NGANI JAKULIJIGANYA 31
Tuyamichileje Upile wa Lipopelo
“Lipopelo lyangu likwele mpela ubani pameso pa ŵalakwe.”—SAL. 141:2.
NYIMBO NA. 47 Mpopeleje kwa Yehofa Lisiku Lililyose
YACHITULIJIGANYE *
1. Ana tuwuwoneje chamtuli upile watukwete wakupopela kwa Yehofa?
TUKWETE upile wekulungwa mnope wakupopela kwa Mlungu juŵapanginyisye kwinani soni chilambo chapasi. Agambe ganisya, mpaka tumsalile yamumtima mwetu pandaŵi jilijose soni muchiŵecheto chilichose. Mpaka tutende yeleyi mwangalajila kumŵenda. Mpaka tupopele chinga patuli kuchipatala kapena patuli kundende tuli tukwete chikulupi chakuti Atati ŵetu ŵachinonyelo chatupikane. Kusala yisyene tukusayamichila mnope upile welewu.
2. Ana Mwenye Daudi jwalosisye chamtuli kuti jwayamichilaga upile wakupopela?
2 Mwenye Daudi jwayamichilaga mnope upile wakupopela. Jwalakwe ŵamjimbile Yehofa kuti, “Lipopelo lyangu likwele mpela ubani pameso pa ŵalakwe.” (Sal. 141:1, 2) Mundaŵi ja Daudi, ubani waŵakamulichisyaga masengo ŵakutaga mbopesi pakulambila kusyesyene ŵawulinganyaga mwakusamala mnope. (Eks. 30:34, 35) Pakusala ya ubani, Daudi jwagopolelaga kuti jwasosekwaga kosechela chenene pakusaka kupopela kwa Atati ŵakwe ŵa kwinani. Yeleyi ni yatukusasaka kutenda m’wejisoni kuti mapopelo getu gaŵeje gakumsangalasya Yehofa.
3. Ana tukusosekwa kuŵechetaga chamtuli patukupopela kwa Yehofa? Ligongo chichi tukusosekwa kutenda yeleyi?
3 Ndaŵi jilijose patukupopela kwa Yehofa tukusasosekwa kuŵechetana najo mwaulemu. Kwende tuganichisye yindu yakusimonjesya mnope yaŵayiweni Yesaya, Esekiele, Daniele, soni Yohane. Jemanjaji ŵayiweni yindu yakulekangana nambo yaliji yakulandana pachindu chimo. Wosopeŵa ŵayiweni kuti Yehofa ali Mwenye jwamkulungwa mnope. Yesaya jwaweni “AMBUJE ali atemi pachitengu cha Uchimwene chelewu soni chapenani.” (Yes. 6:1-3) Esekiele jwam’weni Yehofa ali atemi paligeleta lyalyasyungulilidwe ni ‘kuŵala kwamachili . . . kukwawonekaga mpela ukunje wa ula.’ (Esek. 1:26-28) Daniele jwam’weni “Jwamasiku Gejinji” ali awete yakuwala yeswela soni malamba gamoto gali mkutyochela kuchitengu chakwe cha uchimwene. (Dan. 7:9, 10, NWT.) Nombe Yohane jwam’weni Yehofa ali atemi pachitengu cha uchimwene chichasyungulilidwe ni ukunje wa ula wakusalala mnope wawawonekaga mpela liganga lya gilini lya emeladi. (Chiw. 4:2-4) Patukuganichisya uchimbichimbi wa Yehofa wapenani mnope, yikusatukumbusya ya udindo wekulungwa watukwete wakupopela kwa jwalakwe. Nambo ana mpaka tupopeleje chamtuli?
“PANDAŴI JIMKUPOPELA MJILEJE MYI”
4. Ana tukulijiganya chichi pa lipopelo lyachisyasyo lyalikusasimanikwa pa Mateyu 6:9, 10?
4 Aŵalanje Mateyu 6:9, 10. Pakulalichila kwa petumbi, Yesu jwasalile ŵakulijiganya ŵakwe yakusosekwa kutenda pakupopela kuti amsangalasye Mlungu. Panyuma pakuŵecheta kuti “pandaŵi jimkupopela mjileje myi,” Yesu jwatandite kukolanga yindu yakusosekwa mnope yakamulana ni chakulinga cha Yehofa. Yindu yakwe yaliji kuswejesyedwa kwa lina lyakwe, kwika kwa Uchimwene wakwe wawuchijonanga achimmagongo wosope ŵa Mlungu, nambosoni yindu yambone yamsogolo yachachatendela ŵandu pachilambochi. Patukukolanga yindu yeleyi m’mapopelo getu, tukusalosya kuti chakulinga cha Mlungu chili chakusosekwa mnope kwa uweji.
5. Ana yili yakuŵajilwa kumŵenda Yehofa yakusosechela ya paumi wetu?
5 Mumbali jakuyichisya ja lipopeloli, Yesu jwasasile kuti yili yakusosekwa mnope kuti mundu jwalijose apopeleleje yindu yakusosechela paumi wakwe. Mpaka tumŵende Yehofa kuti atupe yakulya, atukululuchile yakulemwa yetu, atuchenjele ku yindu yakulinga chikulupi, nambosoni kuti atukulupusye kwa jwakusakala. (Mat. 6:11-13) Patukumŵenda Yehofa yindu yeleyi, tukusalosya kuti tukumdalila mnope jwalakwe soni kuti tukusasaka kumsangalasya.
Ana jwamlume mpaka apopeleleje yamtuli pali yalumo ni ŵamkwakwe? (Alole ndime 6) *
6. Ana patukupopela tukusosekwa tugambeje kusyasya yindu ya mulipopelo lya chisyasyo? Alondesye.
6 Yesu nganajembecheyaga kuti ŵakulijiganya ŵakwe chagambeje kusyasya ndendende lipopelo lyakwe lya chisyasyo. Ndaŵi sine Yesu paŵapopelaga ŵasalaga yindu yakulekanganalekangana yaŵasosechelaga pandaŵijo. (Mat. 26:39, 42; Yoh. 17:1-26) Mwakulandana ni Yesu, m’wejisoni mpaka tusale mwipopelo yindu yiliyose yatukusaka. Naga tukusaka kusagula yindu yekulungwakulungwa mpaka tupopele kwa Yehofa kuti atupe lunda lwakutukamuchisya kusagula chenene. (Sal. 119:33, 34) Naga tukusaka kutanda utumiki watukuwuwona kuti uli wakusawusya, mpaka tupopele kwa jwalakwe kuti atukamuchisye. (Mis. 2:6) Achinangolo mpaka ŵapopeleleje ŵanache ŵawo, nombe ŵanache mpaka ŵapopeleleje achinangolo ŵawo. Wosopewe tukusosekwa kupopelelanaga soni mpaka twapopeleleje ŵandu ŵatukusalijiganya nawo Baibulo nambosoni ŵandu ŵatukusitwalalichila. Nambope mapopelo getu gakagambaga kuŵa gakuŵendape basi.
Ana mpaka tumyamichile Yehofa pa yindu yapi patukupopela? (Alole ndime 7-9) *
7. Ligongo chichi tukusosekwa kumchimbichisya Yehofa mwipopelo?
7 Tukumbuchileje kumchimbichisya Yehofa patukupopela. Pangali jwampaka tumchimbichisye mnope kupunda Mlungu jwetu. Jwalakwe ali ‘jwambone, ni jwakululuchila ŵandu ŵakwe.’ Jwalakwe alisoni ‘jwachanasa ni umbone mtima, jwangatumbila chitema, akwete chinonyelo changamala soni jwakulupichika.’ (Sal. 86:5, 15) Tukwete magongo gambone gakututendekasya kumchimbichisya Yehofa, ligongo lyakuti tukusammanyilila chenene soni ligongo lya yindu yakusatendaga.
8. Ana ni yindu yine yapi yatukusasosekwa kumyamichila Yehofa? (Salimo 104:12-15, 24)
8 Kupwatika pakumchimbichisya Yehofa mmapopelo getu, tukusosekwasoni kumyamichila ligongo lya yindu yambone mnope yakusatutendela. Mwachisyasyo, mpaka tumyamichile jwalakwe ligongo lya mitundu jakusalala ja maluŵa gatukusagawonaga, yakulya yambone, soni kuŵa paunasi wambone ni achimjetu. Atati ŵetu ŵachinonyelo akusatupa yindu yeleyi soni yine yejinji kuti tusangalaleje. (Aŵalanje Salimo 104:12-15, 24.) Kupunda yosope, tukusamyamichila mnope Yehofa ligongo lyakutupa malangiso gakutukamuchisya kola chikulupi chakulimba, soni kola chembecheyo chambone cha msogolo.
9. Ana chichi champaka chitukamuchisye kuti tukumbuchileje kumyamichila Yehofa? (1 Atesalonika 5:17, 18)
9 Mpaka yiŵe yangasawusya kuliŵalila kumyamichila Yehofa pa yindu yosope yakusatutendelaga. Ana chichi champaka chakamuchisye kuti akumbuchileje? Mpaka ayilembe yindu yaŵendile kwa Yehofa kaneko aloleje yatesile Yehofa pakwanga yindu yaŵaŵendileyo. Kaneko apopeleje kwa Yehofa kumyamichila payindu yaŵatendeleyo. (Aŵalanje 1 Atesalonika 5:17, 18.) Aganichisye ayi. Tukusaŵa ŵakusangalala ŵandu ŵane patuyamichile. Mwakulandana ni yeleyi, naga tukusakumbuchila kumyamichila Yehofa ligongo lyakwanga mapopelo getu yikusamtendekasya jwalakwe kuŵa jwakusangalala. (Akolo. 3:15) Nambo panasoni chindu chine chakusosekwa mnope chakututendekasya kumyamichila Mlungu.
TUMYAMICHILEJE YEHOFA LIGONGO LYA MWANACHE JWAKWE
10. Mwakamulana ni 1 Petulo 2:21, ligongo chichi tukusasosekwa kumyamichila Yehofa ligongo lyakumtumisya Yesu pachilambo chapasi?
10 Aŵalanje 1 Petulo 2:21. Tukusasosekwa kumyamichila Yehofa ligongo lyakumtumisya Mwanache jwakwe jwakunonyelwa kuti atujiganye. Patukulijiganya yakwamba Yesu, tukusammanyilila chenene Yehofa soni yampaka tutende pakumsangalasya jwalakwe. Naga tukusakulupilila mbopesi ja Klistu, mpaka jitukamuchisye kuŵa paunasi wambone ni Yehofa.—Alo. 5:1.
11. Ligongo chichi tukusapopela m’lina lya Yesu?
11 Tukusamyamichila Yehofa pakutukunda kuti tupopeleje kupitila mwa Mwanache jwakwe. Yehofa akusapikana soni kwanga mapopelo gatukusapeleka kupitila mwa Yesu. Yesu jwatite, “Nipo tinjitenda chilichose chitachiŵenda mu lina lyangu, mwakuti lumbili lwa Atati tiluchiwoneka kupitila mwa Mwanache.”—Yoh. 14:13, 14.
12. Ana ligongo line lyapi lyakututendekasya kumyamichila Yehofa ligongo lyakutupa Mwanache jwakwe?
12 Yehofa akusatukululuchila yakulemwa yetu kupitila mu mbopesi jakutuwombola jaŵapeleche Yesu. Malemba gakusamlondesya Yesu kuti ali “jwamkulungwa jwa ŵakutaga mbopesi wosope, jwele jwakutama ku mkono wamlyo ku chitengu cha uchimwene cha Mlungu cha uchimbichimbi kwinani.” (Aheb. 8:1) Yesu ali “namangoswe jwakulungama jwakutuŵechetela kwa Atati.” (1 Yoh. 2:1) Kusala yisyene tukusamyamichila mnope Yehofa ligongo lyakutupa Jwamkulungwa jwa Ŵakutaga Mbopesi jwakusapikanichisya yakulepela yetu soni “jwakutuŵechetela uwe” kwa Mlungu. (Alo. 8:34; Aheb. 4:15) Yikaŵe kuti pangali mbopesi ja Yesu, ngamkanitukombolaga kupopela kwa Yehofa ligongo tuli ŵangali umlama. Kusala yisyene, tukusasosekwa kumyamichila mnope Yehofa ligongo lyakutupa Mwanache jwakwe kuti atuwombole.
TWAPOPELELEJE ABALE NI ALONGO ŴETU
13. Ana Yesu jwalosisye chamtuli kuti jwanonyelaga ŵakumkuya ŵakwe?
13 Pa chilo chakumalisya cha umi wa Yesu pachilambopa, jwalakwe jwapopesile kwandaŵi jelewu kwaŵenda Atati ŵakwe kuti “ŵasunje chenene [ŵakulijiganya ŵakwe] kwa jwakusakala jula.” (Yoh. 17:15) Apatu Yesu jwalosisye kuti jwanonyelaga mnope ŵakulijiganya ŵakweŵa. Atamose kuti Yesu jwamanyililaga kuti asigele panandi kuwulajidwa, jwalakwe jwalosisye kuti jwaganichisyaga ŵakulijiganya ŵakwe.
Ana mpaka twapopelele abale ni alongo pa yindu yapi? (Alole ndime 14-16) *
14. Ana mpaka tulosye chamtuli kuti tukusitwanonyela abale ni alongo ŵetu?
14 Ligongo lyakuti tukusamsyasya Yesu, tukusaŵambala kwambaga ganichisya yakusaka yetupe. Mmalomwakwe, tukusitwapopelelagasoni abale ni alongo ŵetu. Patukutenda yeleyi, tukusaŵa kuti tukupikanila lilamusi lya Yesu lyakuti tunonyelaneje nambosoni tukusamlosya Yehofa kuti tukusitwanonyela mnope ŵakulupilila achimjetu. (Yoh. 13:34) Kwapopelela abale ni alongo ŵetu nganikuŵa kwasa ndaŵi. Maloŵe ga Mlungu gakusatusalila kuti, “lipopelo lya mundu jwakulungama likusaŵa lyamachili, nipo lyangapita pachabe.”—Yak. 5:16.
15. Ligongo chichi tukusasosekwa kwapopelela Aklistu achimjetu?
15 Tukusasosekwa kwapopelela Aklistu achimjetu ligongo lyakuti akusasimana ni yakusawusya yejinji. Mpaka tumŵende Yehofa kuti ŵakamuchisye jemanjaji kuti akombole kupilila yilwele, ngosi syachilengedwe, ngondo, kulagasidwa, kapena yakusawusya yine. Mpaka twapopelelejesoni abale ni alongo ŵakusalipeleka pakusaka kwakamuchisya achimjawo. Komboleka kuti wawojo akwamanyilila ŵandu ŵane ŵakusimana ni yakusawusya yine. Ana nganaŵa akombwele kwakolanga jemanjaji m’mapopelo gawo? Tukusalosya kuti tukusitwanonyela yisyesyene abale ni alongo ŵetu mwakumŵenda Yehofa kuti ŵakamuchisyeje jemanjaji kupilila yakusawusya yakusasimana nayo.
16. Ligongo chichi tukusasosekwa kwapopelelaga ŵandu ŵakwete maudindo mumpingo?
16 Abale ŵakwete maudindo mumpingo akusayamichila mnope ŵandu ŵane pakwapopelela soni mapopelo gelego gakusigakamuchisyaga mnope. Yeleyi ni yayamtendechele ndumetume Paulo. Jwalakwe jwalembile kuti, “Mumbopeleleje une soni, kuti Mlungu ambe maloŵe ndaŵi jitimbecheteje, kuti namanyisye ŵandu yakusisika ya Ngani Syambone mwakulimba mtima.” (Aef. 6:19) Masiku agano, tukwetesoni abale ŵakusatulongolelaga. Tukusalosya kuti tukusitwanonyela jemanjaji mwakumŵenda Yehofa kuti ŵalongoleleje pa masengo gawo.
PATUKUPOPELA PAMESO PA ŴANE
17-18. Ana ni yakutendekwa yapi yampaka atuŵende kuti tupeleche lipopelo? Ana tukusosekwa tukumbuchileje chichi?
17 Ndaŵi sine, akusatuŵenda kuti tupopele pameso pa ŵane. Mwachisyasyo, mlongo jwakutendesya lijiganyo lya Baibulo mpaka amŵende mlongo jwajesile najo kuti apeleche lipopelo. Mpaka yisimanikwe kuti mlongo jwampechesye mjakwejo ngakummanyilila chenene jwakulijiganyajo. Myoyo jwalakwe mpaka asagule kupeleka lipopelo lyakumalisya. Yeleyi mpaka yimkamuchisye kuti apeleche lipopelo lyakamulana ni yakusosechela ya jwakulijiganyajo.
18 M’bale mpaka amŵende kuti apeleche lipopelo pamsongano wakosechela utumiki kapena pamsongano wa mpingo. Abale ŵakusakola upile welewu, akusasosekwa kumbuchila chakulinga cha msonganowo. Jemanjaji ngakusosekwa kuwujamuka mpingo kapena kupeleka yimanyisyo pakupeleka mapopelo gawo. Pamisongano jejinji ja mpingo, pakusaŵa maminisi 5 gakamulichisya masengo pakwimba nyimbo soni lipopelo. Myoyo, m’bale jwakupeleka lipopelo, ngakusosekwa ‘kuchuluya maloŵe’ mnopemnope pakupeleka lipopelo lyandanda.—Mat. 6:7.
LIPOPELO LIŴEJE CHINDU CHAKUSOSEKWA MNOPE PA UMI WAWO
19. Ana chichi champaka chitukamuchisye kuŵa ŵakoseka palichiyikaga lisiku lyakulamula lya Yehofa?
19 Palikuŵandichila lisiku lyekulungwa lya Yehofa, tukusosekwa tukuwoneje kupopela kuŵa chindu chakusosekwa mnope paumi wetu. Pangani jeleji, Yesu jwatite, “Mlindilileje ndaŵi syosope, mchipopelaga kuti timpakombole kulupuka pa yindu yosope yitichitendekwayi.” (Luk. 21:36) Kusala yisyene, naga tukupopela ndaŵi syosope tuchikola chikulupi chakulimba soni tuchiŵa ŵakoseka palichiyikaga lisiku lyakulamula lya Mlungu.
20. Ana mpaka tutende wuli kuti mapopelo getu gaŵeje gakununjila chenene mpela ubani?
20 Ana munganiji tukambilene chichi? Tukusayamichila mnope upile wakupopela kwa Mlungu. Yindu yatukusosekwa kusala patukupopela yiŵeje yakamulana ni chakulinga cha Yehofa. Tukusasosekwasoni kumyamichila Mwanache jwa Mlungu soni Uchimwene wakwe nambosoni kwapopelela abale ni alongo ŵetu. Tuyiwenisoni kuti mpaka tumŵende Mlungu kuti atupe yindu yatukusosekwa paumi wetu soni kuti atukamuchisye kola chikulupi chakulimba. Patukuganichisya chenene yatukusaka kuŵecheta m’mapopelo getu, tukusalosya kuti tukusayamichila mnope upile wa lipopelo. Patukutenda yeleyi, maloŵe getu gachiŵa mpela liwungo lya ubani lyakununjila chenene ‘lyalikusamsangalasya’ Yehofa.—Mis. 15:8.
NYIMBO NA. 45 Nganisyo sya Mumtima Mwangu
^ Tukusayamichila mnope upile watukwete wakuŵechetana ni Yehofa kupitila mu lipopelo. Tukusasakasoni kuti mapopelo getu gaŵeje gakununjila mpela ubani gampaka gamsangalasye jwalakwe. Munganiji chitukambilane yindu yampaka tusale patukupopela. Chitulolesoni mfundo sine syamnono syatukusasosekwa kumbuchila ŵane patuŵendile kuti tupopele.
^ KULONDESYA CHIWULILI: Jwamlume yalumo ni ŵamkwakwe akumpopelela mwanache jwawo kuti yindu yimjendeleje chenene pali ku sukulu, akumpopelelasoni nangolo jwawo jwachikulile jwakulwala, soni jwakulijiganya Baibulo kuti ajawule pasogolo.
^ KULONDESYA CHIWULILI: M’bale jwachinyamata akumyamichila Yehofa ligongo lya mbopesi jakutuwombola, chilambo chetu chakusalalachi, soni yakulya yambone.
^ KULONDESYA CHIWULILI: Mlongo akumŵenda Yehofa kuti ŵalongoleleje abale ŵa m’Likuga Lyakulongolela soni kuti ŵakamuchisye ŵandu ŵakulaga ligongo lya ngosi syachilengedwe soni ŵakulagasidwa ligongo lya chikulupi chawo.
