O Isus sicadea le manușen te aven andi pacea iech avereia. Cu sea cadala, iech data, vo phendea le apostolenghe: „Te na pachian că avilem te anav pacea pi phuv; ci avilem te anav pacea, tha sabia. Căci avilem te cherav holi mașcar o șiav hai o dad, mașcar i șei hai i dei hai mașcar i bori hai i sasui”. (Mat. 10:34, 35) So camlea o Isus te phenel?

Vo ci camlea te duriarel iech averestar le jenen andai familia, tha vo jianglea că lesche sicaimata va anena but nehachiarimata ande chichiva familii. Cadea că, codola cai camenas te aven lesche discipoli hai te bolen-pe, trebunas te hachiaren mișto so daștilas te avel cana alosarenas te cheren cadaia. Dacă lengo rrom sau rromni sau aver neamuri așenas lenghe contra, daștilas te cherel te avel lenghe pharo te încăren le sicaimata le Cristososche.

I Biblia sicavel le creștinen ‘te aven andi pacea savore manușența’. (Rom. 12:18) Tha, ande chichiva familii, le sicaimata le Isusosche daștin te aven sar iech sabia. Cadaia si cana iech jeno andai familia alosarel te încărel le sicaimata le Isusosche, the le coaver nici na camen te așunen-le. Cadea, le neamuri cai așen contra arăsăn „le dușmani” codolesche cai sichiol o ciacimos. (Mat. 10:36)

Le discipoli le Cristososche cai train ande iech chăr cai le jenen andai familia silen aver religia, sile șiute poiechdata andi situația te alosaren mașcar i iubirea anda o Iehova hai o Isus, hai i iubirea anda lenghi familia. Sar exemplo, le neamuri cai silen aver religia daștinas te cheren presiuni opral lende caște încăren iech anumime sărbătoarea. So alosarel te cherel iech discipolo le Cristososco va sicavela dacă camel te bucuril o ilo le Iehovasco sau te cherel so camen lesche neamuri. O Isus phendea: „Con iubil mai but pesche dades hai pesca deia sar man nai-lo lașio anda mande”. (Mat. 10:37) Si ciaces, o Isus ci camlea te phenel că lesche discipoli trebun te iubin mai țâra penghe daden caște aven lașe anda leste. Ando than te cherel cadaia, vo sicadea-le sar te alosaren save sas le buchia mai importanto anda lenghi viața. Dacă le neamuri cai ci silen sa codo pachiamos sar amen așen amenghe contra caște na mai slujisaras le Iehovasche, amen va avela te iubisaras-le vi mai dur, tha na mai but sar le Devles.

Si ciaces, cana i familia așel lenghe contra daștil te peravel-le zurales but. Cu sea cadala, le discipoli le Isusosche trebun te anen ande penghi goghi so phendea lenghe vo: „Con ci lel pesco stâlpo de tortură hai ci avel pala mande ci silo lașio anda mande”. (Mat. 10:38) Daisaras te phenas că atunci cana alosaren te aven discipoli le Cristososche, von ajucăren-pe ca i familia te așel lenghe contra hai jianen că i duch cai anel-la lenghe cadaia cherel partea anda le pharimata prin save nachen le Devlesche manușa. Cu sea cadala, von ajucăren ca, prin lengo lașio phiraimos, te cheren vi avere jenen anda lenghi familia te paruven-pe hai te camen te prinjianen mai but buchia andai Biblia. (1 Pet. 3:1, 2)