1. Pine nemen matre tha sesëkötre kö së laka, tha mejiune hë la itre atr koi itre xan?

 AME enehila, tha mejiune hë la itre atr koi itre xan. Xele catr angatr ma wang la aqane ujë ne la itre ka salem, me itre he ne politik, me itre hene ne hmi. Goi tha mejiune fe angatr kowe la itre sinee i angatr me itre atrene la fami angatr. Ngo tha sesëkötre kö së, ke öni Tusi Hmitrötr ka hape: “Ngöne la itre drai ne la pun . . . , tro la itre atr a . . . tha mele nyipici, . . . me silitrengathoi ketre, . . . me mele hnihni.” Kolo lai a hape, tro la itre atr a ujë tune la haze ne la fene celë laka, tha nyine tro kö a mejiune kow.​—2 Tim. 3:1-4; 2 Kor. 4:4.

2. (a) Drei la hne së hna mejiune kow? (b) Nemene la hna hnyingëne hnene la itre xan thei easë?

² Ame easë itre hlue i Iehova, easa mejiun koi Nyidrë. (Iere. 17:7, 8) Xecie koi së laka, Nyidrëti a hnimi së, nge tha tro kö Nyidrëti a “nuetrij” la itre hnei Nyidrëti hna hnim. (Sal. 9:10) Nge easë fe a mejiun koi Iesu ke, hnei nyidrëti hna nue la mele i nyidrë koi së. (1 Pet. 3:18) Ketre, ka hetre thangane koi së la itre eamo qa hnine la Tusi Hmitrötr. (2 Tim. 3:16, 17) Celë hi matre easa mejiun koi Iehova, me Iesu, me kowe la Tusi Hmitrötr. Ngo ame la itre xan thei easë, angatr a hnying ka hape: ‘Ijije kö tro ni a mejiun kowe la itre xaa trejin? Maine eje hi, ke tro ni a amamane tune kaa?’

3. Nemene la ketre manathith ka tru hne së hna kapa? (Mareko 10:29, 30)

³ Ame enehila, hnei Iehova hna ee së kowe la fami Nyidrë, ene la itre hlue i Nyidrë. Nge ketre manathithi ka tru la troa sine la fami cili! (E jë la Mareko 10:29, 30.) Ame ngöne la fen, nyimutre la itre trejin ka tu së, ka hnimi Iehova me ka isine  troa trongëne la itre trepene meköti Nyidrë. Ngacama isapengöne kö la qene hlapa së, me qenenöje së, me aqane heetre së, ngo ame la easa iöhnyi me angatr ke, kösë ka iatre hë së qaan ekö. Madrine catre së troa ce nyihlue i Iehova me angatr me ce atrun la Keme së ka tru ihnimin.​—Sal. 133:1.

4. Pine nemen matre loi e tro sa cas memine la itre trejin?

⁴ Enehila hi la ijine tro sa cas memine la itre trejin me easë. Angatr a ce thu me easë la itre hace së. (Rom. 15:1; Gal. 6:2) Angatr a ithuecatr me xatua së troa catre nyihlue i Iehova. (1 Thes. 5:11; Heb. 10:23-25) Nge angatre a xatua së troa cile catr qëmekene la itre ithupëjia me easë, ene Satana memine la fene i angeic. Easenyi catre hë tro Satana me itre sine xöle i angeic a lep la itre hlue i Iehova. Drei jë kö la madrine së la easa cas memine la itre trejin ngöne la ijine cili!

5. Pine nemen matre jol koi itre xan troa mejiun kowe la itre xaa trejin?

⁵ Jol koi itre xan troa mejiun kowe la itre xaa trejin. Maine jë, hnene la ketre hna kötrefë ithanata, maine tha eatrëne pena la hna qaja. Maine jë, hna akötrë angatr hnene la hna qaja maine kuca hnene la ketre trejin ne la ekalesia. Celë hi kepin matre jole hë koi angatr troa mejiun koi itre xan. Nemene la ka troa xatua së troa acatrene la mejiune së kowe la itre trejin?

6. Pine nemen matre tro la ihnim a upi së troa mejiune koi itre xan? (1 Korinito 13:4-8)

⁶ Ihnim la ka upi së troa mejiun koi itre xan. Ame la itre igötranene la ihnim hna qaja ngöne 1 Korinito mekene 13, ke kola upi së troa mejiun maine mejiune hmaca koi itre xan. (E jë la 1 Korinito 13:4-8.) Kola qaja ngöne la xötre 4 ka hape, “ame la ihnim, tre  ka xomihni me menyik.” Iehova a xomihni së la easa ngazo koi Nyidrë. Celë hi matre loi e tro fe sa xomihnine la itre trejin, la angatr a qaja maine kuca la itre ewekë ka aelëhni së maine akötrë së pena. Önine la xötre 5 ka hape, ame la ihnim tre “tha ka canga elëhni kö. Nge tha ka lapa fë trenge hni kö.” Tha tro kö sa hnehen la nöjei ngazo hna kuca koi së matre troa amexeje hmaca ngöne la ketre ijin. Kola qaja ngöne Ate Cainöj 7:9 ka hape, ‘tha tro kö sa canga drengakötrën.’ Loi e tro pe sa trongëne la eamo ngöne Efeso 4:26 ka hape: “The nue kö troa lö la jö nge ka elëhni pala hi nyipunie”!

7. Tune kaa la aqane xatua së hnene la hna qaja ngöne Mataio 7:1-5 göi troa mejiun koi itre xan?

⁷ Hmaloi hi tro sa mejiun koi itre xan e tro sa goeë angatr tui Iehova. Tha Nyidrëti kö a mekune lapane la itre tria i angatr ke, tru la ihnimi Nyidrë koi angatr. Matre loi e tro sa nyitipu Nyidrë. (Sal. 130:3) Tha tro kö sa goeën la itre thiina ka ngazo i angatr, ngo loi e tro pe sa goeën la itre thiina ka loi angatr memine la itre hnei angatr hna atreine kuca. (E jë la Mataio 7:1-5.) Pine laka ame la ihnim ke, ka “kapa la nöjei ewekë asë,” haawe tha tro kö sa canga mekun ka hape, angatr a thel troa akötrë së. (1 Kor. 13:7) Tha kolo kö lai a hape, Iehova a upi së troa mejiun koi angatr, nge pë pe nyipi kepin. Ngo hnene laka hnei angatr hna amaman ka hape, ijije hi tro sa mejiun koi angatr. *

8. Tune kaa la aqane tro sa acatren la mejiune së kowe la itre trejin?

⁸ Loi e tro sa nue ijin matre troa mejiun kowe la ketre atr. Tune kaa la aqane tro sa acatrene la mejiune së kowe la itre trejin? Thele jë troa atre angatre hnyawa. Porotrike jë me angatr qëmeken me e thupen la itre icasikeu. Ce cainöje jë fe me angatr. Loi e tro sa atreine itreqe, me nue ijin koi angatr troa amaman laka, ijije hi tro sa mejiun koi angatr. Ame la easa xötrei atre la ketre atr, ke tha easë kö a canga fe la hni easë koi angeic. Ngo ame hë la easa atre angeice hnyawa, ke tha xou easë hë. (Luka 16:10) Ngo tune kaa e traqa ju angeic kötrefë ithanata? The canga wesitre kö koi angeic ngo pane nue ijine pi. Ketre, the nue kö la aqane ujë i angeic troa sewe eö troa mejiun kowe la itre xaa trejin. Tro sa ce wang la tulu ne la itre hlue i Iehova ekö ka hane melëne lai, ngo hnei angatr palahi hna mejiun koi itre xan.

9. (a) Hnei Hana hna drengethenge tune kaa la itre hna amekötin ngacama ngazo la thiina ne la itre ka elemeken? (b) Nemene la ini hne së hna xom qa ngöne la tulu i Hana göne la enyipiewekën troa mejiun koi Iehova? (Wange ju la iatr.)

⁹ Hna hane kö akötrë epun hnene la ketre trejin ka hetre hnëqa ngöne la organizasio i Iehova? Maine eje hi, tro la tulu i Hana a xatua epun. Ame ekö, Eli, Atre Huuje Ka Sisitria la qeneqaja i Iehova e Isaraela. Ngo tha ka loi kö la aqane ujë ne la lue nekö i nyidrë. Ngacama nyidro a cilëne la itre hnëqa ka tru, ngo nyidro a kuca la itre huliwa ka sis me kuci ngazo. Tha hna haji nyidro kö hnene la keme i nyidro. Nge tha hnei Iehova kö hna canga xom la hnëqa qaathei Eli. Ame pe, hnei Hana palahi hna drengethenge la itre hna amekötin hnei Iehova. Hnei eahlo palahi hna tro kowe la uma maano ngacama Eli la Atre Huuj Ka Sisitria. Ame la Eli a öhnyi Hana a thith me treij, hnei nyidrëti hna mekun ka hape, ka hmo eahlo hnei kahaitr. Hnei nyidrëti hna upezö eahlo menu,  ngo tha hna pane atre pe la ka traqa. (1 Sam. 1:12-16) Hnei Hana hna sisinyi koi Iehova laka, e tro Nyidrëti a hamë nekö i eahlo trahmany, ke tro nyën a huliwa drai ka pexej ngöne la uma maano. (1 Sam. 1:11) Hnei eahlo hna metrötrën la hnei eahlo hna sisiny, ngacama Eli la ka troa thupën la nekö i eahlo. Hapeu, hna amekötine kö la lue nekö i Eli? Eje hi, hnei Iehova hna ameköti nyidro ngöne la nyipi ijin. (1 Sam. 4:17) Nge hnei Nyidrëti hna amanathithi Hana me hamë nekö i eahlo trahmany, Samuela.​—1 Sam. 1:17-20.

10. Nemene la hna kuca hnei Dravita la kola mele thoi hnene la itre sinee i nyidrë?

¹⁰ Hnene kö la ketre sinee i epun hna mele thoi koi epun? Maine eje hi, tro la tulu i Dravita Joxu a xatua epun. Hetre ketre sinee i nyidrë hna hëne ka hape, Ahithofela. Ngo ame la Abasaloma nekö i Dravita a thel troa thapa la hnanyijoxu, hnei Ahithofela hna ce xöle me angeic. Pane mekune jë la akötre i Dravita la kola icilekeu me nyidrë hnene la sipu nekö i nyidrë memine la sinee i nyidrë! Ame pe, tha celë kö la ka sewe Dravita troa mejiun koi itre xan. Hnei nyidrëti palahi hna mejiun koi Husai, ketre sinee ka mele nyipici koi nyidrë. Nge nyipici nyidrëti hi ke, hnei Husai hna nue mel koi nyidrë.​—2 Sam. 17:1-16.

11. Tune kaa la aqane amamane la ketre hlue i Nabala laka, angeic a mejiun koi Abigaila?

¹¹ Tro pena sa ce wange la tulu ne la ketre hlue i Nabala. Hnei Dravita me itre sooce i nyidrë hna thupëne la itre hlue i Nabala, ketre atre Isaraela ka trenamo. E thupen, hnei Dravita hna sipo xen koi Nabala, matre ithua i nyidrë me itre sooce i nyidrë. Ngo tha hna kapa kö hnei Nabala la sipo i nyidrë. Elëhni catre Dravita, matre hnei nyidrëti hna tro troa humuth la nöjei trahmanyi ngöne la hnalapa i Nabala. Hnene la ketre hlue i Nabala hna canga thuemacanyi Abigaila föi nyidrë la ewekë ka traqa. Atre hi angeic laka, Abigaila hmekuje hi la ka atreine amele angatr. Maine ju tro angeic a kötr, ngo xecie koi angeic laka, atreine hi Abigaila nyinyine lai jol. Hna atre eahlo ka hape, ketre föe ka atreine waiewekë. Nge kola mama e thupen laka, nyipici angeice hi troa mejiun koi eahlo. Hnei eahlo hna tro koi Dravita me  ithanata me nyidrë matre saze la mekuna i nyidrë. (1 Sam. 25:2-35) Mejiune eahlo koi Dravita, nge xecie koi eahlo laka, tro nyidrëti a kapa la sipo i eahlo.

12. Nemene la ka amamane laka, Iesu a mejiun kowe la itretre drei nyidrë ngacama tha ka pexeje kö angatr?

¹² Hnei Iesu hna mejiun kowe la itretre drei nyidrë ngacama itre atr ka tha pexeje kö angatr. (Ioane 15:15, 16) Ame lo Iakobo me Ioane a sipo Iesu troa cilëne la ketre göhnë ka tru ngöne la Baselaia, ke tha ase kö nyidrë mekun ka hape, nyidroti a nyihlue i Iehova göi thupen, me xome qaathei nyidro la hnëqa ne aposetolo. (Mar. 10:35-40) Ame ngöne lo jidr kola othi nyidrë, hnene la itretre dreng asë hna kötr me nuaxöji nyidrë. (Mat. 26:56) Ngo hnei Iesu palahi hna mejiun koi angatr. Ngacama atre hi nyidrëti la itre tria i angatr, ngo hnei nyidrëti palahi hna “hnimi angatre uti hë la pun.” (Ioane 13:1) Thupene la kola amele nyidrëti hmaca, hnei nyidrëti hna ahnithe kowe lo ala 11 lao aposetolo la ketre hnëqa ka tru, ene la troa elemekene la huliwa ne cainöj me thupëne la itre mamoe i nyidrë. (Mat. 28:19, 20; Ioane 21:15-17) Nge nyipici nyidrëti hi ke, hnei angatr hna mele nyipici koi Iehova utihë la angatr a mec. Hnei Hana, Dravita, memine lo hlue i Nabala, me Abigaila, me Iesu hna mejiun kowe la itre atr ka tha pexeje kö. Angatre hi la itre tulu nyine tro sa xötrethenge.

13. Pine nemene matre tha mejiune hë la itre xaa trejin kowe la itre xan?

¹³ Hna hane fe kö traqa koi epun troa fe la hni epun kowe la ketre trejin, nge hnei angeic hna qaja koi ketre? Nyipici, aqane ujë lai ka troa akötrë epun. Ame ngöne la ketre ijin, hnene la ketre trejine föe hna fe la hni angeic kowe la ketre qatre thup. Ame ju fe kö la drai thupen, hna ithuecatr koi angeic hnene la föe ne lai qatre thup. Trotrohnine ju hi angeic ka hape, ase hë la qatre thup qaja la jole i angeic kowe la föi nyidrë. Ame cili, tha mejiune hë angeic kowe lai qatre thup. Eloine pe, hnei angeic hna thele ixatua thene la ketre qatre thup, nge hnei nyidrë hna xatua angeic tro hmaca a mejiun kowe la itre qatre thup.

14. Nemene la ka xatuane la ketre trejin troa mejiune hmaca kowe la lue qatre thup?

¹⁴ Hnene la ketre trejin hna iwesitrë memine la lue qatre thup matre tha mejiune hë angeic koi nyidro. Ngo mekune hmaca jë hi angeic la hna qaja hnene la ketre trejin hnei angeic hna metrötrën. Ka co hi la hna qaja ngo ka ketri angeice catr. Önine lai trejin: “Satana la ithupëjia me easë, ngo tha itre trejine kö.” Hnei angeic hna lapa mekun la hna qaja e celë, me catre thith, me iloi hmaca memine lo lue qatre thup.

15. Hnauëne laka, jole catr koi së troa mejiune hmaca kowe la ketre atr? Qaja jë la ketre ceitun.

¹⁵ Hna hane fe kö xome qaathei epun la ketre hnëqa? Nyipici, tha ka hmaloi kö. Celë hi ka traqa koi Grete me thine i angeic e Alema, lo ijine kola wathebone la hmi së ngöne lo itre macatre 1930. Ka mele nyipici nyidro koi Iehova, nge hna sipo Grete troa fejane la Ita Ne Thup. Ngo ame la itre trejin a atre ka hape, ka icilekeu la keme i angeic memine la hmi së, ke hnei angatr hna xome hmaca la hnëqa qaathei Grete. Xoue angatr tro la keme i angeic a qajaqaja la itre huliwa ne la hmi kowe la itre ka icilekeu. Ngo tha celë hmekuje kö la hna kuca koi Grete. Ame ngöne lo Hnaaluene Isi Ka Tru, tha hnene hmaca kö la itre trejin hna hamë Grete me thine i angeic la itre Ita Ne Thup. Nge goi tha ithanata fe angatr me nyidro la angatr a ixelë e cahu gojeny. Tha fene akötre kö koi nyidro! Öni Grete, thatreine kö angeic thëthëmin,  nge thatreine kö angeic troa mejiune hmaca kowe la itre trejin. Ngo ame la angeic a mekun ka hape, ase hë Iehova nue la ngazo ne la itre trejin, ke celë fe hi ka upi angeic troa nue la ngazo i angatr. *

16. Pine nemen matre tha tro pi kö sa nue la ketre jol, a sewe së troa mejiune hmaca kowe la trejin ka akötrë së?

¹⁶ Hane hë epuni melëne la jol ka traqa koi Grete? Maine eje hi, the nue kö la jole cili troa sewe epun, troa mejiune hmaca kowe la trejin ka akötrë epun. Nyipici tro lai a hmiitr, ngo tro kö epuni a kepe manathith e thupen. Hane hi la ketre ceitun. Thupen la hna angazone la hni së hnene la ketre xen, tro së lai a hmekën maine thupën la aqane tro sa xen. Tha kolo kö lai a hape, tha tro hmaca kö sa xen. Ceitune hi lai memine la kola akötrë së hnene la ketre trejin. Tha kolo kö lai a hape, tha tro hmaca kö sa mejiun kowe la itre trejin asë. Atre hnyawa hi së ka hape, itre atr ka tha pexeje kö së. Haawe, maine tro sa mejiune hmaca kowe lai trejin, ke tro së lai a madrin, nge easë fe hi lai a kuca matre tro palahi a tingetinge la ekalesia.

17. Pine nemen matre nyipiewekë tro sa mejiun kowe la itre trejin? Nge nemen la hne së hna troa wang ngöne la tane mekun e thupen?

¹⁷ Ame ngöne la fene i Satana, ke xalaithe pe hi la itre atr ka mejiun koi itre xan. Ngo ame easë, easa mejiune kowe la itre trejin ke, hna acasi së hnene la ihnim. Jëne la mejiune cili, easa madrin me cas. Nge kolo fe a thupë së göne la itre jol ka troa traqa elany. Nemene la nyine tro epuni a kuca e tha mejiune hë epuni koi ketre? Thele jë troa waiewekë tui Iehova, me trongëne la itre trepene meköt. Catre jë hnime la itre trejin, nge xötrethenge jë la tulu ne la itre hlue i Iehova ekö. Tha ka hmaloi kö la kola akötrë së, ngo ijije hi tro sa elëhune lai, me mejiune hmaca kowe la trejin. E cili, tro hë sa madrin troa hetre trejin ‘ka ihnimi catr kö hune la sipu trejin.’ (Ite edomë 18:24) Nyipici, nyipiewekë tro sa mejiune kowe la itre trejin, ngo loi e tro fe angatr a mejiune koi së. Celë hi matre, ame ngöne la tane mekun e thupen, tro sa ce wang la nyine tro sa kuca matre tro angatr a mejiune koi së.