1. Бӱгӱнги кӱнде улуска бӱдерге коркышту кӱч болгонына бис нениҥ учун кайкабай јадыс?

 БУ ТЕЛЕКЕЙДЕ улус кемге бӱдерин билбей јат. Нениҥ учун дезе олор политиктердиҥ, бизнесмендердиҥ, кудай јаҥныҥ башчыларыныҥ керектерин кӧрӱп, чӧкӧп тургандар. Кезик улуска најыларына, айылдаш улузына, керек дезе билезиниҥ де улузына бӱдерге кӱч. Мындый айалга бистерди кайкадат па? Јок. Нениҥ учун дезе Агару Бичикте озолондыра айдылып калган: «Калганчы кӱндерде уур-кӱч ӧйлӧр келер. Олордо агару не де болбос [«сӧзине турбас», ЈТ]... копчы болор... садынчак болор». Ӧскӧртӧ айтса, улус «бу чактыҥ [телекейдиҥ] кудайы» ошкош болор, а ого бир де кичинек бӱдер арга јок (2 Тим. 3:1—4; 2 Кор. 4:4).

2. а) Бис кемге алаҥзыбай бӱдер аргалу? б) Бисте кандый сурактар чыгардаҥ айабас?

² Христиандар билер, Иегова Кудайга бир де алаҥзыбай бӱдерге јараар деп (Иер. 17:7, 8). Нениҥ учун дезе ол бисти сӱӱп јат, ол најыларын качан да артыргыспай јат (Сар. 9:10). Анайда ок бис Иисус Христоско бӱдӱп јадыс, нениҥ учун дезе ол бис учун бойыныҥ јӱрӱмин берген (1 Пётр 3:18). Бого коштой Агару Бичиктиҥ јӧптӧри сӱреен бӱдӱмјилӱ (2 Тим. 3:16, 17). Айдарда, бис Иегова Кудайга ла Иисус Христоско, анайда ок Агару Бичикке бӱдер аргалу. Је кем де сураар болор: «А јуундагы ака-эјелерге бис јаантайын бӱдер аргалу ба? Эйе болзо, нениҥ учун?»

3. Бисте баалу кандый сый бар? (Марк 10:29, 30).

³ Иегова бисти канча миллиард улустыҥ ортозынаҥ талдап, бойыныҥ кандый ла укту албатызына кожуп алган. Бу сыйды бис сӱреен тыҥ баалап јадыс! (Марк 10:29, 30 кычырыгар, ЈТ.) Теҥеридеги Адабысты сӱӱрге ле  оныҥ нормаларыла јӱрерге кӱӱнзеп турган ака-эјелер бастыра јердиҥ ӱстинде бар. Олордыҥ тили, культуразы, кийими бистийинеҥ башка да болзо, бис олорды бир де кӧрбӧгӧн дӧ болзоос, олор биске кожо чыккан улустый билдирет. Бисти сӱӱп турган теҥеридеги Адабысты кожо мактаарга ла ого иштеерге ончобыска сӱреен тыҥ јарап јат! (Сар. 133:1).

4. Ака-эјелер биске нениҥ учун керек?

⁴ Бӱгӱнги кӱнде ака-эјелерле бирликти оноҥ тыҥ кичеер керек. Олор биске уур јӱгисти апарарга болужат (Рим. 15:1; Гал. 6:2). Анайда ок Иеговага оноҥ ло ары эрчимдӱ иштенерге ле кӧгӱс јанынаҥ бек артарга кӱӱнисти кӧдӱрет (1 Фес. 5:11; Евр. 10:23—25). Качан-бирде јуун јок јӱрерис деп сананып та ийзеес, коркымчылу боло берет! Јуун бисти корулап јат, анайда ок Сатанага ла оныҥ калју телекейине удура турарга болужат. Удабас Сатана ла оныҥ колында јӱргендер Кудайдыҥ албатызына табару эдер. Карын ол тушта бистиҥ јаныста ака-эјелерис болор!

5. Нениҥ учун кезигиске јуундагы ака-эјелерге бӱдерге кӱч болуп јат?

⁵ Бистиҥ кезигиске јуундагы ака-эјелерге бӱдерге кӱч болуп јат. Нениҥ учун дезе кем-кем оныҥ јажыдын ӧскӧ улуска куучындап ийген болор, ол эмезе берген сӧзине турбаган болор, ол эмезе ака-эјелердиҥ кемизи-кемизи айткан сӧзиле, эткен керегиле олордыҥ јӱрегин шыркалаган. Оныҥ да учун олордыҥ кезиги мынайда сананат: «Эмди ака-эјелерге канай бӱдетен?» Је ака-эјелерге оноҥ ло ары бӱдерге биске не болужар?

6. Сӱӱш ака-эјелериске бӱдӱп турарга канай болужат? (1 Коринфтегилерге 13:4—8).

⁶ Сӱӱш јокко бис ака-эјелерге бӱдӱп болбозыс. 1 Коринфтегилердиҥ 13-чи  бажалыгында айдылган сӱӱш бистерге ака-эјелериске бӱдӱп турарга ла олорго ойто бӱдӱп баштаарга болужар. (1 Коринфтегилерге 13:4—8 кычырыгар, ЈТ.) Темдектезе, 4-чи ӱлгерде: «Сӱӱш чыдамкай, јалакай» — деп айдылат. Иегова бистиҥ ого удура эткен кинчегисти чыдажып турарда, биске де ака-эјелердиҥ сӧстӧрине, эткен керектерине кадалбай, чыдамкай болор керек. 5-чи ӱлгеринде «сӱӱш ачынбайт, јаманды тоолобойт» деп айдылат. Оныҥ учун бис ака-эјелердиҥ ачынчылу сӧстӧрин ле керектерин блокнотко бичибей јадыс. Экклезиаст 7:9-та айдылганыла, «ачынарга меҥдебе». А Эфестегилерге 4:26-да: «Кӱн ашкалакта, чугулыгар ӧчӱп калгай» — деп айдылат.

7. Матфей 7:1—5-теги принциптер ака-эјелерге бӱдӱп турарга канайып болужар?

⁷ Ака-эјелерге бӱдӱп турарга болужатан база бир арга — олорго Иегованыҥ кӧзиле кӧрӧри. Иегова ака-эјелерди сӱӱп јат, олордыҥ јастыраларын тоолобой јат. Биске де андый болор керек (Сар. 130:3). Олордыҥ јастыраларын тоологончо, јакшы кылык-јаҥдарына ла керектерине ајару эдип турар керек. (Матфей 7:1—5 кычырыгар, ЈТ.) Ака-эјелерге јаман сананбай јадыс, нениҥ учун дезе «сӱӱш ӱзе немеге бӱдет» (ЈТ) (1 Кор. 13:7). Је Иегова бисти кажы ла кижиге бӱдӱп турзын деп айтпай јат. Бис дезе бойын бӱдӱмјилӱ эдип кӧргӱскен ака-эјелерге бӱдӱп јадыс b.

8. Ака-эјелерге бӱдӱп турарга канай ӱренер?

⁸ Бис билбес кижиге бодоп ло бӱдӱп баштабай јадыс дезеер? Бӱдӱп баштаарга ӧй керек болуп јат. Айса ака-эјелерге бӱдӱп турарга канайып ӱренер? Олорло јакшы таныжып алыгар, јуунныҥ туштажуларында куучындажып туругар. Олорды јарлаар ишке кычырыгар. Олорго чыдамкай болуп, бойын бӱдӱмјилӱ кижи деп кӧргӱзетен арга берип туругар. Баштап тарый слер олорго бойоордыҥ јажытту немегерди куучындабас болорыгар. Је ака-эјелерле јууктада таныжып алзаар, бойоордыҥ сезимдеригерди куучындаарга јеҥил боло берер (Лука 16:10). Је ака-эјелердиҥ кемизи-кемизи сӧзине турбаган болзо, канайдараар? Капшай ла ол кижиле база качан да куучындашпазым деп сананбагар. Карын чыдамкай болугар. Анайда ок бир ле кижидеҥ улам, ӱзе ака-эјелердеҥ чӧкӧбӧй туругар. Эмди, кемнеҥ-кемнеҥ чӧкӧп тӧ калган болзо, је улуска оноҥ ло ары бӱткен ишчилердиҥ кезик темдерин кӧрӱп ийектер.

9. а) Анна каруулу улустыҥ кинчектерин билген де болзо, Иеговага бӱдӱп турганын канайып кӧргӱскен? б) Иегованыҥ организациязына бӱдӱп турарга, Аннаныҥ теминеҥ неге ӱренедис? (Јурукты кӧрӱгер.)

⁹ Слерде каруулу кандый бир акага бӱдер кӱӱнеер ӧчкӧн учурал болгон бо? Болгон болзо, Аннаныҥ темин шӱӱп кӧрӱгер. Ол ӧйдӧ Израильдиҥ кӧгӱс јанын Илий деп абыс башкарган. Оныҥ билези јакшы ла тем кӧргӱспеген. Илийдиҥ уулдары каруулу иштер де бӱдӱрген болзо, коркышту јаман керектер эдетен. Је Илий уулдарын тӱзедерге нени де этпеген. Андый да болзо, Иегова оны эдип турган ижинеҥ тӱрген ле јайлатпаган. Аннаны да алзаас, ол Иеговага бажырарга, Илийдиҥ иштеп турган агару байканга барып јат. Ондо бир де јаман санаа болбогон. Илий оныҥ јайнап мӱргӱп  турганын кӧрӧлӧ, эзирик деп сананган. Ол керектиҥ аайын јазап билбей ле јадып, кату сӧстӧр айткан (1 Сам. 1:12—16). Андый да болзо, Анна уул бала чыкса, агару байканда иштезин деп сӧзин берген. Анна бу сӧзин берип јадарда, оныҥ балазын байканда Илий кӧрӧр деп билген болгон (1 Сам. 1:11). Илийдиҥ уулдары кату каруузына тургузылган ба? Тургузылган эмей. Иегова олорды ӧлӱмге јаргылаган (1 Сам. 4:17). Аннага дезе Самуил деп уул бала сыйлаган (1 Сам. 1:17—20).

10. Давидти јуук улузы садып ийерде, ол улуска бӱтпей барды ба? Јартап беригер.

¹⁰ Слерди качан-бирде јуук најыгар саткан ба? Эйе болзо, Давид каанныҥ учуралын сананып ийектер. Давидте јӧп берип турган Ахитофел деп бӱдӱмјилӱ кижи болгон. Давидтиҥ уулы Авессалом оныҥ јаҥын блаажып, тӱймеен кӧдӱрерде, Ахитофел оныҥ јанына јайыла берген. Давидке бир ле уунда уулыныҥ ла јӧп берип турган кижизиниҥ болужын јылыйтарга кандый ачу болды не! Је андый да болзо, Давид оноҥ ло ары улуска бӱткен. Темдектезе, Авессаломныҥ тӱймеенине коштонбогон Хушай деген кижиге. Давид ого калас бӱтпеген. Ол бӱдӱмјилӱ кижи болуптыр. Нениҥ учун дезе Хушай Давидке болужарга, јӱрӱмин де берерге белен болгон (2 Сам. 17:1—16).

11. Навалдыҥ јалчыларыныҥ бирӱзи Авигеяга бӱткенин канайып кӧргӱскен?

¹¹ Эмди дезе Навалдыҥ јалчыларыныҥ бирӱзиниҥ темин кӧрӱп ийектер. Бир канча ӧйдиҥ туркунына Навал деп бай кижиниҥ кӱдӱчилерин Давид ле оныҥ улузы корулаган. Кийнинде Давид бойына ла јуучылдарына Навалдаҥ курсак сураарда, Навал олорго нени де бербеген. Мынаҥ улам Давид чугулданып, оныҥ айылында ӱзе эр улусты ӧлтӱрер деп сананып јат. Бу керегинде Навалдыҥ ӱйине, Авигеяга, байагы јалчы тил јетирген. Ол бу айалгада кача берер аргалу болгон. Је јӱрӱмин аргадаарга, ол Авигеяга баштанып јат. Оныҥ санаазыла, Авигея кандый бир эбин табып ийер, нениҥ учун дезе ончо улус оны ойгор ӱй кижи деп билген. Бу јалчыныҥ Авигеяга бӱткени калас болбойтыр. Јалтанбас  Авигея Давидке барып, оны јастыра керектеҥ токтодып алат (1 Сам. 25:2—35). Бу учуралдаҥ Авигеяныҥ Давид каанга бӱткенин, Давидти бу айалгада чын алтам эдер деп бир де алаҥзыбаганын кӧрӧдис.

12. Иисус бойыныҥ ӱренчиктерине, олор јастырган да болзо, бӱткен деп недеҥ кӧрӱнет?

¹² Иисус ӱренчиктери јастырып та турарда, тӱҥей ле олорго бӱткен (Иоанн 15:15, 16). Бир катап Иаков ло Иоанн Иисустаҥ Кудайдыҥ Каандыгында кӱндӱлӱ јер сураган. Је Иисус олорды Кудайдаҥ јаҥыс ла јакшы неме аларга болуп иштеп турган деп сананбаган да, олорды он бир апостолдордыҥ тоозынаҥ чыгарбаган да (Марк 10:35—40). Кийнинде, Иисусты тудуп аларда, ӱренчиктери оны таштап, качкылай бергилерде, Иисус олордоҥ бир де чӧкӧбӧгӧн (Матф. 26:56). Иисус олордыҥ кажызыныҥ ла уйан јандарын сӱреен јакшы билген, андый да болзо, олорды «учына јетире сӱӱген» (Иоанн 13:1). Оныҥ да учун Иисус тирилген кийнинде олорго ӱренчиктер белетеер ле оныҥ баалу койлорын кичеер јакылта берген (Матф. 28:19, 20; Иоанн 21:15—17). Бу толо кемдӱ эмес эр улус божоордыҥ божогончо бу јакылтаны сӱреен јакшы бӱдӱргендер. Анна, Давид, Навалдыҥ јалчызы, Авигея ла Иисус толо кемдӱ эмес улуска бӱткен. Олор биске сӱреен јакшы тем кӧргӱскен.

13. Биске недеҥ улам улуска бӱдерге кӱч болордоҥ айабас?

¹³ Слерде мындый учурал болгон бо: слер бойоор керегинде аксагалга куучындап ийгенеер, је ол оны ӧскӧ улуска куучындап ийген. Мындый неме коркышту ачынчылу. Бир катап бир эје бойыныҥ кӱчтерин аксагалга куучындаган. Оноҥ эртезинде ле бу аксагалдыҥ ӱйи бу эјениҥ кӱӱнин кӧдӱрерге телефон соккон. Анайып, бу эје байагы аксагал ӱйине ӱзе куучындап салтыр деп оҥдоп ийген. Оноҥ улам эје бу аксагалга бӱтпей барган. Је андый да болзо, ол айалганы ӧскӧ аксагалга куучындаган. Ол ака дезе эјеге аксагалдарга ойто бӱдерге болужып берген.

14. Бир акага аксагалдарга ойто бӱдӱп баштаарга не болушкан?

¹⁴ Бир акада эки аксагалла узак ӧйдиҥ туркунына оҥдошпостор болгон. Ака бу эки аксагалга бӱтпес керек деп сананган. Је бу ӧйдӧ бӱдӱмјилӱ христианныҥ сӧстӧри санаазына кирген: «Бистиҥ ӧштӱ ака-карындаштар эмес, је Сатана». Ол бу сӧстӧрди шӱӱп сананган, мӱргӱген, оноҥ байагы эки аксагалла јаражып алган.

15. Биске нениҥ учун акаларга бӱдерге кӧп ӧй керек болордоҥ айабас? Тем куучындап беригер.

¹⁵ Слердеҥ качан-бирде јуунда бар молјуларыгарды айрыган ба? Андый айалга коркышту јаан ачу јетирердеҥ айабас. 1930 јылдарда нацистский Германияда Грета ла оныҥ энези Иеговага чындык иштегилеген. Ол ӧйдӧ ондо бистиҥ ижис токтодуда болгон. Акалар Гретага «Каруулчы шибеениҥ» копияларын эдетен јакылта бергендер. Је кийнинде олор Гретаныҥ адазына Иегованыҥ Керечилери јарабай турганын угуп ийеле, ончобысты садып ийер деп коркый бергендер. Оныҥ учун Гретанаҥ јакылтаны айрып алгылады. Је ондо ӧскӧ дӧ ченелтелер болгон. Экинчи телекейлик јуу-согуштыҥ ӧйинде акалар Грета ла оныҥ энезине кандый да журналдар бербей туратан, керек дезе олорды тышкары кӧрӱп ийзе, эзендешпей де туратан! Кандый кӱч айалга. Бу ӧйдӧ Гретага коркышту ачу болгон. Мынаҥ улам ол узак  ӧйгӧ акалардыҥ јаманын таштап болбой, олорго бӱтпей јӱрген. Је кийнинде, Иегова бу акалардыҥ јаманын таштап ийген болордо, ого до таштаар керек деп аайлап ийген c.

16. Нениҥ учун јеҥил эмес те болзо, ака-эјелерге ойто бӱдерге ӱренер керек?

¹⁶ Слерде бого тӱҥей учурал болгон болзо, бир де чӧкӧбӧгӧр. Ака-эјелерге ойто бӱдӱп турарга ӱренерге албаданыгар. Је слер ого тӱрген ӱренип албазыгар, андый да болзо албаданыгар. Темдектезе, слер кандый бир курсактаҥ јамандала береле, эмди база бир де курсак јибезим деп айтпазыгар не. Андый учуралдыҥ кийнинеҥ, карын, курсакка ајарыҥкай болорыгар. Анайып ла бир ле учуралдаҥ бастыра ака-эјелерге бӱтпей барбазаар эмей. Нениҥ учун дезе ончобыс толо кеминде эмезис. Бис ака-эјелериске ойто бӱдӱп турарга ӱренип турзаас, бойыс ырысту болорыс, анайда ок јуунда ака-эјелер бой-бойына бӱдӱп турзын деп канайып болужарын оҥдоп турарыс.

17. Биске бой-бойыска нениҥ учун бӱдер керек? Келер јӧрмӧлдӧ нени билип аларыс?

¹⁷ Бу Сатананыҥ телекейинде улус бой-бойына чек бӱтпей барган. Је бистиҥ телекейлик карындаштыкта ака-эјелер бой-бойын сӱӱп јат. Бис бой-бойыска бӱдӱп турзаас, јуун сӱӱнчилӱ ле бирлик болор. Анайда ок ол келер ӧйдӧги ченелтени де ӧдӧргӧ болужар. Је слер та кемге де бӱткенигер, а ол слерди тӧгӱндеп койгон болзо, слерге кандый ачу болор эди. Мындый айалгада нени эдерис? Айалганы Иегованыҥ кӧзиле кӧрӱгер. Библиялык принциптерди тузаланыгар. Ака-эјелерди сӱӱрге албаданыгар, библиялык темдерди кычырып, шӱӱп сананаар. Слер бу ченелтени ӧдӱп, ойто ака-эјелерге бӱдӱп баштаар аргалу. Мынайып этсеер, слерде сӱреен кӧп најылар болор. Бу најылар слерди кожо чыккандараардаҥ да тыҥ сӱӱр (Укаа 18:24). Улуска бӱдери — удура-тедире барган јолго тӱҥей. Оныҥ учун биске бой-бойыска бӱдер керек. Келер јӧрмӧлдӧ ака-эјелер биске бӱдӱп турзын деп, биске нени эдер керек деген сурак кӧрӱлер.