Yezu akag’iyaliza omwanzi gw’omurhûla. Cikoki lusiku luguma abwira entumwa zage ntya: “Murhamanyaga mpu murhûla nal’ilerha en’igulu; ntal’ilerha murhûla, ci ngorho. Bulya nal’irhenza omuntu kul’ishe, n’omunyere kuli nnina, n’omuhya kuli nnazala.” (Mt. 10:34, 35) Bici Yezu alonzagya okuderha?

Yezu arhal’ilonzize okujira abantu b’omu mulala bagabikanemwo, cikone al’imanyire oku enyigirizo zage zakadwirhe akashababe omu milala miguma na miguma. Co cirhumire, abalonzize okuba banafunzi ba Kristu n’okubatizibwa bashinganine bahugûkwe oku hali amango abantu b’omu mulala barhakashagalukira ogo muhigo gwabo. Erhi omuntu akahagalikwa n’iba erhi na mukage orhali Muhamirizi wa Yehova erhi n’abandi bantu b’omu mulala, oko kwanarhuma kwaba kuzibu kuli ye okuba mwishwekerezi oku nyigirizo za Kristu.

Ebibliya ehîre Abakristu omurhima oku bacisêze ‘okuba n’omurhûla n’abantu boshi.’ (Rm. 12:18) Cikone, enyigirizo za Yezu zanaba nka “ngorho” omu milala milebe. Binabe ntyo erhi muntu muguma omu mulala akayemera enyigirizo za Yezu cikone abandi bohe bazilahire. Omu kanga ka ntyo, abantu b’omulala, erhi b’omu nyumpa, banacijire ‘bashombanyi’ b’olya oli wayiga okuli.​—Mt. 10:36.

Abanafunzi ba Kristu balamire omu mulala abantu bagwerhemwo erindi idîni, banacishoga erhi bajira ebyashagalusa Yehova na Yezu erhi ebyashagalusa abantu b’omu mulala gwabo. Kwa lwiganyo, abantu b’omu mulala barhali Bahamirizi ba Yehova banalonza okubasêza oku bacilunge haguma nabo omu kujira lusiku lukulu lulebe lugwerhe olushangi n’idîni. Omu kanga kantyo, bashinganine okucishonga ndi basimisa. Yezu adesire ntya: “Ozigira ishe erhi nnina kundusha, arhankwanini.” (Mt. 10:37) Yezu arhalonzagya okuderha oku, mpu lyo rhuba banafunzi bage rhurhashinganini okuzigira ababusi birhu bwenene. Cikone, alonzagya okubayigiriza gurhi bakacishogamwo ebintu by’obulagirire bwenene omu kalamo kabo. Erhi abantu b’omu mulala gwirhu barhali Bahamirizi ba Yehova bakarhuhagalika lyo rhurhakoleraga Yehova rhunagendekere okubazigira, cikone rhunahugûkwe oku obuzigire bwirhu kuli Yehova bo bushinganine bube oku nafasi ya burhanzi.

Kobinali, okuhagalikwa n’abantu b’omu mulala kwanarhulumisa omurhima bwenene. Cikone, abanafunzi ba Yezu bashinganine bakakengera ezi nderho zage: “Ngasi muntu orhayemiri omurhi gwage gw’amalibuko n’okunkulikira arhanshinganini.” (Mt. 10:38, NWT) Omu zindi nderho, Abakristu banabone okuhagalikwa n’abantu b’omulala gwabo nka cigabi c’amalibuko abanafunzi ba Kristu bashinganine okulembera. Cikone banalangalire oku olugenzi lwabo lwinja lwanashumya abo bantu b’omu mulala gwabo barhali Bahamirizi ba Yehova bashanje entanya zabo bananayemere okuyiga Ebibliya.​—1 Pt. 3:1, 2.