Yesu ayugupai fu aboro tipa i du na zereda dagbatiyo na akurayo. Ono ti kura regbo sa, ko agumba gupai fu gako amokedi nga: “Ka oni bérẽ nga ha ya mi aye ka maa zereda zegino ya; mi aye nga ka maa zereda te, ono kina baso! Bambiko mi aye ka maa kangu dagba ba gude na wirini, na dagba degude na nani, na dagba de na nakumbari.” (Mt. 10:34, 35) Ginipai Yesu aaida ka gumbaha na gipai re?

Yesu aaidanga ka kparaka aboro kusayo ti akurayo te, ono ko aima ino gupai nga, gako ayugopai nika yeaye na kparakaro ku rogo kura ariikporo. Sidu tie, si naida agu aboro nakpinyemu kada ni ga Kristo abawiriki na ki zi bapatiza rugutiyo na gupai nga, ti kura aregbo, kura gayo aborokporo adunga na ngbarago na gayo diaberã te. Ti kura aregbo, gu gayo abadiarogatise angianga aDezire Yekova ya watadu kura gayo aborokporo ima rengba ka soga yo na si kidu ni kpakarakpakaraha fuyo i nye ni ruruyo kuti ga Kristo ayugopai.

Baibiri nangarasa aKristano tipa i “dú zezeredi na aboro dũ.” (Rom. 12:18) Ono ga Yesu ayugopai ima rengba kada wakina “baso” rogo ariikporo. Gipai re namanga ho kura borokporo sa aida na ga Yesu ayugopai ni na agu akurayo kini sogoho. Ka gipai re mangi, agu aborokporo re ima rengba ka satiyo ni “avura” gu ni nawirika rengo.—Mt. 10:36.

Ti kura aregbo, si naaida aida gu ga Kristo abawiriki nga aguyo naraka na agu agumeyo du rogo kura apambori kia mangi diberã, singia i nika manga gupai nasa ngbarago ti Yekova na Yesu watadu i nika manga gupai nika sa ngbarago ti agumeyo. Ni kpiapai, agu agumeyo angianga aDezire Yekova ya ima rengba ka sayo ngbaome i mangi agu aˈuru ongada nga ga ziree pambori. Na i ima rengba ka manga diaberã tipa da i nika sa ngbarago ti ni. Yesu aya: “Gu ni ka kpi nyemu bani na nani ki susi re, ni are nga na mi te.” (Mt. 10:37) Anga gupai Yesu aaida ka gumbaha nga tipa boro da ni gako bawiriki, si naida agu aboro nawirika rengo mbu kpinyemu avunguyo te, si naida gako abawiriki kpinyemu avunguyo akpi. Ono ko aayugopai fuyo tipa wai ka manga diaberã tipa agu apai du na nyanyakipaha kisusi fuyo rogo gayo raka yo. Ka si du nga gu gaani borokporo angianga Dezire Yekova ya nasoga gu ome ani amangaha tipa ka iriso Yekova, ho du si aida ani ini gupai ni nga gaani nyemuse tipa Yekova du na nyanyakipaha kisusi.

Zanga kapa, sogote be gaani aborokporo ima rengba ka sarani ani du na bakere gberãrago. Ono si naida kindi ga Yesu abawiriki tingidi agu afugoko nga: “Gu ni ka atumba nga gani wagiwagi ngua ki nipeke re ya, ni are nga na mi te.” (Mt. 10:38) Ka pehe rogo kura afugo, aKristano nabi gu sogote naye be gayo aborokporo nga si nga papara agu apai si adu nga ga Kristo abawiriki nika hihe. Ono i na maabangirise nga, mbiko gayo wene mangaapai, gayo aborokporo nika aria berãyo aˈaria na ki idi ka wirika gupai Baibiri apehe.—1 Pet. 3:1, 2.