Иисус бойыныҥ ӱренчиктерин улусла амыр јӱрзин деп ӱреткен. Је бир катап ол апостолдорына мынайып айткан: «Мени јерге амыр экелерге келген деп сананбагар. Мен амыр эмес, кылыш туттырарга келгем. Уулын адазынаҥ, кызын энезинеҥ, келдин кайын энезинеҥ айрыырга келгем» (Матф. 10:34, 35). Иисус бу сӧстӧрлӧ нени айдарга сананган?

Иисус јуук улустарды ачынышпазын деп кӱӱнзеген. Је оныҥ ӱредӱлери кезик билелерге ӧӧн-бӧкӧн экелер деп билген. Андый болордо, Иисустыҥ ӱренчиги болуп чӧҥӱрилерге турган кижи андый алтам неге экелерин билип турар учурлу. Кезикте эш-нӧкӧри эмезе билезиниҥ ӧскӧ улустары кижиге библиялык нормаларла јӱрерге чаптыгын јетирет. Мынаҥ улам христиан кижиниҥ бӱдӱмјизи ченелет.

Агару Бичик христиандарды: «Ончо улусла амыр јӱригер» — деп кӱӱнзедет (Рим. 12:18). Андый болордо, нениҥ учун Христостыҥ ӱредӱлери кезик билелерде «кылыш» болуп калат? Нениҥ учун дезе кижи Иисустыҥ ӱредӱлерин алынып јат, је билезиниҥ улузы алынбай јат эмезе удурлажып јат. Анайып, Агару Бичик ӱренип турган кижиниҥ јуук улустары ого «ӧштӱлер» болуп калат (Матф. 10:36).

Кезик христиандардыҥ јууктары Иеговага иштебей јат. Мынаҥ улам олордыҥ Иеговага ла Иисуска сӱӱжи ченелип турган кӱч айалгалар боло берет. Темдектезе тӧрӧӧндӧри оны кудай јаҥныҥ кандый бир байрамын байрамдаарга кӱӱнзедет. Андый учуралда христиан кижиге кемге јараарга турганын талдаар керек. Иисус айткан: «Адазын эмезе энезин Менеҥ артык сӱӱгени, Меге јарабас» (Матф. 10:37). Иисус бу сӧстӧриле оныҥ ӱренчиктери бойыныҥ ада-энезин тыҥ сӱӱбезин деп айткан эмес, је карын ӱзе неме бойыныҥ јеринде болор керек деп ӱреткен. Айдарда, јууктарыс биске Иеговага иштеерге чаптыгын јетирип турза, бис тӱҥей ле олорды сӱӱп јадыс, је Иегованы бис олордоҥ артык сӱӱйдис.

Бистиҥ јууктарыс Иегова Кудайды билерге кӱӱнзебей турза, коркышту ачынчылу болот. Је Иисустыҥ ӱренчиктери бу сӧстӧрди ундыбай јадылар: «Керӱ агажын алып Мениле кожо барбаганы, Меге јарабас» (Матф. 10:38). Христиандар оҥдоп јат: ченелтелер болор, кемге де билезиниҥ улузы удурлажар деп. Андый да болзо, тӧрӧӧндӧри олордыҥ јакшы кылык-јаҥын кӧрӱп, јымжап, Кудайга јууктаарга кӱӱнзеер деп иженет (1 Пётр 3:1, 2).