1. ¿Mbaʼérepa nañanesorprendéi umi hénte ndaikatúi haguére okonfia ótrore?

 UMI HÉNTE ko mundopegua ningo ndoikuaái máva rehepa okonfiáta. Chupekuéra pyʼỹinte odesepsiona umi komersiánte, umi polítiko ha umi rrelihión omoakãva. Upéva káusare ijetuʼúma avei chupekuéra okonfia hag̃ua iñamigokuérare, ivesínore ha ifamíliare jepe. Péro upéva ningo nañanesorprendéi, pórke la Biblia heʼi voi: ‘Umi ára pahápe umi hénte ombotavýta hapichápe, oñeʼẽ reíta ótrore, itraisionérota’. Upéva heʼise umi hénte okopiataha Satanás lája, upévare ndaikatúi ñakonfia hesekuéra (2 Tim. 3:1-4; 2 Cor. 4:4).

2. a) ¿Máva rehepa ikatu jajerovia ñande pyʼaite guive? b) ¿Mbaʼépa algúno ikatu oñeporandu?

² Péro ñande ningo jaikuaa ikatuha jajerovia Jehová rehe ñande pyʼaite guive (Jer. 17:7, 8). Ñande jaikuaa porã haʼe ñanderayhuha, ha ‘núnka ndohejareimoʼãiha’ umi iñamigokuérape (Sal. 9:10). Avei ñande ikatu ñakonfia Jesúsre, pórke haʼe omeʼẽ vaʼekue hekove ñanderehehápe (1 Ped. 3:18). Ha jahecháma avei mbaʼéichapa la Biblia ikatu ñanepytyvõ ñandéve ha ikatuha jajerovia hese (2 Tim. 3:16, 17). Upévare ñande ñaime segúro ikatuha ñakonfia Jehováre, Jesúsre ha avei la Bíbliare. Péro heta oĩ ikatúva oñeporandu: “¿Ikatúpa avei jajerovia umi ñane ermanokuéra oĩvare kongregasiónpe? Ha oiméramo ikatu, ¿mbaʼérepa ñakonfia vaʼerã hesekuéra?”.

3. ¿Mbaʼe priviléhio ndaijojaháivapa jaguereko? (Marcos 10:29, 30).

³ Jehová ningo ñandeelehi ñaime hag̃ua ifamíliape. Epensamíntena pe priviléhio ndaijojaháiva jaguerekóvare ha umi mbaʼe porã jahupytývare upéva rupive (elee Marcos 10:29, 30). Ko múndo tuichakuére ningo jaguereko heta ermáno ha ermána ñandéicha avei ohayhúva Jehovápe, ha oñehaʼãmbaitéva  oiko haʼe oipotaháicha. Ñande jahayhu chupekuéra, jaguerekóramo jepe diferénte idióma, kultúra térã ñañemonde diferénte ha primera ves jaikuaáramo jepe chupekuéra. Javyʼaiterei voi ñaime jave hendivekuéra ñamombaʼeguasu ha jaadora hag̃ua ñande Túa ñanderayhuetéva Jehovápe (Sal. 133:1).

4. ¿Mbaʼérepa ñaikotevẽ umi ñane ermanokuérare?

⁴ Koʼág̃a ningo ñaikotevẽterei ñaime en unida ñane ermanokuérandi. Sapyʼánte haʼekuéra ikatu ñanepytyvõ jagueraha hag̃ua umi ñande kárga pohýi (Rom. 15:1; Gál. 6:2). Haʼekuéra ningo ñanemokyreʼỹ jasegi hag̃ua jaservi Jehovápe ha jaguereko chupe ñane amígoramo (1 Tes. 5:11; Heb. 10:23-25). Ñapensamíntena ndajaguerekóirire umi ñane ermanokuérape, ajépa ijetuʼuete vaʼerãmoʼã ñandepuʼaka hag̃ua umi ñane enemígore, haʼéva Satanás ha ko múndo aña. Koʼẽrõitéma ningo Satanás ha umi omoirũva chupe oatakáta hína Ñandejára siervokuérape. Epensamíntena mbaʼeichaitépa javyʼáta upe moméntope jaguereko haguére ñande ykére ñane ermanokuérape.

5. ¿Mbaʼérepa oĩ umi ermáno ijetuʼúvape okonfia hag̃ua umi ermanokuérare?

⁵ Upéicharõ jepe oĩ umi ermáno ijetuʼúvape okonfia hag̃ua umi ermanokuérare. Upéva ikatu oiko, pórke peteĩ ermáno omombeʼu raʼe peteĩ mbaʼe haʼénte oikuaa vaʼerã kuri, ha péicha ombyai pe konfiánsa oguerekóva hese. Térã peteĩ oĩva kongregasiónpe heʼi térã ojapo raʼe peteĩ mbaʼe omoñeñandu vaietereíva chupe. Koʼã mbaʼe oikóramo ñanderehe, ijetuʼúta voi ñakonfia hag̃ua ótrore. Upéicharõ, ¿mbaʼépa ñanepytyvõta ñakonfia jey hag̃ua ñane ermanokuérare?

6. ¿Mbaʼéichapa pe mborayhu ñanepytyvõ ñakonfia hag̃ua ojuehe? (1 Corintios 13:4-8).

⁶ Pe mborayhu ningo ñanepytyvõ ñakonfia hag̃ua ojuehe. 1 Corintios kapítulo 13-pe ningo jatopa umi mbaʼe porã oúva pe mborayhúgui,  ñanepytyvõtava jahayhu ha ñakonfia hag̃ua ñane ermanokuérare, térã ñakonfia jey hag̃ua hesekuéra (elee 1 Corintios 13:4-8). Por ehémplo pe versíkulo 4-pe heʼi ‘pe oporohayhúva ipasiénsia ha imbaʼeporãha’. Jehová ningo ipasiensiaite ñanderehe, jepe heta vése jajavy. Upéicharõ ñande avei ikatu jahechauka ñanepasiensiaha Jehováicha ñambohasa rei jave oĩramo peteĩ ñane ermáno heʼi térã ojapóva peteĩ mbaʼe ñanemoñeñandu vaietereíva. Pe versíkulo 5-pe heʼi avei ‘pe oporohayhúva ndaipochyreíri ha ndaipyʼaroiha’. Ñande ningo ndajaikoséi ñanemanduʼa umi mbaʼe vai ojejapo vaʼekuére ñanderehe ha upéi jaipuru umíva japorohovaʼapi hag̃ua. Eclesiastés 7:9 heʼi voi ‘ani hag̃ua pyaʼeterei ñandepochy’. ¡Ajépa iporãiteve ñamoĩramo en práktika Efesios 4:26 heʼíva: “Ani pesegi pendepochy kuarahy oike peve”!

7. ¿Mbaʼéichapa ñanepytyvõta umi konsého jatopáva Mateo 7:1-5-pe ñakonfia hag̃ua ñane ermanokuérare?

⁷ Ótro mbaʼe ñanepytyvõtava avei ñakonfia hag̃ua ñane ermanokuérare ningo haʼe jahecha chupekuéra Jehová ohechaháicha. Jehová ningo ohayhu chupekuéra ha ndahaʼéi ku oikóva oheka moõpa ojavy hikuái, ha ñande avei jasegise Jehová ehémplo (Sal. 130:3). Ñande ningo ndajaikói jajesareko umi ñane ermáno defektokuérare, síno umi kualida porã haʼekuéra oguerekóvare ha ñanemanduʼa haʼekuéra ojaposeha avei pe iporãva (elee Mateo 7:1-5). Ñande ningo siémpre ñapensa porãse ñane ermanokuérare, pórke pe oporohayhúva “osegi oguerovia entéro mbaʼe” (1 Cor. 13:7). Péro upéva ningo ndeʼiséi Jehová oipotaha ñakonfia reínte ñane ermanokuérare. Upéva rangue haʼe ohaʼarõ ñandehegui ñakonfia hesekuéra, pórke haʼekuéra ohechaukáma ikatuha ñakonfia hesekuéra. b

8. ¿Mbaʼépa ikatu nde ejapo ekonfia hag̃ua ne ermanokuérare?

⁸ Ñakonfia hag̃ua ñande rapicháre ningo ogueraha la itiémpo. ¿Mbaʼépa ikatu nde ejapo ekonfia hag̃ua ne ermanokuérare? Eñehaʼã eikuaa porã chupekuéra. Ikatu rejapo upéva reñemongetávo hendivekuéra rreunionhápe térã resẽvo hendivekuéra predikasiónpe. Nepasiénsiakena hesekuéra ohechauka hag̃ua ndéve hikuái ikatuha rekonfia hesekuéra. Ñepyrũrã ningo nde ikatu neremombeʼúi upe ermánope umi mbaʼe nde reñandúva, péro amás ke eikuaa porãve chupe ha ereko chupe ne amígoramo ikatútama emombeʼu chupe umi mbaʼe epensáva ha eñandúva (Luc. 16:10). ¿Péro mbaʼépa ikatu rejapo peteĩ ermáno ombyaíramo pe konfiánsa eguerekóva hese? Aníkena upe haguérente nerekonfiavéima hese, síno emeʼẽ chupe tiémpo ani hag̃ua eperde pe amista eguerekóva hendive. Ani avei oiko haguére nderehe upéicha, nerekonfiavéima umi ótro ermanokuérare. Upearã tuichaiterei nepytyvõta ehecháramo umi ehémplo yma guare. Oĩ vaʼekue umi Jehová siervokuéra oñedesepsionáramo jepe osegi vaʼekue okonfia ótrore.

9. a) ¿Mbaʼéichapa Ana osegi okonfia Jehováre opekáramo jepe umi haʼe omoĩ vaʼekue orrepresenta hag̃ua chupe? b) ¿Mbaʼéichapa Ana ehémplo nepytyvõ ejerovia hag̃ua umi Jehová omoĩvare oñangareko hag̃ua ipuévlore? Ehecha pe taʼanga.

⁹ ¿Nedesepsionámapa algúna ves peteĩ ermáno oguerekóva priviléhio kongregasiónpe? Oiméramo upéicha, tuichaiterei nepytyvõta rehecháramo Ana ehémplo. Upérõ ningo Elí haʼe vaʼekue pe súmo saserdóte. Péro ifamiliakuéra ndahaʼéi vaʼekue ehémplo porã. Itaʼyrakuéra haʼe vaʼekue avei saserdóte, hekokyʼa ha ojapo vaʼekue umi mbaʼe noĩporãiva. Ha itúa katu ndojapói mbaʼeve okorrehi hag̃ua chupekuéra. Jehová ndahaʼéi ensegída oipeʼa vaʼekue Elígui  ipuésto de súmo saserdóte. Ana ndoguerahái vaʼekue enkuénta upe situasión. Upéva rangue haʼe siémpre osegi vaʼekue oadora Jehovápe pe tavernákulope, Elí oservi aja upépe kómo súmo saserdóte. Elí ohechárõ guare Ánape oñemboʼe hína haʼe opensa hese okaʼuha. Ndoikuaaporãiramo jepe la oikóva, Elí oñepyrũ okritika Ánape (1 Sam. 1:12-16). Upéicharõ jepe Ana opromete haʼe oguerekóramo peteĩ mitãʼi omeʼẽtaha oservi hag̃ua pe tavernákulope oservihápe Elí (1 Sam. 1:11). ¿Tekotevẽpa raʼe ojekorrehi umi Elí raʼykuérape? Jehová ojapo vaʼekue upéva itiempoitépe (1 Sam. 4:17). Upe tiémpope Jehová ovendesi Ánape omeʼẽvo chupe imembyrã haʼéva hína Samuel (1 Sam. 1:17-20).

10. ¿Mbaʼéichapa David osegi okonfia umi ótrore jepe oĩ umi persóna odesepsionáva chupe?

¹⁰ ¿Ndévepa nedesepsionámava peteĩ ne amigoite? Oiméramo upéicha tuichaiterei nepytyvõta pe rréi David ehémplo. Haʼe ningo oguereko vaʼekue peteĩ iñamigoite hérava Ahitofel. Itaʼýra Absalón oipeʼasérõ guare chupe oĩhágui rréi, Ahitofel oñemoĩ Absalón ládo. Oiménepa hasyete raʼe Davídpe upéva. Itaʼýra ha iñamigoite oñemoĩ ikóntrape. Oikóramo jepe hese upéva, David ndahaʼéi ku nokonfiavéimava ótrore. Upéva rangue haʼe osegi okonfia peteĩ iñamigoite héravare Husái. Haʼe ningo noñentremetéi vaʼekue umi mbaʼe oplaneávare Absalón. David ikatu kuri okonfia Husái rehe, pórke haʼe ohechauka kuri haʼeha peteĩ amígo tee, hiʼarive haʼe ojapeligra kuri oipytyvõ hag̃ua Davídpe (2 Sam. 17:1-16).

11. ¿Mbaʼéichapa ohechauka vaʼekue Nabal siérvo okonfiaha Abigail rehe?

¹¹ Jahechamína avei mbaʼépa ikatu ñaaprende peteĩva umi Nabal siérvogui. David ha iñirũnguéra ningo imbaʼeporã ha oprotehe vaʼekue peteĩ israelita hérava Nabal siervokuérape. Peteĩ tiémpo rire David ojerureka Nabálpe omeʼẽmi hag̃ua chupekuéra hoʼumi vaʼerã. Ha upéva ningo Nabal ikatu kuri ojapo, pórke haʼe peteĩ kuimbaʼe iplátava. Nabálpe ndogustaiete upéva. Ha upevakuére David odesidi ojukapaitetaha umi Nabal rogayguakuérape. Peteĩ isirviénte omombeʼu la oikóva Abigaílpe. Haʼe oikuaa porã kuri Abigail ikatuha osalva chupekuéra. Okañy rangue, haʼe okonfia Abigail ikatuha osolusiona upe provléma. Haʼe ikatu  kuri okonfia péicha Abigail rehe, pórke enterove oikuaa vaʼekue haʼe iñaranduha. Umi mbaʼe oiko vaʼekuére upe rire ojehecha porã pe sirviénte nokonfiareíri hague Abigail rehe. Abigail ipyʼaguasu ha oipytyvõ Davídpe okambia hag̃ua pe opensáva ojapo (1 Sam. 25:2-35). Haʼe oikuaa David iñakãguapyha, upévare okonfia hese ojapotaha la oĩ porãva.

12. ¿Mbaʼéichapa Jesús ohechauka kuri okonfiaha idisipulokuérare ojavy mimíramo jepe hikuái?

¹² Jesús okonfia kuri idisipulokuérare ojavy mimíramo jepe hikuái (Juan 15:15, 16). Santiago ha Juan ojerurérõ guare Jesúspe peteĩ puésto espesiál pe Rréino yvagaguápe, Jesús ndodudái pe intensión orekóvagui hikuái oservi hag̃ua Jehovápe ni ndorrechasái chupekuéra ijapóstolramo (Mar. 10:35-40). Ojejagarrárõ guare Jesúspe ojejuka hag̃ua, umi idisipulokuéra ohejapaite chupe (Mat. 26:56). Upéicharõ jepe Jesús siémpre okonfia vaʼekue hesekuéra. Haʼe ningo ohechakuaa vaʼekue haʼekuéra iñimperfektoha ha upéicharõ jepe “ipahaite peve ohayhu chupekuéra” (Juan 13:1). Hiʼarive Jesús orresusita rire, omeʼẽ kuri umi 11 ijapóstolpe peteĩ rresponsavilida tuichaitereíva omoakã hag̃ua hikuái pe traváho ojejapo hag̃ua disípulo ha oñangareko hag̃ua umi ijovechakuéra mimíre (Mat. 28:19, 20; Juan 21:15-17). Haʼe ningo ndojeroviareíri kuri hesekuéra. Haʼekuéra ningo ifiél kuri omano meve. Añetehápe ningo Ana, David, Nabal siérvo, Abigail ha Jesús omoĩ peteĩ ehémplo iporãitereíva ñakonfia hag̃ua ñande rapichakuéra imperféktore.

13. ¿Mbaʼérepa heta vése ijetuʼu ñakonfia hag̃ua ótrore?

¹³ ¿Oikómapa nderehe emombeʼu hague peteĩ ermánope peteĩ mbaʼe ndereipotáiva ótro oikuaa péro upéi eikuaa netraisiona hague? Ijetuʼuetereímante vaʼerã upéva. Peteĩ ermána omombeʼu peteĩ ansiánope la isituasión okonfiágui nomombeʼumoʼãiha ótrope upéva. Al día sigiénte pe ansiáno rembireko ohenói ko ermánape omokyreʼỹ hag̃ua chupe, ha ojekuaa porãiterei pe ansiáno heʼi hague hembirekópe la oñemombeʼu vaʼekue chupe. Upévare ijetuʼueterei kuri ko ermánape okonfia jey hag̃ua upe ansiánore. Upe rire ko ermána ojerure ajúda ótro ansiánope okonfia jey hag̃ua upe ansiánore, ha upéva oipytyvõ chupe ikatu hag̃uáicha okonfia jey umi ansianokuérare.

14. ¿Mbaʼépa oipytyvõ peteĩ ermánope okonfia jey hag̃ua iñermanokuérare?

¹⁴ Peteĩ ermáno ningo ojoavy vaʼekue mokõi ansiánondi. Ohasáramo jepe heta tiémpo, ko ermánope ijetuʼueterei okonfia hag̃ua koʼã mokõi ansiánore. Upe rire ko ermáno opensa la heʼi vaʼekuére peteĩ ermáno haʼe orrespetaitereíva. Upe ermáno heʼi ko fráse iporãitéva: “Satanás hína la ñane enemígo, ndahaʼéi umi ñane ermanokuéra”. Ko ermáno oñepyrũ ojepyʼamongeta upe frásere ha mbaʼépa haʼe ojapo vaʼerã. Upe rire oñemboʼe Jehovápe oipytyvõ hag̃ua chupe, ha mbeguekatúpe ojogueraha porã jey umi mokõi ansiánondi.

15. ¿Mbaʼérepa ogueraha tiémpo ñakonfia jey hag̃ua ñane ermanokuérare? Emoĩ peteĩ ehémplo.

¹⁵ ¿Ndépa eperdéma peteĩ priviléhio eguerekóva kongregasiónpe? Oiméramo upéicha upéva ndahaʼéi hína la ifasilpáva. Grete ha isy ningo haʼe vaʼekue Testígo ijerovia mbaretéva ha ifiélva ojeproivírõ guare ñane rembiapo pe Alemania Názipe pe segunda gérra mundiál mboyve. Upe tiémpope Grete oguereko kuri pe priviléhio okopiávo pe rrevísta Ñemañaha iñirũnguérape g̃uarã. Péro umi ermáno oikuaávo Grete túa oñemoĩha la verdáre, oipeʼa chugui pe priviléhio, pórke okyhyje hikuái itúa omeʼẽrõ g̃uarã informasión pe kongregasión rehegua umi oñemoĩvape ikontrapekuéra. Péro ndahaʼéi kuri  upéva añónte la Grete oaguanta vaʼerã kuri. Pe segunda gérra mundiál aja umi ermanokuéra nomeʼẽi kuri chupe ha isýpe pe rrevísta Ñemañaha kópia, ha ni noñeʼẽséi chupekuéra ojotopa jave hikuái kállere. Upéva ningo hasyeterei kuri Grétepe. Heta tiémpore ijetuʼu rupi chupe upéva, hasypeterei Grete operdona jey umi ermánope ha okonfia jey hesekuéra. Tiémpo rire haʼe opensa oiméne Jehová operdonáma hague umi ermánope ha haʼe ojapo vaʼerãha avei upéva. c

16. ¿Mbaʼérepa ñañehaʼãmbaite vaʼerã ñakonfia jey hag̃ua ñane ermanokuérare?

¹⁶ Oiméramo nde rehasa avei peichagua situasión, iporãta eñehaʼãmbaitéramo ekonfia jey ne ermanokuérare. Upéva ningo katuete ogueraháta itiémpo, péro iporãitereíta ejapóramo upéicha. Por ehémplo, ñanembyai jave peteĩ tembiʼu, jakuidave la jaʼu vaʼerã. Péro upe tembiʼu ñanembyai haguérente ndahaʼéi ndajakaruvéimava. Upéicha avei peteĩ ermáno térã ermána ñanedesepsiona jave, ndahaʼéi nañakonfiavéitamava ñane ermanokuérare pórke jaikuaa iñimperfektoha hikuái. Ñañehaʼãramo ñakonfia jey ñane ermanokuérare, katuete javyʼavéta ha ñanepytyvõta jaikuaa hag̃ua mbaʼépa ikatu jajapo enterove ñakonfia hag̃ua ojuehe kongregasiónpe.

17. ¿Mbaʼérepa iñimportantete pe konfiánsa, ha mbaʼépa jahecháta pe artíkulo oúvape?

¹⁷ Satanás múndope ningo ndaipóri la konfiánsa. Péro ñande katu ñakonfia ojuehe, pórke jajoayhu ñane ermanokuérandi. Ñakonfia rupi péicha ojuehe, javyʼave ha ñaneunive koʼág̃a, ha amo gotyove katu upéva ñandeprotehéta ñambohovái hag̃ua umi tiémpo ijetuʼuetéva. ¿Mbaʼépa ikatu ejapo oĩramo peteĩ nedesepsionáva ha nerekonfiavéi hese? Eñehaʼãkena ehecha pe situasión Jehová ohechaháicha, esegi umi konsého bíblico, ehayhu nde pyʼaite guive ermanokuérape ha eaprende umi ehémplo oĩvagui la Bíbliape. Jajapóramo koʼã mbaʼe, ikatúta ñañeñandu porãve ha ñakonfia jey ñane ermanokuérare. Avei javyʼáta jareko haguére heta ‘amígo ñanderayhuvéva peteĩ ñane ermánogui’ (Prov. 18:24). Péro ndahaʼéi ñandénte ñakonfia vaʼerã ñane ermanokuérare, síno haʼekuéra avei okonfia vaʼerã ñanderehe. Pe artíkulo oúvape jahecháta mbaʼépa ikatu jajapo umi ermanokuéra okonfia hag̃ua ñanderehe.