No ifahaʼö ita Yesu enaʼö tarorogö waʼatulö ba niha böʼö. Hizaʼi, no irai iwaʼö khö ndra sinengenia, imane, ”Böi miwaʼö tödömi, ba wolohe faʼatulö ba gulidanö wa möi ndraʼo. Tohare ndraʼo ba wolohe föda, tenga ba wolohe faʼatulö. Wa möi ndraʼo, ba wangaʼasogö faʼudusa: ono matua ilawa namania, ono alawe ilawa ninania, ba umönö ira alawe ilawa ninania matuania.” (Mat. 10:34, 35) Hadia geluaha niwaʼö Yesu andrö?

Tenga daʼö geluaha niwaʼö Yesu enaʼö aboto wahasara dödö ba zi sambua omo. Hizaʼi, aboto ba dödönia wa tola tobali famoto wahasara dödö ba zi sambua omo wamahaʼö nifaʼemania. Börö daʼö, niha somasi tobali nifahaʼö Keriso ba tebayagö idanö, moguna aboto ba dödönia wa tola manö fatuwu khönia nösi nomonia börö gangetula nihalönia. Tola manö laʼuduni ia ösi nomonia mazui foʼomonia si tenga si sara lala wamati, irege abua khönia wangoromaʼö faʼalöfaröi ba woloʼö famahaʼö Keriso.

Iwaʼö Sura Niʼamoniʼö ba niha Keriso enaʼö ’lagohi waʼatulö ba niha fefu’. (Rom. 12:18) Hizaʼi, itaria hulö ’wöda’ wamahaʼö Yesu andrö yomo ba nomo. Tola alua daʼa, na so nösi nomo sanemaʼö famahaʼö Yesu, ba so göi danö böʼö zi lö omasi mazui fatuwu ira. Na daʼö zalua, ösi nomo si fatuwu andrö tobali ia ’udu’ ba niha samahaʼö yaʼia ba zindruhu.—Mat. 10:36.

Itaria, tetandraigö waʼomasi ndra nifahaʼö Keriso khö Yehowa hegöi Yesu börö me so nösi nomora si tenga si sara lala wamati khöra. Duma-dumania, so ösa nösi nomora samaso yaʼira wefao ba gowasa si lö tefaudu ba zomasi Yehowa. Na alua zimane daʼö, moguna latatugöi haniha zabölö laʼomusoiʼö tödö. Imane Yesu, ”Haniha zabölö mangomasiʼö amania mazui inania moroi ba wangomasiʼönia yaʼo, tenga sinangea tobali ia nifahaʼögu.” (Mat. 10:37) Tatu manö, tenga daʼö geluaha wehede Yesu wa tebai taʼomasiʼö sibai ndra satuada na no tobali ita nifahaʼönia. Omasi ia ifahaʼö ita haniha zabölö taʼofönaiʼö. Hewaʼae fatuwu nösi nomoda börö me tafosumange Yehowa, böi tebulö taʼomasiʼö ira. Hizaʼi, moguna taʼofönaiʼö wangomasiʼö Yehowa.

Sindruhu sa, abu dödöda na göna ita folohi moroi ba nösi nomoda. Hizaʼi, yaʼita nifahaʼö Yesu, moguna tatörö tödöda wehede daʼa: ”Haniha zi lö manehegö tefakao ia ba woloʼö yaʼo, tenga sinangea tobali ia nifahaʼögu.” (Mat. 10:38) Börö daʼö, latehegö göna ira folohi moroi ba nösi nomora börö me laʼila wa no sambua famakao daʼö si lö tola löʼö latemaʼö ira nifahaʼö Keriso. Hewaʼae simane daʼö, manötöna ira wa tola dania samuza inötö tebulö wangera-ngera nösi nomora ba terou dödöra wamahaʼö yaʼira ba Zura Niʼamoniʼö.—1 Fe. 3:1, 2.