulizika ndi chiŵingavuwa chakutowa chakuwoneka nge mwa wa emeradi. (Chivu. 4:2-4) Asani tiŵanaŵaniya unkhankhu ukulu ukongwa waku Yehova, titimuwonga ukongwa chifukwa cha kutizomereza kuti tipempherengi kwaku iyu. Kweni kumbi titenere kupemphere vinthu wuli?
“YIMWI MUPEMPHERENGI VIYO”
4. Kumbi tisambiranji pa mazu ngakwamba nga mupempheru lakuwoniyapu ngo nge pa Mateyu 6:9, 10?
4 Ŵerengani Mateyu 6:9, 10. Pa Upharazgi wa Paphiri, Yesu wangusambiza akusambira ŵaki mo angapemphere mu nthowa yo yikondwesa Chiuta. Wati wakamba kuti “yimwi mupempherengi viyo,” wangwamba kuzumbuwa vinthu vakukhumbika ukongwa vo vikoliyana ndi khumbu laku Yehova: kutoweseka kwa zina Laki; kuza kwa Ufumu, wo wazamunanga arwani wosi aku Chiuta; kweniso vinthu vamampha vo Iyu wazamuchitiya charu chapasi ndipuso ŵanthu kunthazi. Asani tizumbuwa vinthu venivi mu mapempheru ngidu, tilongo kuti khumbu laku Chiuta ndakukhumbika ukongwa kwaku isi.
5. Kumbi mbumampha kumupempha Yehova kuti watichitiyi vo tikhumba?
5 Wachikamba chigaŵa chinyaki cha pempheru, Yesu wangulongo kuti mbumampha kupemphere vinthu vo tikhumba kuti Chiuta watichitiyi. Tingamupempha Yehova kuti watipaski chakurya cha msanawale, watigowoke maubudi ngidu, wativikiliyi ku mayeseru kweniso kuti watitaski ku muheni yo. (Mate. 6:11-13) Asani tipempha Yehova vinthu venivi, tilongo kuti titimuthemba ndipuso kuti tikhumba kumukondwesa.
Kumbi mubali ndi muwolu waki angapempheriyanji? (Wonani ndimi 6) *
6. Kumbi mukhumbika waka kupemphere vinthu vo vazumbulika mupempheru lakuwoniyapu? Konkhoskani.
6 Yesu wakhumbanga cha kuti akusambira ŵaki akambengi ndendende mazu nga mu pempheru lakuwoniyapu. Mu mapempheru nganyaki ngo Yesu wangupereka, wanguzumbuwamu vinthu vakupambanapambana vo venga vakukhumbika ukongwa kwaku iyu pa nyengu yeniyo. (Mate. 26:39, 42; Yoha. 17:1-26) Mwakuyanana waka, nasi tingamukambiya Yehova mupempheru chechosi cho chititifipiska mtima. Asani tikhumba kusankha chinthu chinyaki, tingamupempha Yehova kuti watipaski zeru kweniso kuti watiwovyi kuvwisa vinthu. (Salimo 119:33, 34) Asani te pafupi kwamba uteŵeti unyaki wakusuzga, tingamupempha Yehova kuti watiwovyi kuziŵa mo tingawuchitiya. (Nthanthi 2:6) Apapi angapemphere ŵana ŵawu, ŵana angapemphere apapi ŵawu ndipuso tosi tingapemphere pamwenga titenere kupemphere wo tisambira nawu Bayibolu kweniso ŵanthu wo titiŵapharazgiya. Asani tipemphera, titenere kupempha vinthu pe cha.
Kumbi ndi vinthu nivi vo tingathamika kweniso kuwonga Yehova mu mapempheru ngidu? (Wonani ndimi 7-9) *
7. Ntchifukwa wuli titenere kuthamika Yehova mupempheru?
7 Titenere kukumbuka kuthamika Yehova mu mapempheru ngidu. Palivi yo ngwakwenere kuthamikika ukongwa kuphara Chiuta widu. Iyu ‘ngwamampha ndipuso ngwakunozgeka kugowoka.’ Kweniso iyu ‘ngwalisungu kweniso wawezi, wambula kukwiya liŵi, wakuzaza ndi chanju chambula kumala ndipuso ngwakugomezgeka.’ (Salimo 86:5, 15) Mphakuvwika kumuthamika Yehova chifukwa cha mo waliri kweniso vo wachita.
8. Kumbi ndi vinthu wuli vinyaki vo tingamuwonga Yehova ? (Salimo 104:12-15, 24)
8 Kusazgiyapu pa kumuthamika Yehova mu mapempheru ngidu, tikhumbika so kumuwonga chifukwa cha vinthu vamampha vo watitipaska. Mwakuyeruzgiyapu, tingamuwonga chifukwa cha mitundu yakutowa ukongwa ya maluŵa, vakurya vakunowa vakupambanapambana kweniso mabwezi ngamampha ngo tenangu. Awusefwi achanju atitipaska venivi ndipuso vinthu vinyaki vinandi kuti tikondwengi. (Ŵerengani Salimo 104:12-15, 24.) Ndipu chakuluska vosi, titimuwonga Yehova chifukwa watitipaska chakurya chauzimu chinandi kweniso chifukwa cha chilindizga chamampha ukongwa cho tenachu.
9. Kumbi ntchinthu wuli cho chingatiwovya kukumbuka kumuwonga Yehova? (1 Atesalonika 5:17, 18)
9 Chingaŵa chipusu kuluwa kumuwonga Yehova chifukwa cha vinthu vosi vo watitichitiya. Kumbi ntchinthu wuli cho chingakuwovyani kuti mukumbukengi? Mulembengi vinthu chayivu vo mwamupempha Yehova ndipu pavuli paki muwonengi mo wakumukiyani. Pavuli paki, mumuwongengi mupempheru chifukwa chakukuwovyani. (Ŵerengani 1 Atesalonika 5:17, 18.) Ŵanaŵaniyani fundu iyi: Tikondwa kweniso titijivwa kuti titanjika asani ŵanthu anyaki atiwonga. Mwakuyanana waka, asani tikumbuka kumuwonga Yehova chifukwa chakuti wamuka mapempheru ngidu, iyu wakondwa. (Ako. 3:15) Kweni kumbi ntchifukwa chinyaki nichi chakukhumbika cho tingamuwonge Chiuta widu?
MUWONGENGI YEHOVA CHIFUKWA CHA MWANA WAKI WAKWANJIWA
10. Mwakukoliyana ndi 1 Peturo 2:21, ntchifukwa wuli tikhumbika kumuwonga Yehova chifukwa cha kutumiza Yesu pacharu chapasi?
10 Ŵerengani 1 Peturo 2:21. Tikhumbika kumuwonga Yehova chifukwa cha kutumiza Mwana waki wakwanjiwa kuti wazitisambizi. Tisambira vinandi ukongwa vakukwaskana ndi Yehova kweniso mo tingamukondwese, asani tisambira umoyu waku Yesu. Asani te ndi chivwanu mu sembi yaku Khristu, tija pa ubwezi wakukho ndi Yehova Chiuta ndipuso tituŵa Nayu pa chimangu.—Aro. 5:1.
11. Ntchifukwa wuli tipemphera kuziya mu zina laku Yesu?
11 Titimuwonga Yehova chifukwa chakuti tingapemphera kwaku iyu kuziya mwa Mwana waki. Yehova wagwiriskiya ntchitu Yesu kuti watipaski vo tapempha. Yehova wavwisiya kweniso kumuka mapempheru ngo ngaperekeka kuziya mu zina laku Yesu. Yesu wangukamba kuti: “Chechosi cho mungapempha mu zina langu, ndazamuchita, kuti Ada akankhuskiki kuporote mu Mwana.”—Yoha. 14:13, 14.
12. Kumbi ntchifukwa chinyaki nichi cho tingamuwonge Yehova chifukwa cha Mwana waki?
12 Yehova watitigowoke maubudi ngidu chifukwa cha sembi yaku Yesu. Malemba ngatimukonkhoska Yesu nge “wasembi mura [yo waja] kujanja lamaryi la mpandu waufumu wa Wakutumbikika Ukongwa kuchanya.” (Ahe. 8:1) Yesu ‘ngwakovya widu mweniyo we kwa Ada.’ (1 Yoha. 2:1) Titimuwonga ukongwa Yehova pakutipaska Wasembi Mura yo watitivwiya lisungu pa vinthu vo tinangisa kweniso ndiyu “waŵeyere mumalu mwaku isi.” (Aro. 8:34; Ahe. 4:15) Te ambula kufikapu, mwaviyo, kwambula sembi yaku Yesu tatingi tipempherengi cha kwaku Yehova. Tikayika cha kuti namwi mungazomereza kuti tingamuwonga mwakukwana cha Yehova chifukwa cha mphasu yakuzirwa ukongwa yo wakutipaska, mphasu ya Mwana waki wakwanjiwa!
MUPEMPHERIYENGI ABALI NDI AZICHI ŴINU
13. Ndi usiku wakuti mawa laki wafwengi, kumbi Yesu wangulongo wuli kuti wayanjanga akusambira ŵaki?
13 Ndi usiku wakuti mawa laki wafwengi, Yesu wangupemphere akusambira ŵaki kwa nyengu yitali, kupempha Awisi kuti ‘aŵavikiliyi chifukwa cha muheni yo.’ (Yoha. 17:15) Venivi vingulongo kuti Yesu waŵayanjanga ukongwa akusambira ŵaki! Iyu wenga pafupi kukumana ndi masuzgu ngakulu; kweni wafipiyanga mtima akutumika ŵaki.
Kumbi tingapempheriyanji vakukwaskana ndi abali kweniso azichi ŵidu? (Wonani ndimi 14-16) *
14. Kumbi tingalongo wuli kuti titanja abali ndi azichi ŵidu?
14 Kuti tiyezgi Yesu, tiŵanaŵaniya vakukhumba vidu pe cha. Mumalu mwaki, nyengu zosi tipemphere abali ndi azichi ŵidu. Asani tichita viyo, ndikuti tivwiya dangu laku Yesu lakuti tiyanjanengi kweniso titimulongo Yehova kuti titiŵayanja ukongwa abali ndi azichi ŵidu. (Yoha. 13:34) Kupemphere abali ndi azichi ŵidu, nkhutaya waka nyengu cha. Mazu ngaku Chiuta ngatitikambiya kuti “pempheru lakuŵeyere la munthu murunji ligwira ntchitu mwanthazi ukongwa.”—Yako. 5:16.
15. Ntchifukwa wuli tikhumbika kupemphere Akhristu anyidu?
15 Tikhumbika kupemphere Akhristu anyidu chifukwa chakuti akumana ndi masuzgu nganandi. Tingapempha Yehova kuti waŵawovyi kukunthiyapu matenda, masoka nga chilengedu, nkhondu, kutombozgeka pamwenga masuzgu nganyaki. Tingapemphere so abali ndi azichi ŵidu wo atijipereka ukongwa kuti awovyi wo akumana ndi masoka. Mungaŵa kuti muziŵapu anyaki wo akumana ndi masuzgu nge ngenanga. Asani ndi viyo, mungachita umampha kuzumbuwa mazina ngawu mupempheru. Tilongo kuti titiŵayanja nadi abali ŵidu, asani tipempha Yehova kuti waŵawovyi kukunthiyapu.
16. Ntchifukwa wuli tikhumbika kupemphere wo atitilongozga?
16 Abali wo alongozga mumpingu awonga ukongwa asani titiŵazumbuwa mu mapempheru ngidu ndipuso ngatiŵawovya. Umu ndimu venge ndi wakutumika Paulo. Iyu wangulemba kuti: “Nani so mundipempheriyengi, kuti asani ndajula mulomu wangu ndipaskikengi mazu, ndi chilatu chakuti ndifiskengi kulongoro mwachiganga pakuvumbuwa chisisi chakupaturika cha uthenga wamampha.” (Aefe. 6:19) Mazuŵa nganu napu, te ndi abali anandi wo atitilongozga, wo agwira ntchitu mwaphamphu. Tilongo kuti titiŵayanja asani tipempha Yehova kuti watumbiki ntchitu yawu.
ASANI MWAPEMPHEKA KUTI MUPEREKI PEMPHERU
17-18. Kumbi mphanyengu niyi po tingapempheka kuti tipereki pempheru, nanga tikhumbika kukumbukanji?
17 Nyengu zinyaki, tipempheka kuti tipereki pempheru. Mwakuyeruzgiyapu, mzichi yo wachitiska sambiru la Bayibolu, wangapempha mzichi yo wayenda nayu kuti wapereki pempheru. Mzichi yo waza nayu ku sambiru, wangaŵa kuti watimuziŵa umampha cha munthu yo wasambira Bayibolu, mwaviyo, wangayanja kupereka pempheru lakumaliya. Venivi vingamuwovya kuti waziŵi vo wangapemphere munthu yo wasambira Bayibolu.
18 Mubali wangapempheka kuti wapereki pempheru pa unganu wakunozgeke uteŵeti pamwenga pa unganu wa mpingu. Abali wo apaskika mwaŵi wenuwu akhumbika kukumbuka chilatu cha unganu. Yiwu akhumbika cha kupereka ulongozgi mupempheru, kusambiza pamwenga kupereka vipharazgu. Pa maunganu nganandi nga mpingu, maminiti 5 ngatuŵa nga sumu kweniso pempheru. Mwaviyo, mubali yo wapemphera wakhumbika cha kukamba “mazu . . . nganandi,” ukongwa asani ndi pempheru lakwamba.—Mate. 6:7.
MUWONENGI KUTI PEMPHERU NDAKUKHUMBIKA UKONGWA PA UMOYU WINU
19. Kumbi ntchinthu wuli cho chingatiwovya kuti tinozgeke zuŵa la cheruzgu laku Yehova?
19 Titenere kuwona kuti pempheru ndakukhumbika ukongwa pa umoyu widu, chifukwa zuŵa la cheruzgu laku Yehova le pafupi ukongwa. Pa nkhani yeniyi, Yesu wanguti: “Mwaviyo, jani masu ndipu nyengu zosi mupempherengi mwakuŵeyere kuti muzifiski kuthaŵa vinthu vosi vo vitenere kuchitika.” (Luka 21:36) Mwaviyo, kupemphera nyengu zosi kungatiwovya kuti tije masu mwauzimu ndi chilatu chakuti zuŵa laku Chiuta lizileki kutibuchizga.
20. Kumbi mapempheru ngidu ngangaja wuli nge kafungu kamampha ka vakununkhira?
20 Kumbi tasambiranji? Tiwona kuti pempheru ndakukhumbika ukongwa pa umoyu widu. Vinthu vakukhumbika ukongwa vo titenere kupemphere vakukwaskana ndi khumbu laku Yehova. Titimuwonga so Chiuta chifukwa cha Mwana waki ndipuso Ufumu waki kweniso tipemphere abali ndi azichi ŵidu. Tingapemphere so vinthu vakuliŵavu ndipuso vauzimu vo tikhumbika. Asani tiŵanaŵaniya mwakuphwere vo tikamba mu mapempheru ngidu, tilongo kuti tiwonga mphasu yakuzirwa yeniyi. Mazu ngidu ngajengi nge kafungu kamampha ka vakununkhira kwaku Yehova, ‘kakumukondwesa.’—Nthanthi 15:8.
SUMU 45 Vo Ndilunguruka Mumtima Wangu
^ Tiwonga ukongwa kuti Yehova watizomereza kuti tipempherengi kwaku iyu. Tikhumba kuti mapempheru ngidu ngajengi nge kafungu kamampha ka vakununkhira, ngo ngangamukondwesa. Mu nkhani iyi, tikambiskanengi vo tingazumbuwa mupempheru. Tikambiskanengi so fundu zinyaki zo tikhumbika kukumbuka asani tapempheka kuti tipempheri.
^ VITHUZI: Mubali limoza ndi muwolu waki apemphere mwana wawu yo we kusukulu kuti wavikiliriki, awisi a munthurumi wo atama kweniso yo wasambira Bayibolu kuti waluti panthazi.
^ VITHUZI: Mubali wachinyamata wawonga Yehova chifukwa cha sembi yaku Yesu, charu chidu chakutowa kweniso chakurya chamampha.
^ VITHUZI: Mzichi wapemphera kuti Yehova watumbiki Wupu Wakulongozga ndi mzimu waki ndipuso kuti wawovyi wo asuzgika chifukwa cha masoka nga chilengedu kweniso kutombozgeka.
