Jesubara jaradiabasi dayirãra yõmia ẽ baibarata, maʉ̃ta ewari aba jarasi iyi kʼaidubemaraʼa: «Krĩcharãũdua mʉrã zesita druadʼe zhãrã adu-a bʼeabiita, mʉrã zesi ẽã zhãrã adu-a bʼeabiita, awuarabʉrʉ mʉ kʼarea zhõnaña. Mʉ zebʉrʉbara mʉnebemata juradʼaya, zhãrãbara juraya zhi zezeta, kʼaubara juraya zhi papata, ãĩgubara juraya zhi pakʼõrẽta» (Mat. 10:34, 35). ¿Naʉ̃ bedʼeabara kʼãrẽta jarakĩrãbʉ?

Jesubara kãga ẽ basi yi mebẽrãbarabʉra ãyirainʉ yi jʉra kʼãrãpe jĩgara wãnamarẽã, mamina iya bia kʼawuabasi iya bedʼea jaradiabadaba mawũã zeibasita. Mawũẽra ẽbẽrarã iyi kʼaidubemara bakĩrãbʉra akʉza buru kʼoekĩrãbʉra, biʼia kʼawuabaibara edaʉde yi mebẽrãbara kãga ẽ baita ãya maʉ̃ ota jidasi baera. Ʉ̃kʉrʉitara yi kimaba mawũã ẽ bʉrʉ yi mebẽrãba kãga ẽ bʉrʉ Daizeze ode bʼaita naʉ̃itara zarea baseabʉ Jesu kʼaidubema bʼaita.

Daizeze Bedʼeabara jarabʉ kristianoraʼa: «Adu-a bʼeaudua jõmaʉ̃ bawara» (Rom. 12:18). Mamina ʉ̃kʉrʉ mebẽrãita Jesuba bedʼea jaradiadara kucho kĩrãkʼabʉ, ¿kʼãrẽa? Ẽbẽra abaʉba Jesuba jaradiadata ũrĩ jʉ̃drʉbʉrʉde yi mebẽrãba kãga ẽãne iya maʉ̃ o jidaita akʉza jaraseapanʉ Daizeze Bedʼea kʼawuabʉta iduaribimarẽã. Mawũã berabaribʉrʉde yi mebẽrãra ariya iyi nejʉra babʉ (Mat. 10:36).

Jeowa ʉ̃rʉ Kʼawuabipanʉrãta ãbapanʉbʉrʉ ãyi mebẽrã awuru religionebʉme, bedʼea zromata ũdubʉ kʼawua jidaibarade kʼaita sobiabita Jeowata akʉza Jesuʉ̃me mawũã ẽ bʉrʉ iyi mebẽrãta. Edaʉde yi mebẽrãbara kãgapanʉ ʉ̃kʉrʉ piesta ãyi religionba obʉta omarẽã, maʉ̃ta berabaribʉrʉdera ãya kʼawua jidaibara kʼaiare bʼaita. Jesuba jarasi: «Iabʼaʉba zhi zezeta zhi papata mʉ audre kʉãgʼabʉrʉ mʉrẽta bʼaidʼe bʼʉ ẽã» (Mat. 10:37). Naʉ̃ bedʼeaba Jesuba jarakĩrãkʉ ẽ basi iyi kʼaidubema bʼaira yibarirata kãga ẽ baibarata, awuarabʉrʉ jaradiakĩrãbasi bia kʼawuabaibarata saʉ̃ta nããra bʉeibarata. Dayirã mebẽrãnebema abaʉba kãga ẽ bʉrʉ dayirã Jeowa ode bʼaita, mawũãsidu dayirãbara kãgapanʉ iyira, mamina bia kʼawuapanʉ Jeowatrʉ audre kãgaibarata.

Dayirã mebẽrãba kãga ẽ bʉrʉ dayirã Jeowa ode bʼaita naʉ̃ba sopʉabibʉ dayirãra, mamina kĩrãbedaibara Jesuba jaradata: «Iabʼaʉba bebudʼe basiidʼu mʉta pẽwã ẽbʉrʉ mʉrẽta bʼaidʼe bʼʉ ẽã» (Mat. 10:38). Dayirã kristianorabara kʼawuapanʉ Jesu kʼaidubema bʼaira dayirãra zʉbʉriadaita akʉza maʉ̃ra edaʉde dayirã mebẽrãba zʉbʉriabita. Mamina dayirã Daizeze ode kʼẽrẽpabʉba obiseabʉ ãyabida kʼawuakĩrãnamarẽã Daizeze Bedʼeata (1 Ped. 3:1, 2).