Yecu onongo tito kwena me kuc. Ento i nino mo acel, en owaco ki lukwenane ni: “Pe wutam ni abino me kelo kuc i lobo; an pe abino me kelo kuc, ento pala lucwan. Pien abino me poko kin dano woko ki wonne, nyako bipokke woko ki minne, ki ci-wod bene bipokke woko ki dane.” (Mat. 10:34, 35) Ngo ma onongo Yecu tye ka lok iye?

Yecu onongo pe mito poko kin jo me odi, ento en oniang ni pwonye bikelo apokapoka i odi mogo. Pi meno, jo ma gimito doko lupwonnye pa Kricito kun ginongo batija, myero guniang ni wadigi cwinygi pe oromo bedo yom i kom tam ma gumoko. I kare mukene, ngat ma gunyomme kwede nyo lupacogi mukene gitwero kwerogi kun giweko bedo tek botgi me lubo pwony pa Yecu.

Baibul cuko cwiny Lukricitayo ni ‘myero gubed ki kuc ki dano ducu.’ (Rom. 12:18) Ento pwony pa Yecu twero doko calo “pala lucwan” i odi mogo. Man timme ka ce ngat mo ma i ot meno ojolo pwony pa Yecu kun jo mukene-ni gukwero woko. Ka meno otimme, ci wadi magi gidoko “lukwor” pa ngat ma tye ka pwonyo lok ada-ni.—Mat. 10:36.

Lupwonnye pa Kricito ma gibedo ki wadigi ma gitye i dini mukene i kare mogo mitte ni guyer kace gibitimo gin ma yomo cwiny Jehovah ki Yecu nyo gin ma yomo cwiny wadigi. Me labolle, wadi ma pe Lucaden gitwero diyogi me nywako i kwer mo me dini goba. Ci nongo mitte ni gumok tamgi i kom anga ma gibiyomo cwinye. Yecu owaco ni: “Ngat ma maro wonne nyo minne makato an pe myero me bedo danona.” (Mat. 10:37) Ngene kene ni, Yecu onongo pe tye ka waco ni wek gidok lupwonnyene, jo ma gitye ka pwonyo ada myero pe gumar lunywalgi matek. Ento, onongo en tye ka pwonyogi kit me yero gin ma pire tek loyo i kwo. Ka ce wadiwa ma pe gubedo Lucaden gidag tutewa me woro Jehovah, wan wamedde ki marogi, ento myero wiwa opo ni marwa pi Jehovah aye gin ma pire tek loyo.

Labongo akalakala mo, adegadega ma a ki bot wadiwa lit tutwal. Kadi bed kit meno, lupwonnye pa Yecu myero wigi opo i kom lokke ma owaco ni: ‘Dano ma pe tingo yatte kun lubo kwede kora pe myero me bedo danona.’ (Mat. 10:38) Me ketone i yo mukene, Lukricitayo gineno adegadega ma a ki bot wadigi calo but can ma lupwonnye pa Kricito myero gucir. Ento bene gigeno ni, kitgi maber meno twero weko wadigi loko tamgi dok gibedo ki miti me pwonyo lok ada me Baibul.—1 Pet. 3:1, 2.