Jisas i skulim ol manmeri long stap wanbel wantaim narapela narapela. Tasol wanpela taim em i tokim ol aposel bilong em olsem: “Yupela i no ken ting mi kam bilong kamapim bel isi long graun, nogat. Mi no kam bilong kamapim bel isi, mi bringim bainat i kam. Mi kam bilong brukim lain, man bai birua long papa bilong em na pikinini meri bai birua long mama bilong em na tambu meri bai birua long tambu mama bilong em.” (Mat. 10:34, 35) Wanem insait bilong dispela tok bilong Jisas?

Jisas i no kam bilong seperetim ol lain insait long famili, tasol em i save olsem tok em i skulim ol man long en inap brukim sampela famili. Em as na ol manmeri husat i laik kamap disaipel bilong Krais na kisim baptais, ol i mas kliagut olsem sampela taim famili bilong ol bai i no amamas long disisen ol i mekim. Sapos poroman marit i no wanbilip o wanpela famili i no Witnes i birua long ol, em bai hatwok long ol i stap gut long ol tok em Krais i bin skulim ol long en.

Baibel i strongim olgeta Kristen long “stap wanbel wantaim olgeta man.” (Rom 12:18) Tasol ol tok Jisas i skulim ol man long en i ken kamap olsem “bainat” insait long ol famili. Dispela samting i save kamap taim wanpela long famili i kisim na bihainim ol tok Jisas i skulim ol man long en, tasol ol narapela long famili i sakim o birua long ol dispela tok. Long kain taim olsem, ol wanblut em ol wanhaus bilong man i wok long lainim tok i tru i kamap olsem “birua” bilong em.​—Mat. 10:36.

Ol disaipel bilong Krais em ol hap famili bilong ol i no Witnes, sampela taim ol samting i kamap insait long famili bilong ol na dispela i save traim pasin bilong ol long laikim Jehova na Jisas. Olsem, ating ol wanfamili i no Witnes inap kirapim ol long selebretim ol holide bilong lotu olsem Krismas. Taim kain traim i painim ol, ol bai amamasim husat? Jisas i tok: “Man i laikim tumas papa o mama na i no laikim mi moa yet, em i no fit long stap disaipel bilong mi.” (Mat. 10:37) Jisas i no tok man i laik kamap disaipel em i no ken laikim tumas papa o mama bilong em, nogat. Em i skulim ol long tingim wanem ol samting i bikpela samting moa long ol. Sapos ol wanfamili em ol i no Witnes i birua long yumi bikos long ol samting yumi mekim bilong lotuim Jehova, orait yumi ken wok yet long laikim ol, tasol yumi mas luksave olsem pasin bilong yumi long laikim God i mas i stap nambawan samting.

Tru tumas, taim famili i birua long yu, dispela inap mekim yu bel hevi tru. Maski i olsem, ol disaipel bilong Jisas i ken tingim gut tok Jisas i mekim olsem: “Man i no laik karim diwai pos bilong em yet na bihainim mi, em i no fit long stap disaipel bilong mi.” (Mat. 10:38) Olsem na ol Kristen i tingim pasin bilong wanfamili long birua long ol olsem wanpela hevi em ol disaipel bilong Krais i mas redi long karim. Na long wankain taim, ol i bilip olsem gutpela pasin bilong ol bai kirapim ol wanfamili em ol i no Witnes long lusim pasin ol i mekim na kisim save long ol tok bilong Baibel.​—1 Pita 3:1, 2.