1. Ka uagu maweiridun tubéi wanigi ibidiñe lan houn gürigia kaba lan uagu hafiñera lidan ubóu le?

 LIDAN ubóu le lábugiñebei lubafu Satanási, ibidiñeti houn saragu kaba lan uagu hafiñera. Súnwandan hasandiragun gürigia ha houngua heyeeduñanu lan tábutigu bísinisi, tábutigu relihión hama burí polítiku ladüga katei wuribati le hadügübei. Ani ligiaméme hásügürübei hama hamadagu, habesinanigu, luma hama haduheñu. Moun lumuti ladügün lira lun taweiridun wanigi. Ariñagatu Bíbülia: “Lídounme lagumuhóun dan” marasualugubaña gürigia, magudemehabu hagíame ani halugurubaña hamadagu. Ha madünabaña lun lafiñerúniwa hawagu harufuduñein luriban ligaburi lubungiute ubóu le (2 Tim. 3:1-4; 2 Ko. 4:4).

2. a) Kaba uagu gayara lan wafiñerun sunsuinagubei? b) Ka álügüdahani gayaraabei ladügüni somu gürigia lúniwagua ?

² Ánheinti wagía, kristiánugu inarünitiña gayaraati wíchuguni sun wafiñen luagu Heowá (Her. 17:7, 8). Chouru wamuti hínsiñe wamá lun luma luagu maweiyasunbei lan áchagaraña lumadagu (Sal. 9:10). Gayaraati giñe wafiñerun luagu Hesukrístu ladüga ru lumuti libagari wawagu (1 Fe. 3:18). Subudi wamuti giñe gayara lan wíchuguni sun wafiñen luagu adundehani le tíchugubei Bíbülia woun (2 Tim. 3:16, 17). Chouru wamuti gayara lan wafiñerun luagu Heowá, luagu Hesusu luma tuagu Bíbülia. Gama lumoun, másiñati lálügüdagun somu gürigia lungua anhein gayara lubéi lafiñerun hawagu íbirigu ha lílana damuriguaü. Anhein ítara liña lubéi, ariha wamá ka lan uagu.

3. Ka lubuidun chansi wámabei? (Márükosu 10:29, 30).

³ Ru haali Heowá aban lubuidun chansi woun lun hádangiñe wamá lubúeingu ha ítarabaña kei iduheñu lidan sun ubóu. Seremei lun lira, ibihatiwa saragu abiniruni (aliiha huméi Márükosu 10:29, 30). Lidan sun ubóu añahein íbirigu dandu wügüriña kei  würiña ha ítaratiña kei wagía, hínsiñeti Heowá houn ani áfaaguatiña lun inebe lan lilurudun houn. Lau sun ámuñegueinarügü lan wererun, wechun luma ligaburi wadaüragun, sanditiwa aban óunwenbu ínsiñeni hawagu wábirigu lúmagiñe warihiniña furumiñe wéiyaasu. Lanwoun lira hínsiñeti woun walawahani luma wáhuduragun úara lun wáguchi hínsiñehabuti le siélubei (Sal. 133:1).

4. Ka uagu megei wabaliña wábirigu?

⁴ Mosu lidan wamá aban, uguñetima sügǘ luéi amu dan. Anihein dan, íderagua hamutiwa íbirigu anügei wahürügü (Rom. 15:1; Gal. 6:2). Ínchaha hamutiwa giñe lun beresegu wamá lidan weseriwidun lun Heowá luma lun derebugu lan wamadagua luma (1 Tesa. 5:11; Ebü. 10:23-25). Híruti hamuga, lun hamuga mibihin wamani hídeha íbirigu ha lílanabaña damuriguaü lun wagagibudagun hama wáganiñu: Satanási luma luriban ubóu le lábugiñebei lubafu. Yarafa madise, lábürühaba ligía hau sun ha lábugiñebaña lagumadihan hawagun lubúeingu Bungiu. Lídanme dan ligía wéiribei weteingiruni Bungiu lau añahán lanme wábirigu wama.

5. Ka uagu hénrengu lubéi houn fiu íbirigu hafiñerun hawagu hábirigu?

⁵ Gama lumoun, gayaraati añahein lan hádangiñe íbirigu hénrenguti houn hafiñerun hawagu hábirigu. Ka uagu? Másiñati aba lan habahüdahan aban katei lun aban íbiri ani lárigiñe aba lidin íbiri ligía abahüdahei houn amu. Háfuga adüga lan somu gürigia aban füramasei houn ani magunfulirun hamuti. Gayaraati giñe ariñaga lan o adüga lan aban íbiri somu katei le adügübei lun wuriba lan hasandiragun houngua. Ligíati, kaba íderaguawa lúntima wafiñerun hawagu wábirigu?

6. Ida liña líderaguniwa ínsiñeni lúntima wafiñerun hawagu wábirigu? (1 Korintuna 13:4-8).

⁶ Ínsiñeni lébunabei afiñeni. Lidan kapítulu 13  lidan 1 Korintuna ayanuhóuati ñein luagu saragu igaburi lánina ínsiñeni le lunbei líderaguniwa lúntima wafiñerun hawagu amu luma lunya wafiñerun hawagu ha féridi wamaalibei wafiñen hawagu (aliiha huméi 1 Korintuna 13:4-8). Kei hénpulu, ariñagati bérusu 4 “le hínsiñehabubei gaguraasunti areidati”. Gaguraasunti Heowá wabá lau sun afigouha wamá ligibugiñe. Ligíati mosu giñe gaguraasun wamá habá wábirigu ánhaña adüga o ariñaga katei burí le mínsiñebei woun o le gáribei woun. Ariñagati giñe bérusu 5 “magañidunti” lan aban gürigia le hínsiñehabuti ani “maguyuguagüdünti wuribani luagu wuribani”. Mabuseruntiwa wágiribudagüdün “wuribani luagu wuribani”, ni lun wabahüdüni sun wuribani le hadügübei wábirigu woun. Ariñagati Apurichihati 7:9 lun mígiraguagüdün wamá woungua lun igañi. Le buidutimaabei lun gaganbadi wamá lun adundehani le ariñawagúbei lidan Éfesuna 4:26: “Málüdala weyu hau gáñiñu”.

7. Ida liña líderaguniwa adundehani le wadarirubei lidan Matéu 7:1-5 lúntima wafiñerun hawagu wábirigu?.

⁷ Ábaya katei le lunbei líderaguniwa lúntima wafiñerun hawagu wábirigu warihiniña kei larihiniña Heowá. Hínsiñetiña lun ani mabahüdün lumuti hafigoun. Ligíati moun lumuti giñe wabahüdüni hachara amu (Sal. 130:3). Lubaragiñe wetenirun lun hachara wábirigu, lunti wáfaagun lun wetenirun lun lubuidun hagaburi luma lun warihini áfaaguni le hadügübei lun hadügüni le buídubei (aliiha huméi Matéu 7:1-5). Afiñetiwa hawagu ladüga le hínsiñehabubei afiñe lumuti “sun katei” (1 Ko. 13:7). Úati mini lan le amuriaha lan Heowá wama lun wafiñerun hawagu amu ítaraguarügü. Agurabaharügüti lun wafiñerun hawagu lugundun mosu harufuduni gadüna hamá lun lafiñerún hawagu. *

8. Ka gayaraabei hadügüni lun laganwoundun hafiñen hawagu ha híbiri íbirigu?

⁸ Ítara liña afiñeni kei inebesei, mégeiti saragu dan lun libihíniwa. Ka gayaraabei hadügüni lun laganwoundun hafiñen hawagu amu? Subudi humaña buidu. Ayanuha humá hama lidan damuriguaü. Sügǘ huma dan hama lidan apurichihani. Gaguraasun humá habá ani ru humá chansi houn lun harufuduni luagu gayara lan lafiñerúniwa hawagu. Anhein ibidiñe habéi somu gürigia hun buidu, gayaraati mayanuhan humá saragu huougua hama. Gama lumoun, éibutima asubudireina humani gürigia ligía buidu, gayaraabei buídubei lan hasandiragun hungua hariñaguni lun ida liña lan hasandiragun hungua (Luk. 16:10). Ka gayaraabei hadügüni anhein adüga aban íbiri lun heferidiruni hafiñen luagu? Lubaragiñe wóufudahan arihei kei féridihali, ru wama dan lun. Ani mígira humá lun ladügün le hadügübei fiu lun mafiñehadün lan hawagu amu. Aban katei le gayaraabei líderaguniwa, wakutihani hani lubúeingu Heowá ha úaraguabaña hénpulu ha asigirubaña afiñera hawagu amu íbini magundaagüda hamaniña.

9. a) Ka tadügübei Ana lau sun gafigoun hamá ha líchugubaña Heowá lun halidihan? b) Ka hafurendeirubei lídangiñe tani Ana hénpulu? (Ariha huméi dibuhu).

⁹ Adügaali san somu íbiri le alidihabalin damuriguaü somu katei le mínsiñeti hun? Anhein ítara liña lubéi, gayaraabei líderagunün tani Ana hénpulu. Lidan meha tidaani, Elí meha fádiribei le íñutimabei ani ligía giñe meha adundehati le súdinitimabei Ísüraeli. Gama lumoun míchutiña liduheñu aban lubuidun hénpulu. Íbini fádirigu hamá lirahüñü, adügatiña magíaguni ténpulurugu ani lóuguati lererehan Elí houn lun hasansiruni luriban igaburi le hawagubei le nibusigarídünati. Lau sun lira, magidarun lumuti Heowá lubara Elí luéi lau lóufudagun. Ka tadügübei Ana? Lau sun sigí lan Elí eseriwida kei fádiri le  íñutimabei, mígirun tumuti Ana táhuduragun lun Heowá tidan lisanduariun. Dan le tafurieiduña lubéi lau saragu íruni, aba lafuresehan Elí asaminara bacharuañoun lan, ani aba layanuhan tun lau anarimeni (1 Sam. 1:12-16). Lau sun lira, aba füramase tan Ana lun Heowá anhein lan íchiga aban irahü tun tanügübei lan eseriwida tidan lisanduariun Bungiu, le meha ñeinba lubéi lóunigirei Elí (1 Sam. 1:11). Mégeiwati meha san laranserun hawaguti lisaanigu Elí? Anha, ani adüga lumuti Heowá lidan lidaani (1 Sam. 4:17). Ligíati, lau lásügürün dan aba líchuguni Heowá tafayeiruaha Ana lau líchugun aban irahü gíriti Samueli tun (1 Sam. 1:17-20).

10. Ida liña larufudun Dawidi afiñe lan hawagu amu íbini añahein lan meha fiu agarabaagutiña luagu?

¹⁰ Garabaguaali san aban humada huagun? Lidan kesi le, samina humá luagu lani urúei Dawidi hénpulu. Dan le lóuchunbei Abüsalón le liráü lagidaruni larúeihan luéi, aba lóundarun Aitoféli, le meha lumada Dawidi, lumoun Abüsalón lidan lebedaagun. Máfuna ligari lun Dawidi lagarabaagun dandu lisaani kei gürigia le lanügübei kei besi lumada luagun. Gama lumoun madügünti katei le asuseredubei lun mafiñerun hali lan Dawidi hawagu amu. Sigiti afiñera luagu Usaí, aban besi lumada le úaraguabei lun le moundaragunbei hamoun ha ebedaagubaña. Anihein meha resun buiti luma Dawidi lun lafiñerun luagu Usaí, ladüga ru lani umadaü úaraguati le libagari lidan peliguru lun líderaguni (2 Sam. 17:1-16).

11. Ida liña larufudun aban lubúein Nawali afiñe lan hawagu amu?

¹¹ Samina humá giñe luagu hénpulu le líchugubei aban hádangiñe lubúeingu Nawali, Aban meha wügüri ísüraelina rísiti Nawali. Dandu meha Dawidi kei luwügüriñanigu buiti meha hagaburi hama lubúeingu Nawali ani góunigi hamutiña. Fiu dan lárigiñe, amuriahati Dawidi éigini houn luwügüriñanigu, lérügü gayaraabei híchugun houn. Kei maha lan Nawali, aba lagañidun Dawidi saragu darí lun lariñagun láfaragubaña lan sun wügüriña ha lúbiñebaña Nawali. Aba labahüdaguni aban hádangiñe lubúeingu Nawali tun Awigaili to lani Nawali weiriou le asuseredubei. Subudi lumuti tadügübei lan Awigaili sun tiyaraati lun tesefuruni libagari. Ani manurahanti ñéingiñe. Lubaragiñe lira, afiñeti meha taransehabei lan Awigaili sun katei ladüga subudiwatu kei aban würi chuti-tau. Buiti lidin lun ladüga lafiñerun tuagu. Aba tárügüdün Awigaili  ganigi aba tayanuhan luma Dawidi lun madügün lani le yebe lasaminarubei ladügün (1 Sam. 25:2-35). Ani afiñetu giñe larufuduba lan Dawidi lichú-aau.

12. Ida liña larufuduni Hesusu afiñe lan hawagu lani disipulugu lau sun chará hamá?

¹² Afiñeti meha Hesusu hawagu lani disipulugu lau sun chará hamá (Huan 15:15, 16). Dan le lamuriahanbei Santiagu luma Huan aban ubaraü wéiriguti lidan Larúeihan Bungiu, masigenehanti Hesusu hama ka lan lébubei heseriwidun lun Heowá mariñagun ligía houn mámaaña lanme lani apostolugu (Mar. 10:35-40). Ani guñoun le lárügüdünbei Hesusu, aba hígiruni sun lani disipulugu lábugua (Mat. 26:56). Gama lumoun meferidirun lumuti Hesusu lafiñen hawagu. Lau sun subudi lani hachara, hínsiñetiña “lun dagá lagumuhóun” (Huan 13:1). Ani lárigiñe láguyugun, ruti aban dasi houn 11 lani apostolugu úaraguatiña lun halidihani dasi lánina hadügün disipulugu luma lun hóunigiruniña mudún ha gebegibaña lun (Mat. 28:19, 20; Huan 21:15-17). Anihein meha buiti resun luma Hesusu lun lafiñerun hawagu wügüriña charatiña ha. Sun hagía úaraguatiña darí lagumuchun habagari ya ubouagu. Kei le aubei warihei, Ana, Dawidi, lubúein Nawali, Awigaili luma Hesusu afiñetiña meha hawagu gürigia charatiña ha. Ínchaha lumutiwa lubuidun hani hénpulu lun wadügüni ligiaméme.

13. Ka uagu anihein lubéi dan hénrengu lan woun wafiñerun hawagu amu?

¹³ Abahüdahadiwa san somu katei wawougua le masubudirun hamuti amu lun aban íbiri ani lárigiñe aba wíchugun fe abahüdaha lani houn amu? Le linarün katei gáriti woun dan le ladügün somu gürigia lun weferidiruni wafiñen luagu. Luagu aban dan, aba tabahüdaha aban íbiri aban katei tuougua lun aban wéiyaali lidan afiñeni. Ani afiñetu yebe mabahüdahan lubéi lan, larugan aba tagúarun lani wéiyaali lidan afiñeni ligía weiriou tun lun tíchugun dǘgüdaguaü tun, ladüga ayanuha lani wéiyaali ligía tikesin tuma lani weiriou. Lárigiñe hénrenguhaali meha tun íbiri tuguya tafiñerun luagu wéiyaali lidan afiñeni ligía. Gama lumoun, buiti tóuserun íbiri tuguya, aba tamuriahan ídemuei. Aba tayanuhan luma amu wéiyaali lidan afiñeni, ani íderagua lumutu lunya tafiñerun hawagu wéiyaaña lidan afiñen.

14. Ka íderagubalin aban íbiri lunya lafiñerun hawagu amu?

¹⁴ Barüti aban íbiri saragu dan gáñiñu hama bián wéiyaaña lidan afiñeni ladüga samina lan madüna hamá lafiñerúniwa hawagu. Lárigiñe aba laritaguni fiu dimurei súdiniti le meha lariñagubei aban íbiri le inebebei lun, lariñaga íbiri ligía lun: “Satanási wáganibei, mama wábirigu”. Aba lararamagun íbiri ligía asaminara luagun dimurei ligía, Ani aba lafurieidun libügürü katei le. Lau lásügürün dan, aba laranseruni liturobulin hama bián wéiyaaña lidan afiñeni hagía.

15. Ka uagu mégeiwa lubéi dan lunya gayara lan wafiñerun hawagu amu? Abahüdagua huméi tani Grete hénpulu.

¹⁵ Féridihadün san somu dasi le ichugúbei hun lidan damuriguaü? Gayaraati weiri lan ligari hun dan le lasuseredun aban katei ítarati. Ariha waméi tikesin Grete tuma túguchu, bián íbirigu ha úaraguatiña lun Heowá lidan burí irumu darandi lidan sígulu le sügühalibei. Hageira meha yámani hawinwanda le ñein lubéi maha hamá gumadimatiña nasi lapurichihóun. Rúwati meha dasi tun Grete lun tídehan adüga kopia tánina Garüdia Awisahatu houn íbirigu. Gama lumoun aba híchugun íbirigu fe mínsiñe lan inarüni tídangiñeti Bíbülia lun túguchi Grete. Adügati le lun hanufudedun íbirigu saragu luéidügü labuyaruniña túguchi Grete lílana damuriguaü, ligíati aba hagidaruni dasi ligía tuéi. Ani mámarügüñein katei le asusereda tun Grete, mosu meha tagagibudagun luma amu burí óuchawaguni. Lidan  libiaman Wuribu Wéiriti, ladüga mafiñen hamá hawagu míchutiña agumeiraguagüdüni ni tun ni tun túguchu ani mabusurun tiña giñe houn dan le harihiniña ǘmadarugu. Ma lanarime ligari katei le asuseredubei houn! Adügati katei le lun weiri lan luriban tasandiragun Grete tungua ani barütu saragu dan lubá gayara lan feruduna tániña íbirigu hagía, luma lunya gayara lan tafiñerun hawagu. Lau lásügürün burí irumu, aba tasaminarun feruduna laña lan Heowá, aba gunfuranda tani mosu lan giñe feruduna tániña. *

16. Ka uagu mosu lubéi wáfaagun lun wafiñerunya hawagu amu?

¹⁶ Anhein susere lubéi somu sügǘ gáriti lenege le iridúbei ya hun, áfaagua humá lunya hafiñerun hawagu íbirigu. Gayaraati lanügüba lan saragu dan lun hibihini, gama lumoun áfaaguni le hadügübei lanügüba saragu buiti hun. Samina wamá luagu aban hénpulu. Ánhawa asandira ladüga weigin somu éigini, lúmagiñe dan ligía lun lubaruaguóun wóunigirubei le lunbei wéigini, gama lumoun madügünbei lira lunya meigin wamá. Ítarameme, mígiraguagüda wamá woungua lun ladügün aban luriban sügǘ lun mafiñerun wamá hawagu wábirigu, ladüga subudi wamuti luagu chará hama. Ánhawaya afiñera hawagu wábirigu, gúndaatimabadiwa ani weteniruba lun le gayara wabéi adüga lun ñein lan afiñeni luma darangilaü lidan damuriguaü.

17. a) Ka uagu súdini lubéi afiñeni? b) Kaba wariha lidan leweñegua aturiahani?

¹⁷ Lidan ubóu le lábugiñebei lubafu Satanási mafiñentiña gürigia hawagu ni aban. Gama lumoun, hadan íbirigu ha lídanbaña sun ubóu ha ítarabaña woun kei iduheñu afiñetiwa wámagua ladüga hínsiñegua wamá wámagua. Seremei lun afiñeni le, gúndaati wasandiragun woungua ani anihein úarani wadan guentó. Ani lóunigirubadiwa lidan dan hénrenguti le lunbei liabin. Ánheinti wuriba lubéi wasandiragun woungua ladüga ladügün somu gürigia aban katei le adügüti lun weferidiruni wafiñen luagu? Gayaraati wafiñerun hawagu amu lau wáfaagun lun warihini katei kei larihini Heowá, luma lau gaganbadi wamá lun adundehani le tídanbei Bíbülia, lau wasandirun aban óunwenbu ínsiñeni hawagu wábirigu luma lau wakutihani hénpulu le tídanbei Bíbülia. Anhein wadüga, wagundaaruba lau abiniruni lánina hagamadúniwa saragu umadagu ha “úaraguatiña sügǘ lau íbiri” (Ari. 18:24). Úati buídurügü lan lun wafiñerun hawagu amu; mégeitiña giñe wábirigu hasubudiruni gayara lan hafiñerun wawagu. Lidan leweñegua aturiahani warihubei ka lan lunbei wadügüni lun hafiñerun amu wawagu.