1. Ngatta ari ittam nakuan makaddag nga aru nga totolay sangawe i marigatan nga mattalo?

 ARI nga ammu na totolay ta mundo ni Satanas nu sinni i pammakatalakkadda. Kanayun ira nga madismaya ta kukukuan na negosiante ira, pulitiko, anna lider ira na relihion. Ari paga lagu makapattalo i karuan ta kofudda ira, karruba da, anna maski ta kafamilia da. Kattam nakuan makaddag tatun, megafu ta niprofesiya na Biblia: ‘Ta pangurianan ira nga aggaw, mamara-parake anna traidor i totolay.’ Kayà na kagian, ipasingan na totolay i ugali na dios na mundo nga ari nga mapammakatalakkan.​—2 Tim. 3:1-4; 2 Cor. 4:4.

2. (a) Sinni ira i puede tam nga pattalakkan? (b) Anni i nononopan na karuan?

² Bilang Cristiano, ammu tam nga meyawa tam i buu nga pattalo kani Jehova. (Jer. 17:7, 8) Kumbinsidu ittam nga iddeddukan na ittam anna ‘ari na vuluvuga nga pagurayan’ i kofun na ira. (Sal. 9:10) Makapattalo ittam gapa kani Cristo Jesus megafu ta nisakrifisio na i inango na para ta nittam. (1 Ped. 3:18) Napakurug tam gapa ta mismu nga ekspiriensa tam nga mapammakatalakkan i giya nga naggafu ta Biblia. (2 Tim. 3:16, 17) Makkomfiansa ittam nga makapattalo ittam kani Jehova, kani Jesus, anna ta Biblia. Ngem nonopan na karuan nu mapammakatalakkan kari kanayun i wawwaragi ira ta kongregasion. Nu wan, ngatta ta makapattalo ittam ta nira?

3. Anni i espesial nga pribilehio tam? (Marcos 10:29, 30)

³ Pinili na ittam ni Jehova tapenu mabbalin tu parte na interu mundo nga familia na maddayarayaw ira nisa. Espesial nga pribilehio yatun nga mangiyawa tu napakaru nga bendision! (Bibbigan i Marcos 10:29, 30.) Ta interu mundo, egga ira i wawwaragi tam nga magiddu kani Jehova kagitta tam. Kukukuadda gapa i  ngamin tapenu makapattolay ira segun ta estandarte na. Awayya na tu neruma i lengguahe, kultura, anna assissinnuttam ta nira. Ngem iddeddukattam ira maski nu first time tam laman ira nga mammammu. Kakayà tam nga makavvulu ira nga masserbi anna maddayaw ta minaggiddu nga Yama tam ta langi.​—Sal. 133:1.

4. Ngatta mawag tam i wawwaragi tam ira?

⁴ Sangawe ngana i tiempo nga mawag tu makiddukko ittam ta wawwaragi. Egga ira i tiempo nga duffunadda ittam nga mangattu ta ziga tam. (Roma 15:1; Gal. 6:2) Pagarammadda ittam nga mattalupaddian nga aktibo ta passerbi kani Jehova anna matuyag ta espiritual. (1 Tes. 5:11; Heb. 10:23-25) Nonopan ngana laman nu anni i matageno tam nu awan i proteksion maggafu ta kongregasion tapenu manuffun ta nittam nga labanan i kalabattam ngamin—si Satanas nga Diablo anna i kitaddake nga mundo na. Aranni ngana nga atakeyan ni Satanas anna na kaalyadu na ira danuri masserbi ta Dios. Imajinammu i pappabalo tam saw ta wawwaragi tam megafu ta kavulu tam ira sonu mesimmu yatun!

5. Ngatta marigatan i karuan nga mattalo ta wawwaragi da?

⁵ Marigatan gapa i karuan nga mattalo ta wawwaragi da. Awayya na gare nga inistoria na tadday nga wagi ta tanakuan i konfidensial onu sekreto nga gannug nga nekagi ta nisa, onu ari na nga natuppal i promesa na. Onu baka egga i nakagi onu nakua na kakongregasiodda tu kitattaki ta nira. Nu mesimmu ta nittam i kunnatun, baka marigatan ittam ngana nga mattalo ta tanakuan. Anni gafu i makaduffun ta nittam tapenu mapadakal i pattalo tam ta wawwaragi tam?

6. Kunnasi nga makoffun i aya tapenu mapadakal tam i pattalo? (1 Corinto 13:4-8)

⁶ Nebase i pattalo ta aya. Kagian na 1 Corinto kapitulo 13 i aru nga aspeto na aya nga makoffun ta nittam tapenu mapadakal onu metoli i  pattalo tam ta tanakuan. (Bibbigan i 1 Corinto 13:4-8.) Angngarigan na, nakagi ta versikulo 4 nga “i aya ay pappasensia anna pagallo.” Pasa-pasensian ittam ni Jehova maski nu makaliwa ittam ta nisa. Yari tu mawag gafu nga pasa-pasensiattam i wawwaragi tam nu egga i makagi onu makua da nga kalussaw tam onu natakitan ittam. Kagian paga na versikulo 5: “[I aya ay] ari tu pallullussaw onu pamappan tu taki na nono.” Ari tam kayà i ‘mangipappan tu taki na nono,’ nga gitta na ilillista tam i makapataki ira nga kingngua na wawwaragi tam. Kagian na Eclesiastes 7:9 nga ari ittam nakuan “insigida nga matakitan.” Yari tu mas makasta nu iyaplika tam i nakagi ta Efeso 4:26: ‘Nu mappatu i ulu nu, arian nu yaw nga pabbayagan’!

7. Kunnasi nga makoffun i prinsipio ta Mateo 7:1-5 tapenu mapadakal i pattalo tam?

⁷ Makoffun paga ta pamadakal ta pattalo ta wawwaragi tam nu parigattam i paningan ni Jehova ta nira. Iddeddukan ira na Dios anna ari tu i kamali da laman i inninnan na. Kunnatun ittam nakuan gapa. (Sal. 130:3) Imbes tu i pakkamaliadda laman i agga-sinnattam, mawag tu mappursigi ittam nga innan i mapia ira nga ugali da anna nonopattam i potensial da. (Bibbigan i Mateo 7:1-5.) Mattalo ittam nga kayà da nga kuan i mapia anna ari tam ira passuspechan nga sadyakadda nga takitan ittam megafu ta “i aya ay . . . pammakatalo.” (1 Cor. 13:7) Ari na mabba kayà kagian yatun tu ekspektan ni Jehova tu mattalo ittam ta tanakuan maski awan mabba tu basehan tatun. Ekspektan na lallagu nga mattalo ittam ta tanakuan megafu ta napakurug da nga mapattalakkan ira. *

8. Anni i kuammu tapenu mattalo ka ta wawwaragim?

⁸ Tapenu irespeto naka na tanakuan, mawag tu egga i kuammu. Kunnatun gapa ta pattalo. Tapenu pattalakkan naka na tanakuan, mawag gapa tu egga i kuammu. Ngem kawagan natun i tiempo. Anni i kuammu tapenu mattalo ka ta wawwaragi? Mawag tu makilalam ira tu mapia. Makistoria ka ta nira ta study. Mallayyagayya ka kavulu da. Pasa-pasensiammu ira. Iddammu ira tu oportunidad nga mepasingadda nga mapammakatalakkan ira. Ta gafu na, awayya na tu piliammu labbi i personal ira nga gannug nga ikaya mu iyistoria ta nira. Habang mas makilalam ira, baka mas komfortable ka ngana sangaw nga mangikagi ta mataga-tageno mu. (Luc. 16:10) Ngem kunnasi nu zinaral na tadday nga wagi i pattalo mu ta nisa? Ari mu nakuan insigida gappakkan i pakkofun nu. Pappasammu labbi i tiempo. Kammu ipamavulun nga madaral i pattalo mu ta ngamin nga wawwaragi megafu laman ta kingngua na karuan. Ikonsidera tam i ehemplo na matalo ira nga aripan ni Jehova nga nattalo lagapa ta tanakuan maski nu nadismaya na karuan.

9. (a) Anni lagapa i kingngua ni Hana maski paga nakaliwa i mangirollu ira ta paddayaw kani Jehova? (b) Anni i magigiammum kani Hana meyannung ta pangirespeto ta unnug ira ni Jehova? (Innan i letratu.)

⁹ Nadismaya ka ngana kari ta kondukta na tadday nga brother nga egga i pribilehio na? Nu wan, makoffun niko i ehemplo ni Hana. Ta tiempo na, si Eli i atannang nga pari nga mangirollu ta paddayaw kani Jehova ta Israel. Ngem ari tu makasta i ehemplo na familia ni Eli. Papari i ána na ngem kanayun ira nga magangngua tu kappasiran anna imoral nga gannug. Ngem alappaw laman i pinangivuya na ta nira. Ari na nga niyawa i mepangngo nga disiplina para ta nira. Ari nga insigida nga inalsa ni Jehova si Eli bilang atannang nga pari. Maski paga kunnatun i situasion, nirespeto lagapa ni Hana i unnug na Dios. Ari lagapa yayya nagimmang nga maddayaw ta  tabernakulo maski nu si Eli paga i atannang nga pari. Turi ta nasingan ni Eli si Hana nga makimallo megafu ta nepallo i daddam na, abbo na tu nellaw si Hana. Maski paga kanna ammu i kurug nga situasion na, insigida nga krinitika na yaw nga problemadu nga babay. (1 Sam. 1:12-16) Maski kunnatun, ari lagapa nga nibabawi ni Hana i tabba na nga nu mapeggan yayya tu ana nga lalaki, iyangay na yatun tapenu masserbi ta tabernakulo nu sitaw si Eli i manangngal ta abbing. (1 Sam. 1:11) Mawag kari nga metunung i ána ira ni Eli? Wan, kinastigo ira ni Jehova ta mepangngo nga tiempo. (1 Sam. 4:17) Binendisionan gapa na Dios si Hana tu ana nga lalaki—si Samuel.​—1 Sam. 1:17-20.

10. Ngatta ari nawawwan i pattalo ni Patul David ta tanakuan maski paga natraydor yayya?

¹⁰ Trinaydor naka ngana kari na tadday ta madukko nga kofummu? Nu wan, makagigiammu ka ta nesimmu kani Patul David. Tadday ta kofun na i mangngagan tu Ahitofel. Ngem turi ta plinano na ana ni David nga si Absalom nga tafun i kinapatul na, sinuportan ni Ahitofel i rebelyon ni Absalom. Anni mabba i kataki na yatun para kani David! Nawawwan na i suporta na mismu nga ana na anna na abbo na tu kofun na! Ngem ari nga nawawwan i pattalo ni David ta tanakuan megafu laman taw nga pattraydor. Nattalo lagapa yayya ta matalo nga kofun na nga si Husai, nga ari nga nevulu ta rebelyon. Egga i basehan ni David nga mattalo kani Husai. Napakurug gare ni Husai nga mapia yayya nga kofun gafu ta pinappeligro na paga lagu i inango na tapenu duffunan si David.​—2 Sam. 17:1-16.

11. Kunnasi nga nangipasingan tu pattalo i tadday ta doroban ni Nabal?

¹¹ Gigiammuattam i ehemplo na tadday ta doroban ni Nabal. Masippo nga prinotektan ni David anna na tauhan na ira i doroban ira na Israelita nga mangngagan tu Nabal. Turi kua, nakkiddaw si David ta mariku nga si Nabal tu maski anni laman nga makan nga meyawa na para ta tauhan na ira. Ngem manaki ni Nabal nga iyawa yatun nga simple nga kiddaw, yari tu fermi i poray ni David. Megafu tatun, ginakkag ni David nga patayan i ngamin nga lalaki ta balay ni Nabal. Nidanug na tadday nga doroban yatun ta atawa ni Nabal nga si Abigail. Gafu gare ta kabbalay da yayya, ammu na nga nakadepende i inango na kani Abigail. Imbes tu mattammang yayya, nattalo  yayya nga metunung ni Abigail i situasion. Kunnatun ngana laman kadakal i pattalo na kani Abigail megafu ta aru i makakkilala nisa nga ma-uto yayya nga babay. Ipasingan na tumunug nga nesimmu tu egga i basehan na nga mattalo kani Abigail. Magutu gare nga kinumbinsi ni Abigail si David nga kanna ituloy i plano na. (1 Sam. 25:2-35) Nattalo yayya kani David nga kuan na i fustu.

12. Kunnasi nga nipasingan ni Jesus i pattalo na ta disipulos na ira maski paga makkamali ira?

¹² Pinattalakkan lagapa ni Jesus i disipulo na ira maski makkamali ira. (Juan 15:15, 16) Turi ta nikiddaw ni Santiago anna ni Juan kani Jesus nga mapeggan ira tu espesial nga posision ta Pappatulan, ari nga kinuestion ni Jesus i motibo da ta passerbi kani Jehova, ni tu inalsa na ira bilang apostol. (Mar. 10:35-40) Turi kua, pinanawan na ngamin nga disipulos si Jesus ta gabi nga naaresto yayya. (Mat. 26:56) Ngem ari lapa nawawwan i pattalo ni Jesus ta nira. Ammu na i pakkafiadda ira. Ngem “nipasingan na nira i pagiddu na nga awan tu panuppalan na.” (Juan 13:1) Kabalin nga napaginnolay si Jesus, nitalo na ta 11 nga matalo nga apostoles na i importante nga responsibilidad. Yatun i pangirollu ta trabahu nga pagangngua tu disipulos anna i panangngal ta meddu nga karneru na. (Mat. 28:19, 20; Juan 21:15-17) Egga i basehan na ta pattalo tatun nga imperfekto nga lallaki. Matalo gare ira ngamin nga nasserbi adde ta pateda. Manawag nga makasta i ehemplo da Hana, David, doroban ni Nabal, Abigail, anna Jesus ta pattalo ta imperfekto nga totolay.

13. Ngatta awayya na tu mariga i mattalo ta tanakuan?

¹³ Napuruebammu ngana kari nga makkagi tu konfidensial nga gannug ta tadday nga wagi, tapus zinaral na i pattalo mu? Kaddismaya i kunnatun. Mittan, egga i sister nga nakkagi tu personal nga gannug ta tadday nga elder. Tapus ta tumunug nga aggaw, nattawag i atawa natun nga elder tapenu pagaramman i sister. Halatadu nga ammu na i konfidensial nga informasion nga nekagi ta atawa na. Malippawa tam gafu nu ngatta nadaral i pattalo na sister tatun nga elder. Ngem kingngua na sister i fustu ta pakkiddaw na tu uffun. Minaranni yayya ta tanakuan tu elder nga nanguffun ta nisa nga itoli i pattalo na ta elder ira.

14. Anni i nakaduffun ta tadday nga brother tapenu mattalo uli?

¹⁴ Tadday nga brother i nabayag ngana nga egga i “ngem” na ta dua nga elder nga abbo na nga ari nga mapammakatalakkan. Ngem pinannonopan na i kinagi na tadday nga brother nga kuruga irespeto na. Kunnaw i simple ngem mafuersa nga kinagi na: “Si Satanas i kalaban, ari tu i wawwaragi tam.” Pinannonopan yatun tu mapia na brother anna ninono na gapa nu anni i kuan na. Kabalin na nga nakkiddaw tu uffun kani Jehova ta pakimallo, naayus na gabbalaman i problema na tari ta dua nga elder.

15. Ngatta kawagan i tiempo tapenu metoli i pattalo? Mangistoria tu angngarigan.

¹⁵ Nawawwanakka ngana kari tu pribilehio? Mataka-taki yatun. Si Grete anna i yena na ay matalo nga Saksi ta Nazi Germany ta dekada 1930 turi ta negamma i trabahu tam. Magayayya si Grete ta pribilehio na nga mat-type tu kopia na The Watchtower para ta kapangngurug na ira. Ngem turi ta nannammuan na wawwaragi ira nga opposer i yama na, inalsa da nisa i pribilehio na. Maganassing gare ira ta baka ikagi na yama na ta kagitta na nga opposer i informasion meyannung ta kongregasion. Ngem ari tu yatun laman i namurueba kani Grete. Ta interu World War II, ari nga nitalo na wawwaragi kani Grete anna ta yena na i kopia ira na magazina anna ari da paga lagu ira nga kikkibbidan maski nu madafung da ira ta dalan. Kitattaki yatun! Araralam i nikabigag ni Grete ta emosion, yatutta nappasa labbi i apaddu nga tiempo  nige nga mapakoma na i wawwaragi anna mattalo uli nira. Ngem ta pappasa na tiempo, narekunnisi na nga pinakoma ngana ira ni Jehova, yari tu mawag tu pakoman na ngana gapa ira. *

16. Ngatta mawag tam i mappursigi tapenu metoli i pattalo tam ta wawwaragi?

¹⁶ Napuruebammu ngana kari i kunnatun nga makapataki tu ekspiriensa? Nu wan, mappursigi ka tapenu metolim i pattalo mu. Awayya na tu kawagammu i tiempo, ngem ari tu sayang i pappursigim. Tapenu meyilustra, napuruebammu ngana kari i ma-poison gafu ta kinammu? Nu wan, awayya na tu mas magimmugug ka ngana sangaw ta kanammu. Ngem ari na kayà kagian nga nu napuruebammu ngana i mittan nga ma-poison ay ari ka ngana kuman. Kunnatun gapa, ari tam nga ipamavulun nga daralan na tadday tu marake nga ekspiriensa i pattalo tam ta ngamin nga wawwaragi tam. Ammu tam mabba nga neyana gapa ira tu imperfekto. Nu itoli tam uli i pattalo tam, mabbalin ittam tu mas magayayya. Makapaffokus ittam gapa ta makua tam tapenu mapeggan tu pattalo i wawwaragi tam ta kataggi-tadday ta kongregasion.

17. Ngatta kuruga importante i pattalo, anna anni i gigiammuattam ta tumunug nga artikulo?

¹⁷ Bihira i pattalo ta totolay ira ta mundo ni Satanas. Ngem makapattalo ittam ta wawwaragi megafu ta iddeddukattam ira anna iddeddukadda ittam. Mamagayayya anna mamattaradday ta nittam sangawe i kunnatun nga pattalo. Mabbalin gapa yatun tu proteksion ta nittam nu meparubang ittam ta mariga ira nga tiempo ta mappange. Anni i kuammu nu nadismaya ka megafu ta zinaral na tanakuan i pattalo mu ta nira? Parigammu i pagimamma ni Jehova ta ganna-gannug, iyaplikam i prinsipio ira na Biblia, mapeggakka tu dakal nga pangaya ta wawwaragim, anna gigiammuammu i ehemplo ira ta Biblia. Mawayya tam nga alsan i taki na nono anna metoli i pattalo ta tanakuan. Nu kuattam yatun, magayayya ittam ta bendision na kapeggan tu aru nga kokkofun nga “mas madukko anne ta wagi.” (Prov. 18:24) Ngem ari tu makalanno nga mattalo ittam ta tanakuan. Mawag gapa tu ammu da nga makapattalo ira ta nittam. Ta tumunug nga artikulo, gigiammuattam nu kunnasi tam pakurugan nga mapattalakkan ittam na wawwaragi tam.