1. Pouki nou pa sipwi an chay moun an latè-a pa ka konfyé pyèsonn?

 MOUN an latè sala pa konnèt ki moun yo sa konfyé, paski mèt gwo biznis, politisyen, èk mèt wilizyon ka dézapwenté yo. Osi, la ni moun ki ka santi yo pa sa konfyé jan yo, vwézinaj yo, èk jis fanmi yo. Mé sa pa ka sipwi nou paski Bib-la té di: “Asou dènyé tan-an . . . nonm pa kay ni pyès wèspé pou Bondyé . . . yo kay malpalan . . . yo kay twèt.” Sa vlé di, moun ki ka viv an dènyé tan-an té kay ni sé menm mové atitid-la èk sé vyé kawaktè-a Satan ni. Sé li ki dyé latè-a, èk nou sav nou pa sa konfyéʼy.​—2 Tim. 3:1-4; 2 Kòr. 4:4.

2. (a) Ki moun nou sa konfyé épi tout tjè nou? (b) Kisa adan di nou pé katjilé?

² Kon Kwityen nou sav nou sa konfyé Jéhova épi tout tjè nou. (Jér. 17:7, 8) Nou asiwé Jéhova enmen nou èk i ‘pa kay janmen abandonnenʼ nou. (Sam 9:10) Nou osi sa konfyé Jézi Kwi paski i té bay laviʼy pou nou. (1 Pita 3:18) Èk nou sav nou sa konfyé sé konsèy-la ki an Bib-la paski yo ja édé nou an lavi nou. (2 Tim. 3:16, 17) Alò, nou asiwé nou sa mété konfyans nou an Jéhova, an Jézi, èk an Bib-la. Mé adan di nou pé katjilé: ‘Ès mwen sa toujou konfyé sé fwè èk sè-a an kongwigasyon-an?ʼ Si wépons-lan pou kwèsyon sala sé wi, pouki nou sa ni konfyans an sé fwè èk sè-a?

3. Ki bèl pwivilaj nou ni? (Mak 10:29, 30)

³ Jéhova chwazi nou pou vini an pa an fanmiʼy. Sa sé an bèl pwivilaj, èk nou ka twapé an chay bennéfis. (Li Mak 10:29, 30.) Oliwon latè-a, nou ni fwè épi sè ki enmen Jéhova èk ki ka fè tout sa yo pé pou swiv pwensip li. Délè, nou pa ka palé menm langaj épi yo, èvèk pitèt nou pa ni menm kilti, mé nou enmen yo, menm si nou ka jwenn yo pou pwèmyé fwa-a. Yonn an sé bagay-la nou pli kontan, sé lè nou sa vini ansanm épi sé fwè èk sè nou-an pou adowé èk glowifyé Jéhova.​—Sam 133:1.

4. Pouki nou bizwen sé fwè èk sè nou-an?

⁴ Apwézan sé lè pou nou wèsté an lilyon épi sé fwè èk sè nou-an pli pasé avan. Délè yo ka édé nou pòté chay nou. (Ronm 15:1; Gal. 6:2) Osi, yo ka ankouwajé nou pou fè tout sa nou pé an sèvis Jéhova, èk pou kontiné ni an bon wilasyon épiʼy. (1 Tèsa. 5:11; Hib. 10:23-25) Osi, nou ni an chay lèlmi, sa sé Satan épi vyé latè-a. Imajiné mannyè ou té kay santi si ou pa té ni sé fwè èk sè-a pou sipòtéʼw èk édéʼw goumen kont sé lèlmi sala. Chonjé, touswit, Satan épi sé zèlèv li-a kay ataké pèp Bondyé. Mé a lè sala, pa dé kontan nou kay kontan pou ni sé fwè èk sè nou-an pou édé nou èk sipòté nou!

5. Pouki adan di nou pé twapéʼy difisil pou konfyé sé fwè èk sè-a?

⁵ Adan di nou pé twapéʼy difisil pou konfyé sé fwè èk sè-a, paski nou té ni an mové èspéyans. Pou ègzanp, pitèt nou té di an fwè ében an sè an bagay an konfyans, épi i di an lòt moun sa nou té diʼy. Ében pitèt an moun an kongwigasyon-an té fè ében di an bagay ki ofwansé nou. Èspéyans kon sa sa fèʼy difisil pou nou konfyé lézòt. Alò, kisa ki sa édé nou pou ni konfyans an sé fwè èk sè nou-an?

6. Ki mannyè lanmityé ka édé nou pou konfyé sé fwè èk sè nou-an? (1 Kòrint 13:4-8)

⁶ Si nou enmen an moun, nou kay konfyéʼy. Pwèmyé Kòrint chapit twèz (13) ka dékwi plizyè diféwan mannyè lanmityé sa édé nou pou ni konfyans, ében bati konfyans an sé fwè èk sè nou-an ankò. (Li 1 Kòrint 13:4-8.) Pou ègzanp, vèwsé 4 ka di: “Lanmityé ni pasyans épi i ni bon mannyè.” Jéhova enmen nou, konsa, menm si nou péché kont li, i ni pasyans épi nou. Alò, menm kon Jéhova, nou enmen sé fwè èk sè nou-an, konsa menm si yo ofwansé nou ében yo kontwayé nou, nou vlé ni pasyans épi yo. Osi, vèwsé 5 di: “Anyen pa kay [fè lanmityé] faché. I pa ka tjenbé moun an tjèʼy.” Konsa, nou pa vlé tjenbé moun an tjè nou. Sa vlé di, nou pa vlé chonjé tout ti bagay an fwè ében an sè fè nou. An plis di sa, Ékléziyastis 7:9 di, sé pa nou ‘twò pwésé pou vini ofwanséʼ. Pito sa, annou fè sa Èfésòs 4:26 di: “Pa kité sòlèy-la kouché épi ou faché toujou”!

7. Ki mannyè sé pwensip-la an Mafyou 7:1-5 kay édé nou pou ni konfyans an sé fwè èk sè nou-an?

⁷ An lòt bagay ki sa édé nou ni konfyans an sé fwè èk sè nou-an, sé si nou ka gadé yo menm mannyè-a Jéhova ka gadé yo. Jéhova enmen sé fwè èk sè nou-an, èvèk i pa ka tjenn sa yo fè ki pa bon an lidéʼy. Konsa, nou vlé fè menm kon Jéhova. (Sam 130:3) Alò, pito nou fiksé asou défo sé fwè èk sè nou-an, annou fiksé asou bèl kawaktè yo, èvèk katjilé asou sé bon bagay-la yo sa fè. (Li Mafyou 7:1-5.) Bib-la di: “Lanmityé pa [ka] janmen pèd lafwa.” (1 Kòr. 13:7) Konsa nou ni lafwa-a ki, sé fwè èk sè nou-an vlé fè sa ki bon, èk yo pa janmen vlé ofwansé nou. Jéhova vlé nou konfyé sé fwè èk sè nou-an paski yo ja moutwé nou sa konfyé yo. b

8. Kisa nou sa fè pou édé nou konfyé sé fwè èk sè nou-an?

⁸ Menm kon an moun ni pou fè éfò pou an lòt moun wèspèktéʼy, sé konsa nou ni pou fè éfò pou moun konfyé nou. Chonjé, i kay pwan an ti tan pou on moun konfyé nou. Alò, kisa nou sa fè pou édé nou konfyé sé fwè èk sè nou-an? Nou ni pou fè éfò pou konnèt yo pli mèyè. Pou ègzanp, nou sa palé épi yo an sé mitin-lan, èk osi lè nou ka pwéché épi yo. Mé ni pasyans épi yo èk ba yo chans-lan pou moutwé nou, nou sa konfyé yo. Kanmenm, ou pa kay di an moun ou pa byen konnèt tout zafèʼw. Alò, konʼw ka vini konnèt moun-lan pli mèyè, ou kay santi pli konfòtab pou palé épiʼy konsèné diféwan bagay. (Louk 16:10) Mé, kisa ou sa fè siʼw di an moun an bagay an konfyans épi i di an lòt moun sa ou diʼy? Pa pwésé pou kasé wilasyon-an ou ni épiʼy, baʼy an ti tan. Èvèk pa kité sa déotwa moun fè anpéchéʼw konfyé lòt fwè èk sè. Bon, annou konsidiwé ègzanp déotwa sèvant Jéhova ki kontiné konfyé lézòt, magwé moun té dézapwenté yo.

9. (a) Ki mannyè Hanna té tjenn konfyans li an awanjman Jéhova menm si Chèf Pwèt-la èvèk sé gasonʼy-lan té ni défo? (b) Kisa ou apwann an ègzanp Hanna lèʼy vini pou mannyè nou ni pou konfyé awanjman Jéhova? (Gadé pòtwé-a.)

⁹ Ès an fwè ki ni wèskonsabilité an ògannizasyon-an janmen dézapwentéʼw? Si sa ja wivéʼw, ègzanp Hanna kay édéʼw. Chèf Pwèt Ilay té ka pwan douvan an ògannizasyon Jéhova an Izwayèl. Mé sé dé (2) gasonʼy-lan pa té bon ègzanp pyès. Magwé yo sété pwèt, yo té ka kouwi vyé lavi, èvèk papa yo Ilay pa té ka kowijé yo. Menm si Jéhova pa té tiwé Ilay kon chèf pwèt la menm, Hanna pa té tounen doʼy asou awanjman-an Bondyé té mété an plas pou moun adowéʼy. Pito sa, i kontiné adowé Jéhova an tant-lan menm si Ilay sété chèf pwèt-la. Yon jou, Hanna té ka pwédyé ofon tjèʼy èk lèv li té ka twanblé. Lè Ilay wè sa, i té kwè Hanna té sou. Konsa i koumansé kwititjéʼy, sanʼy mandé kwèsyon. (1 Sm 1:12-16) Magwé sa, Hanna sèwmanté, si Jéhova té baʼy an gason, i té kay mennen gason sala pou wann sèvis an tant-lan. Èvèk menm Ilay sala té kay ni pou otjipé gason sala. (1 Sm 1:11) Ès sé gason Ilay-la té bizwen kowijman toujou? Absoliman, èk lè tan-an wivé Jéhova pini yo. (1 Sm 4:17) An menm di tan-an, Jéhova benni Hanna épi an gason. Nonʼy sété Sanmyèl.​—1 Sm 1:17-20.

10. Ki mannyè Wa David moutwé i té ka konfyé lézòt menm si adan moun té twayiʼy?

¹⁰ Ès an bon jan janmen twayiʼw? Si sa ja wivéʼw konsidiwé ègzanp Wa David. David té ni an jan, nonʼy sété Ahifofèl. Lè gason David, Absalonm, té vlé pwan plas papaʼy kon wa, Ahifofèl sipòtéʼy an wévòt sala. Sa oblijé té soukwé David, pouʼy pèd sipò gasonʼy èk nonm-lan i té konsidiwé pou janʼy! Magwé yo té twayi David, sa pa té anpéchéʼy konfyé lézòt. Pa ègzanp, i kontiné konfyé an lòt bon janʼy ki wifizé sipòté wévòt-la. Non jan sala sété Houchay. David té ni bon wézon pou konfyé Houchay. I jis mété laviʼy anwis pou édé David.​—2 Sm 17:1-16.

11. An ki mannyè sèvant Nébal-la té moutwé i té ka konfyé Abigél?

¹¹ Annou osi konsidiwé ègzanp yonn an sé sèvant Nébal-la. David èk sé nonm li-a té pwotèkté sèvant Nébal, an nonm ki té byen wich. Tjèk tan apwé sa, David mandé Nébal pou potjiwé népòt saʼy té ni pou sé nonm li-a manjé. Lè Nébal wifizé édéʼy, David vini si tèlman faché, i désidé pou tjwé dènyé nonm an kay Nébal. Yonn an sé sèvant Nébal-la, di Abigél, madanm Nébal, sa David té vlé fè. Sèvant-lan té sav, sé Abigél sèlman ki té sa sové laviʼy. Alò, pito i pitjé kouwi, i té ni konfyans Abigél té kay wanjé sitiwasyon-an. Èk i té ni konfyans sala, paski tout moun té sav Abigél té ni an chay lasajès. Èvèk mannyè bagay alé ka moutwé i té ni bon wézon pou konfyé Abigél. Abigél moutwé an chay kouwaj. Pawòl li èk aksyon-an i té pwan-an fè David chanjé lidéʼy. (1 Sm 25:2-35) Abigél té ni konfyans-lan ki, David té kay koutéʼy èk fè sa ki bon.

12. Ki mannyè Jézi moutwé i té ka konfyé sé disip li-a menm si yo té ka fè lèwè?

¹² Jézi té ka konfyé sé disip li-a magwé yo té ka fè lèwè. (Jan 15:15, 16) Pou ègzanp, lè Jémz èk Jan mandé Jézi pou an pozisyon spésyal an Wéyòm li, Jézi pa té jijé yo ében tiwé yo kon zapòt li. (Mak 10:35-40) Osi, tout sé disip Jézi-a abandonnenʼy swè-a yo té awétéʼy-la. (Maf. 26:56) Mé Jézi pa janmen pèd konfyans an sé disip li-a, magwé i té sav yo pa té pawfé, “i moutwé yo ki otan enmen i enmen yo”. (Jan 13:1) Apwé Jézi wésisité, i bay sé wonz (11) zapòt li-a gwo wèskonsabilité. Yo té ni pou pwan douvan an twavay-la pou fè disip èk gadé apwé sé moutonʼy-lan. (Maf. 28:19, 20; Jan 21:15-17) I té ni bon wézon pou mété konfyans li an sé nonm sala ki pa té pawfé, paski yo tout wèsté fidèl olanmò. San dout, Hanna, David, sèvant Nébal-la, Abigél, èk Jézi ban nou bon ègzanp an mannyè pou konfyé lézòt menm si yo pa pawfé.

13. Kisa ki sa fèʼy difisil pou nou konfyé moun?

¹³ Ès ou janmen di an fwè an bagay an konfyans èk pli ta ou apwann i di lòt moun sa ou té diʼy? An èspéyans konsa sa blésé tjèʼw. Sa té wivé yon sésé. I té di yon ansyen an bagay an konfyans, èk i té ni konfyans-lan ansyen-an pa té kay di pyèsonn. Mé li denmen, i apwann ansyen-an té di madanm li sa i té diʼy. Paski madanm ansyen-an té kwiyéʼy pou baʼy ankouwajman. Sa soukwé sésé-a èk i twapéʼy difisil pou konfyé ansyen sala ankò. Kanmenm, sésé-a palé épi an lòt ansyen, èk sa ankouwajéʼy pou ni konfyans an sé ansyen-an ankò.

14. Kisa ki té édé yon fwè pou ni konfyans an sé ansyen-an ankò?

¹⁴ An fwè té faché épi dé (2) ansyen pou an chay tan, paski i té pèd konfyans an yo. Mé kanmenm, i chonjé sa an lòt fwè té di. Fwè-a té di: “Sé Satan ki lèlmi-an èk pa sé fwè nou-an.” Sé pawòl sala té byen senp, mé yo té ni an pil fòs. Konsa i pwédyé konsèné sitiwasyon-an, épi i fè lapé èvèk sé dé (2) ansyen-an.

15. Poutji i pé pwan tan pou konfyé sé fwè-a ankò? Bay yon ègzanp.

¹⁵ Ès ou ja pèd an pwivilaj an kongwigasyon-an? Èspéyans sala sa kwazé tjèʼw. Grete épi manmanʼy sété Témwen Jéhova an Almany lè twavay nou té anba bann. Diwan tan sala, Grete té ka fè kòpi Gad-la pou sé fwè èk sè-a. Èk i té ka enjwi pwivilaj sala. Mé lè sé fwè-a apwann papa Grete té ka opozé lavéwité-a, yo pwan pwivilaj-la an lanmenʼy, paski yo té pè papaʼy té kay twayi kongwigasyon-an. Osi la té ni pli pwoblenm Grete té èspéyansé. Diwan Dézyenm Gwo Ladjè-a, sé fwè-a pa té ka ba Grete épi manmanʼy Gad-la. Èvèk yo pa té ka menm palé épi yo lè yo té jwenn yo asou chimen-an. Sa blésé Grete ofon tjèʼy! Èk i di, i té pwanʼy an chay tan pouʼy té sa pawdonnen sé fwè-a, èk pou konfyé yo ankò. Kanmenm, i wéyalizé Jéhova té pawdonnen yo, alò i mété on chay éfò pou pawdonnen yo osi. c

16. Pouki nou ni pou fè fòs kò nou pou konfyé sé fwè èk sè-a?

¹⁶ Si ou té ni yon èspéyans kon Grete, fè fòs kòʼw pou viwé bati konfyans ou an sé ansyen-an. Sa kay pwan tan, mé i kay vo éfòʼw. Pou ègzanp, siʼw ja manjé an bagay ki fèʼw malad, ou kay pwan pokosyon épi sa ou ka manjé. Mé èspéyans sala, pa kay fèʼw doubout manjé. An menm mannyè-a, nou pa kay kité yon mové èspéyans afébli konfyans nou an tout sé fwè èk sè-a, sitou lè nou chonjé yo pa pawfé. Lè nou bati konfyans nou an sé fwè èk sè-a ankò, nou kay ni tjè kontan, èk sa kay édé nou konpwann kisa nou menm sa fè pou édé sé fwè èk sè-a pou konfyé yonn a lòt an kongwigasyon-an.

17. (a) Pouki i si tèlman enpòtan pou nou konfyé sé fwè èk sè nou-an? (b) Kisa nou kay diskité an lòt atik-la?

¹⁷ An latè Satan, moun pa ka konfyé yonn a lòt. Mé nou sa konfyé sé fwè èk sè nou-an paski nou enmen yo èk nou sav yo enmen nou tou. Lè nou konfyé sé fwè èk sè nou-an, sa ka ban nou tjè kontan èk nou ka ni lilyon an kongwigasyon-an. Èk osi an tan pou vini, lè nou ka èspéyansé difikilté, sa kay an pwotèksyon pou nou. Mé kisa ou sipozé fè si an moun ou té ka konfyé dézapwentéʼw? Ou sa éséyé pou gadé sitiwasyon-an menm kon Jéhova ka gadéʼy. Ou sa apliké pwensip Bib. Ou sa kiltivé lanmityé ofon tjèʼw pou sé fwè èk sè-a, èk ou sa apwann hòd ègzanp moun ki an Bib-la. Toujou chonjé, nou sa konfyé sé fwè èk sè nou-an ankò. Èk si nou fè sa, nou kay ni plizyè bon jan ki kay ‘twòp pli fidèl pasé an fwèʼ. (Pwov. 18:24) I sé an bon bagay lè nou sa konfyé sé fwè nou-an, mé kanmenm, sa pa asé. Sé fwè nou-an osi ni pou santi yo sa konfyé nou tou. An lòt atik-la nou kay diskité sa nou ni pou fè pou sé fwè-a konfyé nou.