Jesusca tucuicunahuan alli apanacungapaj esforzarichunmi yachachirca. Pero shuj cutinca Jesusca paipaj discipulocunamanca: “Cai allpaman sumaj causaita apamushcataca ama yuyaichijchu. Sumaj causai tiyachunca mana shamurcanichu. Ashtahuanpish pꞌiñanacuicuna tiyachunmi shamurcani. Ñucaca familia ucupi pꞌiñanacuicuna tiyachunmi shamurcani. Churica yayapaj contra, ushushica mamapaj contra, nueraca suegrapaj contrami tucunga” nircami (Mateo 10:34, 35).

Jesusca familiacuna separarichunca mana munarcachu. Pero paita catisha nijpi, bautizarisha nijpica chaita ama rurachunmi tal vez familiacunaca jarcangacuna. Jesusca familiacuna jarcaita churanataca allimi yacharca, chaimi achcacunapajca Jesusta catinaca sinchi ricuringa.

Romanos 12:18-pica: ‘Tucuicunahuan sumajta causaichij’ ninmi. Shinapish maipica Jesusmanta pi yachajpica tucui familiacunaca Jesusmantaca mana yachasha nincunachu. Huaquinpicarin achca jarcaicunatami churancuna. Chaimantami achcacunapajca chai jarcaicunaca shuj espada laya can. Jesusca: ‘Quiquin huasi ucullapitaj causajcunami cancunapaj contra tucunga’ nircami (Mateo 10:36).

Jesusta catijcunaca maipica shujtaj religionta charij familiacunahuanmi causancuna. Chai familiacunaca huaquinpica yanga fiestacunata rurashpami causancuna. Chai yanga fiestacunapi participachun nijpica Jesusta catijcunaca paicunapaj familiata cazunata o Yayitu Diosta cazunatami agllana cancuna. Jesusca: “Maijanpish paipaj yayata, mamata ñucata yalli cꞌuyajca ñucataca mana cati tucunchu” nircami (Mateo 10:37). Jesusca cai shimicunata nishpaca paicunapaj yaya mamata mana cꞌuyanataca mana nircachu. Ashtahuanpish paica familiata punta lugarpi churanapaj randica Yayitu Jehová Diosta punta lugarpi churana cashcatami nicurca. Chaimantami familiacuna jarcaicunata churajpipish paicunata cꞌuyashpa catinchij. Shinapish Yayitu Diosta punta lugarpi churanataca manataj saquinchijchu.

Ñucanchij propio familiacuna jarcaicunata churajpica ñucanchijpajca dimastij llaquimi can. Pero ñucanchijca Jesús ima nishcatami pajtachisha ninchij. Paica: “Ñucata catingapaj paipaj quiquin llaquichina caspita mana chasquijca ñucataca mana cati tucunchu” nircami (Mateo 10:38). Maipica Jesusta catisha nishpaca llaquicunata apana cashcata, ñucanchij familiapish ñucanchijpaj contra cana cashcataca allimi yachanchij. Paicuna chashna jarcajpipish ñucanchijca cꞌuyaita ricuchishpami catina canchij. Chashnami paicunaca shuj punllaca Bibliamanta yachasha ningacuna (1 Pedro 3:1, 2).