1. Cossa che ghemo de pensar sora la orassion?

 LA ORASSION la ze un grando presente che el Creador del cielo e dela Tera el ne ga dato. L’è un bel presente parché podemo parlar a Geovà quel che pensemo e sentimo, in qualche léngua e in qualche ora. Noantri podemo esser sicuri che Geovà el ndarà scoltarne anca se semo nel leto de un ospedal o in preson. Sicuro che ghe demo tanto valor a questo presente.

2. Come che Davi el ga mostra che el ghe piasea tanto de pregar a Geovà?

² El Rè Davi el ghe piasea tanto de pregar a Geovà. Lu el ga cantà che el volea che le so ‘orassion le fusse come un insenso parecià a Geovà’. (Sal. 141:1, 2) Nei giorni de Davi, i sasserdoti i pareciea tanto ben el insenso sacro che l’era doperà nel témpio. (Éso. 30:34, 35) Par via de questo, Davi el ga capio che el gavaria de scòlier ben quel che el ndaria parlar a Geovà nele so orassion. E anca noantri volemo far orassion che assa Geovà contento.

3. Cossa che ghemo de mostrar a Geovà quando preghemo a lu, e parché?

³ Quando preghemo a Geovà, ghemo de mostrarghe rispeto. Isaia, Ezechiel, Daniel e Gioani i ga bio vision de maraveiarse de Geovà. Isaia el ga visto Geovà sentà do nel so trono nte un posto tanto alto. (Isa. 6:1-3) Ezechiel el ga visto  Geovà nel so caro, e intorno del caro ghen’era una luce che la era come un arcobaleno. (Eze. 1:26-28) Daniel el ga visto “el Antigo de Giorni” che el doperea robe bianche e vegnea fora fiame de fogo del so trono. (Dan. 7:9, 10) E Gioani el ga visto Geovà sentà do nte un trono, e intorno del trono ghen’era un arcobaleno che l’era come una smeralda. (Apo. 4:2-4) Tute queste vision ne giuta a ricordar che Geovà el ga tanto poder e glòria. Alora, ghe demo tanto valor a le orassion a Geovà e volemo farlo con tanto rispeto. Ma cossa che podemo parlar a Geovà?

4. De acordo con Mateo 6:9, 10, cossa che imparemo dele prime parole dela orassion che Gesù el ga insegnà?

⁴ Ledi Mateo 6:9, 10. * Nel discurso che Gesù el ga fato nel monte, lu el ga insegnà ai so dissìpoli a pregar de una maniera che ghe piase a Geovà. Gesù el ga parlà prima de quel che l’è pi importante. Lu el ga domandà che el nome de Dio el fusse santificà, che vegnesse el Regno (che el ndarà finir fora con tuti i nemighi de Dio), e che el realisesse quel che el ga prometesto par la Tera e par le persone. Alora, quando parlemo sora queste robe nele nostre orassion, mostremo che quel che Dio el vol l’è tanto importante anca par noantri.

5. Sarà che podemo parlar a Geovà sora robe dela nostra vita o quel che ne ocore?

⁵ Gesù el ne ga anca insegnà che podemo parlarghe a Geovà sora le robe dela nostra vita e quel che ne ocore. Par esémpio, el magnar de cada giorno, el perdon dei nostri pecati, el aiuto par no far quel che l’è sbalià e la protession contra el Diaol. (Mat. 6:11-13) Quando preghemo a Geovà sora queste robe, mostremo che ghemo bisogno del so aiuto e che volemo far el meio par contentarlo.

6. Quando preghemo a Geovà, sarà che ghemo de parlar sol quel che ghen’è nela orassion del pare nostro? Spiega.

⁶ Ma Gesù no’l volea che i so dissìpoli i preghesse a Dio e i doperesse le medèsime parole una volta drio man. Par esémpio, in nantra orassion che Gesù el ga fato, el ga domandà a Geovà quel che el gavea pròpio de bisogno in quela ora. Alora, podemo domandar a  Geovà robe che le ze importante par noantri. (Mat. 26:39, 42; Gioani 17:1-26) Par esémpio, quando ghemo de far una scòlia importante nela nostra vita, podemo domandar sabedoria a Geovà. (Sal. 119:33, 34) Quando ghemo de cambiar el laoro che femo par Geovà, podemo domandar che el ne dae la abilità par farlo ben. (Pro. 2:6) I genitori i pol domandar che Geovà el giute i so fioi e i fioi i pol domandar che el giute i so genitori. E tuti noantri podemo domandar che Geovà el giute i nostri studianti dela Bìblia e quei che parlemo nela predicassion. Ma l’è importante ricordarse che no ghemo de seitar sol a domandarghe robe a Geovà.

7. Parché che ghemo de lodar a Geovà nele nostre orassion?

⁷ Ghemo anca de lodar a Geovà nele nostre orassion. E lu lo mèrita de pi che qualche altra persona. Geovà l’è bon e el vol pròpio perdonarne. Lu el ga anca misericòrdia, compassion, passiensa, amor leal e lu l’è fedele. (Sal. 86:5, 15) Alora, volemo lodarlo parché el ga tante bele qualità e el fà tante robe bone par noantri.

8. Che robe podemo ringrassiar a Geovà quando preghemo? (Salmo 104:12-15, 24)

⁸ Quando preghemo a Geovà, volemo anca ringrassiarlo par tute le bele robe che el ne dà. Par esémpio, podemo anca ringrassiarlo par i bei colori che ghen’è nei fiori, par tute le robe che lu el ga fato par noantri magnar e par i boni amighi che ghemo. Volemo anca ringrassiarlo par tute le robe che el ne dà par far pi forte la nostra fede e par la bela speransa che ghemo par el futuro. Geovà el vol che semo felici, par quela el ne dà queste e tante altre robe. — Ledi Salmo 104:12-15, * 24. *

9. Cossa che pol giutarne a nò desmentegarse de ringrassiar a Geovà? (1 Tessalonissensi 5:17, 18)

⁹ Pol esser che noantri se desmenteghemo de ringrassiar a Geovà par tute le robe bone  che el fà par noantri. Alora, cossa che pol giutarne a nò desmentegarse de ringrassiarlo? Podemo scriver le robe che ghemo domandà a lu e dele volte vardar quel che gaveino scrito par capir come che Geovà el ne ga rispondesto. Cossita podemo ringrassiar a Geovà par el aiuto che el ne ga dato. (Ledi 1 Tessalonissensi 5:17, 18. *) Sicuro che restemo pròpio contenti quando una persona la ne ringràssia par qualcossa che ghemo fato. Anca Geovà el restarà tanto contento se noantri ghe ringrassiemo. (Col. 3:15) Vedemo che nantra roba podemo ringrassiar a Geovà.

10. De acordo con 1 Piero 2:21, parché che volemo ringrassiar a Geovà de mandar el so Fiol ala Tera?

¹⁰ Ledi 1 Piero 2:21. * Volemo anca ringrassiar a Geovà parché el ga mandà el so Fiol par insegnarne tante robe. Quando studiemo sora la vita de Gesù, podemo cognosser de pi a Geovà e a saver quel che ghemo de far par contentarlo. Se ghemo fede nel sacrifìssio de Gesù, podemo esser amighi de Geovà e esser in pace con lu. — Rom. 5:1.

11. Parché che preghemo a Geovà par meso de Gesù?

¹¹ Par meso de Gesù, podemo parlar con Geovà. Noantri ringrassiemo tanto a Geovà parché podemo farlo. Geovà sol ndarà scoltar e risponder ale nostre orassion quando le femo par meso de Gesù. Gesù el ga dito: “Tuto quel che domandé nel me nome, mi lo farò, par glorificar el Pare par meso del Fiol.” — Gioani 14:13, 14.

12. Parché che ghemo de ringrassiar a Geovà de dar el so Fiol come sacrifìssio par noantri?

¹² Geovà el perdona i nostri pecati parché Gesù el ga dato la so vita come sacrifìssio par noantri. La Bìblia la dise che Gesù l’è el nostro ‘somo sasserdote, sentà do ala drita del trono del Sovrano dei cieli’. (Ebr. 8:1) E Gesù Cristo “l’è insieme al Pare” par giutarne. (1 Gio. 2:1) Par quela restemo tanto contenti che Geovà el ne ga dato un Somo Sasserdote che el vol giutarne e che el capisse che no semo mia perfeti! (Rom. 8:34; Ebr. 4:15) Come no semo perfeti, no podarìssino pregar a Dio se Gesù Cristo no’l gavesse dato la so vita par noantri. Sicuro che el sacrifìssio de Gesù l’è un presente tanto importante par noantri e che mai saremo boni de ringrassiar a Geovà come el mèrita!

13. Come che Gesù el ga mostrà che el amea i so dissìpoli nela note vanti de morir?

¹³ Nela note vanti de morir, Gesù el ga pregà par tanto tempo par domandar che Geovà el tendesse dei so dissìpoli ‘par causa del Diaol’. (Gioani 17:15) Quando el ga fato questa orassion, el savea che poco tempo dopo el ndaria sofrir tanto. Anca cossita, el ga mostrà che el se preocupea tanto coi so apòstoli e che li amea tanto.

14. Come che mostremo che amemo i nostri fradei?

¹⁴ Noantri femo come Gesù quando domandemo a Geovà no sol quel che ghemo de bisogno, ma quel che i nostri fradei e sorele i ga de bisogno. Quando seitemo a far cossita, semo drio obedir al comandamento che Gesù el ga dato de amar un al altro e mostremo a Geovà che amemo i nostri fradei. (Gioani 13:34) Sicuro che le nostre orassion le ndarà giutar tanto i nostri fradei e le sorele parché  la Bìblia la dise che la orassion del giusto la ga tanto poder. — Tiago 5:16.

15. Parché che ghemo de domandar che Geovà el giute i nostri fradei?

¹⁵ I nostri fradei i infronta tante dificoltà. Par quela, lori i ga de bisogno che domandemo a Geovà che li giute. Par esémpio, podemo domandar che Geovà li giute a infrontar le desgràssie dela naturesa, guere, nemighi che ghe vien contra e tante altre dificoltà. Podemo anca domandar che Geovà el dae la so benedission ai fradei che i se sforsa par giutar quei che i ga de bisogno. Te cognossi qualchedun che l’è drio infrontar una dificoltà? Alora te pol parlar el so nome nele to orassion. Quando domandemo a Geovà che el giute i nostri fradei, mostremo che li amemo.

16. Parché che ghemo de domandar che Geovà el giute i fradei che i tende dele congregassion?

¹⁶ Ghemo anca de parlar dei ansiani e dei servi ministeriai nele nostre orassion. Parché? Parché lori i resta tanto contenti e parché le nostre orassion li giuta tanto. El apòstolo Paolo el ga domandà ai fradei che i fesse questo par lu. Lu el ga dito: ‘Preghé par mi e domandè che mi sìpia bon de parlar quel che ghe vol. Cossita sarò bon de parlar con coraio sora le bone notìssie.’ (Efe. 6:19) Ancoi, ghen’è fradei che i laora tanto par tender dele congregassion. Alora, quando preghemo par questi fradei, mostremo che li amemo.

17-18. Quando che fursi ghemo de far una orassion, e cossa che ghemo de ricordarse?

¹⁷ Dele volte, noantri femo orassion che altre persone le ndarà scoltar. Par esémpio, una sorela che la ndarà far un stùdio dela Bìblia la pol domandar che la sorela che la ze insieme la fae una orassion. Fursi questa sorela la ghe piaseria far la orassion nel fin del stùdio. Cossita la ndarà cognosser meio la studiante e la saverà cossa dir.

¹⁸ Pol esser che un fradel el gàpia de pregar nte una riunion o vanti de ndar ala predicassion. Una roba che pol giutar questo fradel a saver cossa parlar l’è ricordarse parché che lori i ze riunidi. In queste orassion, lu no’l ga de dar consili o anunsi ai fradei. Nele nostre riunion, l’è doperà sinque minuti par el càntico  e orassion. Par quela, el fradel che el ndarà far la orassion no’l ga de parlar tanto, manco ancora se la ze la orassion del scomìnsio. — Mat. 6:7.

19. Cossa che ndarà giutarne a pareciarse par el fin?

¹⁹ Noantri savemo che el fin l’è drio rivar. Alora, tuti noantri ghemo de pregar cada volta de pi. Gesù el ga dito: ‘Alora, sté atenti e fé sùpliche tuto el tempo. Cossita, podé scampar de tute queste robe che le ga de suceder.’ (Luc. 21:36) Se seitemo a pregar, la nostra fede la sarà cada volta pi forte e saremo pareciadi par el fin.

20. Come che le nostre orassion le pol piaserghe a Geovà?

²⁰ In questo stùdio, ghemo visto che la orassion la ze un bel presente che Geovà el ne ga dato. Ghemo anca visto che quel che Geovà el vol ga de esser la roba pi importante nele nostre orassion. Ghemo imparà che l’è tanto importante ringrassiar a Geovà de mandar el so Fiol qua ala Tera e de farlo el nostro Rè. Ghemo anca de pregar par i nostri fradei e sorele e podemo anca parlar a Geovà sora quel che ghemo bisogno par viver e par gaver una forte fede. Sicuro che la orassion la ze un presente tanto importante, e par quela, volemo pensar ben in quel che ndaremo parlar a Geovà. Cossita, le nostre parole le sarà come un insenso profumà, che ghe piase a Geovà. — Pro. 15:8.