1. Porque gendeh mas kita ta espanta que manada el ta sinti que gendeh sila puede confia con otro?

 EL MAGA gente na mundo de Satanas no sabe si con quien sila puede confia. Pirmi sila desmayao na maga negociante, politico y religioso lider. Manada tambien ta sinti que gendeh sila puede confia con el diila maga amigo, vecinos y maskin maga familia. Gendeh mas kita debe espanta con ese. El Biblia ya predicta que na ultimo maga dia, “el maga gente ay queda . . . chismoso . . . [y] traidor.” Quierre decir, el maga gente hay queda igual con el dios de este sistema de maga cosas con quien gendeh gayot puede confia.​—2 Tim. 3:1-4; 2 Cor. 4:4.

2. (a) Con quien gayot kita puede confia? (b) Cosa el cuanto posible ta pensa?

² Pero como maga Cristiano, sabe kita que puede gayot kita confia con Jehova. (Jer. 17:7, 8) Convincido kita que ta ama le kanaton y “nunca [le] abandona” con el de suyu maga amigo. (Sal. 9:10) Puede tambien kita confia con Cristo Jesus cay ya dale le el de suyu vida para kanaton. (1 Ped. 3:18) Y ya puede kita sabe na diaton personal experiencia que puede kita confia na guia del Biblia. (2 Tim. 3:16, 17) Asigurao kita que puede kita confia con Jehova, con Jesus y con el Biblia. Pero, el cuanto posible ta pensa si puede ba sila pirmi confia con el maga hermano y hermana na congregacion. Si oo, porque kita puede confia kanila?

3. Cosa bonito privilegio kita tiene? (Marcos 10:29, 30)

³ Ya iscuji kanaton si Jehova para queda parte del un familia de maga siervo del Dios na entero mundo. Imagina si paquemodo de grande ese privilegio y el maga beneficio de ese! (Le con el Marcos 10:29, 30.) Na entero mundo, tiene kita maga hermano y hermana quien ta ama tambien con Jehova y ta pricura sigui con el de suyu maga principio. Posible otro el diaton  lengguaje, cultura y mudada kanila pero ta ama kita kanila maskin pa por primer vez pa lang kita kanila ya conoce. Quierre-quierre kita man junto kanila para alaba y adora con el diaton amable Tata na cielo.​—Sal. 133:1.

4. Porque kita necesita con el diaton maga hermano y hermana?

⁴ Ahora, mas necesita ya gayot kita esta unido na diaton maga hermano y hermana. Tiene vez, ta ayuda sila kanaton para puede enfrenta con el diaton maga problema. (Roma 15:1; Gal. 6:2) Ta anima tambien sila kanaton para esta activo na servicio con Jehova y para esta fuerte na espiritual. (1 Tes. 5:11; Heb. 10:23-25) Pensa si cosa gaha kita hay sinti si nuay kita el proteccion del congregacion para ayuda kanaton resisti con el diaton maga enemigo​—si Satanas Diablo y el de suyu mal mundo. Gendeh dura, si Satanas y aquellos con quien le ta controla hay ataca con el maga siervo del Dios. Na ese tiempo, asigurao rindi gayot kita gracias cay talli el diaton maga hermano y hermana que ta suporta kanaton!

5. Porque el cuanto posible tan alang-alang confia con el maga hermano y hermana?

⁵ Pero, el cuanto tan dificil confia con otro na congregacion cay posible tiene un hermano o hermana que ya habla con otro el diila secreto o nuay puede cumpli con el de suyu promesa. O baka ya sinti sila duele na cosa ya habla o ya hace el un persona na congregacion. Ese maga experiencia posible causa kanaton para man dificil confia con otro. Cosa puede ayuda kanaton para hace fuerte con el diaton confianza na diaton maga hermano y hermana?

6. Paquemodo el amor puede ayuda kanaton para confia con otro? (1 Corinto 13:4-8)

⁶ Ta puede kita confia con otro por causa na amor. El 1 Corinto capitulo 13 ta menciona  manada aspeto del amor que puede ayuda kanaton para puede confia o aprende confia otravez con otro. (Le con el 1 Corinto 13:4-8.) Por ejemplo, el versiculo 4 ta habla que “el amor paciencioso.” Paciencioso kanaton si Jehova maskin ta culpa kita con ele. Poreso, debe kita queda paciencioso na diaton maga hermano si ta puede sila habla o hace cosas que ta manda consumi o ta hace sinti duele kanaton. El versiculo 5 ya omenta: “El amor gendeh ta rabia, sino ta olvida el malo ya hace con ele.” Este quierre decir que no quierre kita que continua pensa con el maga kamali del diaton maga hermano. El Eclesiastes 7:9 ta habla que debe “no [kita] rabia dayun.” Mas bueno si aplica kita con el maga palabra na Efeso 4:26: “No deja con el sol sumi mientras rabiao pa ustedes”!

7. Paquemodo el maga principio na Mateo 7:1-5 puede ayuda kanaton para confia con otro?

⁷ Puede tambien kita mas confia con el diaton maga hermano si mira kita kanila igual si paquemodo ta mira si Jehova kanila. Ta ama kanila el Dios y gendeh le ta recuji lista del diila maga culpa. Poreso, gendeh tambien kita se debe hace. (Sal. 130:3) En vez de man focus na diila maga kamali, debe kita pricura mira con el diila maga buen calidad y considera con el maga buen cosas que puede sila hace. (Le con el Mateo 7:1-5.) Ta creé kita que quierre sila hace si cosa el bueno y no quierre que hace sinti duele kanaton cay el amor “ta cree todo.” (1 Cor. 13:7) Gendeh se quierre decir que ta expecta si Jehova que basta lang kita confia con otro sino ta expecta le que confia kita con otro cay ya dale sila mira que conviene kanila confia. *

8. Paquemodo tu puede tene confianza na de tuyu maga hermano?

⁸ Igual na respeto, necesita tiempo para puede kita confia con otro. Paquemodo tu puede tene confianza na de tuyu maga hermano? Conoce kanila enbuenamente. Man cuento kanila na maga miting. Man partner kanila na ministerio. Queda paciencioso kanila y dale kanila el oportunidad para demonstra que conviene kanila confia. Na primero, si ta conoce pa lang tu con el un persona, posible iscuji lang tu el maga personal cosas que habla tu con ele. Pero mientras mas ta queda ustedes cerca, posible mas sinti tu comfortable que habla si cosa gayot tu ta sinti. (Luc. 16:10) Pero, paquemodo si ya confia tu con el un hermano pero ya falla le contigo? No dayun pensa que gendeh mas tu puede confia con ele como un amigo. Sino, deja pasa cuanto tiempo. Y no permiti que el cosa ya hace el cuanto hay causa contigo para gendeh mas confia con el de tuyu maga hermano. Hay considera kita ahora el ejemplo del cuanto maga fiel siervo de Jehova quien ya continua confia con otro maskin ya falla kanila el cuanto.

9. (a) Paquemodo si Ana ya mentena el de suyu confianza na arreglamiento de Jehova maskin ya falla el cuanto del De Suyu maga representante? (b) Cosa el experiencia de Ana ta enseña contigo acerca na de tuyu confianza na arreglamiento de Jehova? (Mira con el letrato.)

⁹ Ya queda ba tu desmayao na cosa ya hace el un hermano quien tiene privilegio? Si ansina, puede contigo ayuda el ejemplo de Ana. Aquel tiempo, el alto sacerdote que si Eli el ta guia na adoranza con Jehova na Israel. Pero, gendeh un buen ejemplo el de suyu familia. El de suyu maga anak, quien tiene tambien maga privilegio, regular ta hace maga maka-huya y imoral cosas. Pero, nuay kanila dale pesao disciplina el diila tata. Nuay dayun quita si Jehova con Eli  na de suyu privilegio. Maskin pa ansina, nuay decidi si Ana que gendeh mas le anda na tabernaculo para adora si si Eli siempre el alto sacerdote. Na un ocasion, cuando ya mira si Eli con Ana que ta reza, ya pensa le dayun que tomao este. Nuay le pricura sabe si cosa gayot el situacion sino ya regaña le con este bien triste mujer. (1 Sam. 1:12-16) Maskin pa ansina, ya promete si Ana que si tene le un anak hombre, hay lleva le con este para sirvi na tabernaculo donde si Eli el cuida con este. (1 Sam. 1:11) Necesita ba corecta con el maga anak de Eli? Si y amo se el cosa ya hace si Jehova na justo tiempo. (1 Sam. 4:17) Mientras tanto, ya bendici el Dios con Ana y ya dale con ele un anak hombre, si Samuel.​—1 Sam. 1:17-20.

10. Paquemodo si Rey David ya puede continua confia con otro maskin ya traiciona con ele el cuanto?

¹⁰ Ya traiciona ba contigo el un cerca amigo de tuyu? Si ansina, considera con el experiencia de Rey David. Uno na de suyu maga amigo amo si Ahitofel. Pero cuando el anak de David que si Absalom ya pricura queda rey, ya sigui si Ahitofel con el rebellon de este. Asigurao que ya sinti gayot duele si David cay ya traiciona con ele el de suyu anak y el persona que ta considera ele como de suyu amigo. Pero, nuay permiti si David que causa este con ele para gendeh mas confia con otro. Ya continua le confia con el de suyu uno pa leal amigo, si Husai, quien nuay sigui na rebellon. Tiene maga buen razon si David para confia con Husai. Ya dale mira si Husai que un buen amigo le y ya pone pa gane le na peligro el de suyu vida para ayuda con David.​—2 Sam. 17:1-16.

11. Na cosa manera ya dale mira confianza el un ayudante de Nabal?

¹¹ Considera tambien con el ejemplo del uno del maga ayudante de Nabal. Si David y el de suyu maga soldao ya protege con el maga ayudante del un Israelita que si Nabal. Cuanto tiempo despues, ya pidi si David con este rico gente que dale comida con el de suyu maga soldao​—maskin cosa que puede dale si Nabal kanila. Razonable el cosa ya pidi si David pero nuay conforma si Nabal. Poreso, ya queda bien rabiao si David y ya decidi que mata con el todo hombre na casa de Nabal. El un ayudante ya menciona este situacion con el mujer de Nabal que si Abigail. Ciendo ta queda ele alla  junto kanila, sabe le que puede si Abigail salva con el de suyu vida. En vez de escapa, ya confia le que puede si Abigail solva con el situacion. Puede le confia con Abigail cay conocido con este como un sabio mujer. Y base na cosa sunod ya sucede, justo gayot que ya confia le con Abigail. Con coraje ya actua si Abigail para convinci con David que no hace con el de suyu plano. (1 Sam. 25:2-35) Ya confia le que hay hace tambien si David el justo decision.

12. Paquemodo si Jesus ya dale mira que ya confia le con el de suyu maga dicipulo maskin ya hace sila maga kamali?

¹² Ya confia si Jesus con el de suyu maga dicipulo maskin ya hace sila maga kamali. (Juan 15:15, 16) Cuando ya pidi si Santiago y Juan con Jesus un especial posicion na Reino, nuay si Jesus cuestiona con el diila maga motivo na servicio con Jehova o habla kanila que gendeh mas sila de suyu maga apostoles. (Mar. 10:35-40) Mas pa, todo maga dicipulo de Jesus ya abandona con ele na noche cuando ya arresta con ele. (Mat. 26:56) Pero, nuay perde el confianza de Jesus kanila. Sabe le el diila maga imperfeccion pero “ta ama [le] firmi” kanila. (Juan 13:1) Gane, cuando ya resucita con Jesus, ya dale le importante responsibilidad con el de suyu 11 fiel apostoles​—que guia con el trabajo de hacida de dicipulo y cuida con el de suyu maga precioso carnero. (Mat. 28:19, 20; Juan 21:15-17) Justo lang que ya confia le con este maga imperfecto hombre. Todo sila ya esta fiel hasta na fin del diila vida. Claro que maga buen ejemplo si Ana, David, el ayudante de Nabal, si Abigail y Jesus cay ya confia sila con el maga imperfecto gente.

13. Cosa posible el un razon que puede causa kanaton para man dificil confia con otro?

¹³ Ya confia ba tu con el un hermano y ya habla un personal informacion pero ya puede tu sabe que ya habla le se con otro? Maka-triste gayot se. Na un ocasion, el un hermana ya habla personal cosas con el un anciano. Alamañana, ya llama el mujer del anciano para anima con el hermana y claro que sabe este si cosa ya habla el hermana con el anciano. Gendeh maka-estraña que ya perde el confianza del hermana con aquel anciano. Pero, ya hace el hermana si cosa el justo y ya pidi ayuda. Ya atraca le con el otro anciano y ya ayuda este con ele para bira el de suyu confianza con el maga anciano.

14. Cosa ya puede ayuda con el un hermano para confia otravez con el dos anciano?

¹⁴ El un hermano largo tiempo ya desmayao con el dos anciano y ta sinti le que gendeh le puede confia kanila. Pero, ya principia le pensa acerca con este simple pero importante maga palabra del un hermano: “Si Satanas el enemigo, gendeh el diaton maga hermano.” Ya pensa enbuenamente el hermano con ese y ya reza. Y na uliji, ya puede le otravez tene buen relacion con el dos anciano.

15. Porque posible necesita tiempo antes puede aprende confia otravez con otro? Dale un ejemplo.

¹⁵ Ya experiencia ya ba tu que ya perde el de tuyu privilegio? Posible que duele ese. Maga leal Testigo si Hermana Grete y el de suyu nana na Nazi Germany del maga 1930 cuando prohibido el diaton trabajo alla. Tiene si Grete el privilegio que man type maga copia del El Torre de Guardia para na maga hermano y hermana. Pero cuando ya sabe el maga hermano que tan contra el de suyu tata na verdad, ya quita sila el de suyu privilegio cay ta tiene sila miedo que baka traiciona el de suyu tata con el congregacion. Gendeh lang se el cosa ya enfrenta si Grete. Durante el Guerra Mundial II, el maga hermano gendeh ta dale maga copia del magasin con Grete y con el de suyu nana y gendeh sila ta hace caso kanila. Ya sinti gayot sila  duele! Ya habla si Grete que ya pasa pa largo tiempo antes le ya puede perdona y confia otravez con aquel maga hermano. Ya puede le realiza que ya perdona ya si Jehova kanila poreso debe tambien le se hace. *

16. Porque kita debe hace esfuerzo para confia con el diaton maga hermano y hermana?

¹⁶ Si tiene tu ansina semejante maka-triste experiencia, hace esfuerzo para puede tu otravez confia con otro. Posible, necesita tu tiempo pero gendeh man sayang el de tuyu esfuerzo. Considera con este ilustracion: Si yan food poison kita, posible hay queda kita mas con cuidao na cosa kita ta come. Pero, gendeh se causa kanaton que gendeh mas come. Na igual manera, gendeh kita debe permiti que el un gendeh buen experiencia hay causa kanaton para gendeh mas confia con el todo diaton maga hermano y hermana quien sabe kita que ya nace imperfecto. Si pricura kita confia otravez con otro, hay queda kita mas alegre y mas puede kita man focus na cosa kita puede hace para anima con otro na congregacion que confia con el maga hermano y hermana.

17. Porque bien importante que confia kita con el diaton maga hermano y cosa kita hay discuti na sunod articulo?

¹⁷ Na mundo de Satanas, tan dificil el maga gente confia con otro. Pero por causa na amor, ta puede kita confia con el diaton maga hermano y hermana. Por causa con ese, tiene kita alegria y unidad ahora, y un proteccion ese si enfrenta kita maga dificultad na futuro. Paquemodo si ya perde el de tuyu confianza na un hermano o hermana? Pricura mira con el situacion na mirada de Jehova, aplica maga principio na Biblia, pricura tene hondo amor na maga hermano y imita con el maga ejemplo na Biblia. Puede kita ulvida con el dolor y tene otravez confianza con otro. Si hace kita se, hay tene kita manada maga amigo “que leal pa na un hermano.” (Prov. 18:24) Pero, importante tambien que mira el otro que puede sila confia kanaton. Na sunod articulo, hay discuti kita si paquemodo kita puede dale mira que puede confia kanaton el diaton maga hermano.