Yesu ubed uponjo dhanu nia gikwo ku kwiyocwiny i kindgi. Re saa moko elund eyero ni jukwenda pare nia “kud wupar nia abino kelo kwiyocwiny i ng’om; abino kelo kwiyocwiny ungo, ento palamularu. Kum abino kelo pokiri i kind jalawobi giku won, nyaku giku min, man dhaku giku wang’umire.” (Mat. 10:34, 35) Eno Yesu umito yero ang’o?

Yesu umito ngo epok kind wedi, ento eng’eyo nia ponji pare copo ketho kind juruot moko pokere. Pieno, ju ma gibemito gidok julub pa Kristu man gilim batizo, mito ging’ey nia wedi migi copo maru ngo ng’iyong’ic ma gitimo. Tek judhoggi mi gamiri ma gijuyic ungo kunoke wedi migi ubenyayu ragedo i kumgi, ecopo bedo tek igi nimoko kikiki i kum ponji pa Kristu.

Biblia ubekwayu nia Jukristu gikwo “ku kwiyocwiny ku dhanu ceke.” (Rum. 12:18) Re ponji pa Yesu copo bedo ve “palamularu” ni wedi moko. Lembuno copo timere tek ng’atu moko ujolo ponji pa Yesu re wedi pare ulund ukwero ponjine kunoke gijai i kume. Saa maeno nwang’u wedine gibekethiri gigi ni “judegi” pa ng’atu m’ubeponjo lemandha.​—Mat. 10:36.

Jukristu ma gibekwo i ot ma dini tie tung’ tung’ i iye, saa moko ginwang’iri i wang’ lembe ma ketho mer ma gimaru ko Yehova man Yesu i amulaic. Ku lapor, wedi ma gijuyic ungo copo diyogi nia gitim foc mi ceng’ ma dit mi jurudini. Saa maeno mito ginen nia gibinyayu anyong’a i ng’a. Yesu uwacu kumae: “Ng’atu m’umaru won kunoke min nisagu an uromo ngo kuda.” (Mat. 10:37) I andha, Yesu umito yero ngo nia pi nibedo jalub pare mito ng’atini kud umar junyodo pare lee. Ento ebino ketho nwoc akeca iwi lembe ma pire tek ma mito ng’atini utim ng’iyong’icne i kwo pare. Tek wedi mwa ma gijuyic ungo gibejai i kumwa pilembe ya wabeworo Yehova, wamedara asu nimarugi; re nwang’u wang’eyo nia mer ma wamaru ko Mungu re m’utie mi kwong’o.

Andha, jai ma wedi mwa gibenyutho tie lembe ma nyayu can lee. Re julub pa Yesu gicikiri niwil ungo ku wec ma e ma Yesu uyero: “Ng’atu m’ujolo ngo yen mi can pare man elubo toka de, eromo ngo kuda.” (Mat. 10:38) I ayi mange, Jukristu gineno jai ma wedi migi ubenyutho igi ni acel m’i kind can dupa ma jalub pa Kristu ucikere nibedo ayika niciro. Re saa maeno, gibedo ku genogen nia kura kunoke timo migi ma ber bicwalu wedi migi ma juyic ungo niloko paru migi man niponjo lemandha mi Biblia.​—1 Pet. 3:1, 2.