Yesu wādi usapula musapu wa ndoe. Inoko difuku dimo wāsapwidile batumibwa bandi amba: “Kemwakilangai amba naile kuleta ndoe pano pa ntanda; nkyailepo kuleta ndoe, ino i kipete. Mwanda naile kuleta nkalañani, pa bukata bwa mwana-mulume na shandi, ne mwana mwana-mukaji na inandi, kadi muko mwana-mukaji nandi na inandi muko.” (Mat. 10:34, 35) Le Yesu wādi usaka kunena bika?

Yesu kādipo usaka kukalañanya bantu ba mu kisaka, inoko wāyukile amba bufundiji bwandi bukakalañanya bisaka bimo. Nanshi, boba basaka kwikala bana ba bwanga ba Kidishitu ne kubatyijibwa, basakilwa kwivwanija’mba kyaba kimo bantu ba mu kisaka kebakasangelapo butyibi bwabo. Kyaba kimo, benē pabo nansha bantu bakwabo mu kisaka badi ba kwibalwa ne kulengeja bībekadile bikomo kukōkela bufundiji bwa Kidishitu.

Bible ukankamika bene Kidishitu bekale “mu ndoe na bantu bonso.” (Loma 12:18) Inoko bufundiji bwa Yesu bubwanya kwikala pamo bwa “kipete” mu bisaka bimo. Kino kilongekanga shi muntu umo mu kisaka waitabija bufundiji bwa Yesu, inoko bakwabo abebupele nansha kwanza kwibulwa. Mu uno muswelo, babutule​—ko kunena’mba boba botushikete nabo mu njibo​—beloñanga abo bene ke “balwana” na yewa wifunda bubine.​—Mat. 10:36.

Bana ba bwanga ba Kidishitu bashikete mu njibo mudi mitōtelo mishileshile, batanwanga kyaba kimo na myanda itūla buswe bobasenswe Yehova ne Yesu pa ditompo. Kimfwa, muntu wa mu kisaka wampikwa kwitabija ubwanya kukimba kwibaningila bafete fetyi ya kipwilo. Shi abatompibwa namino, banenwe kutonga i ani obakasangaja. Yesu wānenene amba: “Yewa ense usenswe bininge mwana mwana-mulume nansha mwana mwana-mukaji kuntabuka kamfwaninwepo ami.” (Mat. 10:37) Inoko Yesu kādipo usaka kunena’mba bandi bana ba bwanga pa kumufwaninwa, badi bafwaninwe kusanswa bityetye bambutwile babo. Aye wādi wibafundija mwa kuyukila bintu bya mvubu mu būmi bwabo. Shi ba mu kyetu kisaka bampikwa kwitabija betulwa pa bukomo botulonga bwa kutōta Yehova, twendelelanga kwibasanswa. Inoko tuyukanga’mba buswe botusenswe Leza, bufwaninwe kwikala pa kifuko kibajinji.

Na bubine, bibwanya kwitusansa bininge shi ba mu kyetu kisaka betulwa. Inoko bana ba bwanga ba Yesu bavulukanga binenwa byandi bya amba: “Yewa ense ketabijapo mutyi wandi wa masusu ne kunonda kamfwaninwepo ami.” (Mat. 10:38) Mu muneneno mukwabo, bene Kidishitu bamonanga kulwibwa na ba mu kisaka bu kubadilwa mu masusu etabijanga bana ba bwanga ba Kidishitu na mutyima tō. Inoko kadi bakulupilanga’mba, mwiendelejo wabo muyampe ubwanya kulengeja ba mu kisaka bampikwa kwitabija bashinte milangwe yabo ne kusaka kwifunda musapu wa mu Bible.​—1 Pe. 3:1, 2.