Yésu a bi niiga le bôt ba nlama niñ ikété nsañ. Ndi lisañ jada a kal banigil bé le: “Ni hoñol bañ le me bi lo hana ’isi i lona nsañ; me bi lo, ha inyu lona nsañ bé, ndi pansoñ. Inyule me bi lo inyu bagal bôt ba lihaa, kayéle man munlôm a kolba isañ; man muda ki a kolba nyañ; yak nkiya a kolba nyôgôl wé.” (Matéô 10:34, 35) Kii Yésu a bé sômbôl kal?

Yésu a bé sômbôl bé bagal bôt ba ba yé i lihaa jada, ndi a bé yi le biniigana gwé bi ga boñ le ngim bôt i lihaa i bagla. Hala a nkobla le ba bobasôna ba nsômbôl yila banigil ba Kristô ba kôhna ki sôble, ba nlama yi le mahaa map ma ga bane bé bo maséé. Ibale sobiina yap tole ngim bôt ikété lihaa jap ba nkolba bo, ba nlama yi le i ga béda bo le ba bana hémle i ngui i biniigana bi Kristô.

Bibel i niiga le bikristen bi nlama “ba ikété nsañ ni bôt bobasôna.” (Rôma 12:18) Ndi biniigana bi Yésu bi nla bane ngim bôt ba lihaa kiki “pansoñ.” Hala a mbéna bôña i ngéda mut wada ikété lihaa a yila nnigil Kristô, bana bape ba tjél tole ba kolba nye. Ha i ngéda i, yak bôt ba ba yé ndap yada ni we ba nyila “baoo” boñ.—Matéô 10:36.

Banigil ba Kristô ba ba niñ ndap yada ni bôt bap ba lihaa ba ba yé i base ipe, ba ga boma manoodana ma ma ga tinde bo i pohol too ba ga lémél Yéhôva bo Yésu tole bôt bap ba lihaa. Kiki hihéga, bôt bap ba lihaa ba yé le ba tinde bo i tégbaha mangand ma kwéha base. I ngéda ba mboma i nya ngolba i, njee ba ga nkônha maséé? Yésu a kal le: “Nu ni nu a ngwés isañ tole nyañ iloo me a kôli bé ba nnigil wem.” (Matéô 10:37) Yésu a bé sômbôl bé kal le i bet ba nsômbôl yila banigil bé ba nlama bé gwés bagwal bap ngandak. Ndi, a bé kal le ba nlama yi i jam li nlôôha ba nseñ niñ yap. Ibale bôt bés ba lihaa ba ñoo bés inyule di ngwélél Yéhôva, di nlama ke ni bisu i gwés bo, ndi di yi le gwéha yés inyu Yéhôva yon i yé ndugi nseñ.

Ni maliga, hala a nôgha njôghe iloo hihéga i ngéda bôt boñ ba lihaa bon ba nkolba we. Ndi banigil ba Yésu ba nlama tééda bibañga gwé bini le: “Nu ni nu a ngwés bé begee kék yé njiiha le a noñ me, a kôli bé ba nnigil wem.” (Matéô 10:38) Hala a nkobla le bikristen bi nlama tehe ngolba i bôt bap ba lihaa kiki ndééñga yada banigil ba Kristô ba nlama hônba. Ndi, ba mbot ñem le, libak jap lilam li nla tinde bôt bap ba lihaa i héñha ni i emble Bañga i Djob.—1 Pétrô 3:1, 2.