Jesús tamachtij ke moneki kuali timouikaskej iniuan nochin. Sayoj ke se tonal kiniluij itatitaniluan: “Amo xiknemilikan ke niualaj para maj nochin kuali mouikakan, ta niualaj ika se machete tein ojkan tenej tein kichiuas maj nochin moxexelokan. Porin nikchiuako maj moxexelokan. Okichpil kiixnamikis itat, siuapil kiixnamikis inan uan tesiuamon kiixnamikis imonan” (Mat. 10:34, 35, TNM). ¿Toni kijtosneki nejin?

Maski Jesús amo kinekia maj kalyetouanij moxexelokan, kimatia ke tein tamachtij ueliskia kichiuas maj pano nejon. Yejua ika, akin kinekij moauiskej moneki kielnamikiskej ke nejon uelis panos. Nejin uelis kichiuas maj ouij kinkisa kichiuaskej kemej Jesús, okachiok komo kinixnamiki ininnamik oso okse ininchankauj.

Biblia techiluia: “Xiyolseujkanemikan iniuan nochin” (Rom. 12:18, TNM). Tein Jesús tamachtij uelis mochiuas kemej se “machete tein ojkan tenej” porin keman aksa peua momachtia Biblia, ichankauan xa amo kinekiskej momachtiskej oso hasta kiixnamikiskej. Ichankauan kitauelitaskej porin momachtia Biblia (Mat. 10:36).

Komo se tokniuj nemi iniuan ichankauan akin amo itaixpantijkauan Jiova, kemansa monekis kinextis ox yekmelauj kitasojta Jiova uan Jesús. Ichankauan xa kinekiskej maj iniuan iluiti uan yejua moneki kiixpejpenas akoni kineki kiyolpaktis. Jesús kijtoj: “Amo kinamikis de ke ma pouiske nouan ne tekoneuan taneltokani komo kachi kintasojtaj itat uan inan” (Mat. 10:37). Tein Jesús kijtoj amo kijtosneki ke amo moneki tikintasojtaskej tochankauan, ta tiksentokaj tikintasojtaj. Sayoj ke okachi moneki tiktasojtaskej Jiova.

Semi techyolkokoua keman tochankauan techixnamikij, sayoj ke tikelnamikij tein Jesús kijtoj: “Akin amo kineki tajyouis uan nechtojtokas, amo kinamiki yeski nomomachtijkauj” (Mat. 10:38, TNM). Tikmatij ke komo tiknekij timochiuaskej imomachtijkauan Jesús tikijyouiskej miak taman. Kemej neskayot, tochankauan xa techixnamikiskej. Sayoj ke komo timochikauaj tikchiuaskej tein kuali, uelis kinpaleuis maj kinekikan momachtiskej Biblia (1 Ped. 3:1, 2).