1. Wa mek it no shak wi fi si se piipl no chos piipl iina da worl ya?

 IINA da worl ya we Sietan a ruul, di piipl dem we de iina it no nuo uu dem kyan chos. Laik di bizniz man dem, an di palitishan dem, an di choch liida dem aalwiez a du tingz we mek di piipl dem fiil a wie laik se dem kyaahn chos dem. An a siem so dem fiil bout dem fren dem, an dem nieba an fambili dem. Dis no shak wi at aal at aal kaa di Baibl did mek wi nuo se: “Iina di laas die dem . . . piipl . . . naa go av notn fi du wid Gad . . . an dem a-go taak bad bout dem wan aneda tu . . . an dem a-go ton chrieta.” Dis miin tu se, di piipl dem iina da worl ya wudaana gwaan laik ou di Devl we a ruul da worl ya wudaana gwaan. Kaa jos laka ou nobadi kyaahn chos Sietan nobadi kyaahn chos dem niida.​—2 Tim. 3:1-4; 2 Kor. 4:4.

2. (a) Uu wi kyan chos no mata wa? (b) Wa som a wi mait-a a wanda se?

² Bot wi kyan aalwiez chos Jeuova Gad. (Jer. 17:7, 8) Wi nuo se Jeuova lov wi an im “naa go lef” im fren dem. (Sa. 9:10) An wi kyan aalwiez chos Jiizas Krais tu kaa im kom ded fi wi. (1 Pii. 3:18) An wi kyan chos di Baibl tu, kaa bies pan wa gwaan wid wi, wi nuo se it aalwiez wok out gud wen wi du wa Gad se. (2 Tim. 3:16, 17) So wi nuo fi shuor se wi kyan chos Jeuova, Jiizas Krais, an di sitn dem we iina Gad Wod. Bot som a wi mait-a wanda tu wiself se ef wi kyan aalwiez chos di breda an sista dem we de iina di kanggrigieshan. Ou wi nuo se wi kyan chos dem?

3. Wa wi api se wi av? (Maak 10:29, 30)

³ Jeuova pik aal a wi fi bi paat a im big fambili we de aal uova di worl we a worship im. Jos tingk bout ou nais it bi fi bi paat a da big fambili ya an aal di gud we it du fi wi! (Riid Maak 10:29, 30.) Wi av wi breda an sista dem aal uova di worl we wi nuo  se lov Jeuova an dem a chrai aad fi liv di wie ou im waahn dem fi liv. Aalduo wi chat difrant difrant langwij, an wi kom fram difrant difrant plies, an wi du tingz difrant, an wi wier difrant difrant taip a kluoz, aal ef a di fos taim wi a si dem wi fiil laik wi nuo dem lang taim. Bot iivn muo dan dat, wi lov wen wi an dem de tugeda a worship Jeuova.​—Sa. 133:1.

4. Wa mek wi niid wi breda an sista dem?

⁴ Muo dan notn els, rait ya nuo wi fi a liv gud an kip kluos tu di breda an sista dem. Dem elp wi wen wi iina wi prablem dem. (Ruo. 15:1, Gya. 6:2) Pan tap a dat, dem push wi fi gwaan du di ting dem we a-go kip wi an Jeuova kluos an we a-go push wi fi du muor fi Jeuova. (1 Tes. 5:11; Iib. 10:23-25) Jos tingk bout ou it wuda fiil ef wi neehn av wi breda an sista dem a bak wi an a elp wi fi tan op chrang gens Sietan an da wikid worl ya we im kanchuol. Memba se ino, Sietan an im piipl dem suun ton gens aal a Jeuova piipl dem. So wi api an fiil gud fi nuo se di breda an sista dem a-go de de wid wi!

5. Wa mait-a mek it aad fi som a wi chos di breda an sista dem?

⁵ Bot som a di breda an sista dem mait-a fain it aad fi chos di ada breda an sista dem, kaa sumadi mait-a did du ar se sitn we ort dem, ar dem mait-a did tel dem sitn an tingk se dem wuda kip dem mout bot dem go chat bout it. Ar dem mait-a did tel dem se dem did a-go du sitn an dem mait-a no dwi’it. So dem sitn ya mait-a mek it aad fi dem fiil laik se dem kyan chos di breda an sista dem. Bot wa kyan elp wi fi aalwiez chos di breda an sista dem?

6. Wen wi lov sumadi ou it elp wi fi chos dem? (1 Korintiyan 13:4-8)

⁶ Di fos ting wi afi nuo se a dat wi kyaahn chos sumadi ef wi no lov dem. Iina 1 Korintiyan chapta 13 it tel wi som difrant  difrant ting bout lov we kyan elp wi fi chos wi breda an sista dem, an ef dem did se ar du sitn we mek wi fiil a wie laik se wi kyaahn chos dem agen wi kyan staat fi chos dem agen. (Riid 1 Korintiyan 13:4-8.) Laik iina vors 4 it se: “Wen sumadi av lov iina dem aat dem kain tu piipl an dem tek taim wid dem.” A siem so wen wi du tingz we ort Jeuova im tek im taim wid wi an a so wi fi tek wi taim wid di breda an sista dem wen dem se ar du sitn we ort wi. An vors 5 se: “Piipl we av lov iina dem aat no iizi fi get beks an dem no av op piipl iina dem aat.” So wi no waahn fi “av op piipl iina wi aat” an wi no waahn fi aalwiez a chrai fi memba sitn we wi breda ar wi sista mait-a did du we ort wi. Iikliiziyastiiz 7:9 se: “Yu no fi kwik fi get beks.” It beta wi du laik wa Ifiijan 4:26 se, wen it se: “No mek di die don an unu stil beks wid wan aneda”.

7. Ou Matyu 7:1-5 kyan elp wi fi chos di breda an sista dem?

⁷ Wan neda ting we elp wi fi chos wi breda an sista dem a fi luk pan dem di wie ou Jeuova luk pan dem. Jeuova Gad lov dem so moch dat im no uol dem sin dem gens dem an a siem wie so wi fi du. (Sa. 130:3) Insted-a luk pan di bad wiez dem we dem av, wi fi chrai an luk fi si dem gud wiez an si ou dem kyan du beta. (Riid Matyu 7:1-5.) Kaaz wi lov di breda an sista dem wi no fi tap biliiv se dem aalwiez waahn du wa rait an dem naa plan fi ort non a wi. (1 Kor. 13:7) Bot dis no miin se wi jos a-go chos eni an enibadi aal wen dem a muuv a wie. Wa it miin a dat wi fi chos piipl wen dem shuo se piipl kyan chos dem. b

8. Wa kyan elp wi fi staat chos di breda an sista dem muor an muor?

⁸ Jos laik ou piipl afi du tingz fi shuo se dem dizorv rispek a siem wie so wid chos. Piipl afi du tingz fi shuo se wi kyan chos dem. An it tek taim fi dat apm. So wa kyan elp yu fi staat chos di breda an sista dem muo an muo? Wa yu fi du a get fi nuo dem gud gud. Wen yu go a miitn chrai an taak tu dem an chrai an lain op tingz so yu an dem kyan wok tugeda iina fiil sorvis. Tek yu taim wid dem an gi dem a chaans fi shuo yu se yu kyan chos dem. Di fos taim yu an sumadi a taak yu afi nuo wa an wa yu tel dem buot yu bizniz, bot di muo yu staat fi nuo dem beta an beta den yu mait staat fiil beta fi tel dem likl muo bout yuself. (Luuk 16:10) Bot wa ef wan breda ar wan sista se sitn ar du sitn we mek yu fiil bad se yu did chos dem iina di fos plies? No kwik fi rait dem aaf bot wa yu kyan du a gi it likl muo taim. No tek wan sumadi fat frai evribadi an tap chos di ada breda an sista dem tu. Matarafak, wi a-go taak bout som piipl we sorv Jeuova we di lorn fi chos dem breda an sista dem aalduo dem did du tingz we mek dem fiil a wie laik se dem kyaahn chos dem agen.

9. (a) Ou Ana did shuo se shi chos iina Jeuova aalduo Iilai an im pikni dem neehn a gwaan wid notn? (b) Ou we Ana did go chuu shuo wi se wi fi gwaan chos ou Jeuova a ron tingz iina di kanggrigieshan no mata wa? (Luk pan di picha.)

⁹ Sumadi we iina di kanggrigieshan we yu luk op tu laik wan elda ar so eva du sitn we mek yu fiil a wie? Ef sitn laka dat eva apm tu yu, yu kyan lorn sitn fram Ana. Di Ed Priis we Jeuova did a yuuz fi liid im piipl dem iina Izrel iina fi ar taim a did Iilai. Bot im bwai pikni dem neehn a gwaan gud. A bie naasinis an aal kain-a seks sin dem did a gwaan  wid. An dem did a bring dong bie shiem an disgries pan dem fambili, bot dem faada Iilai neehn riili did a jraa dem op fi wa dem did a du. Bot Jeuova did stil lou Iilai fi gwaan bi di ed priis. Aalduo a dat did a apm, Ana neehn tel arself se shi naa go bak a Gad ous kaa Iilai a di ed priis de. Wan die wen Ana did de a Gad ous a prie aad, shi did luk laik se shi did jongk tu Iilai. An bifuo im did go chrai fain out wa riili a gwaan, im go tu ar a diil wid ar laik se shi a jongkad, an memba se ino, shi did don schres out wid ar prablem dem. (1 Sam. 1:12-16) Iivn duo aal a dis did gwaan, Ana did pramis se ef shi pregnant an get wan bwai biebi shi a-go kyari im go a Gad ous, we a Iilai wudaana tek kier a im. (1 Sam. 1:11) So tingk bout it nou, yu tingk Iilai son dem did fi get jraa op? Ye man, an Jeuova du dat wen im did redi. (1 Sam. 4:17) Bot wa Gad did du da taim de a das im bles Ana wid wan bwai pikni we niem Samwel.​—1 Sam. 1:17-20.

10. Aalduo piipl we kluos tu Dievid did sel im out, ou wi nuo se im neehn tap chos ada piipl?

¹⁰ Yu eva av wan gud gud fren we sel yu out yet? Ef dat eva apm tu yu tingk bout wa di king we niem Dievid did go chuu. Im did av wan fren we niem Aitofel. Bot wen Dievid son Absalam did ton gens im kaa im did waahn fi ruul, Aitofel go jain op wid Absalam gens Dievid. Yu kyan imajin ou Dievid did fiil fi nuo se im uona son an im fren ton gens im dem wie de? Bot dat neehn mek Dievid no chos nobadi els. Dievid did gwaan chos im fren we niem Ushai we aalwiez stik tu im no mata wa. Im neehn jain op wid di ada wan dem we ton gens Dievid. Dievid did av gud riizn fi chos im kaa Ushai did a wan gud gud fren we aalwiez elp Dievid aal wen im nuo se im wuda ded ef im dwi’it.​—2 Sam. 17:1-16.

11. Wa wan a Niebal sorvant did du fi shuo se im chos Abigiel?

¹¹ Wi kyan lorn sitn tu fram wan a Niebal sorvant dem. Wan taim wen Niebal sorvant dem a luk aafa im animal dem an dem did de wich paat Dievid an im brejrin dem de, Dievid an im brejrin dem mek shuor se nobadi no chobl dem an di animal dem. Likl afta dat, Dievid an di man dem did onggri so dem sen go aks Niebal ef im av no fuud kuda gi dem. An Niebal di rich ino, bot im  se im naa gi dem notn. An dat did mek Dievid beks til im fiil laik im blod a bwail, an im an im brejrin dem mek op dem main se dem did a-go kil aaf evri man iina Niebal fambili, aal im sorvant dem tu. So wan a Niebal sorvant dem go tel Niebal waif Abigiel wa did a gwaan kaa im nuo se Abigiel a did wan waiz uman an im nuo se shi wuda du sitn we kuda siev im laif. Memba se ino, im kuda jos ron we bot im neehn du dat kaaz im chos Abigiel fi saat out evriting. An bies pan ou tingz did wok out, wi si se im did nuo wa im a du kaa Abigiel briev op arself an go taak tu Dievid an elp fi chienj im main fram du wa im did a-go du. (1 Sam. 25:2-35) An Abigiel did chos Dievid se im did a-go du di rait ting.

12. Ou Jiizas did shuo se im chos im falara dem aalduo dem neehn porfek?

¹² Aalduo Jiizas falara dem neehn porfek an dem du tingz fi ort im somtaim im did stil chos dem. (Jan 15:15, 16) Wen Jiemz an Jan did aks Jiizas fi gi dem di tap-a-tap pozishan iina di Kindom, Jiizas neva staat wanda ef dem did a worship Gad fi di rait riizn ar tel dem se dem kyaahn bi wan a im apasl dem agen. (Maak 10:35-40) An lietaraan wen di piipl dem kom fi ares Jiizas, aal a im falara dem tek fut ron we lef im. (Mat. 26:56) Bot Jiizas neva tap chos dem. Aalduo dem neehn porfek; “im did riili riili lov dem.” (Jan 13:1) Aal wen Jiizas did ded an kom bak alaiv im did tel im 11 apasl dem fi tek kier a im piipl dem an di priichin wok we dem wuda du. (Mat. 28:19, 20; Jan 21:15-17) An yu kyan si wa mek im did chos dem so kaa wi si se aal a dem did sorv Jeuova til dem ded. Kaaz a wa Ana, Dievid, an wan a Niebal sorvant dem, Abigiel, an Jiizas did du it mek wi si se wi kyan chos ada piipl aalduo dem no porfek.

13. Wa kyan mek it aad fi chos ada piipl?

¹³ Yu eva tel wan breda sitn yet we yu no waahn im tel nobadi els bot den yu fain out se im did tel sumadi els bout it? Dat kuda did mash op enibadi. Matarafak it did apm tu wan sista. Wa did apm a dat da sista ya did go tel wan elda sopm we shi no waahn nobadi els fi nuo. An shi kuda si se di elda did tel im waif bout wa dem did taak bout, kaa di neks die di elda waif kaal ar fi taak bout di siem ting we shi did taak tu ar ozban bout an a chrai fi elp ar fi fiil beta. An wi kyan si wa mek shi mait-a fiil laik se shi kyaahn go chos da elda de agen. Bot wi si se shi did du di rait ting wen shi did go aks wan neda elda fi elp ar, an da elda de elp ar fi si se shi kyan chos di elda dem agen iivn duo wan a dem did du sitn we mek shi fiil laik se shi kyaahn chos dem.

14. Wa did elp wan breda fi staat chos di breda dem agen?

¹⁴ Fi wan lang taim wan breda did av prablem wid tuu elda we im fiil laik se im kudn chos. Bot den im staat fi tingk bout wa wan breda we im av nof rispek fa se. Wen im memba wa di breda did se it mek im staat luk pan tingz difrant. Di breda did se: “A Sietan a wi enimi, a no wi breda an sista dem.” An kaa a wa di breda did se, di breda go tingk bout it, an prie bout it, an it push im fi go mek it op bak wid di tuu elda dem agen.

15. Tel wi wa mek yu wuda se it wuda tek taim fi chos sumadi we did ort yu agen?

¹⁵ Yu eva a du wan speshal wok fi Jeuova yet an dem tap yu fram dwi’it? Dat kyan bi wan aad sitn fi go chuu. Iina di 1930’z wen di wok did anda lakdong iina Natzi Jormani, Grete an ar mada did a sorv Jeuova an a stik tu im. Grete yuus tu taip uova The Watchtower fi di breda an sista dem. Bot wen di  breda an sista dem get fi fain out se Grete faada did a fait gens di chuut, dem tap ar fram du da wok de kaa dem did fried se ar faada wuda sel dem out. Bot it neehn tap de so. Wen Worl Waar 2 did a gwaan di breda an sista dem wudn iivn gi Grete an ar mada non a di magaziin dem, an dem wudn iivn tel dem oudi wen dem si dem pan di ruod. Dat did aad fi Grete an ar mada an Grete se it di tek wan lang taim bifuo shi kuda paadn dem breda an sista de an chos dem agen. Bot den shi se tu arself se Jeuova mos paadn dem breda an sista de, so shi fi paadn dem tu. c

16. Wa mek wi fi du evriting we wi kyan du fi staat chos wi breda an sista dem?

¹⁶ Ef sitn laka dis ya eva apm tu yu, wa yu fi du a chrai fi si ef yu kyan staat fi chos piipl agen. It mait tek a wail fi yu dwi’it bot yu a-go si se it wot it fi staat chos piipl agen. Tingk bout dis, ef yu go nyam som fuud an it paizn yu, no chuu se dat wudn tap yu fram nyam fuud? Aal yu a-go du a wach wa yu iit neks taim. A siem so it go ef wan breda ar sista du sitn fi ort wi. Wi naa go mek siek-a wa apm wi no chos nobadi agen, kaa wi nuo se nobadi no porfek. Wen wi staat fi chos wi breda an sista dem agen it a-go mek wi api an wi a-go si wa wi kyan du fi mek evribadi si se wi kyan chos wi breda an sista dem.

17. Wa mek a wan big ting fi wi chos wi breda an sista dem an wa wi a-go luk pan iina di neks lesn?

¹⁷ Iina da worl ya we Sietan kanchuol, piipl no chos dem wan aneda, bot iina Jeuova aaganaizieshan wi chos wi breda an sista dem kaa wi lov dem an wi nuo se dem lov wi tu. A kaa wi chos wi wan aneda mek wi so api, an it mek wi a wok tugeda, an pan tap a dat it a-go elp wi lietaraan wen wi a go chuu uol iip a prablem. Wa ef yu did chos sumadi an dem du sitn we mek yu fiil laik se yu kyaahn chos dem agen? Chrai fi luk pan tingz laik ou Jeuova luk pan tingz, an chrai fi du di sitn dem we yu lorn iina di Baibl, plos yu afi lorn fi lov yu breda an sista dem muor muor, an lorn fram di piipl dem we di Baibl tel wi bout we du di siem ting. Ye man, wen sumadi du sitn we ort wi an mek wi fiil laik wi kyaahn chos dem, dat no miin tu se wi kyaahn chos dem ar nobadi els agen. Wen wi du aal a dis, wi a-go si se wi a-go fiil beta fi av uol iip a fren we de de fi wi ‘muor dan wi uona breda.’ (Pr. 18:24) Bot a no jos fi nuo se yu kyan chos yu breda an sista dem, dem fi nuo se dem kyan chos yu tu. A dat wi a-go taak bout iina di neks lesn.