1. Apay a ditay masdaaw nga adu a tattao ita ti marigatan nga agtalek iti padada a tao?

 SAAN nga ammo dagiti tattao iti lubong ni Satanas no siasino dagiti mabalinda a pagtalkan. Kanayon a madismayada iti ar-aramiden dagiti negosiante, politiko, ken lider ti relihion. Mariknada a dida metten mapagtalkan dagiti gagayyem, kaarruba, ken uray dagiti kapamiliada. Ditay masdaaw iti dayta ta impakpakauna ti Biblia: “Iti maudi nga al-aldaw . . . , dagiti tattao [ket] . . . saan a matalek, . . . manangpadakes, . . . traidor.” Iti sabali a pannao, tultuladenda ti saan a pulos a mapagtalkan a dios daytoy sistema ti bambanag.​—2 Tim. 3:1-4; 2 Cor. 4:4.

2. (a) Siasino dagiti naan-anay a mapagtalkantayo? (b) Ania ti mabalin a pampanunoten ti dadduma?

² Ngem kas Kristiano, ammotayo a naan-anay a makapagtalektayo ken Jehova. (Jer. 17:7, 8) Kombinsidotayo nga ay-ayatennatayo ken ‘dina baybay-an dagiti gagayyemna.’ (Sal. 9:10) Makapagtalektayo met ken Kristo Jesus ta intedna ti biagna para kadatayo. (1 Ped. 3:18) Ken napadasantayon a mismo a talaga a mapagtalkan dagiti pammagbaga ti Biblia. (2 Tim. 3:16, 17) Awan duadua a makapagtalektayo ken Jehova, ken Jesus, ken iti Biblia. Ngem baka pampanunoten ti dadduma: Kanayon kadi a mapagtalkantayo dagiti kakabsat? No wen, apay?

3. Ania ti espesial unay a pribilehiotayo? (Marcos 10:29, 30)

³ Pinilinatayo ni Jehova nga agbalin a paset ti sangalubongan a pamilia dagiti agdaydayaw kenkuana. Espesial unay dayta a pribilehio a mangyeg iti nagadu a bendision! (Basaen ti Marcos 10:29, 30.) Iti intero a lubong, adda dagiti kakabsat a kapadatayo a mangay-ayat ken Jehova ken mangikagkagumaan nga agbiag maitunos kadagiti pagalagadanna. Saan nga agpapada  ti lengguahe, kultura, ken panagbadbadotayo. Ngem uray no damotayo pay la ida a makita, nalag-anen ti riknatayo kadakuada. Magusgustuantayo unay ti makikadua kadakuada nga agdaydayaw iti nadungngo a nailangitan nga Amatayo.​—Sal. 133:1.

4. Apay a kasapulantayo dagiti kakabsat?

⁴ Lallalo a kasapulantayo ita ti makikaykaysa kadagiti kakabsat. Adda dagiti tiempo a tulongandatayo a mangawit kadagiti pakadagsenantayo. (Roma 15:1; Gal. 6:2) Tultulongandatayo met nga agtultuloy a naregta nga agserbi ken Jehova ken agtalinaed a natibker iti naespirituan. (1 Tes. 5:11; Heb. 10:23-25) No awan ti proteksion ti kongregasion, marigatantayo la ketdi a manglaban kadagiti kabusortayo​—ni Satanas a Diablo ken ti nagdakes a lubongna. Dagiti adipen ti Dios ket asidegen a rauten ni Satanas ken dagiti tattao a konkontrolenna. Anian a yamantayo ta iti dayta a tiempo, addanto dagiti kakabsat a tumulong kadatayo!

5. Apay nga adda dagiti tiempo a marigatan ti dadduma nga agtalek kadagiti kakabsat?

⁵ Ngem marigatan ti dadduma nga agtalek kadagiti kakabsat. Posible ngamin nga adda kapammatian a nangdadael iti panagtalekda wenno saan a nangtungpal iti karina. Wenno baka adda kakongregasionda a nakaibaga wenno nakaaramid iti nakasaktan unay ti riknada. No mapasamak dayta, mabalin a marigatantayo nga agtalek iti dadduma. Ania ngarud ti makatulong tapno makapagtalektayo kadagiti kapammatiantayo?

6. Kasano a ti ayat ti tumulong kadatayo nga agtalek? (1 Corinto 13:4-8)

⁶ Ayat ti pundasion ti panagtalek. Deskribiren ti 1 Corinto kapitulo 13 ti adu nga aspeto ti ayat a tumulong tapno masursurotayo  ti agtalek wenno tapno maisubli ti panagtalektayo iti sabsabali. (Basaen ti 1 Corinto 13:4-8.) Kas pagarigan, kuna ti bersikulo 4 a “ti ayat ket naanus ken naimbag.” Naanus ni Jehova kadatayo uray no makabasoltayo kenkuana. Masapul ngarud nga anusantayo dagiti kakabsat no makaibaga wenno makaaramidda iti pakasuronan wenno pakasairantayo. Kuna pay ti bersikulo 5: “[Ti ayat ket] saan a nalaka nga agpungtot. Saan nga agbilbilang iti pannakadangran.” Ditay kayat ti ‘agbilang iti pannakadangran,’ a sangkapanunottayo dagiti nagkamalian dagiti kakabsat. Sigun iti Eclesiastes 7:9, ‘saantayo koma nga alisto nga agpungtot.’ Nasaysayaat nga amang nga iyaplikartayo ti kuna ti Efeso 4:26: “Diyo ipalubos a lumnek ti init nga agung-ungetkay pay laeng”!

7. Kasano a makatulong dagiti prinsipio iti Mateo 7:1-5 tapno masursurotayo ti agtalek?

⁷ Ti sabali pay a makatulong tapno masursurotayo ti agtalek kadagiti kakabsat ket ti panangtulad iti panangmatmat ni Jehova kadakuada. Ay-ayaten ida ti Dios ken saanna a bilbilangen dagiti basolda. Kastatay met koma. (Sal. 130:3) Imbes nga agpokustayo kadagiti kamalida, ikagumaantayo a kitaen dagiti nasayaat a kualidadda ken panunoten dagiti posible a nasayaat a maaramidanda. (Basaen ti Mateo 7:1-5.) Ditay pagduaduaan ti motiboda ta ti ayat “patienna ti amin a banag.” (1 Cor. 13:7) Saanna a kayat a sawen dayta nga ekspektaren ni Jehova nga agtalektayo lattan iti sabsabali, no di ket ekspektarenna nga agtalektayo kadakuada ta pinaneknekandan a mapagtalkanda. *

8. Kasano a masursurom ti agtalek kadagiti kakabsat?

⁸ Ti panagtalek ket kas iti panagraem. Kasapulan ti panagregget ken tiempo tapno maalam dayta. Kasano a masursurom ti agtalek kadagiti kakabsat? Am-ammuem ida a naimbag. Kasaritam ida kadagiti gimong ken makikaduaka kadakuada iti ministerio. An-anusam ida. Ikkam ida iti gundaway a mangipakita a mapagtalkam ida. Iti damo, piliem pay laeng dagiti personal a banag a kayatmo nga ibaga iti nabiit pay a naam-ammom. Bayat a bumaybayag ti panaggayyemyo, baka mas komportablekan a mangibaga iti rikriknam. (Luc. 16:10) Ngem kasanon no adda kabsat a nangdadael iti panagtalekmo kenkuana? Saanmo a dagus a laksiden kas gayyem. Imbes ketdi, mangpalabaska pay laeng iti tiempo. Dimo met ipalubos a saankan a pulos nga agtalek gapu laeng ta adda sumagmamano a nangpaay kenka. Maipapan iti daytoy, usigentayo ti ulidan ti dadduma a matalek nga adipen ni Jehova nga intultuloyda latta ti nagtalek uray no adda sumagmamano a nangpaay kadakuada.

9. (a) Kasano a nagtultuloy a nagtalek ni Hanna iti urnos ni Jehova iti laksid dagiti pagkamkamalian ti dadduma a pannakabagi ti Dios? (b) Ania ti masursurom iti kapadasan ni Hanna maipapan iti panagtalek iti urnos ni Jehova? (Kitaen ti ladawan.)

⁹ Adda kadin inaramid ti maysa a panglakayen a nakadismayaam? No wen, mabalin a magunggonaanka iti panangusigmo iti ulidan ni Hanna. Ti mangidadaulo idi iti panagdaydayaw ken Jehova iti Israel ket ti nangato a padi a ni Eli. Ngem saan a mapagulidanan ti pamiliana. Papadi dagiti annakna, ngem kanayon a nakababain ken immoral dagiti ar-aramidenda. Nupay kasta, nalag-an laeng ti panangkorehir kadakuada ni Eli. Kaskasdi a saan a dagus  nga inikkat ni Jehova ni Eli iti saadna. Iti laksid dayta, intultuloy ni Hanna a sinuportaran ti urnos ti Dios. Nagdaydayaw latta idiay tabernakulo uray no ni Eli pay laeng ti nangato a padi. Nakita ni Eli nga agsangsangit ni Hanna bayat nga agkarkararag, isu nga impagarupna a nabartek ni Hanna. Krinitikarna daytoy maladladingitan a babai a dina man la inammo nga umuna no ania ti kasasaadna. (1 Sam. 1:12-16) Nupay kasta, inkari ni Hanna a no maaddaan iti anak a lalaki, ipanna idiay tabernakulo tapno agserbi sadiay, iti sidong ti panangaywan ni Eli. (1 Sam. 1:11) Masapul kadi a mailinteg dagiti annak ni Eli? Wen, ket nagtignay ni Jehova iti naikeddeng a tiempo. (1 Sam. 4:17) Kabayatanna, binendisionan ti Dios ni Hanna iti anak a lalaki a ni Samuel.​—1 Sam. 1:17-20.

10. Kasano a nagtultuloy ni Ari David a nagtalek iti dadduma uray no adda dagiti nangtraidor kenkuana?

¹⁰ Adda kadi nasinged a gayyemmo a nangtraidor kenka? No wen, panunotem ti napasamak ken Ari David. Maysa kadagiti gayyemna ti lalaki nga agnagan iti Ahitofel. Ngem idi pinadas ni Absalom nga anak ni David nga agawen ti kinaari ni tatangna, sinuportaran ni Ahitofel ti panagrebelde ni Absalom. Permi la ketdi a nasaktan ni David idi trinaidor ti anakna ken ti maysa nga ibilbilangna a gayyem! Ngem saan nga impalubos ni David a dayta a panangtraidor ti rason a saanen nga agtalek iti sabsabali. Intultuloyna latta ti nagtalek iti sabali a napudno a gayyemna a ni Husai, a saan a simmuporta iti panagrebelde. Adda natibker a rason iti panagtalek ni David. Napaneknekan ni Husai nga isu ket nasayaat a gayyem, nga uray la inrisgona ti biagna a tumulong ken David.​—2 Sam. 17:1-16.

11. Kasano nga impakita ti maysa nga adipen ni Nabal nga agtalek ken Abigail?

¹¹ Usigem met ti ulidan ti maysa kadagiti adipen ni Nabal. Gapu ta nakaim-imbag ni David ken dagiti tattaona, prinotektaranda dagiti adipen ti maysa nga Israelita nga agnagan iti Nabal. Idi agangay, nagdawat ni David iti nabaknang a ni Nabal iti taraon para kadagiti tattaona, aniaman ti maitedna. Saan a pinatgan ni Nabal ti nainkalintegan a kiddaw ni David. Gapu iti dayta, nakapungtot unay ni  David nga uray la nagdesision a patayenna ti amin a lallaki iti sangakabbalayan ni Nabal. Adda adipen a nangipadamag iti dayta a situasion iti asawa ni Nabal a ni Abigail. Dayta nga adipen ket paset ti sangakabbalayan, isu nga ammona a masalbar ni Abigail ti biagna. Imbes nga agtalaw, nagtalek a kabaelan ni Abigail nga iremedio ti situasion. Nagtalek unay ta ammona a masirib ni Abigail nga amona. Husto ti inaramid ti adipen. Natured ni Abigail a nangkombinsir ken David a dinan ituloy ti planona. (1 Sam. 25:2-35) Nagtalek ni Abigail nga umiso ti aramiden ni David.

12. Kasano nga impakita ni Jesus a nagtalek kadagiti adalanna iti laksid dagiti pagkapuyanda?

¹² Nagtalek ni Jesus kadagiti adalanna iti laksid dagiti pagkapuyanda. (Juan 15:15, 16) Idi kiniddaw da Santiago ken Juan nga ikkan ida ni Jesus iti espesial a saad iti Pagarian, saanna a kinuestionaran ti motiboda nga agserbi ken Jehova wenno dina inikkat ida kas apostolna. (Mar. 10:35-40) Idi agangay, ni Jesus ket pinanawan ti amin nga adalanna iti rabii a naaresto. (Mat. 26:56) Ngem saan a pulos a napukaw ti panagtalek ni Jesus kadakuada. Uray no ammona dagiti pagkapuyanda, “inayatna ida agingga iti panagpatingga ti biagna.” (Juan 13:1) Idi napagungar ni Jesus, inikkanna pay ketdi ti 11 a matalek nga apostolna iti napateg a responsabilidad a mangidaulo iti trabaho a panagaramid iti adalan ken mangaywan kadagiti nagpateg a karnerona. (Mat. 28:19, 20; Juan 21:15-17) Saan a napaay ti panagtalekna kadagitoy imperpekto a lallaki. Simamatalekda amin a nagserbi agingga a nagpatinggan ti biagda ditoy daga. Talaga a nagsayaat ti ulidan da Hanna, David, Abigail, ti adipen ni Nabal, ken ni Jesus maipapan iti panagtalek kadagiti imperpekto a tattao.

13. Ania ti posible a mangdadael iti panagtalek?

¹³ Adda kadin kompidensial nga impormasion nga intalekmo iti maysa a kabsat, ngem naammuam idi agangay nga imbagana dayta iti sabali? Nagkas-ang la ketdi dayta! Naminsan, impudno ti maysa a sister ti personal a banag iti maysa a panglakayen. Kabigatanna, timmawag kenkuana ti asawa ti panglakayen tapno paregtaenna. Nalawag nga ammo ti asawa ti panglakayen ti kompidensial a naibaga ken lakayna. Natural laeng a marigatanen ti sister nga agtalek iti dayta a panglakayen. Imbag laengen ta nagpatulong dayta a sister iti sabali a panglakayen a timmulong kenkuana a mangisubli iti panagtalekna kadagiti panglakayen.

14. Ania ti nakatulong iti maysa a brother a mangisubli iti panagtalekna?

¹⁴ Nabayagen a masuron ti maysa a brother iti dua a panglakayen a mariknana a dina mapagtalkan. Ngem pinanunotna ti imbaga ti maysa a brother a raraemenna unay. Ti simple ngem nabagas nga imbagana ket: “Ni Satanas ti kabusor, saan a dagiti kakabsat.” Pinampanunot ti brother dagita a sasao sa nagkarkararag. Idi agangay, nakikappia met laeng kadagita a dua a panglakayen.

15. Apay a tiempo ti kasapulan sakbay a maisubli ti panagtalek? Mangted iti pagarigan.

¹⁵ Napukawanka kadin iti pribilehio? Nasakit la ketdi dayta. Idi 1930’s, ti Germany ket iturturayan dagiti Nazi isu a maiparparit ti trabahotayo. Ni Grete ken ni nanangna ket matalek a Saksi sadiay. Naikkan ni Grete iti pribilehio a mangimakinilia kadagiti kopia Ti Pagwanawanan para kadagiti kapammatianna. Naammuan dagiti kakabsat a busbusoren ni tatangna ti kinapudno, isu nga inikkatda ti pribilehiona ta mabutengda amangan no ipulong ni tatangna ti kongregasion kadagiti bumusbusor.  Saan la a dayta ti nakasuotan ni Grete. Bayat ti Gubat Sangalubongan II, saan nga intalek dagiti kakabsat kada Grete ken ni nanangna dagiti magasin ken saanda man la a kasarita ida uray no masabatda ida iti kalsada. Nasaktan unay ni Grete isu a nakabaybayag a dina napakawan ken nagtalkan dagidiay a kakabsat. Ngem idi agangay, naamirisna a pinakawan la ketdi idan ni Jehova isu a masapul a pakawanenna met ida. *

16. Apay a masapul nga ikagumaantayo a sursuruen ti agtalek kadagiti kakabsat?

¹⁶ No addan kasta a nasaem a kapadasam, ikagumaam nga isubli ti panagtalekmo. Tiempo ti kasapulan, ngem saan a sayang ti panagreggetmo. Kas panangyilustrar, no nakapangantayo iti nagsakitan ti tiantayo, mabalin a naan-annadtayton iti kanentayo. Ngem saan a gapu ta napasamak dayta ket sumardengtayon a mangan. Umasping iti dayta, ditay koma ipalubos a ti maysa a nasaem a kapadasan ti mangpakapuy iti panagtalektayo iti amin a kakabsat, nga ammotayo a nayanak met nga imperpekto. No sursuruentayo nga isubli ti panagtalektayo, naragragsaktayo ken mas makapagpokustayo iti mabalin nga aramidentayo a makatulong tapno agtalinaed ti panagtalektayo iti maysa ken maysa iti kongregasion.

17. Apay a nakapatpateg ti panagtalek, ken ania ti pagsasaritaantayo iti sumaruno nga artikulo?

¹⁷ Manmanon ti mapagtalkan iti lubong ni Satanas. Ngem ti panagtalek a naibatay iti ayat ti agar-ari iti sangalubongan a panagkakabsattayo. Gapu iti kasta a panagtalek, naragsak ken agkaykaysatayo ita ken proteksion dayta inton maipasangotayo kadagiti narigat a kasasaad. Nasaktanka kadin gapu ta adda nangdadael iti panagtalekmo? Ikagumaam a tuladen ti panangmatmat ni Jehova iti bambanag, iyaplikarmo dagiti prinsipio ti Biblia, paunegem ti ayatmo kadagiti kakabsat, ken agsursuroka kadagiti pagarigan iti Biblia. Kayatayo nga ikkaten ti sakit ti nakemtayo ken isubli ti panagtalektayo iti sabsabali. No aramidentayo dayta, umadunto ti gagayyemtayo a ‘nadekdekket ngem iti kabsat.’ (Prov. 18:24) Ngem saan nga umdas nga agtalektayo iti sabsabali; masapul nga ammoda met a mapagtalkandatayo. Iti sumaruno nga artikulo, pagsasaritaantayo no kasanotayo a mapaneknekan a maikaritayo a pagtalkan dagiti kakabsat.