Ja Jesús sjeʼakan ke tʼilan oj ajyukujtik lamanil. Pe bʼa jun ekʼele yala yabʼ ja snebʼumaniki: «Moka pensaraʼukex ta jak kaʼ ajyuk lamanil ja bʼa luʼumi; mini jak kaʼ ajyuk lamanil, kechani kʼumal. Yujni jak pilwanukon: ja uninali oj skontraʼuk ja stati, ja akʼixi oj skontraʼuk ja snani jaxa alibʼali oj skontraʼuk ja yalibʼ ixuk» (Mat. 10:34, 35). ¿Jas wa xkʼan yal ja it?

Ja Jesús mi skʼana oj spil ja pamilya, pe wani snaʼa ke bʼa jujuntik ekʼele ojni pilwanuk ja jas jak sjeʼi. Ja matik wa skʼanawe oj ochuke nebʼumanil sok oj yiʼe jaʼ tʼilani oj yaʼ tʼabʼan skʼujole ke bʼobʼta ja spamilya mini lek oj yil-e ja jasa oj stsaʼe skʼulajeli. Ja yuj, ta june wa x-ilji kontra yuja snupi, ma june ja bʼa spamilya, bʼobʼta masni wokol oj snoch tsʼikan lek ja sjejel yaʼa ja Kristo.

Ja Biblia wa xyala yabʼ ja snochumanik Kristo: «Ajyanik laman sok yibʼanal ja kristyano» (Rom. 12:18). Pe bʼobʼta ja jastik sjeʼa ja Jesús ‹kechani yaʼ kʼe kʼumal› sbʼa jujuntik pamilya. Ja it jani wa x-ekʼ yajni june ja bʼa pamilya wa snocho ja sjejel wa xyaʼa ja Jesús, jaxa ja tuk, mi skisawe ma asta wa xyilawe kontra. Ja spamilya, wa xkʼan kaltik ja matik teysok ‹bʼa yoj naʼits› wa xkʼot skontraʼuke yuja wane snebʼjel ja smeranili (Mat. 10:36).

Ja nebʼumanik bʼa Kristo bʼa teyesok ja spamilyaʼe bʼa pilan srelijyone, ay ekʼele wa stʼaspune wokolik bʼa wa x-och preba ja yajtanel yiʼoje bʼa Jyoba sok bʼa Jesús. Bʼobʼta ja spamilyaʼe wa xtʼenjiye bʼa oj skʼuluke jujuntik kʼinik bʼa relijyon. Pe ja bʼa ekʼeleʼik jaw, tʼilani oj stsaʼe ma oj yawe gustoʼaxuk. Ja Jesús yala: «Ja maʼ mas jel yaj wa xyila ja stat ma ja snan yuja keʼni mini sbʼajin oj kʼot jnebʼuman» (Mat. 10:37). Pe ja Jesús mini kʼan yal ke mixa oj syajtay ja snantat june maʼ wa skʼana oj kʼot snebʼumanil. Ja jasa wan sjejelyile, jani tʼilan oj snaʼe ja jas mas tʼilan ja bʼa sakʼanile. Ta jun jpamilyatik mi Testigoʼuk wa xyilawotike kontra yuja wa xkaʼteltaytik ja Jyoba, ja keʼntiki wani xyajtaytike, pe ja jas mas tʼilani jani ja yajtanel kiʼojtik soka Jyoba.

Yajni wa xyilawotike kontra ja jpamilyatik juni jasunuk jel yaj. Pe ja nebʼumanotik bʼa Jesús wani xkaʼa tʼabʼan jkʼujoltik ja yaljelik it: «Ja maʼ mi xyiʼaj ja sposte bʼa yijel wokol sok mi snochowon mini sbʼajin oj kʼot jnebʼuman» (Mat. 10:38). Ja yuj, ja nochumanotik bʼa Kristo wani xnaʼatik ke bʼa oj jnochtik ja Jesús tʼilani oj ajyukotik puesto bʼa yijel wokol, jastal wa x-ilwaniye kontra ja jpamilyatik. Pe wa xmajlaytik ke ja lekil jmodotiki oj koltajuke bʼa oj stukbʼes ja spensare sok bʼa oj kʼe snebʼ-e ja rason bʼa Biblia (1 Ped. 3:1, 2).