1. Nooneleke okhala eheeni nivekelo?

 MPATTUXA a erimu ni elapo ya vathi oonivaha etthu yootepa otthuneya—omwattamela owo moorwela munivekeloni. Hiyo pooti omwaattamela Yehova etempu eri yootheene, ni nuulumo nri nootheene nihitthuneyaka ovaha ewoora weera nuulumeno. Nroromeleke weera Tiithi ahu a wiirimu onooniwiriyana. Nihipwatthaka waari weera nri hospitali naari okadeya. Hiyo ninneera asantte mwaha wa Yehova onivaha eparakha ela.

2. Davidi ooniheenre hayi weera annahela mwiitti eparakha aaraaweno yoopaka nivekelo?

² Mwene Davidi annahela mwiitti eparakha aaraaweno yoovekela. Owo aamwiipela ntxipo Yehova: “Nivekelo naka niwele oholo wanyu ntoko erupani.” (Nsal. 141:1, 2) Mahuku a Davidi, erupani yootteela yaavareliwa muteko emaara yookokhorela ni anamakeya, yannarehereriwa moohikuxera matheela. (Ott. 30:34, 35) Moota erupani yaarehereriwaaya woohikuxera matheela yaamupuxera Davidi weera wannatthuneya othanla nnene masu eeraawe uulumeke anvekelaka Yehova, hiyo-tho nintthuneya weera nimutakiheke Davidi. Nintthuna weera mavekelo ahu emusiveleke Yehova.

3. Nintthuneya okhalano mukhalelo heeni vaavo nimmwaattamelaahu Yehova moorwela munivekeloni?

³ Naapakaka nivekelo wa Yehova nintthuneya okhala anttittimiho. Nkuupuwelani soolohera sootikiniha onnaawe Yesaya, Ezekiyeli, Daniyeli ni Yohani. Soolohera iya saari soovirikana mene saakhalano etthu saalikanaaya. Soolohera sootheene iya sannamoonihera Yehova okhala mwene Mutokweene. Yesaya aawona “Apwiy’awe [Yehova] ekilanthene vehitxeni yorakama ni  yowunuwa.” (Yes. 6:1-3) Ezekiyeli amoona Yehova akilanthene vakaroni vawe wiirimu . . . ni arukureriwene ni ekamama yotutha elikanaka ni ekhwi [munra] mmahutteni nihiku na epula. (Ez. 1:26-28) Daniyeli aamona ole a ‘mahiku evinre’ awanrene ikuwo soottela ekhumaka malumi a mooro vahitxeni vawe. (Dan. 7:9, 10) Yohani aamona Yehova akilantheene vahitxeni ni ekhwi [munra] yaarukurera ehitxe ni ekhove awe yaphwanaphwana ni nluku na Esmeralda. (Apok. 4:2-4) Soolohera iya sinnanuupuxera weera Yehova toowera ni toovuwa, ti vawonto nintthuneyaahu ohela mwiitti eparakha nraahuno yoopaka nivekelo nave ninnatthuneya opaka nivekelo ninttittimiho. Itthu heeni nintthuneyaahu weera nivekeleke?

4. Masu oopatxera eri va Matheyo 6:9, 10 ennixuttiha eheeni?

⁴ Mmusome Matheyo 6:9, 10. Mwaha Yesu aapankaawe vamwako, ahaaxuttiha attharelaawe ovekela mwa ephiro emmusivela Muluku. Yesu aapatxenre ohima itthu siri sootthuneya, owo aahuluma woohima sa ‘otteelihiwa wa nsina na Yehova, orwa wa Omwene wa Muluku’ yoowo onrowa waanyaanya amwiittani ootheene a Muluku ni mareeliho Yehova onuupuwelaawe waavaha atthu. Naahelaka mpuwa itthu iya emaara hiyo ninvekelaahu, ninnonihera weera yootthuna ya Muluku teri yootthuneya wa hiyo.

5. Neereke ti vootthuneya ovekela sootthuna sahu?

⁵ Avirelelihaka nivekelo na va Matheyo, Yesu aahoonihera weera ti wootthuneya ovekela sootthuna sahu. Hiyo pooti onvekela Yehova weera anivahe yootxa ya nihiku ti nihiku, anlevelele soottheka sahu, ni weera anivuluxe mwa sootakhala. (Math. 6:11-13) Vaavo nimpakaahu nivekelo nnahelamo itthu iya, ninnonihera weera ninnamuroromela Yehova ni-tho weera ninnapaka itthu sootheene ninweeraahu weera nimuhakalalihe.

6. Neereke naapakaka nivekelo nintthuneya weera nivekeleke moota Yesu axuttihawe paahi? Muthalihe.

⁶ Mene Yesu khaatthuna weera atthareli awe etthikeleke masu mamoharu a va Matheyo. Mavekelo makina Yesu aapankaawe aahuluma nyaha ikina soovirikana seiyo saari sootthuneya ehuhu ene yeele. (Math. 26:39,  42; Yoh. 17:1-26) Vamoha-moharu, hiyo tho pooti ovekela etthu eri yootheene yootthuneya wa hiyo. Mwa ntakihero, hiyo naatthunaka opaka yoothanla pooti onvekela Yehova weera anivahe miruku. (Nsal. 119:33, 34) Vaavo nnakhelaahu miritti minyowani hiyo pooti onvekela Yehova weera anivahe osuwela woovara nnene muteko owo. (Mir. 2:6) Asipaapa pooti waavekelela anamwene aya ni anamwane pooti waavekelela asipapaya ni ootheene hiyo ninnatthuneya weera naavekeleleke anamasoma ahu a Biblya ni atthu ootheene nnaphwanyaahu mmutekoni moolaleera. Nto, mavekelo ahu ehikhaleke oovekelaru etthu wa Yehova!

7. Mwaha wa heeni nintthuneyaahu onvuwiha Yehova emaara nimpakaahu nivekelo nahu?

⁷ Nave ti wootthuneya onvuwiha Yehova emaara nimpakaahu nivekelo. Khaavo ophwanenle ovuwihiwa ni ottittimihiwa ahikhanle Yehova paahi. Yehova tooreera murima ni ori oolikaneene weera anlevelele soottheka sahu. Nave-tho, Yehova “toopixa murima ni oomoriwa ikharari ni ‘osareya othunku’ ni eekhaikhai.” (Nsal. 86:5, 15) Hiyo nookhalano mathowa ootheene anneriha onvuwiha Yehova, mwaha wa mikhalelo sawe sooreera ni mwaha wa itthu sootheene onnipakelaawe.

8. Itthu heeni nintthuneyaahu weera asantte wa Yehova? (Nsalmu 104:12-15, 24)

⁸ Ohiya paahi onvuwiharu Yehova munivekeloni mwahu, nintthuneya weera nimuxukureleke mwa itthu sootheene owo onnipakelaawe. Hiyo pooti omuxukhurela Yehova mwaha wa ikoore sooreera nnoonahu mulaponi, mwaha wa sootxa soohiyana-hiyana opankaawe ni mwaha wookhalano asinthamwene a nsivelo. Tiithaahu Yehova a nsivelo owo onnanivaha itthu sootheene iya, mwaha wooweera owo ontthuna weera hiyo nihakalaleke. (Mmusome Nsalmu 104:12-15, 24.) Opwaha mwa yeeyo, hiyo ninneera asantte vantxipale wa Yehova mwaha wa yootxa ya omunepani owo onnivahaawe ni-tho mwaha wa yooweherera yooreera yookhalano ekumi yooreera muuhoolo.

9. Etthu heeni eneera enikhavihere ohittiwala omuxukhurela Yehova? (1 Atesalonika 5:17, 18)

⁹ Ikwaha ikina hiyo pooti ottiwala weera asantte wa Yehova mwaha wa itthu sootheene sooreera onnivahaawe. Munaapake eheeni weera muhittiwale omuxukhurela Yehova? Aani, nyuwo  pooti opaka elista wa itthu munvekenlaanyu Yehova munivekeloni mwanyu. Yavira etempu nyuwo pooti orowela elista eyo weera moone moota Yehova aakhunlaawe mavekelo anyu, avinyaka vaavo, nyuwo pooti opaka nivekelo mmuxukhurelaka Yehova mwaha wa nikhavihero oovanhaaweni. (Mmusome 1 Atesalonika 5:17, 18.) Neereke khaiyene ekhaikhai weera onnansivela vaavo mutthu mukina onnixukhurelaaawe? Vamoha moharu vaavo nimmuxukurelaahu Yehova owo onnakhala oohakalala. (Akol. 3:15) Nookhala nthowa nikina-tho nootepa ootthuneya ninneeriha hiyo omuxukhurela Yehova.

10. Moovarihana ni 1 Pedru 2:21, mathowa heeni nraahuno omuxukhurela Yehova mwaha wa omurumiha mwanawe owa elapo ela ya vathi?

¹⁰ Mmusome 1 Pedru 2:21. Hiyo ninnamuxukhurela vantxipale Yehova mwaha woomuruma manawe weera anixuttihe eekhaikhai. Mweekhaikhai, emaara yeeyo hiyo nimmusuwelaahu Yesu ninnaxuttera itthu sintxipale sa Yehova ni moota nneeraahu nimuhakalalihe owo. Wakhala weera nnoororomela mukuttho wa Yesu, nnoowera okhalano onthamwene woolipa ni Yehova ni okhalano murettele ni Muluku ahu.—Arom. 5:1.

11. Mwaha wa heeni hiyo nninvekelaahu mwa nsina na Yesu?

¹¹ Ninnamuxukhurela Yehova mwaha woonivaha eparakha yoovekela moorwela mwa mwanawe Yesu Kristu. Orweela mwa Yesu, Yehova onnanivaha itthu sootheene hiyo nninvekelaahu. Yehova onniwa ni onnakhula mavekelo ootheene ampakiwa moorwela mwa mwanawe Yesu. Yaari yeeyo ene Yesu aahimmaawe, “ni yeyo muneeraanyu nveke mwa nsina naka, yeyo ene kini kakhulele wera Atithi evuwihiwe mwa mwana.”—Yoh. 14:13, 14.

12. Nthowa heeni nikina ninneeriha omuxukhurela Yehova mwaha woomurumiha mwanawe?

¹² Yehova onnalevelala soottheka sahu mwaha wa mukuttho Yesu ovanhaawe mwaha wa hiyo. Biblya onnamuhima Yesu okhala namakeya ahu “okilanthe wirimu mono wolopwana wa ehitxe yowarya.” (Aheb. 8:1) Nokhalano namwaakiha ahu wa “atithi ti Yesu Kristu.” (1 Yoh. 2:1) Hiyo ninnamuxukhurela Yehova mwaha woonivaha namakeya yoowo oniiwexexa ohimalela wahu ni soottettheya sahu ni tiyoowo onanivekelela hiyo. (Arom. 8:34, Aheb. 4:15) Mwaha wookhala atthu oottheka, khanaawera omwaattamwela Yehova morwela munivekeloni wahaakhanle mukuttho wa Yesu. Moohihovela mukuttho wa Yesu yoovaha etokweene Yehova onivanhaawe. Hiyo khaninkela owera oxukhurela mookwanela mwaha wa yoovaha eyo yootepa ootthuneya!

13. Ohiyu ole Yesu ahinaakuve okhwa, oonihenre hayi weera annasivela atthareli awe?

¹³ Ohiyu Yesu ahinaye okhwa aapaka nivekelo noorakama, anvekelaka Yehova weera aasunke “atthareli awe mwa yoonanara.” (Yoh. 17:15) Waari woosiveleya Yesu opaka eyo, mwaha wooweera aasuwela weera ahaanle vakhaaniini weera eereriwe. Nnamweera asuwenle weera anviriha maxupo mantxipale owo ahasaasera mureerelo wa atthareli awe.

14. Nnoonihere moota heeni weera ninnasivela asinna ni asirokora?

¹⁴ Ntoko Yesu nihipwattheke mirerelo sahu paahi emaara nninvekelaahu. Opwaha mwa yeeyo, hiyo ninnavekelela asinna ni asirokora. Naapakaka eyo nniwelela nlamulo na Yesu, nlamulo nenlo nneera: “musivelaneke mukuna ni mukhwawe” nave ninnamoonihera Yehova moota hiyo nnasivelaahu asinnihu. (Yoh. 13:34) Waavekelela asinnihu khaiyene oyeeha  ehuhu vasiyonvene. Biblya onhima weera “nivekelo na naxariya ti naikuru.”—Yak. 5:16.

15. Mwaha wa heeni nintthuneyaahu waavekelelaka asinna?

¹⁵ Asinna annaviriha maxupo mantxipale tivawooto vantthuneyaaya weera naavekeleleke. Hiyo pooti onvekela Yehova weera aakhavihere asinna awo oviriha maxupo a ovoreiwa, irisa sa ephattu, ikhotto, ottharatthariwa ni maxupo makina. Nave-tho, hiyo naavekeleleke asinna ale ampaka itthu sootheene anweraaya weera yaakhahvihere asinna ootthoiwa. Apaale nyuwo moomusuwela mutthu onviriha maxupo vaanano va, munoonela hayi oromola nsina na mutthu owo emaara muneeraanyu mpakeke nivekelo? Hiyo ninnoonihera weera ninnaasivela asinna, vaavo hiyo nnanvekelaahu Yehova weera aakhavihere asinna awo.

16. Mwaha wa heeni vantthuneyaaya waavekelela ale ankosoopa muloko?

¹⁶ Asitokweene ammulokoni ni arummwa oorumeela ennahakalala vaavo hiyo nnaavekelelaahu mwaha wooweera eyo ennaakhavihera. Murummwa Paulo aahaavekela asinna weera envekeleleke. Owo ohimme ha: “Nave tho mukivekeleleke wera, vohula eyano aka, kivahiwe masu ni siso kihòvaka etthu kisuwelihe mutikhinelo wa Evanjelyu.” (Aef. 6:19) Ntoko Paulo mahukwaano tho aakhala asinna eniilipihera vantxipale weera ekosoope muloko. Nanvekelaka Yehova weera aakhavihere asinna awo, ninnoonihera moota hiyo nnaasivelaahu.

17-18. Mapuro heeni apaale nneerahu nivekeliwe opaka nivekelo, ni etthu heeni nintthuneyaahu wuupuwelelaka naapakaka nivekelo mapuro ene yaawo?

¹⁷ Ikwaha ikina pooti munna naari murokora onivekela weera nipake nivekelo ohoolo wa atthu akina. Mwa ntakihero, murokora ompakiha yoosomaawe ya Biblya pooti onvekela murokora mukina omuhoola weera apake nivekelo. Murokora ola onvekeliwa weera apaka nivekelo pooti weeraka khamusuwenle nnene namasoma owo, nto mwaha wa yeeyo, owo pooti olakela weera apake nivekelo noomalihera. Opaka eyo, enoomukhavihera murokora osuwela sootthuna sa namasoma nave ohela mpuwa sootthuna iya sa namasoma emaara onrowaawe opakaka nivekelo.

¹⁸ Vaavo munna onvekeliwaawe weera apake nivekelo mmuthukumano naari nivekelo nookhumano muteko woolaleera, munna  owo ontthuneya weera uupuweleleke yoolakela ya muthukumano owo. Khontthuneya opaka nivekelo ni yootthuna ya ovaha miruku muloko naari ompaka anusiyu. Ikwaha sintxiple, mithukumano sahu sinnasunkeriwa iminutu 5 weera yiipiwe etxipo ni nivekelo. Ti vanto varaaya vootthuneya opaka “nivekelo” nookhuveya otepaxawene omapatxereroni wa mithukumano.—Math. 6:7.

19. Etthu heeni eneera enikhvihere okhala oolikaneene weera niwere oviriha nihuku nootthoriha na Yehova?

¹⁹ Onnatthuneya wiilipihera opaka nivekelo kweekwe, mwaha wooweera nihuku noothoriha na Yehova nri vakhiviru. Ti yeeyo yaamweerihe Yesu ohima ha: “Txentxerani ehuhu yothene, nvekelaka wera nwerye otthawa seiya sothesene sinèra sèreye.” (Luka 21:36) Wakhala weera nnoovirelela ovekela kweekwe nroromelo nahu nnookhala noolipa nave nnokhala oolikaneene weera nivirihe emalihero ya elapo ela.

20. Moota heeni mavekelo ahu ankelaaya olikanaka ni erupani yoowinkhela?

²⁰ Yoosoma ela nooxuttera weera nivekelo yoovaha etokweene, nohoona tho weera etthu eri yootepa otthuneya emaara ninpakaahu nivekelo, ori ohima itthu sinvarihana ni yootthuna ya Muluku nave noohuuluma woohima sa otthuneya waya oxukurela mukuttho wa Yesu mwaha wookhala mwene ahu. Nohuupuwelela otthuneya waya waavekelela asinna ni asirokora. Ni tho nohoona weera onnatthuneya ovekela sootthuna sahu sa weerutthuni ni soomunepani. Moohihovela ninnahela mwiitti eparakha nraahuno ya opaka nivekelo. Aani, tivawonto varaaya va miruku othanla nnene masu ninkelaahu wuuluma vaavo ninkelaahu omwaathamela Yehova moorweela munivekelo. Napaka eyo masu ahu ankela olikanaka ni erupani yowinkhela enwela ohoolo wa Yehova—aani, etthu ‘enamusivela.’—Mir. 15:8.