Jesus aa zuvarisa ombuze yohange. Posi yokutja otjikando tjimwe wa raera ovaapostele ve na tja: “Amu tjangovasi Ami mbe era okueta ohange mouye. Indee uri, Ami hi ere okueta ohange, nungwari mbe era okueta engaruvyo. Ami mba yendera okutwa omuna kumwe na ihe, omukazona kumwe na ina, omusuko omukwe kumwe na ina omukwe.” (Mat. 10:34, 35) Hapo Jesus aa hee tjike?

Jesus kaa vanga okuhaṋa ouṋepo meṱunḓu, posi yokutja aa tjiwa kutja omahongero we maye eta ohaṋi momaṱunḓu tjiva. Ku nao, imba mbe vanga okurira ovahongewa va Kristus nokupapitisiwa, mave hepa okutjiwa kutja povikando tjiva ouṋepo womaṱunḓu wawo kamaau kara nohange mena romukambo mbu va toora. Indu umwe wovakupasane, ngu he ri Omuhongonone wa Jehova, na varwe meṱunḓu mbe he ri Ovahongonone va Jehova tji mave ve pirukire, mape ya ave tjiti kutja ave ha rire ovaṱakame komahongero wa Kristus.

Ombeibela i tunduuza Ovakriste okukara “nohange novandu avehe.” (Rom. 12:18) Posi yokutja, omahongero wa Jesus ye yenena okurira otja “engaruvyo” momaṱunḓu tjiva. Iho tji tjitwa indu okaṋepo keṱunḓu tji ka yakura omahongero wa Jesus, ngunda varwe meṱunḓu amave pirukire omahongero ngo. Indu tji pa tjitwa nao, ouṋepo weṱunḓu u rira “ovanavita” va ingwi ngu me rihongo ouatjiri.—Mat. 10:36.

Ovahongewa va Kristus mbe kara pu nomaṱunḓu wawo mbe he ri Ovahongonone va Jehova, povikando tjiva mave hepa okutya kutja mave yorokisa Jehova na Jesus, poo mave yorokisa omaṱunḓu wawo. Otjotjihorera, omaṱunḓu wawo nge ha karere Jehova mape ya aye ve ṋiṋikiza okukara norupa momazemburukiro womikandi vyouye. Indu tji pa kara nao, owo mave sokutya kutja ouṋe ngu mave vanga okuyorokisa. Jesus wa tja: “Auhe ngwa suvera ihe na ina okukapita Ami ka pwire okurira omuhongewa wandje.” (Mat. 10:37) Jesus kaa hee kutja, kokutja u rire omuhongewa we, ove ko sokusuvera ovanene voye tjinene. Nungwari, ee ve hongo kutja ve toorere ko omukambo ku imbi mbi ri ovinanḓengu tjinene mehupo rawo. Indu ouṋepo weṱunḓu retu mbe he ri Ovahongonone va Jehova, tji mave pirukire ongondjero yetu yokurikotamena ku Jehova, eṱe matu kayenda komurungu okuvesuvera. Posi yokutja, eṱe tu tjiwa kutja matu sokusuvera Jehova okukapita omaṱunḓu wetu.

Otjiperi kutja okupirukirwa i yeṱunḓu otjiṋa otjihihamise. Posi yokutja ovahongewa va Jesus mave sokuzemburuka omambo we nga: “Ngu hi nokutoora [omuti we wondatumisire, NW] na kongorere Ami ka pwire okurira omuhongewa wandje.” (Mat. 10:38) Ku nao, Ovakriste ve vara okupirukirwa i yeṱunḓu otjorupa rwondatumisire ovahongewa va Kristus ndji ve sokuyakura nonḓero. Nungwari, owo ve undjira ko kutja ongaro yawo ombwa mai hingi ouṋepo weṱunḓu mbe he ri Ovahongonone va Jehova, okurundurura omeripura wawo nokuvanga okurihonga ombuze yOmbeibela.—1 Petr. 3:1, 2.