Jizɔs bin de tich pipul dɛn aw fɔ gɛt pis wit ɔda pipul dɛn. Bɔt wan tɛm, i bin tɛl in apɔsul dɛn se: “Una nɔ tink se a kam fɔ mek pis na di wɔl; a nɔ kam fɔ mek pis, na sɔd a kam wit. A kam fɔ mek wanwɔd nɔ de, bɔypikin go de agens in papa, galpikin go de agens in mama, ɛn dɔtɛnlɔ go de agens in mɔdɛnlɔ.” (Mat. 10:​34, 35) Wetin Jizɔs bin min?

Jizɔs nɔ bin want fɔ mek famili dɛn skata, bɔt i bin no se di tin dɛn we i de tich go mek sɔm famili dɛn nɔ gɛt wanwɔd. So di wan dɛn we want fɔ bi Krays in disaypul ɛn baptayz nid fɔ ɔndastand se sɔntɛm dɛn fambul dɛn nɔ go gladi fɔ wetin dɛn disayd. Sɔntɛnde, dɛn man ɔ wɛf ɔ ɔda pɔsin na di famili kin de agens dɛn, ɛn dɛn kin mek i nɔ izi fɔ lɛ dɛn kɔntinyu fɔ fetful to di tin dɛn we Krays de tich.

Di Baybul ɛnkɔrej Kristian dɛn fɔ “gɛt pis wit ɔlman.” (Rom. 12:​18) Bɔt di tin dɛn we Jizɔs de tich go tan lɛk “sɔd” na sɔm famili dɛn. Dis kin apin we wan pɔsin na di famili gri fɔ fala di tin dɛn we Jizɔs de tich ɛn ɔda wan dɛn de agens di tin dɛn we Jizɔs de tich. If dat apin, di wan dɛn we de na di famili go mek dɛnsɛf as ɛnimi to di wan we de lan di trut.—Mat. 10:​36.

Sɔntɛnde, Jizɔs in disaypul dɛn we de wit dɛn fambul dɛn we de na ɔda rilijɔn go gɛt fɔ disayd if dɛn go du wetin go mek Jiova ɛn Jizɔs gladi ɔ dɛn go du wetin go mek dɛn famili gladi. Fɔ ɛgzampul, sɔntɛm dɛn fambul dɛn go tray fɔ fos dɛn fɔ sɛlibret wan pan dɛn ɔlide dɛn. We dis apin, udat dɛn go want fɔ mek i gladi? Jizɔs bin se: “Ɛnibɔdi we lɛk in mama ɔ papa pas mi nɔ fit fɔ bi mi disaypul.” (Mat. 10:​37) As wi no, Jizɔs nɔ de se fɔ mek pɔsin go fit fɔ bi in disaypul, i nɔ fɔ lɛk in mama ɛn papa bɛtɛ. Bɔt i bin de tich dɛn aw fɔ disayd wetin na di tin dɛn we impɔtant pas ɔl ɔda tin na dɛn layf. If wi fambul dɛn we nɔ de sav Jiova de agens di tin dɛn we wi de du fɔ wɔship Jiova, wi go kɔntinyu fɔ lɛk dɛn, bɔt wi no se di lɛk we wi lɛk Gɔd na in fɔ kam fɔs.

Wan dawt nɔ de se we wi famili dɛn de agens wi, dat kin mek wi nɔ gladi. Bɔt stil, Jizɔs in disaypul dɛn fɔ mɛmba in wɔd dɛn we i se: “Ɛnibɔdi we nɔ want fɔ tot in tik we i go sɔfa pan ɛn fala mi nɔ fit fɔ bi mi disaypul.” (Mat. 10:​38) Dis min se Kristian dɛn de si se we dɛn famili dɛn de agens dɛn, dat na pat pan di sɔfanɛs we Jizɔs bin se in disaypul dɛn fɔ rɛdi fɔ bia. Bɔt dɛn de op se bikɔs dɛn de biev fayn, dɛn famili go chenj dɛn maynd ɛn want fɔ lan bɔt di Baybul in mɛsej.—1 Pit. 3:​1, 2.