Wɛn fífá tɔn wɛ Jezu jlá. É ɖo mɔ̌ có, ɖo ninɔmɛ ɖé mɛ ɔ, é ɖɔ nú ahwanvú tɔn lɛ́ ɖɔ: “Mi ma vɛdó ɖɔ fífá wɛ un hɛn wá ayǐkúngban jí sín ó; fífá wɛ un hɛn wá ǎ; hwǐ wɛ un hɛn wá. Ðó un wá bɔ nyɛ wútu ɔ, vǐ súnnu ná mɔ tɔ́ tɔn gbɔ ǎ; vǐ nyɔ̌nu ná mɔ nɔ tɔn gbɔ ǎ; vǐsi ná mɔ asú tɔn nɔ gbɔ ǎ.” (Mat. 10:34, 35) Étɛ́ ka nyí tínmɛ nǔ e ɖɔ wɛ Jezu ɖe é tɔn?

Biba wɛ Jezu ɖe bo ná klán xwédo lɛ́ ǎ, amɔ̌, é tuun ɖɔ nǔkplɔ́nmɛ émítɔn lɛ́ ná dɔn kínklán byɔ́ xwédo ɖé lɛ́ mɛ. Nǔgbó ɔ, mɛ ɖěɖěe ba ná bló batɛ́mu, bo húzú ahwanvú Klísu tɔn lɛ́ é ɖó ná tuun ɖɔ hweɖélɛ́nu ɔ, mɛ e ɖo xwédo yětɔn mɛ lɛ́ é kún ná hun xomɛ dó gbeta e kɔn yě wá é wú ó. Ényí asú, alǒ asi nǔmaɖitɔ́ e yě da é, kabǐ mɛ ɖěvo e ɖo xwédo yětɔn mɛ lɛ́ é klán gbe xá yě ɔ, é sixú vɛ́ wǔ bɔ yě ná kpo ɖo tónú se nú nǔkplɔ́nmɛ Klísu tɔn lɛ́ wɛ.

Biblu dó wǔsyɛ́n lanmɛ nú Klisánwun lɛ́ ɖɔ yě ní nɔ “nɔ fífá mɛ xá gbɛtɔ́ lɛ́ bǐ.” (Hlɔ̌. 12:18) Amɔ̌, nǔkplɔ́nmɛ Jezu tɔn lɛ́ sixú wa nǔ “hwǐ” ɖɔhun ɖo xwédo ɖé lɛ́ mɛ. Nǔ sixú nyí mɔ̌ hwenu e mɛ ɖokpó yí gbe nú nǔkplɔ́nmɛ Klísu tɔn lɛ́ ɖo xwédo ɖé mɛ bɔ mɛ e kpo lɛ́ é ka gbɛ́, alǒ klán gbe xá é. Ðo ninɔmɛ mɔ̌hun mɛ ɔ, hɛ̌nnumɔ mɛ énɛ́ e ɖo nǔgbó ɔ kplɔ́n wɛ é tɔn lɛ́, alǒ mɛ e ɖo xwé tɔn gbe lɛ́ é ná húzú “kɛntɔ́” tɔn lɛ́.—Mat. 10:36.

Hweɖélɛ́nu ɔ, ahwanvú Klísu tɔn ɖěɖěe nɔ xwédo e klán ɖo sinsɛn lixo é mɛ lɛ́ é gbɔn ninɔmɛ ɖěɖěe tɛ́n wǎn e yě yí nú Jehovah kpó Jezu kpó é kpɔ́n lɛ́ é mɛ. Ði kpɔ́ndéwú ɔ, hɛ̌nnumɔ yětɔn e ma nyí nǔɖitɔ́ ǎ lɛ́ é sixú dó wǔsyɛ́n lanmɛ nú yě ɖɔ yě ní nɔ ɖu sinsɛn sín xwe lɛ́. Ényí è tɛ́n yě kpɔ́n ɔ, mɛ̌ sín xomɛ wɛ yě ka ná hɛn hun? Jezu ɖɔ: “Mɛ e yí wǎn nú tɔ́ tɔn abǐ nɔ tɔn hú mì ɔ, mɛ énɛ́ jɛxá ná nyí ahwanvú ce ǎ.” (Mat. 10:37) É ɖo wɛn ɖɔ, é kún nyí ɖiɖɔ wɛ Jezu ɖe ɖɔ cóbónú mɛ ɖěɖěe ɖo nǔgbó ɔ kplɔ́n wɛ lɛ́ é ná húzú ahwanvú émítɔn ɔ, wǎn e yě yí nú mɛjitɔ́ yětɔn lɛ́ é ná ɖe kpo ó. É nyɔ́ wa ɔ, lěe yě ná sɔ́ nǔ ɖokpó ɖokpó ɖó tɛn e jɛxá é mɛ gbɔn é jí tɛɖɛ̌ wɛ é ɖe. Ényí mɛ e ɖo xwédo mǐtɔn mɛ lɛ́ é klán gbe xá mǐ ɖó gǎn e dó wɛ mǐ ɖe bo ná sɛn Jehovah é wú ɔ, mǐ nɔ kpo ɖo wǎn yí nú yě wɛ, amɔ̌, mǐ nɔ tuun ɖɔ Mawu wɛ mǐ ɖó ná tó yí wǎn ná hwɛ̌.

É ɖo wɛn ɖɔ gbeklánxámɛ xwédo tɔn sixú vɛ́ wǔ tawun. É ɖo mɔ̌ có, ahwanvú Jezu tɔn lɛ́ ɖó ná kpo ɖo xó tɔn élɔ́ lɛ́ hɛn d’ayi mɛ wɛ: “Mɛ e ma ɖíɖá [yatín] tɔn, bo jɛ gǔdo ce ǎ ɔ, mɛ énɛ́ jɛxá ná nyí ahwanvú ce ǎ.” (Mat. 10:38) Ðo xógbe ɖěvo mɛ ɔ, Klisánwun lɛ́ nɔ mɔ ɖɔ gbe e klán xá yě wɛ mɛ e ɖo xwédo yětɔn mɛ lɛ́ é ɖe é ɔ, wǔvɛ́ e nu ahwanvú Klísu tɔn lɛ́ nɔ dɛ ɖe kpó jlǒ kpó é ɖokpó wɛ é nyí. Ðo hwe ɖokpó ɔ nu ɔ, yě nɔ ɖó nukún ɖɔ zǐnzán ɖagbe yětɔn lɛ́ ná sísɛ́ mɛ e ɖo xwédo yětɔn mɛ bo ma nyí nǔɖitɔ́ ǎ lɛ́ é bɔ yě ná ɖyɔ́ linlin, lobo wá kplɔ́n Biblu.—1 Pi. 3:1, 2.