ຄຳຖາມຈາກຜູ້ອ່ານ
ພະເຢຊູໝາຍຄວາມວ່າແນວໃດເມື່ອເພິ່ນເວົ້າວ່າ: “ຢ່າຄິດວ່າຂ້ອຍມາເຮັດໃຫ້ໂລກສະຫງົບສຸກ.”
ພະເຢຊູສອນເຮົາໃຫ້ສ້າງສັນຕິສຸກກັບຄົນອື່ນ. ແຕ່ມີເທື່ອໜຶ່ງເພິ່ນບອກພວກລູກສິດວ່າ: “ຢ່າຄິດວ່າຂ້ອຍມາເຮັດໃຫ້ໂລກສະຫງົບສຸກ ຂ້ອຍບໍ່ໄດ້ມາເຮັດໃຫ້ເກີດຄວາມສະຫງົບສຸກ ແຕ່ມາເພື່ອເຮັດໃຫ້ແຕກແຍກ. ຂ້ອຍມາເຮັດໃຫ້ເກີດຄວາມແຕກແຍກລະຫວ່າງລູກຊາຍກັບພໍ່ ລູກສາວກັບແມ່ ແລະລູກໃພ້ກັບແມ່ຍ່າ.” (ມທ. 10:34, 35) ພະເຢຊູໝາຍຄວາມວ່າແນວໃດ?
ພະເຢຊູບໍ່ໄດ້ຢາກໃຫ້ຄອບຄົວແຕກແຍກກັນ. ແຕ່ເພິ່ນຮູ້ວ່າສິ່ງທີ່ເພິ່ນສອນຈະເຮັດໃຫ້ບາງຄອບຄົວແຕກແຍກກັນ. ດັ່ງນັ້ນ ຜູ້ທີ່ຢາກມາເປັນລູກສິດຂອງເພິ່ນແລະຮັບບັບເຕມາຕ້ອງເຂົ້າໃຈວ່າເຂົາເຈົ້າອາດຈະເຈິບັນຫາແບບນີ້ເມື່ອຕັດສິນໃຈເຂົ້າມາເປັນຄລິດສະຕຽນ. ຖ້າເຂົາເຈົ້າຖືກຕໍ່ຕ້ານຈາກຜົວຫຼືເມຍຫຼືຄົນອື່ນໆທີ່ບໍ່ມີຄວາມເຊື່ອ ມັນກໍຍາກທີ່ເຂົາເຈົ້າຈະເຮັດຕາມຄຳສອນຂອງພະເຢຊູ.
ຄຳພີໄບເບິນບອກໃຫ້ຄລິດສະຕຽນ “ຢູ່ຢ່າງສະຫງົບສຸກກັບທຸກຄົນ.” (ຣມ. 12:18) ແຕ່ຄຳສອນຂອງພະເຢຊູສາມາດປຽບຄືກັບ “ດາບ” ທີ່ເຮັດໃຫ້ບາງຄອບຄົວແຕກແຍກກັນ ເຊັ່ນ: ຖ້າຄົນໜຶ່ງໃນຄອບຄົວຍອມຮັບຄຳສອນຂອງພະເຢຊູ ແຕ່ຄົນອື່ນໆພັດບໍ່ຍອມຮັບແລະຕໍ່ຕ້ານ. ເມື່ອເປັນແບບນີ້ຄົນໃນຄອບຄົວກໍຈະເປັນ “ສັດຕູ” ກັນ.—ມທ. 10:36
ບາງເທື່ອຜູ້ທີ່ເປັນຄລິດສະຕຽນເຊິ່ງຢູ່ໃນຄອບຄົວທີ່ບໍ່ມີຄວາມເຊື່ອດຽວກັນກໍຕ້ອງໄດ້ຕັດສິນໃຈວ່າ ເຂົາເຈົ້າຈະເຮັດໃຫ້ພະເຢໂຫວາແລະພະເຢຊູພໍໃຈຫຼືຈະເຮັດໃຫ້ຍາດພີ່ນ້ອງພໍໃຈ. ຕົວຢ່າງເຊັ່ນ: ຍາດພີ່ນ້ອງທີ່ບໍ່ມີຄວາມເຊື່ອອາດຈະພະຍາຍາມບອກເຮົາໃຫ້ໄປເຂົ້າຮ່ວມການສະຫຼອງບຸນແລະເທດສະການຕ່າງໆ. ເມື່ອເປັນແບບນີ້ເຮົາຕ້ອງເລືອກວ່າຈະເຮັດໃຫ້ຜູ້ໃດພໍໃຈ. ພະເຢຊູບອກວ່າ: “ຄົນທີ່ຮັກພໍ່ແມ່ຫຼາຍກວ່າຂ້ອຍກໍບໍ່ເໝາະສົມທີ່ຈະເປັນລູກສິດຂອງຂ້ອຍ.” (ມທ. 10:37) ພະເຢຊູບໍ່ໄດ້ໝາຍຄວາມວ່າເພື່ອຈະເປັນລູກສິດຂອງເພິ່ນ ເຮົາຕ້ອງຮັກພໍ່ແມ່ໜ້ອຍລົງ ແຕ່ເພິ່ນສອນເຮົາໃຫ້ຮູ້ວ່າສິ່ງໃດສຳຄັນທີ່ສຸດໃນຊີວິດ. ຖ້າຄົນໃນຄອບຄົວທີ່ບໍ່ມີຄວາມເຊື່ອຕໍ່ຕ້ານເຮົາຍ້ອນວ່າເຮົານະມັດສະການພະເຢໂຫວາ ເຮົາກໍຈະຍັງຮັກເຂົາເຈົ້າຄືເກົ່າ ແຕ່ເຮົາຕ້ອງຮັກພະເຢໂຫວາຫຼາຍກວ່າ.
ການຕໍ່ຕ້ານຈາກຄອບຄົວເຮັດໃຫ້ເຮົາເສຍໃຈຫຼາຍແທ້ໆ. ແຕ່ຂໍໃຫ້ຈື່ສິ່ງທີ່ພະເຢຊູເວົ້າກັບລູກສິດຂອງເພິ່ນວ່າ: “ຄົນທີ່ບໍ່ຍອມແບກເສົາທໍລະມານຂອງຕົວເອງແລະຕິດຕາມຂ້ອຍກໍບໍ່ເໝາະສົມທີ່ຈະເປັນລູກສິດຂອງຂ້ອຍ.” (ມທ. 10:38) ຄລິດສະຕຽນຕ້ອງເຂົ້າໃຈວ່າ ການຕໍ່ຕ້ານຈາກຄອບຄົວເປັນບັນຫາຢ່າງໜຶ່ງທີ່ຄລິດສະຕຽນຈະຕ້ອງເຈິ. ແຕ່ເຮົາກໍຫວັງວ່າການປະພຶດທີ່ດີຂອງເຮົາຈະເຮັດໃຫ້ຄົນໃນຄອບຄົວທີ່ບໍ່ມີຄວາມເຊື່ອຢາກຮຽນຮູ້ຄວາມຈິງໃນຄຳພີໄບເບິນຫຼາຍຂຶ້ນ.—1 ປຕ. 3:1, 2