1. O tamdaw no hekal pasangaray masasipakasoˈlin, hano cowa ko fafahkaˈ kita tonini hani?

 ITINI hekal ni Satan, cowa ka fanaˈ ko tamdaw o cima ko pakasoˈlinen. O waywayan no adihayay misasingdiay tamdaw, o tapang no mirikecay ato ˈaˈideman no pihakelongan patoleday to tamdaw, ano widangto, fiyafiyaw anca paro no lomaˈ cowa ka ngaˈay pakasoˈlinen saan ko harateng no tamdaw. Cowa ko fafahkaˈ kita tonini, samanen paˈayawayto ko Fangcalay Cudad, tahini ‘salikoray romiˈad,’ ‘cowa ka madimadi’ ‘paorafay’ ‘pacakayay to tao’ ko tamdaw. Sakoniya sowal, patalahkalay ko tamdaw to tatiihay a capeling no kawas no hekal, ci Satan cowa kangaˈay pakasoˈlinen.—2 Timoti 3:1-4; 2 Korinto 4:4.

2. (1) Ngaˈay kita masongilaˈ ko pakasoˈlin cimaanan? (2) O roma tamdaw samaanay ko harateng hani?

² Kawra, kita o Krisciyang, mafanaˈay o ngangaˈay ko niyah miemin to falocoˈ a mitadiˈec ci Yihofaan. (Yirimiya 17:7, 8) Pakasoˈlinay kita tada maolahay ci Yihofa kitaanan, ‘cowa ko mamiliyas’ Cingra to widang no Niyah. (ˈOlic 9:10) Wa ngaˈayho mitadiˈec kita ci Yis Kristoan, samanen pakayniay cingra kitanan kinafalah to ˈorip no niyah. (1 Pitiro 3:18) Mikitini nalifetan matinakoay ita, o mihadakan no Fangcalay Cudad a sakayat ngaˈayay tiˈeren. (2 Timoti 3:16, 17) Wa ngaˈay kita masongilaˈ ko pakasoˈlin ci Yihofaan, ci Yisan ato Fangcalay Cudad. Kawra, o roma tamdaw pasangaray masongilaˈ ko pakasoˈlin to salikaka alatek. Mihaenay, o ngangaˈay kita pakasoˈlin to salikaka han? Misamanay hani?

3. Iraay ko manan mikiriwiˈay a sapalemed kitaanan hani? (Marko 10:29, 30)

³ Mihaiay ci Yihofa kitaanan micomod i taˈangayay paro no lomaˈ Ningra, o taˈangayay a sapalemed konini, padama kitaanan milifok to kadofahay a epoc! (ˈOsien ko Marko 10:29, 30.) Itini icowacowa pala no hekal salikaka ita malecaday kitaanan maolah ci Yihofaan, misaˈicelay midofdof to palinian Ningra. Soˈlin o  sowal ita, serangawan ato caˈedong cowa kalecad alatek, kawra masasiolahay kita maemin, soˈlin sakinacecay masasoˈaraw hato kananaman saan miharateng. Mikiriwiˈay maolah kita malacafay to salikaka pakahemek ato midoko to sidaˈitay a Wama i kakarayan.—ˈOlic 133:1.

4. Hano misaaliay kita to salikaka?

⁴ Nohatini ikakaay to salakatay ko pisaali ita makelec a malacecay to salikaka. Miladaˈay cangra to karetengay a ˈinorong ita. (Loma 15:1; Kalatiya 6:2) Pakalalokay cangra kitaanan padotoc a tanektek ko pakasoˈlin, tawlik a matayal saki Yihofaan. (1 Tisalonika 5:11; Hipray 10:23-25) Haratengen hena, ano awaay ko sadipot no kasakopang, awa ko salikaka padama kitaanan micoˈay ci Akoma Satanan ato ciraraway a hekal ningra, sasamaan kita hani? Kakalikito, ci Satan ato kapot ningra mamiˈodisto to finawlan no Kawas. Itiya, wa hakowa ko piakoˈid ita to salikaka itini tatihi ita midama kitanan aki!

5. O roma tamdaw hano pasangaren pakasoˈlin to salikaka hani?

⁵ Kawra, o roma tamdaw pasangaray pakasoˈlin to salikaka alatek. Na pasowalan nangra ko roma salikaka to mahimeday a demak alatek, ˈarawhan pasadakan nora tamdaw, anca mahapinangay nangra o roma salikaka cowa pitoor to miketonan a sowal, anca ilalomaˈ no kasakopang iraay ko pasowalay to pina a sowal, midemakay to tangongolay ko pidokaˈ cangranan a demak. Onini a nalifetan pasangarento a pakasoˈlin to tao alatek. Ano mahaenay i, sasamaanto kita patireng to pakasoˈlin to salikaka hani?

6. O olah sasamaan padama kitaanan patireng to pakasoˈlin to tao? (1 Korinto 13:4-8)

⁶ O olah o taˈeneran no pakasoˈlinay. Itini 1 Korinto 13 fedengan pasifanaˈay kitaanan sasamaan a paihkal to olah i tao, ilalomaˈ adihayay ko kalimlaan papadama konini kitaanan patireng anca miliyaw patireng to pakasoˈlin to tao. (ˈOsien ko 1 Korinto 13:4-8.) Tinakoen itini saka 4 sinael sanay: ‘O olah, iraay ko mihadidiay, ato sidaˈitay.’ Soˈlin mararaw kita, pakararaw ci Yihofaan,  kamayan Cingra mihadidi micada kitaanan. Mihaenay, o sowal no salikaka anca midemakan paketeray anca pasomaday kitaanan, wa ngaˈay kita mihadidi micada cangranan. Saka 5 sinael sanay, o olah ‘cowa ka ranikay maketer, cowa pisaˈosi to pairaan no tao a dokaˈ.’ Cowa ko mamisaˈosi kita to pairaan no tao a dokaˈ, tatodong i cowa ko aˈinteh ko falocoˈ ita, mitala to sapihadakaw to raraw no tao noikor. Itini Patnakay 7:9 patalipaˈelalay kitaanan ‘aka ranikay maketer,’ itini Ifiso 4:26 sanay ko sowal ‘aka tahira picoreman no cidal kamayanho a maketer.’ Ano sakadademaken ita ko safalod nonini a sinael, maedeng wa adihay ko malifokay a epoc.

7. O safalod no Matay 7:1-5 sasamaan padama kitaanan patireng to pakasoˈlin to tao hani?

⁷ Roma i, tano ni Yihofa a pinengneng a minengneng to salikaka, wa matongal ko pakasoˈlin ita cangranan. Maolahay ko Kawas cangranan, cowa pihacecay mitilid to nano raraw nangra, ano kitato cowa ko mamihaen to demak. (ˈOlic 130:3) Cowa ko mamisamacay kita to nano raraw nangra, ao mamisinanot to kangaˈayan nangra, miharateng ano ikor wa padadotoc cangra a macakat. (ˈOsien ko Matay 7:1-5.) Samanen o olah ‘padadotocay a pakasoˈlin,’ mihaenay pakasoˈlinen ita ko nafalocoˈan no salikaka o ngaˈayay, pakasoˈlin cangranan cowa ko papadeteng midokaˈ kitaanan. (1 Korinto 13:7) Sakoniya sowal makalimay ci Yihofa patelas sa kita pakasoˈlin to tao cowa ka saan, ao makalimay Cingra kitaanan ano mahapinang to ngaˈayay a pakasoˈlinen ko tao, o ngangaˈayto pakasoˈlin cangranan. b

8. Sasamaan kiso a midemak wa matongal ko pakasoˈlin to salikaka?

⁸ O pakasoˈlinay misaaliay to toki ngaˈ ngaˈay mapatireng. Sasamaan ko pidemak iso hani? Songilaˈen ko kafanaˈ to salikaka, itini ˈayaw ato ikor no saˈopo masasowal cangranan, ngaˈayay malacafay cangranan mitosil. Pairaen ko mihadidiay cangranan, mihaen ngaˈ ira ko toki ita mihapinang to ngaˈayay pakasoˈlinen cangra. Tiya satapang mafanaˈ kiso to cecay tamdaw i, iraay ko pina a demak cowa kakahi kiso pasowal tora tamdaw, kawra palidlid sa ngaˈay ko kalalaˈed namo, wa madoloto kiso pasayra cingranan mifohat to nafalocoˈan alatek. (Luka 16:10) Kawra o cecay salikaka ano sakahmaw sa to pakasoˈlin iso, sasamaanto hani? Aka ranikay misawad tonini a kalawidang, alatek mataˈlif ko cecay liyad a tatokian, wa ngaˈayto kiso miliyaw patireng to pakasoˈlin cingranan. O roma tamdaw patoleday tisowanan alatek, kawra aka pakayni tonini eca to pakasoˈlin to polong a salikaka. Itini tonini a pakayraan, maminengneng kita to ngaˈayay taˈarawan no papina madimadiay midoko ci Yihofaan a tamdaw, soˈlin patoleden no tao cangra, cowa ka lahdaw ko pakasoˈlin nangra to tao.

9. (1) Soˈlin o roma mikeriday a tamdaw pakidemay ko raraw, hano mafanaˈ kita kamayan mitadiˈec ci Hana to limasmas ni Yihofa i midokoay a demak? (2) Pakayni pitadiˈec to limasmas ni Yihofa i midokoay a demak, mikitini nalifetan ni Hana mananamay iso ko maanan? (Nengnengen ko coka.)

⁹ Pakayni i waywayan no roma mikeriday a salikaka na matoledan kiso han? Ano hatiraay i, ngaˈayay haratengen iso ko taˈarawan ni Hana. Itiya i, itini Israil o mikeriday to tamdaw midoko ci Yihofaan o Taˈangayay Saysi ci Ili, kawra iraay ko pasangaray no paro no lomaˈ ningra. O saysi ko wawa ningra, kawra marariday midemak to kaacekan ato malafoay a demak, kawra cowa ka salofen ni Ili cangra. Soˈlin cowa ka tangsol ci Yihofa palasawad to ˈinorong ni Ili, kawra ci Hana cowa ka pakayni i mala taˈangayay saysi ci Ili ecato ka tayra i fangcalay sefi midoko ci Yihofaan. Itini fangcalay sefi mikifalocoˈay ci Hana pasayra ci Yihofaan mitolon, pasowal to naifalocoˈay a roray, miketonayho to sowal ci Yihofaan, ano  mahofoc to cecay faˈinayan wawa ko niyah, papatayraen cingra i fangcalay sefi matayal saki Yihofaan. (1 Samuil 1:11) Kawra, saˈosi sanay ci Ili to malasangay konini a masomaday a fafahiyan, telocto cowaho ka hapinang ko demak malikafayto cingranan. (1 Samuil 1:12-16) Soˈlin micada to mahaenay a demak, kamayan makahi ci Hana midofdof to miketonan no niyah a sowal, tatodong nonini o mamakahi cingra papidimokos ci Ilian to wawa no niyah. Ikor, soˈlinay pafelian no Kawas ci Hana to cecay faˈinayan wawa, o ci Samuil. (1 Samuil 1:17-20) Mihaen o tatosaay a faˈinayan wawa ni Ili i? Maraod ko matatodongay a tatokian, mipatayan ni Yihofa cangra.—1 Samuil 4:17.

10. Hano mafanaˈ kita o Hongti ci Tafiti micada to pitowakang ikor i, kamayan padadotoc pakasoˈlin to roma a tamdaw?

¹⁰ Na mitowakangan no ngaˈayay widang kiso han? Ano iraay i, haratengen ko nalifetan no Hongti ci Tafiti. Wawa ningra ci Apsalom na mihalakaay miˈafas to saaroˈan i, o cecay ngaˈayay widang ningra ci Ahitofilan mikadepay mikapot ci Apsaloman mitowakang. Hanaca mitowakang ko wawa no niyah ato ngaˈayay widang, maedeng tangongolay ko macadaay a pidokaˈ, kawra cowa ka pakayni cingra ecato pakasoˈlin to roma tamdaw. Iraay ko cecay ngaˈayay widang ni Tafiti ci Husay, tada madimadiay cingra, cowa ka malacafay ci Apsaloman mitowakang. Padotocay ci Tafiti pakasoˈlin ci Husayan, misawacayay ko demak cowa ka raraw ko pakasoˈlin ni Tafiti, samanen makahiay ci Husay kinafalah to ˈorip mipadama ci Tafitian.—2 Samuil 17:1-16.

11. O cecay sikawdan ni Napal samanay paihkal to pakasoˈlinay ko niyah ci Apikailan?

¹¹ Haratengen ko taˈarawan no cecay sikawdan ni Napal. Ci Tafiti ato sikawdan ningra na mihadak to sadipot i sikawdan ni Napal. Ikor, saalian ni Tafiti ko cihafayay a Napalan mihadak to pina a kakaenen pafeli cangranan, ano o mananto ngaˈayayto. O saali ni Tafiti cowa ka pakidem, kawra manaˈayay ci Napal. Tada mangolaway ci Tafiti, sapipatayaw to polong a faˈinayan i paro no lomaˈ ni Napal. O cecay sikawdan pasowalan ningra toniya demak ko fafahi ni Napal ci Apikail, samanen mafanaˈay cingra to mamilidong to ˈorip ningra ci Apikail. Na ngaˈayay cingra milaliw, kawra cowa pihaen to demak. Pakasoˈlinay cingra ci Apikailan ngaˈay mifalic to hapakayraan, samanen mafanaˈay ko tamdamdaw ci Apikailan o matanengay ko pidemak a fafahiyan. O minaroˈan no demak misawacayay onini a sikawdan matatodongay ko pipakasoˈlin to  tamdaw, timoloay ci Apikail a dademak, malaˈosiay ko piconged ci Tafitian. (1 Samuil 25:2-35) Pakasoˈlinay cingra ci Tafitian cowa ko mamafola ko pidemak.

12. Soˈlin adihayay ko raraw no nisawawaan, kawra samaanay ci Yis paihkal to kamayan pakasoˈlin ko niyah cangranan hani?

¹² Maˈaraway ni Yis ko adihayay raraw no nisawawaan, kawra padadotocay pakasoˈlin cangranan. (Yohani 15:15, 16) Kinacecayay, ci Yakop aci Yohani micangacangay ci Yisan, paitini cangranan i Hongti Kitakit milifok to mikiriwiˈay a saaroˈan, cowa ka cisasa ci Yis to nafalocoˈan nangra midoko ci Yihofaan, cowa pasowal cangranan ikor caayto ka ngaˈay malo tarokos. (Marko 10:35-40) Ikor tiya malepel ci Yis toya dadaya, polong nisawawaan mifalahay cingranan a milaliw. (Matay 26:56) Kawra, cowa ka lahdaw ko pakasoˈlin ni Yis to nisawawaan, ihkalay cingra mafanaˈ to dangoc no nisawawaan, kawra ‘tahatolasay maolah cangranan.’ (Yohani 13:1) Patikol maˈorip ci Yis ikor, hanaca pafelian ko 11 madimadiay tarokos to kalimlaan a ˈinorong, ho ngaˈay cangra mikerid to mitosilay tayal pasifanaˈ to tamdaw, hanaca midimokos to kalimlaan a lopayˈay siri ningra. (Matay 28:19, 20; Yohani 21:15-17) Soˈlin cowa ka lefot onini a nisawawaan, cowa pisakahmaw to pakasoˈlin ni Yis. Tahiraay i patay cangra madimadi. Ci Hana, Tafiti, sikawdan ni Napal, Apikail ato ci Yis cowa ka pakayni i ka eca ka lefot no tao, ecato pakasoˈlin to tao, tada o ngaˈayay a taˈarawan ita cangra.

13. O maanan a pakayraan alatek malahdaway ko pakasoˈlin ita to tao hani?

¹³ Na iraay ko mahaenay a nalifetan iso han? Pakasoˈlinay kiso to cecay faˈinayan salikaka, hanaca pasowalay cingranan to mahimeday no niyah a demak, ikor mahapinangay pasowalan ningra ko tao. Maedeng pakasomaday tisowanan konini, hatiraay han? Kinacecayay cecay fafahiyan salikaka pasowalan ningra ko cecay malohemay malitengay to pasangaray no niyah a demak, saka tosa a romiˈad o fafahi nonini malohemay malitengay patingwaay mihinom tonini a salikaka. Mahapinangay, pasowalan no malohemay malitengay ko fafahi to nisowalan no fafahiyan salikaka. O kafanaˈanto, o harateng nonini fafahiyan salikaka pasangaray to miliyaw pakasoˈlin tonini malohemay malitengay. Kawra ngaˈayay ko midemakan no fafahiyan salikaka, talaˈayaway cingra pasayra i roma malohemay malitengay a micangacang to sapadama, ora malohemay malitengay padamaay cingranan miliyaw a patireng to pakasoˈlin to malohemay malitengay.

14. O maanan ko padamaay to cecay faˈinayan salikaka miliyaw patireng to pakasoˈlin to tatosaay malohemay malitengay?

¹⁴ O cecay faˈinayan salikaka halafinayto a tatokian cowa ka olah to tatosaay malohemay malitengay, pasangaray a pakasoˈlin cangranan saan ko harateng. Ikorto, matengilay ningra ko sowal no kangodoan ningra a faˈinayan salikaka saan: “O ˈada ita cowa ko salikaka, edengan ci Satan.” Onini a kantangay ciˈicelay a sowal mikidatay to pisimsim ningra, misongilaˈay cingra miharateng to sasamaan ko pidemak no niyah, hanaca mitolonay micangacang to sapadama ni Yihofa. Salikor, patatikolayto cingra mala rihaday ko kalalaˈed toniya tatosaay malohemay malitengay.

15. Miliyaw patireng to pakasoˈlin hano misaaliay to toki hani? Tinakoen mitadtad.

¹⁵ Na malahdaway ko cecay katayalan iso a toki han? Itiya maedeng tatiihay ko harateng iso. Itini saka 20 hahekalan 30 miheca lintad i Naci no Towic, ci Kerite ato wina ningra sahtoay o madimadiay a Misawacayay Tamdaw ni Yihofa. Itiya, makecengay ko mitosilay a tayal ita. Pacafayay ci Kerite to salikaka misangaˈ to Mikecolay a casi, kawra mafanaˈay ko salikaka misafelitay ko wama ni Kerite to soˈlinay kimad, cowato patorod ci Keritean tonini a katayalan, samanen calemcemay cangra to mamifanaˈ to  mikowanay ko wama ni Kerite. Cowa ka hatini aca, itini lalomaˈ no Saka Tosa Lalood no Hekal a tatokian, o salikaka cowa ka pafeli to casi no likakawa ci Keritean ato wina ningra, hanaca malitemoh i maci cangra cowa ka masasowal cangranan. Tada pakasomaday ci Keritean konini, sowal ningra halafinay a tatokian pasangaray ko niyah misodod toniya salikaka, awaayto ko pakayraan a pakasoˈlin cangranan. Kawra ikor maharatengay ni Kerite, maedeng maharekayto ci Yihofa misodod toniya salikaka, mihaenay o mamihaen ko demak no niyah. c

16. Hano mamiremo kita to kihcod a sacara, patireng to pakasoˈlin to salikaka?

¹⁶ Ano na tahacadaay kiso to mahaenay a pidokaˈ, o mamisaˈicel miliyaw patireng to pakasoˈlin to salikaka. Mihaen to demak misaaliay to toki, kawra o ciepocay konini. Haratengen hena, ano na mawarakay no kakaenen kiso, ano komaen to kakaenen noikor o maminaˈon kira, kawra cowa ko sasawad sato kiso a komaen. Malecaday, aka pakayni kita i kinacecay tahalifa to tatiihay demak, ecato pakasoˈlin to polong a salikaka. Mafanaˈay kita sahtoay cowa ko malefotay ko salikaka, kawra ano misaˈicel kita miliyaw patireng to pakasoˈlin cangranan, o mamatongal ko lipahak, mamatongalho ko pisarocod to mamadangar no niyah a demak, micowat to kasasipakasoˈlin no kasakopang.

17. (1) O pakasoˈlin hano tada masakalimlaan hani? (2) Dotoc a lalakaw mamilengo to manan?

¹⁷ Itini hekal ni Satan, pasangaray ko tamdaw pakasoˈlin to tao, kawra o salikaka pakayni kasasiolah hato ngaˈayay masasipakasoˈlin. O mahaenay a pakasoˈlin patongalay to lipahak ita anini, matongalay ko kakelec, ano tahalifa to sapalifet noikor i, papafeliho kitaanan to sadipot. Ano misakahmaw ko cecay tamdaw to pakasoˈlin iso, pakasomad tisowanan, sasamaanto hani? Ka pisaˈicel mikitini pinengneng ni Yihofa to demak a minengneng, sakadademaken ko safalod no Fangcalay Cudad, tongalen ko olah to salikaka, pasayraho i ngaˈayay taˈarawan no Fangcalay Cudad a minanam. Mihaen, o papakaremo kiso to dokaˈ no falocoˈ, miliyaw patireng to pakasoˈlin to tao, wa ngaˈayho ciwidang to ikakaay ko kangaˈay to salawina a ngaˈayay widang. (Taneng 18:24) Kawra, o pakasoˈlinay ono tatosaay a kalalaˈed. Dotoc a lalakaw mamilengo, sasamaan kita midemak malo ngaˈayay pakasoˈlinen no salikaka a tamdaw.