1. Ni sèwten moun ki pa’a fè ponmoun konfyans. Poukwa sa pa ka siwprann-nou ?

 ONLO moun ni lenprésyon kè yo pé pa fè ponmoun konfyans. Lèwvwè yo ka vwè jan sé moun-la ka kouyonné moun pou fè antrèpriz a yo fè lajan, oben jan sé chèf a politik la oben sé chèf a relijyon-la ka kouyonné moun, sa ka désèvwa-yo. Dépawfwa osi, ni moun ki pa’a fè moun ki alantou a yo konfyans, yo pa’a fè zanmi a yo konfyans é pa menm moun an fanmi a yo yo pa’a fè konfyans nonplis. Men lè nou ka vwè sa, sa pa dwèt siwprann-nou paskè Labib té ja anonsé kè « pannan sé dènyé jou-la », sé moun-la pa té’é « fidèl », yo té’é « manti pou fè moun mal » é yo té’é « trèt ». Sa vé di kè sé moun-la té’é kon Satan, dyé a mond-lasa, é Satan sé dènyé moun pou nou fè konfyans (2 Tim. 3:1-4 ; 2 Kor. 4:4).

2. a) Kimoun nou pé fè konfyans é adan ki biten nou pé ni konfyans osi ? b) Ka sèwten moun ka mandé-yo ?

² Men nou, nou sé dé krétyen, kifè nou sav kè nou pé fè Jéova konfyans a san pou san (Jér. 17:7, 8). Nou sèten kè i enmé zanmi a-y é kè i pé’é jen lagé-yo (Sòm 9:10). Anplisdisa, nou pé fè Jézi konfyans pas i bay vi a-y pou nou (1 Pyè 3:18). É lèwvwè nou étidyé Labib, nou rann-nou kont kè nou pé fè sé konsèy-la ki an Bib-la konfyans (2 Tim. 3:16, 17). Sé pousa, nou sèten kè nou pé fè Jéova, Jézi é Labib konfyans. Men pétèt kè ni sèwten adan nou ki ka mandé-yo : « Ès yo pé fè frè é sè a yo konfyans ? » Si nou ka réponn wi a kèsyon-lasa, asi ki biten nou ka bazé-nou pou nou di sa ?

3. Ki bèl lonnè nou ni ? (Mawk 10:29, 30).

³ Jéova fè-nou vin owa a-y. Jòdijou, nou ka fè pawti a on fanmi ki plen frè é sè adan-y, é yotout ka adoré Jéova. Mésyé, sé on bèl lonnè toubònman é sa ka prokiré-nou onlo byenfé ! (li Mawk 10:29, 30). Toupatou asi latè frè é sè an nou enmé Jéova kon nou é yo ka fè éfò pou suiv prensip a-y.  Pétèt kè nou pa’a palé menm lang-la, kè nou pa ni menm kilti-la oben kè nou pa ka abiyé menm jan-la, men nou ka santi kè nou ka fè pawti a menm fanmi-la menmsi sé prèmyé fwa nou ka jwenn-yo. Men sa nou enmé plis sé lèwvwè nou ansanm pou nou adoré Pap’ an nou ki an syèl-la é pou nou ba-y louwanj, li ki enmé-nou toubònman ! (Sòm 133:1).

4. Poukwa nou bizwen frè é sè an nou ?

⁴ Fò-nou rété soudé èvè frè é sè an nou, é sé konnyéla pou nou fè sa plis ankò. Dépawfwa, yo ka édé-nou pòté sa ki two lou ban nou (Wom. 15:1 ; Gal. 6:2). Yo ka ankourajé-nou pou nou pé sa rété bon bon zanmi èvè Jéova é pou nou kontinyé sèvi Jéova èvè onlo balan (1 Tés. 5:11 ; Ébr. 10:23-25). Imajiné kè Satan é mond a-y ki méchan toubònman ka ataké-nou é kè nou pa té ni lasanblé-la pou pwotéjé-nou. Ka nou té’é rèsanti ? Talè, Satan é bannélo a-y ké ataké Bondyé men a pa ti kontan nou ké kontan ni frè é sè an nou akoté an nou a moman-lasa !

5. Poukwa sèwten moun pa ka ki rivé fè frè é sè a yo konfyans ?

⁵ Men dépawfwa, ni sèwten moun ki ni dimal a fè frè é sè a yo konfyans. Sé pé paskè yo wouvè tchè a yo ba on frè oben on sè é lèwgadé moun-lasa ay palé sa èvè dòt moun. Oben pétèt kè on frè oben on sè pwomèt-yo on biten é kè i pa tchenn a mo a-y. Ni dòt fwa osi, sé pas on frè oben on sè fè-yo on biten oben di-yo on biten ki fè-yo mal. Lèwvwè sa ka rivé, nou pé rivé a di-nou kè pa ni mwayen nou fè lézòt konfyans. Men ka ki pé édé-nou pou nou kontinyé fè lézòt konfyans ?

6. Lanmou ka pousé-nou fè lézòt konfyans. Poukwa nou ka di sa ? (1 Korentyen 13:4-8).

⁶ Pou nou fè on moun konfyans, fò-nou enmé-y. 1 Korentyen chapit 13 ka montré  diféran biten lanmou ka pousé on moun fè, é onlo adan sé biten-lasa ka pousé-nou fè lézòt konfyans oben ka pousé-nou woufè-yo konfyans (li 1 Korentyen 13:4-8). Pa ègzanp, adan vèwsé 4 la, nou ka vwè kè lanmou « ni pasyans é i ni bonté ». Jéova ka aji èvè pasyans èvè nou menm lèwvwè nou ka péché kont li. Sé pousa, fò-nou osi, nou aji èvè pasyans épi frè é sè an nou lèwvwè yo ka di oben yo ka fè dé biten ki ka fè-nou mal oben ki ka fè-nou fè kòlè. Anplisdisa, adan vèwsé 5 la nou ka li kè « [lanmou] pa ka fè kòlè fasil. I pa ka maké mové biten yo fè-y. » Éklézyas 7:9 ka fè-nou sonjé kè fò pa nou « fè kòlè pou ayen ». Alò, pisimé nou apliké konsèy-la nou ka touvé an Éfézyen 4:26 ki ka di : « Penga solèy-la kouché pou zò kòlè toujou. »

7. Kijan sé prensip-la nou ka touvé an Matyé 7:1-5 pé édé-nou fè lézòt konfyans ?

⁷ Nou ké rivé fè frè é sè an nou konfyans pi fasilman osi siwvwè nou ka vwè-yo kon Jéova ka vwè-yo. I enmé-yo é i pa’a kontinyé sonjé sé péché-la yo ka fè la. Alò, nou nonplis fò pa nou fè sa (Sòm 130:3). Olyé nou gadé défo a lézòt, an-nou fè éfò pou nou vwè ki kalité yo ni é an-nou réfléchi asi tout bon biten yo pé fè (li Matyé 7:1-5). Konm lanmou « ka kwè tout biten », an-nou mèt an tèt an nou kè frè é sè an nou vlé fè-nou dibyen (1 Kor. 13:7). Sa pa vé di kè Jéova ka mandé-nou fè-yo konfyans zyé-fèmé, men i vé kè nou fè-yo konfyans pas yo montré kè yo sé dé moun kè nou pé fè konfyans b.

8. Ka ki pé édé-w fè frè é sè a-w konfyans ?

⁸ Ou pa’a enki fè on moun konfyans konsa. Sa ka mandé tan. Men ka ou pé fè pou ou pé sa fè frè é sè a-w konfyans ? Aprann konnèt-yo pibyen. Pran tan palé èvè yo avan é apré sé réinyon-la. Òwganizé-w pou ou pé sa préché èvè yo. Aji èvè pasyans èvè yo é ba-yo tan pou yo pé sa montré kè yo sé dé moun kè ou pé fè konfyans. Si ou po’o byen konnèt on moun pétèt kè ou ké ni dimal a di-y sa ou ka rèsanti, sa ki an lèspri a-w é pétèt kè ou ké ni dimal a palé-y dè sa ki ka konsèwné-w. Men pi ou ké aprann konnèt-li, pi ou ké alèz èvè-y é ou ké pé wouvè tchè a-w ba-y (Lik 16:10). Men vinvwè on frè oben on sè trayi-w, ka pou ou fè ? Pa mèt an tèt a-w tousuit kè ou vé pa ni ayen a vwè èvè moun-lasa. Préféré ou lésé tibwen tan pasé. Fò pa ou lésé sé mové biten-la moun-la fè-w la aji asi-w é fè-w mèt an tèt a-w kè pa ni mwayen ou fè frè é sè a-w konfyans ankò. Nou ni ègzanp a onlo sèwvitè a Jéova ki té fidèl é moun désèvwa-yo, men apapousa yo arété fè lézòt konfyans. É jistèman, an-nou ègzaminé ègzanp a yo.

9. a) Kijan Àn montré kè i té ka fè Jéova konfyans menmsi sé moun-la ki té ka rèprézanté Jéova la té ka fè érè ? b) Sa enpòwtan kè nou fè Jéova konfyans. Ka ègzanp a Àn ka montré-nou asi sa ? (gadé imaj-la).

⁹ Ès on frè ki ni rèsponsabilité adan òwganizasyon a Jéova ja désèvwa-w ? Si sa ja rivé-w, sèten ègzanp a Àn ké itil pou-w. An tan a Àn, sé Éli ki té gran prèt-la é sé-y ki té ka rèprézanté Jéova an Izrayèl. Men moun an fanmi a Éli té ka fè bétiz. Kifè, sé moun-lasa pa té ka bay on bon ègzanp. Gason a Éli, ki té prèt, té ka fè péché sèksyèl é yo té ka fè onlo dòt biten ki té ka fè pap’a yo wont. Men olyé Éli té palé rèd ba yo pou korijé-yo, i té mòl èvè yo. Jéova pa woté-y an travay-la i té ka fè la tousuit men apapousa Àn arété ay adan tabèwnak-la pou adoré Jéova. On jou, Àn té an penn é tchè a-y té ka sengné. Sa i té ka rèsanti té ka  malmenné-y. Kifè, i ay adan tabèwnak-la é i mété-y ka priyé Jéova. Lè Éli vwè sa, i pa chèché a sav ka ki té ka rivé-y men i enn akizé-y é i di konsa kè i sou alòskè sé tris malérèz-la té tris (1 Sam. 1:12-16). Àn té pwomèt Jéova kè si i té ba-y on gason, i té’é menné-y adan tabèwnak-la pou i travay ba Jéova (1 Sam. 1:11). É Àn tchenn a mo a-y menmsi sa té vé di kè gason a-y té’é travay anba rèsponsabilité a Éli. Ès gason a Éli té mérité kè yo pini-yo pou tout sé mové biten-la yo té fè la ? Wi, é lè moman-la rivé, Jéova fè sa (1 Sam. 4:17). Men annatandan kè Jéova mèt men a-y adan sa, i béni Àn é i ba-y on gason, non a-y sé té Samiyèl (1 Sam. 1:17-20).

10. Lèwvwè zanmi a David trayi-y, poukwa i pa arété fè lézòt konfyans ?

¹⁰ Ès on zanmi a-w ja trayi-w ? Si sé sa, ègzanp a wa David pé édé-w. I té ni on bon zig, non a-y sé té Ayitofèl. Men lèwvwè Absalon, gason a David té vé pran wayòm-la an men a-y, Ayitofèl ba David do é i édé Absalon. Mésyé, sa dwèt té rèd pou David. Non sèlman gason a-y té ka trayi-y men bon zig a-y té ka ba-y on koudkouto an do ! Men apapousa David arété fè lézòt konfyans. Okontrè, i kontinyé fè on bon zanmi a-y konfyans. Zanmi-lasa sé té Ouchay. Sé té on zanmi fidèl é li, i té rèfizé suiv sé rèbèl-la. Anfinaldikont, David té ni rézon fè Ouchay konfyans piskè apré, Ouchay aji kon on vré zanmi èvè-y. I jous té paré a pèd vi a-y pou-y (2 Sam. 17:1-16).

11. Kijan on sèwvitè a Nabal montré kè i té ka fè Abigayil konfyans ?

¹¹ Konnyéla, an-nou palé dè on sèwvitè a Nabal. Èvè onlo jantiyès, David é sé boug a-y la pwotéjé sèwvitè a on izraélit, non a-y sé té Nabal. Kèlkètan apré, David mandé Nabal si i té pé ba-y tibwen manjé pou li é pou sé boug-la ki té èvè-y la pas Nabal sé té on boug ki té rich. Sa David mandé Nabal la té rézonab. Men Nabal voyé David ponmlé. Alò David fè kòlè é i désidé ay tchouyé tout sé misyé-la ki té an kaz a Nabal la. On sèwvitè a Nabal ay di Abigayil, madanm a mèt a-y, sa ki té ka pasé. Poukwa sèwvitè-la fè sa ? I té sav kè Abigayil té pé sové vi a-y. Sé vré, sèwvitè-la té pé chapé kò a-y men i té sèten kè Abigayil té’é pé réglé pwoblèm-la, pas sé té on madanm ki té ni bon jijman. É lè nou ka vwè sa ki pasé apré, nou ka rann-nou kont kè sèwvitè-la té ni rézon fè  Abigayil konfyans. Abigayil montré kè i té ni kouraj é i anpéché David fè sa i té ni lentansyon fè la (1 Sam. 25:2-35). É kanta li Abigayil, i fè David konfyans é i té sèten kè David té montré-y rézonab.

12. Ka ki té ka montré kè Jézi té ka fè disip a-y konfyans magré yo té enpawfè ?

¹² Jézi té ka fè disip a-y konfyans menmsi i té sav kè yo té enpawfè (Jan 15:15, 16). Lèwvwè Jak é Jan vin mandé Jézi on plas adan wayòm a Bondyé pou tout moun vwè-yo, i pa di an tchè a-y : « Men ka ki ka pousé sé mésyé sèvi Bondyé menm ? » Oben i pa di-yo kè yo pé’é apòt a-y ankò (Mawk 10:35-40). Kèlkètan apré, lè yo vin arété Jézi anplen lannuit, tout sé disip-la lagé-y (Mat. 26:56). Men apapousa i arété fè-yo konfyans. Magré i té sav kè yo té enpawfè, i « kontinyé enmé-yo jiska lafen » (Jan 13:1). Apré i résisité, i ba sé 11 apòt-la ki té fidèl la on rèsponsabilité ki té enpòwtan toubònman. I ba-yo dirijé travay a prédikasyon-la é i ba-yo okipé dè timouton a-y ki ni onlo valè pou-y toubònman (Mat. 28:19, 20 ; Jan 21:15-17). Anfinaldikont, i té ni rézon fè-yo konfyans piskè yotout montré kè yo fidèl é yo kontinyé sèvi Jéova joustan yo mò. Àn, David, sèwvitè a Nabal la, Abigayil é Jézi fè dé moun ki té enpawfè konfyans. Yo ka ban-nou on bèl ègzanp adan domenn-lasa.

13. Pou ki biten sèwten moun ni dimal a fè lézòt konfyans ?

¹³ Ès sa ja rivé kè ou di on moun on biten é kè aprésa ou rann-vou kont kè moun-la di ondòt moun sa ou té di-y la ? Lèwvwè on biten konsa ka fèt, sa pé fè onlo déga. On jou, on sè ay vwè on ansyen pou palé-y dè on ti pwoblèm i té ka jwenn. Lèlandèmen-la, madanm a ansyen-la kriyé sè-la pou ankourajé-y é i té sav tousa sè-la té rakonté mari-la alòskè sé té on biten pou i pa té répété. Nou ka tou konprann kè sè-la pa té anvi fè ansyen-lasa konfyans ankò. Men i byen réyaji, i ay vwè ondòt ansyen é ansyen-lasa édé-y woukoumansé fè sé ansyen-la konfyans.

14. Ka ki pousé on frè woukoumansé fè 2 ansyen konfyans ?

¹⁴ Sa té ja ka fè on bèl moman kè on frè té faché èvè 2 ansyen é i té ja mèt an tèt a-y kè pa ni mwayen i fè-yo konfyans ankò. Men on jou, i sonjé on ti fraz on frè kè i té ka rèspèkté onlo té di. Ti fraz-lasa té tousenp men i té vé di onlo biten menm. Mi sa i té ka di : « Lènmi an nou sé Satan, a pa frè an nou. » I réfléchi onlo asi lidé-lasa é i chèché a vwè ka pou i fè. I priyé Jéova é aprésa, i fè ansòt pou wouvin byen èvè sé 2 ansyen-la.

15. Pou nou pé sa woufè on moun konfyans, sa pé pran tan. Poukwa nou ka di sa ? Bay on ègzanp.

¹⁵ Ès ou ja pèd sèwten rèsponsabilité kè ou té ni adan lasanblé-la ? Sé on biten ki pé rèd menm. An-nou palé dè ègzanp a Grete é manman-y. Lèwvwè yo entèwdi aktivité an nou an Almagn nazi, avan 2^èm Gè mondyal la, yo toulédé té Témwen a Jéova é yo té fidèl. Pannan péryòd-lasa, yo té ba Grete on bèl travay a fè é i té kontan fè sa. Sé frè-la té mandé-y préparé sa ki té fo pou yo té pé sa kopyé Tou dè Gad la. Yo ka kriyé biten-la i té ka préparé la an fransé on stencil. Men lè sé frè-la vin aprann kè papa Grete té kont lavérité, yo mandé-y arété fè travay-lasa. Sé frè-la té pè kè papa Grete té ba moun ki té kont nou enfòwmasyon asi lasanblé-la. Men a pa sa tousèl pou Grete té andiré. Pannan 2^èm Gè mondyal la, sé frè-la arété ba Grete é manman-y Tou dè Gad la é lèwvwè yo té ka jwenn-yo an lari-la, yo pa menm té ka palé ba yo. Mésyé, sa té ka fann tchè a Grete é manman-y. Grete soufè toubònman akòz dè sa é sa pran onlo tan pou i  té pé sa padonné sé frè-la é pou i té pé sa woukoumansé fè-yo konfyans. Men aprésa, i rèkonnèt kè si Jéova té padonné-yo, li osi, fò i té fè sa c.

16. Poukwa fò-nou fè onlo éfò pou nou woukoumansé fè on moun ki désèvwa-nou konfyans ?

¹⁶ Si ou ja viv on sitiyasyon konsa é kè sa dékourajé-w, fò ou mèt akoté tousa ki té’é pé anpéché-w woufè frè é sè a-w konfyans. Pétèt sa ké pran tan men sa vo lapenn kè ou fè éfò toubònman. An-nou pran on ègzanp. Imajiné kè nou manjé on biten ki fè-nou mal, sèten kè aprésa nou pé’é manjé nenpòt ki biten. Men apapousa nou ké arété manjé. Menmjan-la osi, a pa paskè on moun adan lasanblé-la fè on biten ki désèvwa-nou kè nou ké arété fè tout frè é sè an nou konfyans, siwtou kè nou sav byen kè noutout enpawfè. Siwvwè nou ka fè éfò pou woukoumansé fè on moun adan lasanblé-la konfyans, tchè an nou ké pi kontan é nou ké vwè ka noumenm an nou pé fè pou yonn toujou fè lòt konfyans adan lasanblé-la. Konsa ké ni on bon anbyans.

17. Poukwa sa enpòwtan toubònman kè nou fè frè é sè an nou konfyans, é ka nou ké vwè adan awtik-la ki ka vin la ?

¹⁷ Adan mond a Satan, onlo moun pa ka fè lézòt konfyans ankò. Men nou, nou pé fè frè é sè an nou konfyans pas nou enmé-yo é yo enmé-nou. Konm yonn ka fè lòt konfyans, nou ni tchè-kontan é nou soudé. Anplisdisa, sa ké pwotéjé-nou osi lè nou ké jwenn bout-rèd. Men ka ou pé fè si on moun désèvwa-w é si ou pa’a rivé fè-y konfyans ankò ? Éséyé vwè sitiyasyon-lasa kon Jéova ka vwè-y, mèt sé prensip-la ki an Bib-la an pratik. Fè tousa ou pé pou enmé frè é sè a-w pi fò é suiv ègzanp a sèwvitè a Jéova ki viv an tan a Labib é ki té fidèl. Si on moun fè-nou on biten ki fè-nou mal, nou pé rivé andiré sa é mèt sa dèyè do an nou é nou pé woukoumansé fè-y konfyans. Konsa, nou ké ni onlo zanmi « ki pli fidèl ki on frè » é sa ké mèt onlo jwa an tchè an nou (Pwov. 18:24). Sé vré, lè nou ka fè frè é sè an nou konfyans sé on bon biten men sa pa’a sifi. Fò frè é sè an nou vwè kè yo pé fè-nou konfyans osi. Adan awtik-la ki ka vin la, nou ké vwè ka nou pé fè pou frè é sè an nou fè-nou konfyans.