1. Nama kebuah kitai enda tekenyit lebuh meda orang kemayaharitu enda pechayaka pangan diri?

 ORANG ba dunya Sitan enda nemu sapa ke patut dipechayaka sida. Sida seruran ngasaika diri ditipu orang ke bedagang, orang politik, sereta tuai pengarap. Mayuh orang mega ngasaika diri enda ulih pechayaka bala bakih, orang ke berimbai pendiau, sereta indah diri sebilik. Tu enda ngasuh kitai tekenyit laban Bup Kudus bisi madah: ‘Ba hari ti penudi orang deka enda tetap ati, bejaika orang bukai sereta nyadi munsuh kaban diri.’ Reti iya, orang ba dunya tu deka nyadi baka Sitan, petara ba dunya tu ke enda ulih dipechayaka.—2 Tim. 3:1-4; 2 Kor. 4:4.

2. (a) Sapa ke amat ulih dipechayaka kitai? (b) Nama engka diperundingka sekeda orang?

² Kitai ke nyadi orang Kristian nemu, kitai ulih pechayaka Jehovah enggau pengabis ati. (Jer. 17:7, 8) Kitai yakin Iya rinduka kitai, lalu Iya “enda ninggalka” bala pangan Iya. (Mas. 9:10) Kitai mega ulih pechayaka Jesus Kristus laban iya udah mati ke kitai. (1 Pet. 3:18) Lalu nengah pengalaman kitai empu, kitai nemu Bup Kudus endang ulih meri iring ke ulih dipechaya. (2 Tim. 3:16, 17) Kitai yakin kitai ulih pechayaka Jehovah, Jesus, sereta Bup Kudus. Tang sekeda orang engka berunding sekalika sida ulih seruran pechayaka bala menyadi Kristian ba raban gempuru tauka enda. Enti saut iya ulih, nama kebuah kitai ulih pechayaka sida?

3. Nama peluang manah ti dikembuan kitai? (Mark 10:29, 30)

³ Jehovah udah milih kitai nyadi sebagi ari ruang bilik Iya di serata dunya. Tu peluang ti amat spesial ke mai mayuh penguntung! (Bacha Mark 10:29, 30.) Ba serata dunya, kitai bisi bala  menyadi Kristian ke sama rinduka Jehovah baka kitai, sereta ke naka ulih idup sejalai enggau standard Jehovah ba pengidup sida. Bansa jaku, adat sereta chara kitai begari engka bebida ari pangan diri, tang kitai berasai semak enggau sida taja pan kitai baru terubah kali betemu enggau sida. Kitai kelebih agi rindu begulai enggau sida, sama muji sereta nyembah Apai kitai ti bepengerindu di serega.—Mas. 133:1.

4. Nama kebuah kitai begunaka bala menyadi Kristian kitai?

⁴ Kelebih agi kemayaharitu, kitai patut mengkang beserakup enggau bala menyadi Kristian kitai. Kekadang sida nulung mai ma kitai maya kitai napi penusah. (Rom. 15:1; Gal. 6:2) Sida mega meransang kitai mengkang aktif ba pengawa ke Jehovah sereta mengkang nyadi pangan Jehovah. (1 Tes. 5:11; Heb. 10:23-25) Perundingka asai ati kitai enti kitai nadai nerima lindung ari raban gempuru kena nulung kitai mengkang tegap ngelaban bala munsuh kitai, iya nya Sitan enggau dunya iya ti jai tu. Sitan enggau orang ke di baruh kuasa iya deka nyerang nembiak Petara enda lama da agi. Tang ba maya nya, kitai deka amat beterima kasihka sukung ari bala menyadi Kristian kitai!

5. Nama kebuah sekeda orang kekadang tusah deka pechayaka bala menyadi Kristian?

⁵ Taja pia, sekeda orang tusah deka pechayaka bala menyadi Kristian sida, engka ketegal sida bisi madahka resia ngagai siku menyadi, lalu menyadi nya madahka resia nya ngagai orang bukai. Tauka sesiku orang ba raban gempuru nyebut tauka ngereja utai ti amat ngemediska ati sida. Enti utai ke baka tu nyadi kitai engka tusah deka pechayaka orang bukai. Enti pia, nama utai ke ulih nulung kitai terus pechayaka bala menyadi Kristian kitai?

6. Baka ni pengerindu ulih nulung kitai pechayaka bala menyadi Kristian? (1 Korint 13:4-8)

⁶ Pengerindu nya pugu pengarap. Satu Korint bagi 13 nerangka mayuh aspek pengerindu  ke ulih nulung kitai ngemansangka pengarap, tauka ngasuh kitai pechaya baru ngagai bala menyadi Kristian kitai. (Bacha 1 Korint 13:4-8.) Ambika chunto, ayat 4 madahka: “Orang ke bisi pengerindu nya orang ti sabar sereta manah ati.” Jehovah sabar enggau kitai indah lebuh kitai bedosa ngagai Iya. Nya alai, kitai patut sabar enggau bala menyadi kitai enti sida bisi nyebut tauka ngereja utai ti ngemediska ati kitai. Ayat 5 nambah: “[Orang ke bisi pengerindu] enda jampat ringat. Iya mega enda bedendam lebuh orang ngemediska ati iya.” Kitai “enda bedendam lebuh orang ngemediska ati” kitai. Reti iya, kitai enda agi ingatka utai ti dikereja bala menyadi Kristian ti udah ngemediska ati kitai. Pengajar 7:9, madahka: “Anang lengkar.” Manah agi enti kitai nitihka jaku ke dipadah ba Epesus 4:26: “Anang majak ringat nyentuk ngagai mata panas padam”!

7. Baka ni prinsip Bup Kudus ke bisi ba Matthew 7:1-5 nulung kitai pechayaka orang bukai?

⁷ Kitai mega ulih belajar pechaya agi ke bala menyadi Kristian kitai enti kitai nunda chara Jehovah berunding pasal sida. Petara rinduka sida lalu Iya enda agi ingatka dosa sida. Nya alai, kitai mega patut ngereja utai ti sama. (Mas. 130:3) Ari ke betumpu ba penyalah sida, kitai patut enggau naka ulih beratika sifat manah sida sereta berunding pasal utai manah ke ulih dikereja sida. (Bacha Matthew 7:1-5.) Kitai pechaya sida deka ngereja utai ti manah, sereta enggai ngemediska ati kitai laban pengerindu “pechayaka semua utai.” (1 Kor. 13:7) Ayat nya ukai mai reti Jehovah ngarapka kitai pechayaka orang sengapa aja, tang Iya dekaka kitai pechayaka sida ketegal sida udah nunjukka diri ulih dikearapka. b

8. Baka ni nuan ulih belajar pechayaka bala menyadi Kristian nuan?

⁸ Kitai endang begunaka awak kena belajar pechayaka bala menyadi Kristian. Baka ni kitai ulih ngereja nya? Ngelala sida enggau manah agi. Bejaku enggau sida maya ba raban gempuru. Begulai nginjil enggau sida, sabar enggau sida, beri sida peluang kena nunjukka sida ulih dipechaya. Terubah iya, nuan engka enda madahka semua asai ati sereta runding nuan ngagai orang ke baru ditemu nuan. Seraya kaul nuan enggau iya majak tegap agi, nuan engka berasai senang agi madahka asai ati nuan. (Luk. 16:10) Tang nama ulih dikereja nuan enti siku menyadi ngereja utai ke ngasuh nuan enda ulih pechayaka iya agi? Anang beguai ngetuka kaul seduai. Tang beri awak kena seduai mutarka penanggul nya. Lalu, anang nejuka ulah sekeda orang ngasuh nuan enda pechayaka bala menyadi Kristian nuan. Ba pekara tu, kitai deka beratika teladan ti udah ditetapka sekeda nembiak Jehovah ti tetap ati ke mengkang pechayaka orang bukai taja pan sekeda orang kala ngasaka ati sida.

9. (a) Baka ni Hanah mengkang pechayaka atur Jehovah taja pan sekeda ari pengari Iya bisi ngereja penyalah? (b) Nama ulih dipelajarka kitai ari pengalaman Hanah pasal pechayaka atur ari Jehovah? (Peda gambar.)

⁹ Kala nuan berasai asa enggau ulah menyadi lelaki ke megai tanggung pengawa? Enti nuan kala, nuan engka deka bulih penguntung lebuh nuan beratika teladan Hanah. Maya nya, Imam Besai Eli ngulu pengawa sembah ngagai Jehovah ba Israel. Tang ruang bilik Eli nadai ngayanka chunto ti manah. Bala anak lelaki iya ke mega nyadi imam seruran ngereja utai ti jai sereta ngembuan ulah ti enda bemoral, tang apai sida enda bebendar ngerara sida. Jehovah enda tekala nya ngasuh Eli badu agi nyadi imam besai. Taja pan baka nya, Hanah terus  ngasika atur Jehovah. Iya seruran datai ngagai Rumah Sembiang taja pan Eli agi nyadi imam besai ba dia. Lebuh Eli meda Hanah besampi madahka penusah ba ati iya, Eli ngumbai Hanah mabuk. Eli enggau sengapa ngutuk Hanah ke benung balat tusah ati. (1 Sam. 1:12-16) Taja pia Hanah besemaya enti iya bisi anak lelaki, iya deka mai anak lelaki nya gawa ba Rumah Sembiang. Ba dia, Eli deka nyaga anak lelaki iya. (1 Sam. 1:11) Kati pekara ke bekaul enggau bala anak Eli patut diputarka? Au, lalu Jehovah ngereja nya ba maya ti udah ditetapka Iya. (1 Sam. 4:17) Lalu, Petara merekatka Hanah enggau siku anak lelaki ke benama Samuel.—1 Sam. 1:17-20.

10. Baka ni Raja David mengkang pechayaka orang bukai taja pan sekeda orang enda tetap ati enggau iya?

¹⁰ Kati bisi bakih rapat nuan ngemediska ati nuan? Enti bisi, peratika utai ke diasaika Raja David. Ahitopel nya siku ari bala bakih iya. Tang lebuh anak lelaki David, Absalom nguji deka nyadi raja, Ahitopel setanah enggau Absalom ngelaban David. Tu tentu amat ngemediska ati David laban iya lenyau sukung ari anak iya enggau lelaki ke dikumbai iya bakih! Taja pia David enda nejuka utai tu ngasuh iya badu agi pechayaka orang bukai. Iya terus pechayaka Husai, siku agi bakih iya ti tetap ati ke enggai setanah enggau orang ke ngelaban David. David bisi kebuah ti manah pechayaka Husai. Husai nunjukka diri bakih ti manah indah sanggup berambunka nyawa diri ngambika ulih nulung David.—2 Sam. 17:1-16.

11. Nama digaga siku ari ulun Nabal ke nunjukka iya pechayaka Abigail?

¹¹ Peratika mega teladan ke ditetapka siku ari ulun Nabal. David enggau bala iya udah ngelindung bala ulun lelaki ke benama Nabal, siku ari orang Israel. Enda lama udah nya, David minta Nabal nyediaka sebarang pemakai ke ulih diberi ngagai bala David. Lebuh Nabal enggai meri utai ti dipinta David, David balat ringat nyentukka iya deka munuh semua lelaki dalam rumah Nabal. Siku ulun madahka utai ti nyadi nya ngagai Abigail, bini Nabal. Ulun nya siku ari bala Nabal, lalu iya nemu Abigail ulih nyelamatka nyawa iya. Ari ke ngerarika diri, iya pechaya Abigail ulih mutarka situasi nya. Iya bisi pengandal baka nya laban semua orang nemu Abigail nya indu ti bepenemu-dalam. Utai ke  nyadi udah nya nunjukka iya bisi kebuah ti manah pechayaka Abigail. Abigail enggau berani nguji nagang David neruska pelan iya. (1 Sam. 25:2-35) Iya pechaya sereta andal David tentu deka ngereja utai ti ngena.

12. Baka ni Jesus nunjukka iya pechayaka bala murid iya taja pan sida bisi ngaga penyalah?

¹² Jesus pechayaka bala murid iya taja pan sida bisi ngaga penyalah. (Jhn. 15:15, 16) Lebuh James enggau John minta ngagai Jesus penuduk ti istimewa ba Perintah Petara, Jesus enda nanya tuju sida nyembah Jehovah tauka badu agi ngasuh sida nyadi bala rasul. (Mrk. 10:35-40) Udah nya, semua bala murid Jesus ninggalka iya ba malam iya ditangkap. (Mat. 26:56) Tang Jesus enda kala lenyau pengarap ba sida. Taja pan iya nemu sida enda sempurna, tang iya “rinduka sida datai ke ujung.” (Jhn. 13:1) Pengudah Jesus diangkatka idup baru, iya indah meri pengawa ti penting ngagai 11 iku rasul iya ti tetap ati. Sida deka ngulu ba pengawa ngaga orang nyadi murid sereta ngintu bala bedus iya. (Mat. 28:19, 20; Jhn. 21:15-17) Iya bisi kebuah ti manah pechayaka bala rasul iya ke enda sempurna. Semua sida enggau tetap ati ngereja pengawa ke diberi Jesus nyentukka sida mati. Endang amat, Hanah, David, ulun Nabal, Abigail, enggau Jesus netapka teladan ti manah lebuh pechayaka mensia ti enda sempurna.

13. Nama utai ke ngasuh kitai tusah deka pechayaka orang bukai?

¹³ Kala nuan madahka penerang ti resia ngagai siku menyadi, lalu udah nya nemu iya udah madahka resia nya ngagai orang bukai? Tu tentu ngemediska ati nuan. Bisi sekali, siku menyadi indu madah ngagai tuai gempuru pasal iya empu lalu pechaya tuai gempuru nya enda madah ngagai orang bukai pasal utai nya. Tang ba hari siti, bini tuai gempuru nya datai meransang menyadi indu nya laban laki iya udah madahka utai ke ditapi menyadi indu nya. Ketegal nya, menyadi indu nya berasai tusah deka pechayaka tuai gempuru nya. Tang menyadi indu nya ngereja utai ti betul lebuh iya minta bantu ari siku agi tuai gempuru kebukai. Lalu, tuai gempuru nya nulung iya pechaya baru ngagai bala tuai gempuru.

14. Nama nulung siku menyadi lelaki pechaya baru ngagai orang bukai?

¹⁴ Ba timpuh ti lama, siku menyadi lelaki pedis ati ngagai dua iku tuai gempuru ke diasaika iya enda ulih dipechaya. Taja pia, iya berengkah berundingka sekeda utai ti dipadahka siku menyadi lelaki ke amat dipebasaka iya. Utai ti dipadah iya amat penting: “Sitan nya meh munsuh kitai, ukai bala menyadi kitai.” Menyadi lelaki nya enggau bejimat berundingka rambai jaku nya sereta utai ke patut dikereja iya. Pengudah besampi ngagai Jehovah minta bantu, iya belubah-lubah bebaik enggau dua iku tuai gempuru nya.

15. Nama kebuah kitai begunaka awak kena pechaya baru ngagai orang bukai? Beri siti chunto.

¹⁵ Kala nuan lenyau tanggung pengawa ba raban gempuru? Tu tentu pengalaman ti amat ngemediska. Grete enggau indai iya Saksi ti taluk ba Nazi Jerman lebuh pengawa kitai disekat sebedau Perang Dunia Kedua. Grete gaga ati bisi tanggung pengawa naip Menara Jaga ke bala menyadi Kristian. Tang lebuh bala menyadi nemu apai iya enda rinduka pemendar, sida enda ngasuh iya ngereja pengawa nya agi laban sida takut enggaika apai iya meri penerang pasal raban gempuru ngagai orang ke nyakal. Ukai nya aja penanggul ke ditapi Grete. Sepemanjai Perang Dunya Kedua, bala menyadi Kristian enggai meri Grete enggau indai iya majalah. Sida mega enggai bejaku enggau seduai iya lebuh betemu enggau seduai iya. Nya amat  ngemediska ati seduai iya! Grete madahka, iya begunaka awak ti panjai kena ngampun sereta pechayaka bala menyadi nya baru. Nyau kelama iya nemu Jehovah tentu udah ngampunka sida, nyadi iya pan patut ngereja utai ti sama. c

16. Nama kebuah kitai patut bebendar pechayaka bala menyadi Kristian kitai?

¹⁶ Enti nuan mega bisi ngasaika pengalaman ti amat ngemediska ati, bebendar meh pechayaka baru orang bukai. Nuan engka begunaka awak ngereja nya tang usaha nuan nya enda lebu ngapa. Ambika chunto, enti nuan kala napi keracunan makanan, nuan engka bejimat agi lebuh milih pemakai ti deka diempa nuan. Taja pia, siti pemakai ti enda manah enda ngasuh kitai badu agi makai. Pia mega, kitai enda patut nejuka siti pengalaman ti enda manah ngelemika pengarap kitai ngagai semua bala menyadi Kristian laban kitai nemu sida mega enda sempurna. Lebuh kitai belajar pechayaka baru orang bukai, kitai deka gaga agi ati. Lalu, nya deka nulung kitai meretika utai ke ulih digaga kitai kena nulung bala menyadi ba raban gempuru pechayaka pangan diri.

17. Nama kebuah pechayaka pangan diri nya amat penting, lalu nama deka dikerandauka kitai ba artikel pengudah tu?

¹⁷ Ba dunya Sitan, kitai tusah deka tetemuka orang ke pechayaka pangan diri. Tang kitai ulih pechayaka bala menyadi Kristian kitai laban kitai rinduka sida, lalu sida rinduka kitai. Enti kitai pechayaka pangan diri, nya ulih mai pengaga sereta penyerakup diatu, lalu deka ngelindung kitai lebuh kitai napi maya ti tusah jemah ila. Nama patut digaga nuan enti bisi siku orang ngemediska ati nuan, lalu nuan enda ulih pechayaka iya agi? Uji beratika situasi nya baka Jehovah, titihka prinsip Bup Kudus, kemansangka pengerindu ti dalam ngagai bala menyadi Kristian nuan, sereta belajar ari teladan ke bisi dalam Bup Kudus. Kitai ulih mutarka asai ati ti pedis lalu belajar pechaya baru orang bukai. Lebuh kitai ngereja nya, kitai deka ngasaika berekat ketegal ngembuan mayuh kaban ke “taluk agi ari menyadi diri.” (J-lam. 18:24) Tang nya enda chukup enti kitai aja ke pechayaka orang bukai, sida mega patut ulih pechayaka kitai. Ba artikel pengudah tu, kitai deka berandauka chara kitai ulih nunjukka diri ulih dipechayaka bala menyadi Kristian.