Yesu ddingʉeri ndrŭ dho ndrŭ di ngoi nji ndima kana. Ro ke pongʉeri i ndi unakpa dho: “Nzɨ ni ddiri ma si ngoi bbʉdha dho d’z djo; ro ma si ndiro, nga ma bbʉ ngoi ri, ro sà d’e. Føri dho ma si ndiro ma li ndóndo kpetsi ke ma kana ndidzá baba na ndirigoti singba ngba ma kana ndidzá mama na, ndirigoti møle ma kana le-dja na d’e.” (Mt. 10:34, 35) Føri ká ngʉe ngbà Yesu ripo ri?

Yesu nzɨ ngʉ riji ndi ndó familia nǎ ndrŭ ka nanga ri, ro ke chungʉeri chu nari kʉ ndidhó mafundisho ka si ndóndo li familia nǎ ndrŭ kana. Føri dho njati ddikpa ke jiri ndi é Yesu unake ndirigoti ndi ba batiso ró, kedho ringani ndi é tayari ndi vʉ nanga ná lo dhi matokeo dho. Nja saa na, kpa lai ndoa kpa chi ná le inga kpa dhó familia nǎ ndrŭ ka ndima li upinzani kpa tso ro ndirigoti ndima liri rie kpakpa kpa dho kpa tøni chi Kristo dzá mafundisho dho.

Biblia adi rija Wakristo dho kpa di “ngoi nji krʉ ndrŭ na.” (Ro. 12:​18) Ro njaro Yesu dzá mafundisho ka ndi ngʉ “sà bbai” nja kʉ ná familia nǎ ndrŭ dho. Fø lo adi ngaba njati familia nǎ ddikpa ke u Yesu dhó mafundisho u, ro nja ndrŭ di fø lo gʉgʉ ró. Fø saa na familia nǎ ndrŭ nganga adi ngʉ “mbubai” bbʉbbʉlo jifunza ná ke dho.​—Mt. 10:36.

Kristo unakpa kʉ nǎ ná familia é njonjo ndima dhó dini kʉ ro ró, kpa ka ndima vʉ ndima ká nji Yova ma Yesu ma na dho bbʉ hwè ná lo inga ndima dhó familia nǎ ndrŭ dho bbʉ hwè ná lo nari nanga. Loroji na, kpadhó familia nǎ nzá u Yova ná ndrŭ ka ndima cho kpa ndiro kpa má dini nǎ bbobbo ddo d‘e, fø saa na kpadho ringani “ndima vʉ ndima ká bbʉ hwè ie dho ma nari nanga.” Yesu pongʉeri ɨ: “Ddikpa ke é jidha na bbo ndidzá baba dho inga ndidzá mama dho ma djolu ró, fø ke nzá ka ma dho ri.” (Mt. 10:37) Bbʉbbʉ dhé, Yesu nzɨ ngʉ ripo, ndi unakpa dho ringani ndima ji ndima dhi gø dhi ndrŭ sese ri. Ke ngʉ ngbaribbai ma kpa ka ndima vʉ bbo na mana kʉ ná lo nanga ndima dhó maisha nǎ nari ngaddi kpa dho. Njati kodhó familia nǎ nzá u Yova ná ndrŭ di upinzani ma nji Yova dho ko bbʉ ná madha tso ró ró, ringani ko ji kpa ji dhé, ro ko churi nari kʉ Mungu le ji nari kʉ bbo na mana kʉ ná lo.

Bbʉbbʉ dhé, kodhó familia di pingana ko na nari ka ndi bbʉ njedha bbo ko dho. Yesu unakpa dho ringani ndima nó ke pongʉe ná i lo nga: “Ddikpa ke ú ndidhó nzadha dhi tsú nzá ndirigoti ndi dyø ma nzá ró, fø ke ro nzá ka ma dho ri.” (Mt. 10:38) Nja lo nǎ, Wakristo dho ringani ndima nja ndima dhó familia dhó ro si ná upinzani ngbà na Yesu unakpa ka ndima bani nari. Ro kpa kʉ na ná ngab’odha kʉ ndima dhó bblo nyí dzá lo dho, ndima dhó familia nǎ ndrŭ ka ndima si ndima dhó ngaddidha thika ø ngbà ndirigoti ndima jiri ndima jifunza Biblia nǎ lo.​—1 Pe. 3:1, 2.