1. Bwabiny kabiin mwa kwiitukemesh hatutaatal baat bavul leeloow balek kuteekel bakwaabw micim?

 BAAT ba mu bulongolody bwa Sataan oobw kabiin baat badyobw mwa kuteekel micim. Myand ya ba ngend a mushing, ya cidiidy, ni myand yiloolong bafumw ba bitendeleel yibuubumb teng mwanz ku makas. Baat bakwaabw bavul i batal cikwaabw neey kabiin mwa kuteekel balund baabab, biin mutumb naabw, ni cikwaabw baan baabw micim. Bwaal oobw kabwiin mwa kwiitukemesh. Bibl uleebel kal neey: “Mu mafuk ma bulekel . . . , baat biiyiiy kwiikal baat . . . Bakiish baneemek biit bijilang, . . . Badingidilangan ba myand, . . . Bahangilangan.” Cikwaabw, baat biiyiiy kwiikal baleej buumuut bwa Sataan mawej a bulab oobw, ukiish mukumban bwa kumuteekel micim.​—2 Tim. 3:1-4; 2 Kor. 4:4.

2. a) I ngany utudy mwa kuteekel biin-biin micim? b) Bakwaabw bady mwa kwiiyihanguj bicy?

² Nook, mutudy biin Krist, tudy bamanyik neey teng Yehow ki utudy mwa kuteekel micim. (Jer. 17:7, 8) Tudy batwiishibw neey i mwiitukat ni ‘kiish ulek’ balund bindiy. (Mis. 9:10) Tudy mwa kutekel cikwaabw Krist Yeez micim bwaal utwaadil buumy bwindiy bwiitut. (1 Py. 3:18) Ni tudy balong ni batal kaayeet neey Bibl udy ni myand ya kutekel micim yidy mwa kwiitwambulwiish. (2 Tim. 3:16, 17) Tudy batwiishibw neey tudy mwa kuteekel Yehow,Yeez, ni Bibl micim. Ki bakwaabw bady mwa kwiiyihanguj ning bady mwa kutungunuk teng ni kuteekel baan baabw baan-balum ni baan-bakaj ba mu cisumbw cyaabab micim. Tut balaabul neey ing, Bwabiny katwiin mwa kwiibatekel micim?

3. I dyaakatok kaay ditudy naady dya habwaah? (Mark 10:29, 30)

³ Yehow i mwiitusungul bwa kwiikal mu cisak cya bahambidil bindiy cya ha bulab butuutul. Diineedy i dyaakatook dya habwaah menmen didy mwa kwiituhetesh mabenesh mavul! (Bal Mark 10:29, 30.) Ha bulab butuutul, tudy ni biin-kweet baan-balum ni baan-bakaj bady bakat Yehow teng bu tut ni baloolong mwaabab moos bwa  kukooyel mikenj yindiy mu shikacil aabab. Ning tut tuleeb bileebel bishilangan, bakasakeen ha byaab bishilangan, ni tuvwaal bizang mu mushind mushilangan ni waababw, tudy teng biibakat ni cikwaabw hatuheehetangan naabw mu bisangil bwa musang a kuuhal. Tudy bakat nang-nang kwiikal naabw bwa kutumbish ni bwa kuhambidil Taat iitut a mu diiwul udy ni lukat.​—Mus. 133:1.

4. Bwabiny tudy bakat kwiikal ni biin-kweet baan-balum ni baan-bakaj?

⁴ Kaabaak, tudy bakat kushaal bikasakan mu kaacyumw ni biin-kweet baan-balum ni baan-bakaj. Mu biisang bikwaabw, bitukwaakwanjok hakwiitwangacishok majit. (Rom 15:1; Kal. 6:2) Bitukaakashish cikwaabw bwa kwiikal ni cisumy mu mudimw a Yehow ni bwa kushaal bakasakan mu myand ya mu spirit. (1 Tes. 5:11; Ebr. 10:23-25) Lang mutudy mwa kwiiyumvw tut biikal katuy bahet bulamy bwa kudy cisumbw budy mwa kwiitwambulwiish bwa kukasakan micim hakushaal ni diitabij dikasakan kuuhal kwa balwiish biitut boos​—tuleeb neey Sataan Dyaabol ni bulongolody bwindiy bubiih. Sataan ni badyey ulombol biiyiiy mu kalung kakeeh oomw kulwiish biin mudimw ba Yehow. Lang ket bwa mutwiikal ni dyanyish divul bwa biin-kweet biitwambambwiish!

5. Bwabiny misang yikwaabw i bakasakeen bakwaabw bwa kuteel biin kweet baan-balum ni baan-bakaj micim?

⁵ Ki, bidy mwa kukasakeenok bakwaabw bwa kuteekelok biin-kweet baan-balum ni baan-bakaj micim, bwaal mwiin-kweet oow wambambil bakwaabw bwaal bwa busok eecy ukiish ukumbaj mucih indiy wa kulek kuleeb myand ya busok yikiish yital baat bakwaabw. Eecy misang yikwaabw i muut kaahand wa mu cisumbw udy muleeb eecy ulongel bwaal budy bwiibatah bikasakan ku micim. Bwaal bwa nook bub bulongek, bidy mwa kukasakeen bakwaabw bwa kuteel bakwaabw micim. Nook, i biny bidy mwa kwiitwambulwiish bwa kuteekel biin-kweet micim?

6. I mushind kaay udy lukat mwa kwitwambulwiish bwa kuteekel bakwaabw micim? (1 Korent 13:4-8)

⁶ Lukat i lul lwiitusaasak bwa kuteekel bakwaabw micim. Mukand a 1 Biin Korent shapitil 13 uleeleej  mishind yivul ya lukat yidy mwa kwiitwambulwiish bwa kwiikal kuteekel bakwaabw micim eecy bwa kukashish cikwaabw mushind utudy mwa kwiibeyeleel. (Bal 1 Biin Korent 13:4-8.) Cileejel, verseh 4 uleeleej neey: “lukat lumweemweekel mu kwiikal mutuukij mu diis, mu kulong kwa myand yilengel.” Yehow i mwiitutuukijil mu diis. Verseh 5 uleeleeb byend neey: “[Lukat] kalwiishoh bend lukaam kufulul kwa mund. Kalwiish lukaam kuteekelangan lukun.” Katwaakukatoh bend bwa “kuteekelangan lukun,” i bwiin kuleeb neey, kutungunuk ni kuvuluk myand yidy biin-kweet balong yidy yiitutaatah ku micim. Mukand a Muleej 7:9 uleeleeb neey: “kabiish bikaam kufulul mund lwang-lwang.” I bilengel menmen tut bakooyel may mady mu Efez 4:26: “Cinj ciinun kacilong cyaafikilok ni ku kawul”!

7. I mushind kaay udy may mady mu Matewus 7:1-5 miitwambulwiish bwa kuteekel bakwaabw micim?

⁷ Cidy mwa kwiitwambulwiish bwiitut kuteekel baan-beet baan-balum ni baan-bakaj micim i hakwiibatal bu mudy Yehow wiibatal. Mawej i mwiibakat ni kiin utungunuk ni kulam bibiih byaabab. Bikaam tulong byeet nook. (Mis. 130:3) Hamut a kwiimanyin teng ha bilem byaabab, bikaam twiikashishomw bwa kutal biikadil bilengel bidyobw naaby ni kwanyish myand yilengel yidyobw mwa kulong. (Bal Matewus 7:1-5.) Twiibaleeleej mutudy biibakat ni tulek meej ma kwiibalongel bibiih bwaal lukat ‘lwiitaatab myand yoos.’ (1 Kor. 13:7) Diiy eedy kadiin dyumvwiij neey Yehow ukaakaam twiikal twiitab bituh byoos bidy bakwaabw biitwambil, hamut a kulong nook, ukaakaam bwa twiibateekel micim mu bidyobw baleeb bwaal i baleej bab kaayaabw mudyobw bakuteekel micim. *

8. I biny biwudy mwa kulong bwa kuteekel biin-kween micim?

⁸ Bwa kwiibateekel micim, bu kwiibaneemek, biloolomb kwiikashishomw, ni byangangatok diib. I biny biwudy mwa kulong bwa kuteekel baan-been micim? Long bwa kwiibamanyik bilengel. Iisamb naabw mu bisangil bya cisumbw. Iikal uy naabw mu mudimw a bukajaady. Iikal utuukijok mu diis hadyobw baleeb, long myand bwa batal mushind udyobw mwa kukuteekel micim. Cya kuuhal, kwiin mwa kwambil muut uwucyendend ni kumanyik, myand yoos yiwudy naay. Hawiibamamanyik bilengel menmen udy mwa kwiibambil misang yikwaabw myand yidyey naay. (Luuk 16:10) Ki i biny biwudy mwa kulong biby biikal neey mwiin-kweet kaahand i mukumb mwanz ku makas bwa mushind uwudy mumuteekel micim? Kwiikal bend ni kalwaak bwa kwiimanyik bulund bwiibuh nend, hamut a kulong nook, lek bwaal aabw bwa mafuk manj mahitok. Ni kwiitaboh bend bwa bilong bya bakeeh bikukooyesh mu mabok bwa kuteekel baan-been bakwaabw micim. Mu bwaal oobw, twiiyiiy kukontonon cileejel cya biin mudimw bakwaabw ba Yehow ba lulamat, ning mwaakady biin-kwaabw bakwaabw bibumb mwanz ku makas, batungunukil teng ni kwiiteekel bakwabw micim.

9. a) I mushind kaay waakady Aan mutungunuk ni kuteekel bulongolody bwa Yehow micim ning haakady bamw balombol bindiy balong bilem? b) I mushind kaay udy cileejel cya Aan cikulongweesh habitaatal kuteekel bulongolody bwa Yehow micim? (Tal cifwaatul.)

⁹ Umvwiilok bibiih bwa cilong kahand cilongel mwiin-kweet mwaan-mulum wa ku bituloolombol eeny? Biby biikal naak, cileejel cya Aan cidy mwa kukwambulwiish. Ciisang aacy, mutam a balambul ba milambw Elih waakady ulombol myand yitaatal kuhambidil kwa Yehow mu Izaleel. Ki biin mu cisak cindiy kabaakady cileejel cilengel kudy bakwaabw. Baan bindiy baan balum, baakady ni mudimw mutam waakadyobw balong, baakady balambul ba milambw,  baakady ni ciibidil cya kulong myand ya bumvw ni bwenzevy; cikwaabw, taat aabab waakady wiibabel ni kaluleng. Yehow kaakadyoh bend mwiimanyik musang umw mudimw waakady nend Elih wa kulambul kwa milambw. cikwaabw, Aan kalekeloh bend kuhambidil ku tempel hacyaakady Elih mwiikal mutam a balambul ba milambw. Haakady Aan ulomb teng kulomb Mawej haakadyey ni kaakunying kavul, Elih ulangil bibiih neey i mukol maal. Kay mwanz kuhet bijaadik, ulebel bibiih bwa Aan, waakady mu kaakunying kavul. (1 Sam. 1:12-16) Ning biby biikal naak, Aan ulayil Mawej neey yiy muhet mwaan mwaan-mulum, wiiyiiy kumutwaal ku tempel bwa kukadil Mawej mudimw ha kumushiy mu bikaam bya Elih bwa iikal umutabaleel. (1 Sam. 1:11) Myand yilongel baan baan ba Elih baan-balum yilongel bwa biiy babel Elih eeny? Ing, ni hahitil mafuk, Yehow wiiyil kwiibanyok. (1 Sam. 4:17) Mu ciisang aacy, Mawej ubeneshel Aan ha kumwaakishey mwaan-mulum, diijin dindiy Samweel.​—1 Sam. 1:17-20.

10. I mushind kaay waakady Mukaleng Davih uteekel bakwaabw micim ning mwaakady bakwaabw bamutombokel?

¹⁰ Baakady bakumbok mwanz kumakas kudy mulund neeb wa ha micim eeny? Biby biikal naak, kontonon cileejel cya Mukaleng Davih. Umw a ku balund nend waakady mwaan-mulum diijin dindiy i Ahitofel. Ki haakady Abusalom mwaan a Davih ukaam kushaal mukaleng, Ahitofel ulondel Abusalom bwa kushaalobw mu kacyumw bwa kutombokel Davih. Misang yikwaabw byaakady biteng Davih ku micim bwa kutal mwaakady mwaan indiy ni muut waakadyey utal bu mulund bamulek! Davih, kalekeloh bend myand eey yimukaakeesh bwa kuteekel bakwaabw micim. Utungunukil ni kuteekel Hushaayih mulund nend a lulamat mukwaabw micim, bwaal ulekel bwa kumutombokel bu bakwaabw. Davih waakady ni tubingil tulengel bwa kuteekel Hushaayih micim. Hushaayih uleejel mwaakadyey mulund mulengel, cikwaabw uteekel buumy bwindiy mu buhund bwa kwambulwiishey Davih.​—2 Sam. 17:1-16.

11. I mu mushind kaay uleejel umw wa ku biin mudimw ba Nabal mwaakadyey uteekel bakwaabw micim?

¹¹ Tukontononaay cikwaabw cileejel cya umw wa ku biin mudimw ba Nabal. Davih ni baat bindiy balongel bilengel bwa kulam biin mudimw ba mwiin Izaleel mukwaabw dindiy Nabal. Hahicil mafuk, Davih ulombel het oow Nabal bwa kutwaaley byaakudy bindiy ni bya biin mudimw bindiy. Halekel Nabal kwiibakish biit bimulombelobw ni kwiihweekesh koos, Davih ufulwiil mund ni wangacil dihangadik dya kuzuh baan-balum boos ba mu nzubw mwa Nabal. Mwiin mudimw mukwaabw uyiil kambil Abikayil mukaj a  Nabal myand eey. Bwaal mwiin mudimw oow waakady mumanyik neey Abikayil waakady mwa kukuuloh buumy bwindiy. Hamut a kuyey lubil, waakady muteekel Abikayil micim neey wiiyiiy kulong bwaal bwa myand yihit bilengel. Bwaal baat boos baakady bamanyik neey waakady mwaan-mukaj wa meej. I bwaal kaay bwiiyil kulongek buleejel neey waakady ni tubingil tulengel bwa kuteekel Abikayil micim. Abikayil uleejel mucim mukasakan bwa kwiisanjil Davih bwa kaay waalong myand yaakadyey ukaam kulong. (1 Sam. 25:2-35) Waakady ni diitabij dya neey Davih wiiyiiy kulong myand ni meej.

12. I mushind kaay uleejel Yeez neey waakady muteekel biiyij bindiy micim ning mwaakadyobw balong bilem?

¹² Yeez waakady muteekel biiyij bindiy micim ning mwaakadyobw balong bilem. (Jah 15:15, 16) Haakady Jak ni Jah balomb Yeez bwa kwiikalobw ni cyaab cya habwaah mu Bukaleng, Yeez kiibihangujilok bwa bwa kumanyik tubingil twaakady twiibasak bwa kukadil Yehow mudimw eecy kulek bwa kwiikalobw bapostol. (Mark 10:35-40) Hahitil mafuk, biiyij boos ba Yeez bamulekel bay lubil bufuk bukwaacilobw Yeez. (Mat. 26:56) Cikwaabw, Yeez waakady mwiibateekel teng micim. Waakady mumanyik bilengel bilem byaabab bya mudyobw baat bakiish bawaakan; cikwaabw, waakady “mwiibakat mwiibakacilomw buyiil.” (Jah 13:1) Hasangulukil Yeez, waakishil cikwaabw bapostol bindiy ba lulamat 11 mudimw a buseeb wa kulombol mudimw a kwaalabul baat bwa bashaal biiyij ni bwa kulam mikook yindiy ya buseeb. (Mat. 28:19, 20; Jah 21:15-17) Waakady ni tubingil tulengel bwa kuteekel baat bakiish bawaakan aab micim. Bab boos baakady ni lulamat kudy Mawej teng ni mufwiilobw. Cya biin, Aan, Davih, mwiin mudimw a Nabal, Abikayil, ni Yeez i bashiy cileejel cilengel habitaatal kuteekel baat bakiish bawaakan micim.

13. I myand kaay yidy mwa kulong bwa bitukasakeen bwa kuteekel bakwaabw micim?

¹³ Ukaadyok muteekelok mwiin-kweet micim ha kumwambil myand yiibuh ya ku micim, ni wiiy kumvw neey i mukumb mwanz ku makas ni mwiiyambiley bakwaabw eeny? Kulong nook i bwaal bubiih menmen. Mwiin-kweet mwaan-mukaj waakady mwambil mukul habitaatal bwaal bwindiy ni umuteekedyel micim neey kakwiibwambil muut mukwaabw. Diifuk dilondel, mukaj a mukul ubiikeen mwiin-kweet mwaan-mukaj oow bwa kumukashish ku micim, mumanyik biin-biin bwaal bwa busok bwaakadyobw bambil mukul ni bwaakady kabuy bwa kuhatuk hatook. Biin-biin, biiyil kukasakeen menmen mwiin-kweet mwaan-mukaj oow bwa kuteekel mukul oow. Ki mwiin-kweet mwaan-mukaj ulongel bwaal bulengel ni ulombel dyambulwiish. Ubiikeen mukul mukwaabw ni kwiisambobw, ni umwambulwiishil bwa iikal cikwaabw ni lukat lwa kuteekel bakul micim.

14. I biny byambulwiishil mwiin-kweet mwaan-mulum bwa kwiikal cikwaabw ni lukat lwa kuteekel bakwaabw micim?

¹⁴ Mwiin-kweet mwaan-mulum ukaady ni mafuk mavul mu bulongolody ufulwiil mund bwa bakul babidy ni utadil neey kakwiibateekeloh bend micim. Ki, hatadiley TV wa JW utadil mwiin mu Kasumbw Kaludik wiisamb ni kuleejey bwaal buheehel ki bwiikal bwa buseeb buvul. Uleejel neey: “Sataan i mulwiish iitut, ki biin-kweet kabiishoh bend balwiish.” Mwiin-kweet mwaan-mulum utumin bikasakan meej ha bwaal oobw, ni wiiyil kwangat dihandik dya kukaamey diitalal ni bakul babidy aab.

15. Bwabiny byangaangat diib bwa kwiikal cikwaabw ni lukat lwa kuteekel bakwaabw micim? Twaal cileejel.

¹⁵ Ukaady mujimbajok bujit bukomekelobw? Bwiin oobw i bwaal budy mwa kukwaakish kaakunying. Grete ni maam indiy baakady batemw baakady ni lulamat mu Alemany mu Nazy mu muvw a 1930 haakadyobw balekesh midimw yiitut. Grete usangeel bwa dyaakatook dyaakadyey naady dya kufundok Bibumb bya Muteetek kahand bwa kwambulwiishey biin Krist nend. Ki hamanyikil biin-kweet neey taat indiy waakady ulwiish myand ya biin-biin, bamufudil bujit bwaakadyobw bamomekel, bwaal bumvwiil mooy neey taat aabab udy mwa kwiiy  kwambil balwiish baabab myand yitaatal cisumbw. Bwiin oobw kabwaakadyoh bend bwaal bwaakaabumw bwaakady Grete mwa kutaatameen. Mu Diivit Diibiidy dya Bulab Butuutul, biin-kweet kaabakady mwa kwaakish Grete ni maam indiy byumw bibij-bij ni ulekeel kwiisamb naabw haakadyobw basambakeen mu njil. Byaakady bimutah menmen ku micim! Ni byangacil diib divul bwa Grece kufwiiley baan baab lus ni kwiibateekel cikwaabw micim. Nook, mu ciisang aacy, waakady mumanyik neey Yehow waakady ni cya kwiibafwiil lus, ki bwabiny utadil neey byaakady bikaam i bafwiil byend lus. *

16. Bwabiny bikaam twiikashishomw bikasakan bwa kuteekel biin-kweet micim?

¹⁶ Biby biikal ney udy byeeb ni bwaal bwaakaabumw bwa bwin bwiin oobw budy bukuhetesh kaakunying, Iikashishomw bwa kwiikal cikwaabw ni lukat lwa kuteekel bakwaabw micim. Bidy mwa kukulomb bwa wangatok diib, ki kwiikashish kwiibuh kakwaakwiikaloh bend kwa bituh. Bwa kumvwiij, biby biikal neey katwiin banj kudyok byaakudy bidyobw bumb mulung, bikaam twiikal ni budimw menmen bwa citudyaady. Nook, cyaakudy cibiih kaciin mwa kwiitulekesh bwa kwiikal kudy. Bya mushind aakaabumw, kabiin bikaam tulek bwaal bubiih budy muut kahand mwiitulongel bwa bwiitukooyesh mu mabok bwa kuteekel baan-beet baan-balum ni baan-bakaj boos micim, batudy bamanyik neey balel biikal baat bakiish bawaakan. Hatuheehet cikwaabw lukat lwa kuteekel bakwaabw micim, twiiyiiy kwiikal ni musangal muvul menmen ni biiyiiy kwiitwambulwiish bilengel bwa kumanyik citudy mwa kulong bwa meej ma kuteekelangan micim miikal mu cisumbw.

17. Bwabiny kuteekel bakwaabw micim i bwaal bwa buseeb buvul, ni i biny bitwiiyiiy kwiisambil mu ciin bwaal ciloolond?

¹⁷ Mu bulongolody bwa Sataan oobw i bikasakan bwa baat kabiin bateekelangan micim, ki tudy mwa kuteekel baan-beet baan-balum ni baan bakaj micim bwaal tudy biibakat ni bab byaab i biitukat. Kuteekelangan kwa micim oow kwiituheehetesh musangal ni kulong bwa twiikal mu kaacyumw leeloow ni kwiiyiiy kwiitulam ni kwiitwambulwiish hatwiikal mwa kutwiilangan ni biisang bya makab mu mafuk maciiyiiy. I biny biwudy mwa kulong iikaleby neey muut kahand i mukumb mwanz ku makas ni hawudy kuy mukat cikwaabw kumuteekel micim? Teetok bwa kutal myand mu mushind udy Yehow wiiyital, kooyel may matam ma mu Bibl, kat bikasakan baan-been, ni longel ku bileejel bya mu Bibl. Tudy mwa kutaatameen myand yidy bakwaabw biitulongel yidy yitulongel bibiih ku micim ni bwiitut kukat cikwaabw bwa kwiibateekel micim. Hatuloolong nook, twiiyiiy kuhet musangal a kuhet balund kabay kubal ‘bady bakooyel ni balamat bahitok ni mwaaneet.’ (Tus. 18:24) Ki, kabiin bikumban teng tut tuteekel bakwaabw micim, bikaam bab byaab bituteekel byaab micim. Mu ciin bwaal ciloolond, twiiyiiy kwiisambil ha mushind utudy mwa kuleej neey tudy bakumban bwa biin-kweet kwiituteekelobw micim.