Yesu o funza vhathu uri vha tea u vha na mulalo na vhaṅwe. Fhedzi ḽiṅwe ḓuvha o vhudza vhaapostola vhawe uri: “Ni songo humbula uri ndi khou ḓisa mulalo kha ḽifhasi; ndo ḓisa banga hu si mulalo. Ndo ḓa u fhandekanya vhathu, murwa u ḓo lwa na khotsi awe, ṅwananyana a lwa na mme awe, mazwale a lwa na mazwale wawe.” (Mat. 10:34, 35) Yesu o vha a tshi khou amba mini?

Yesu o vha a sa khou ṱoḓa u luṱanya miraḓo ya muṱa, fhedzi o vha a tshi zwi ḓivha uri zwine a khou zwi funza zwi nga fhambanya miṅwe miṱa. Ndi ngazwo vhane vha ṱoḓa u vha vhafunziwa vha Kristo na u lovhedzwa vha tshi tea u zwi pfesesa uri nga zwiṅwe zwifhinga mashaka avho ha nga takaleli phetho yavho. Nga zwiṅwe zwifhinga, mufarisi kana mashaka vha nga vha pikisa na u ita uri zwi vha konḓele u dzula vha tshi fhulufhedzea kha zwe Kristo a zwi funza.

Bivhili i ṱuṱuwedza Vhakriste uri vha “vhe na mulalo na vhathu vhoṱhe.” (Vharoma 12:18) Fhedzi zwine Yesu a zwi funza zwi nga nga “banga” kha miṅwe miṱa. Zwenezwi zwi itea musi muṅwe muraḓo wa muṱa a tshi ṱanganedza zwine Yesu a zwi funza ngeno vhaṅwe vha tshi zwi pikisa. Arali zwenezwo zwa itea, mashaka a muthu ane a khou guda ngoho a vha “maswina” awe.—Mat. 10:36.

Nga zwiṅwe zwifhinga, vhafunziwa vha Kristo vhane vha vha na mashaka a re kha vhuṅwe vhurereli vha tea u khetha arali vha tshi ṱoḓa u takadza Yehova na Yesu kana u takadza mashaka avho. Sa tsumbo, mashaka ane a si vhe Vhakriste a nga lingedza u vha kombetshedza uri vha pembelele dziholodei navho. Musi zwo ralo, vha tea u ita phetho ya uri vha ḓo takadza nnyi. Yesu o ri: “Ane a funesa khotsi awe kana mme awe u fhira nṋe ho ngo tewa nga u vha wanga.” (Mat. 10:37) Ndi ngoho uri Yesu o vha a sa khou amba uri vhane vha ṱoḓa u vha vhafunziwa vhawe a vho ngo tea u funa vhabebi vhavho. Fhedzi o vha a tshi khou vha funza uri zwa ndeme zwi tea u vha zwifhio vhutshiloni havho. Arali mashaka ashu ane a si vhe Dziṱhanzi a tshi ri pikisa ngauri ri khou shumela Yehova, ri ḓo dzula ri tshi vha funa, fhedzi ri tea u zwi humbula uri ri tea u funa Mudzimu u vha fhira.

A zwi timatimisi uri u pikiswa nga mashaka zwi a vhavha vhukuma. Fhedzi vhafunziwa vha Yesu vha tea u humbula zwe Yesu a zwi amba musi a tshi ri: “A sa hwaliho danda ḽawe a ntsala murahu, ho ngo tewa nga u vha wanga.” (Mat. 10:38) Nga maṅwe maipfi, musi Vhakriste vha tshi pikiswa nga mashaka avho, vha zwi dzhia sa u tambudzwa hune vhafunziwa vha Kristo vha tea u ḓiimisela u hu konḓelela. Fhedzi vha fhulufhela uri nḓila yavhuḓi ine vha ḓifara ngayo i nga ita uri mashaka avho a shandule mihumbulo yavho, a ṱoḓe u guda zwine Bivhili ya zwi funza.—1 Pet. 3:1, 2.