1. Le yɛɛ kɔndɔfili bii naa le te ŋ che pɛ waŋnda kiɔɔ tiindaŋndo dɔwɔɔ o acheleŋnda niŋ?

 WAŊNDA o chieeŋ Setanaa niŋ sina wana nda nɔ ma tiindaŋndo le. Teleŋ o teleŋ, mi kaala wanaa leyulaa, simlachiaa le yalale chieeŋndeŋ a simlachiaa lepiɛiya cho tosaa laŋ tɛɛmbuu nda kɔllo tau. Nduyɛ mi chaaŋaa ndaa, wanaa nda chiɛɛliaŋnda, wanaa cho o yuŋgula ndalaŋ niŋnda tɛɛmbuu nda vɛlɛ kɔllo. Mi Baabuiyo dimi a hei okɔɔ aa: “O palɛi mɛɛlɛi niŋ, . . . waŋnda . . . lo niŋ o lediom te. . . . A wa niŋ wanaa tɛɛmbuu chaanda tɔɔ wa. . . . A wa niŋ wanaa pisi chaaŋaa ndaa wa.” Hei sim ni maa, waŋnda cho wa maa Setana. Ndu cho mɛlɛka le chieeŋndo hoo ni. Nduyɛ o cho wana wana tiindaŋ te.—2 Timo. 3:​1-4; 2 Kɔliŋ. 4:​4.

2. (a) Nɛɛ naŋ tiindaŋ yɛ a kɔl naa kpou? (b) Kiisaŋ yɛɛ waŋnda apum nɔ yɛ?

² Naa Kilisiɔŋnda sina maa, ŋ tiuba miŋ dɔu tiindaŋ naa kpou o Chɛhowa niŋ. (Chɛlui. 17:​7, 8) Ŋ nɔ tiindaŋndo maa o kaala naa, nduyɛ fɛɛŋ bɛɛ ‘o kɛɛ naa le.’ (Sam 9:​10) Ŋ tiu vɛlɛ ba miŋ tiindaŋ Chiisu Kiliti kanifuule, ndu yɔŋgu yoomu ndɔɔ le naa ni. (1 Pitɛ 3:​18) Nduyɛ ŋ che niŋ o yoomula naalaŋ niŋ maa, ŋ tiuba miŋ tiindaŋ Baabuiyo. (2 Timo. 3:​16, 17) Ŋ laalaŋ kɛsɛ maa ŋ tiuba miŋ tiindaŋ Chɛhowa, Chiisu a Baabuiyo. Kɛ naapum, mi waŋnda apum nɔ kiisaŋndo le puaapiliaa a ndepiliaa ndaa tiindaŋndo. Te o yɔŋ pɛ maa ŋ nɔla miŋ tiindaŋ nda, mɛɛ le yɛɛ naŋ nɔ yɛ miŋ tiindaŋ nda?

3. Dikeŋnaŋ sɔvɛ bɛndu kuɛɛ naŋ nɔ yɛ? (Maki 10:​29, 30)

³ Chɛhowa hɛli naa le miŋ wa o yuŋgu ndɔ cho ndu piɛiyo chieeŋndo balɔɔ silɔ wo niŋ. Nuawɔ se dikeŋnaŋ sɔvɛ bɛndu! Waa o yuŋgu Chɛhowaa niŋ chuu naa tɔnɔlaŋ tau. (Nuawɔ Maki 10:​29, 30.) Chieeŋndo balɔɔ silɔ, ŋ nɔ puaapiliaa a ndepiliaa kaala Chɛhowa maa naa wa, nduyɛ a cho tosaa o nda tiuba wo le sawala ndɔlaŋ diikɔŋndo. Mi che bɛɛ mi suɛi nɛi maŋgalɛi,  naamu naa a chuɛɛnɔŋ naa wa teŋgeŋ a o ndaa, kɛ miŋ sɔɔŋguu nda ikɛi kpɛɛluŋ o yɔŋ bɛɛ aa teleŋ tasoo wa koŋ ni le chiikaŋndo a nda. Miŋ wa a kɔl kɛndɛ tau le mɛɛ naŋ cho Finya naa kaalaa cho o choo choo niŋndo piɛiyo a nda latulu yɛ.—Sam 133:​1.

4. Le yɛɛ naŋ hau yɛ ba a puaapiliaa a ndepiliaa naa?

⁴ Ŋ nɔ miŋ wa o diompilɔɔ niŋ a puaapiliaa a ndepiliaa naa suŋ suŋ, mbo hiou maa paandu. Lepum, ma mala naa te bahawɛilaŋ la komal naa pɛ. (Luomaŋ. 15:​1; Kalee. 6:​2) Ma dɛɛniaa naa le miŋ hiou lachi a Chɛhowa piɛiyo, vɛlɛ a le miŋ hiou lachi a chaŋyɛi kɛndɛi nɔɔ a ndu. (1 Tɛsa. 5:​11; Hibu. 10:​23-25) Yiyaŋndɔ mɛɛ ndii wa niŋ yɛ te naŋ nɔ puaapiliaa a ndepiliaa naa o kundaa niŋ, le naa malaa yaamɔɔnɔ naa Setana Nyina Wɔɔŋndo a chieeŋ ndɔɔ simullo le. O teleŋ biŋgi bɛŋgu, Setana a wanaa cho ndu tooloo wa cho hunɔɔ wanaa Mɛlɛkaa chiŋalaŋ. Kɛ a teleŋ koŋ, ŋ cho wa a kɔl kɛndɛ tau le mɛɛ puaapiliaa a ndepiliaa naa cho wa naa malaa yɛ!

5. Le yɛɛ puaapiliaa a ndepiliaa apum kiisaŋ yɛ le chaaŋaa ndaa laalaŋnda tiindaŋndo?

⁵ Kɛ lepum, mi puaapiliaa a ndepiliaa apum che ndi ikala le chaaŋaa ndaa laalaŋnda tiindaŋndo. Naapum le mɛɛ nda dimul nda isɔɔ, ma kɔ dimul wanaa cheleŋ yɛ ɔɔ le mɛɛ nda lo o lediom te yɛ. Lepum mbo wa vɛlɛ maa, waŋndo o kundaa niŋ dimi ɔɔ tosa isɔɔ ni, mi i tɛɛmbuu nda kɔllo tau. Sɔɔŋ waa nuaa tosa mi i wa ikala le tiindaŋndo dɔwɔɔ o acheleŋnda niŋ. Mɛɛ yɛɛ mala yɛ naa miŋ tiindaŋ chaaŋaa naa laalaŋnda?

6. Vɛɛ kaalaa mala yɛ naa miŋ tiindaŋ acheleŋnda? (1 Kɔliŋtiaŋ 13:​4-8)

⁶ Kaalaa mala naa ni miŋ tiindaŋ acheleŋnda. 1 Kɔliŋtiaŋ bolle 13 tɛɛsiaa sɔɔŋ tau a kaalaa okɔɔ. Nduyɛ sɔɔŋ muŋ mala naa le miŋ dɔu tiindaŋndo o acheleŋnda niŋ. (Nuawɔ 1 Kɔliŋtiaŋ 13:​4-8.) Le tamaseliiyo, sɔɔŋ 4 dimi maa “wana nɔ kaalaa wo biunuŋ, nduyɛ o nɔ  kɛndɛi.” Mi Chɛhowa biunuŋ naa o yɔŋ bɛɛ miŋ benduŋ a ndu. O nɛi pilɛ koŋ choo, naa bɛɛ nɔ miŋ biunuŋ puaapiliaa a ndepiliaa naa te a dimi pɛ ɔɔ te a tosa pɛ suɛi tɛɛmbuu naa kɔllo ve. Mi sɔɔŋ 5 chɔɔlu dimi aa: “Wana nɔ kaalaa wo . . . tuulu kɔl chɔ chɔ le. O kɛsiŋ suɛi nɛiyaŋ o kɔl te.” Ŋ nɔ miŋ “kɛsiŋ suɛi nɛiyaŋ” puaapilɛnɔ naa o kɔl le miŋ wa ndu loonɔŋndo teleŋ o teleŋ a ndi okɔɔ le. Ikilisiaatii 7:​9 dimi maa, “o bɛnda mi wana dɔɔnuŋ tumbe chɔ chɔ le.” Lelaŋ, i cho bɔɔ suɛi kɛndɛ bɛndu le miŋ dɔu nyɛ Ɛfisiaŋnda 4:​26 dimi wo o wali niŋ. Bolle Baabuileŋ ndeŋ le dimi aa: “Te a dɔɔnuŋ tumbe pɛ, . . . lo o tumbe koŋ niŋ haaa mi paaleŋ le del te.”

7. Vɛɛ sawa mandaa cho o Maatiu 7:​1-5 niŋndo mala yɛ naa le miŋ tiindaŋ acheleŋnda?

⁷ Nyɛ cheleŋ mala naa le miŋ tiindaŋ puaapiliaa a ndepiliaa naa wo cho nda chɔɔ mɛɛ Chɛhowa che nda yɛ ni. Chɛhowa kaala nda, nduyɛ o kɛsiŋ biondɔŋnda ndalaŋ o kɔl te. Naa bɛɛ nɔ miŋ tosa nyɛ pilɛ koŋ kpe. (Sam 130:​3) Ŋ nɔ miŋ handu kɔllo o suliŋnda ndala kɛndɛlaŋ a o sɔɔŋ nda chaa tosaa woŋ choo, kɛ o cho o siɔwuŋ ndaŋ choo le. (Nuawɔ Maatiu 7:​1-5.) Ŋ nɔ miŋ nɔ laalaŋndo maa, a yeema ma tosa nyɛ cho o kɛndɔɔ wo, nduyɛ maa o cho a siɛlɛi fuu le nda tɛɛmbuu naa kɔl te. Kanifuule, wana nɔ kaalaa wo “laalaŋ nyɛ o nyɛ.” (1 Kɔliŋ. 13:​7) Hei sim naa maa Chɛhowa yeema naa miŋ tiindaŋ acheleŋnda, mbo ve bɛɛ le sabu kɛndɛ le le. Kɛ i sim maa, o yeema naa miŋ tiindaŋ nda te a chɔm pɛ kɛsɛ maa a cho wanaa wana nɔla ma tiindaŋ. *

8. Yɛɛ ŋ nɔ yɛ ma tosa le ma nɔ tiindaŋndo o puaapiliaa numnda niŋ?

⁸ Wana dimul waŋndo le mbo ke num bɛɛleŋ te. O nɛi pilɛ koŋ choo, wana dimul waŋndo le mbo tiindaŋ num te. Nduyɛ teleŋndo tau yeemaŋ ni le mi waŋndo dɔu tiindaŋndo o wana cheleŋ niŋ. Yɛɛ ŋ nɔ yɛ ma tosa le ma tiindaŋ puaapiliaa numnda? Kindiŋ ma sina nda nyɛkɛndɛi. Wa suukaŋndo a nda te a kuɛ pɛ o bɔŋaŋndaŋ. Tosa kɛɛsiaa le ma kuɛ o wali pollo niŋ a nda latulu. Biunuŋ nda, nduyɛ ma ke nda fondaa le ma chɔm num maa wana nɔla ma tiindaŋ nda. O tasela ndɔ, naapum o cho sɔɔŋ kpou le ŋ hɛnaŋ niŋ le chaaŋ num sɛnɛiyo dimullo le. Kɛ mɛɛ chaŋyɛi nyɛi kiandu fau, a cho wa fɛɛsɛŋ le ndu dimullo a yiyaŋnda numndaŋ okɔɔ. (Luku 16:​10) Mɛɛ yɛɛ ŋ nɔ yɛ ma tosa te puaapilɛnɔ numndo tosa pɛ isɔɔ, i tɛɛmbuu num kɔllo ve? Wa chɔ chɔ le chaŋyɛi nyɛi kiolɔɔ le. Kɛ chua teleŋndo le ma yiyaŋ a ndi okɔɔ. Nduyɛ chɛl mi sɔɔŋ wanaa cheleŋnda cho wa dimioo woŋ kɛɛlu num tiindaŋndo dɔwɔɔ o ndu niŋ te. O hei niŋ, ŋ cho yaasiaa tamaseliilaŋ lapum a buɛiyaa laalaŋaa Chɛhowaa o paandoo niŋ okɔɔ, a hiou lachi a chaaŋaa ndaa tiindaŋndo wa, mi che bɛɛ ma tɛɛmbuu nda kɔllo.

9. (a) Vɛɛ Hana hiou yɛ lachi a kɛɛsiaa Chɛhowaa tiindaŋndo, mi che bɛɛ wanaa wa chilaŋ chuaa wa apum ve kaala kɛndɛ tosa le? (b) Yɛɛ tamasi Hana wo pɛɛku yɛ naa, te o hiŋ pɛ a kɛɛsiaa Chɛhowaa tiindaŋndo? (Tofa fotueiyo.)

⁹ Baa puaapilɛnɔ cho chilaŋ chuaa wo tɛɛmbuu num niŋ pa kɔllo? Te lende i cho ni, mɛɛ a cho tɔnɔɔ sɔla tau te ŋ yaasiaa pɛ tamasi Hana wo. A teleŋ koŋ, Ila wa Masa Wanaa Soliaa Lasalaa o Isɔluɛi niŋ ni. Kɛ wanaa wa o yuŋgu ndɔɔ niŋnda ve tamasi kɛndɛ kɛsi le. Wanaa soliaa lasalaa puaa nduaa wa ni. A koŋ kpou, mi ndaa luei balaŋ o sɔɔŋ lasiɔmboŋ a o kaala nɔɔlɛilaŋ niŋ teleŋ o teleŋ. Mi finya nda sila nda taalɛɛ le nda miŋgioo o nɛi. Chɛhowa keleŋa Ila faŋa o foofo ndɔɔ choo le. Kɛ hei kuuna Hana kɛɛsiaa Mɛlɛkaa tolɔɔ kɔɔli le kɔlaŋ o chiɛi ndɔɔ niŋ le ndu piɛiyo, le mɛɛ Ila wa masa  wanaa soliaa lasalaa yɛ le. Mɛɛ Ila che Hana Mɛlɛka piɛiyo o kɔl tambɛi bɛndoo niŋ, mbo kilul ndu yamɛi maa muɛiyaŋ o kol ni. Yɔŋii ndoo nyuna le sinaa nyɛ wa Hana palaa wo, mbo pɛɛsa ndu, mi che bɛɛ Hana wa o nyɛkindilaa kala kalaa bɛŋgu. (1 Saam. 1:​12-16) A koŋ kpou, mi Hana chua buŋgɛi maa te o velu pɛ poo, o cho hunɔɔ a ndu o chiɛi Mɛlɛkaa niŋ le mbo huŋ tosa wallo Ila o ba bɛŋgu. (1 Saam. 1:​11) Baa Chɛhowa ndoo tosa pa nyɛ a kaala puaa Ila ya, wa tosaalaŋ okɔɔ? Ei, mbo tusi nda nyɛpalaa choo mɛɛ teleŋ tiŋ hiou. (1 Saam. 4:​17) Kɛ mi Mɛlɛka duau Hana sala mbo ke ndu poo diolaŋ aa Saamiɛɛ.—1 Saam. 1:​17-20.

10. Mi che bɛɛ mi waŋnda apum faŋaŋ Deeve kɔɔli, kɛ vɛɛ o hiou yɛ lachi a acheleŋnda tiindaŋndo?

¹⁰ Baa chaaŋ num kpɛɛluŋndo faŋaŋ num niŋ pa kɔɔli? Te lende i cho ni, mɛɛ ŋ yaasiaŋndɔ tamasi Masaa Deeve wo. Chaaŋaa nduaa opilɛ wa Ahitofɛl ni. Kɛ mɛɛ Deeve, po ndɔɔ Abisalɔm kindiŋ le ndu faŋaa o masaleŋ choo, mi Ahitofɛl hiaunuŋ ndu kɔɔli le Deeve simullo. Nuawɔ se mɛɛ i wa suɛi wɔɔŋ le Deeve yɛ, mɛɛ po ndɔɔ a chaaŋ ndɔ kpɛɛluŋndo faŋaŋ ndu kɔɔli! Kɛ keŋ kuuna Deeve tiindaŋndo dɔwɔɔ o acheleŋnda niŋ te. Mbo hiau lachi a Husai chaaŋ ndɔ kpɛɛluŋ chɔm ndu lo lechoo wo wo tiindaŋndo. Husai tul wanaa ndaa simul Deeve wa kɔɔli le. Le hei, Deeve ndoo nɔ sabula kɛndɛlaŋ le tiindaŋndo dɔwɔɔ o ndu niŋ. Mi Husai chɔm kpendekele maa, chaŋyɛi kɛndɛi o wa ni. Mbo luei pɛŋ yoomu ndɔɔ o kpundɔɔ niŋ le Deeve malaa.—2 Saam. 17:​1-16.

11. O nɛi kuɛɛ niŋ buɛi Nabal lo chɔm yɛ maa ndoo nɔ tiindaŋndo o Abikee niŋ?

¹¹ Ŋ tofaŋndɔ vɛlɛ tamasi buɛi Nabal lo. Mi Deeve a puaa nduaa manda buɛiyaa Nabal la teleŋ nda wa saa mandaa yondoo niŋndo. Isɔluɛinɔɔ Nabal wa ni. Nduyɛ sullo pila ndoo sul ni. Mɛɛ teleŋ tiŋ hiou, mi Deeve viam puaa nduaa o Nabal lo le mbo ke nda nyɛdiaa otiŋ. Mɛɛ Nabal kɛɛ, mi Deeve tuulu kɔl. Nduyɛ mbo kɛɛsiaa le wana pɔnɔ o wana pɔnɔ diyɔɔ o Nabal lo chiɛiniŋ. Mi buɛi Nabal lo dimul Abikee lanɔɔ Nabal a suɛi keŋ okɔɔ. Mɛɛ o wa wana pɔnɔɔ opilɛ o chiɛi koŋ niŋ yɛ, ndoo sina maa Abikee ndoo nɔla mbo piŋi yoomu ndɔɔ. Yɔŋii ndoo nyaanuŋ, mbo duau tiindaŋndo o Abikee niŋ maa o nɔla mbo tosa nyɛ a suɛi keŋ okɔɔ. Ndoo nɔ tiindaŋndo o Abikee niŋ kanifuule, wanaa bɔɔbɔɔ ndaa sina ndu maa wana lanɔ taasioo o wa ni. Nyɛ yɔŋnuŋ okoŋ kɔɔli wo chɔm maa, ndoo nɔ sabula kɛndɛlaŋ le tiindaŋndo dɔwɔɔ o Abikee niŋ. Mi Abikee chɔm kɔl  simulaa le Deeve kuunaa nyɛ ndoo kɛɛsiaa le tosaa wo tosaa. (1 Saam. 25:​2-35) Ndoo nɔ tiindaŋndo maa Deeve wa sinapɛŋgoo chɔm a suɛi keŋ okɔɔ.

12. Vɛɛ Chiisu chɔm yɛ maa ndoo nɔ tiindaŋndo o buɛiyaa nduaa niŋ, mi che bɛɛ mi ndaa tosa biondɔŋndaŋ?

¹² Chiisu ndoo nɔ tiindaŋndo o buɛiyaa nduaa niŋ, mi che bɛɛ mi ndaa tosa biondɔŋndaŋ. (Chɔŋ 15:​15, 16) Mɛɛ Chemisi a Chɔŋ nyuna ndu le foofola teŋgeŋndaŋ o Masale Mɛlɛkaleŋ niŋ, o kiisaŋ a sabu nda wa Chɛhowa piɛiyo wo okɔɔ ɔɔ mbo kuuna nda waa kiilaa nduaa le. (Maki 10:​35-40) Okoŋ kɔɔli, mi buɛiyaa nduaa kpou mal ndu o nyumma nda bii ndu waŋ niŋ. (Maa. 26:​56) A koŋ kpou, Chiisu kɛɛ laalaŋndo dɔwɔɔ o nda niŋ te. Ndoo sina siɔwuŋ ndaŋ. Kɛ mbo “lo nda kaalaa haaa o mɛɛlulaŋ.” (Chɔŋ 13:​1) Mɛɛ o miiŋgu yoomu, mbo ke kiilaa 11 chɔm ndu lo lechoo wo wa kalaŋnda sɔvɛ sɔvɛlaŋ. Nduyɛ mbo dimul nda le ma chua chilaŋ o wali dimiaa yooŋgu kɛndɔɔ niŋ, a le saa nduaa kioo nyɛm mala nda o Mɛlɛka piɛiyo niŋndo. (Maa. 28:​19, 20; Chɔŋ 21:​15-17) Ndoo nɔ sabula kɛndɛlaŋ tau le tiindaŋndo dɔwɔɔ o puaa haa niŋ, mi che bɛɛ wanaa lahakiaa nda wa ni. Mi nda kpou lo Chɛhowa piɛiyo o laalaŋndo choo haaa a teleŋ nda chii wali ndaa o lɛŋndeŋ choo wo. A tonya, mi Hana, Deeve, buɛi Nabal lo, Abikee a Chiisu kɛsi tamasi kɛndɔɔ le acheleŋnda tiindaŋndo.

13. Yɛɛ tosa yɛ mi i wa ikala le acheleŋnda tiindaŋndo?

¹³ Baa a dimul niŋ pa puaapilɛnɔ numndo suɛi num oo yeema mi wana ndoo sina a ndi okɔɔ le ve, kɛ okoŋ kɔɔli, ma tuɛi ndi waŋnda o sondo? Mi hei tɛɛmbuu naa kɔllo tau. Teleŋ pilɛ, mi ndepilɛnɔ pilɛ dimul bɛndu kundaa a bahawɛi ndɔɔ okɔɔ. Nduyɛ ndoo nɔ tiindaŋndo maa, o cho wana o wana cheleŋ dimul a ndi okɔɔ le. Kɛ diimandɔɔ, mi lanɔɔ bɛndu kunda koŋ veelu ndepilɛnɔɔ, le ndu kɔllo dɛɛniaa a suɛi keŋ okɔɔ. Mi hei chɔm kpendekele maa, mi lanɔɔ bɛndu kunda koŋ sina a bahawɛi nda dimul pɔnɔ ndɔ wo okɔɔ. O kpeekpei niŋ, mi i wa niŋ ikala le mi ndepilɛnɔ koŋ dɔu tiindaŋndo o bɛndu kunda koŋ niŋ. Ndepilɛnɔ koŋ tosa suɛi wɔɔŋ le bɛndu kunda koŋ nyunaa le malaa le. Mbo nyuna bɛndu kunda cheleŋ le mbo mala ndu mbo miiŋgu vɛlɛ tiindaŋndo dɔwɔɔ o bɛndu kunda koŋ niŋ.

14. Yɛɛ mala yɛ puaapilɛnɔ pilɛ mbo miiŋgu tiindaŋndo dɔwɔɔ o puaapiliaa nduaa niŋ?

¹⁴ A teleŋ pilɛ, kɛɛ sinapɛŋgoo wa puaapilɛnɔ pum tɛɛŋ a bɛnduaa kundaa a ŋiɔɔŋ le teleŋ vilɛi. Le hei, mbo yiyaŋ maa o tiuba mbo dɔu tiindaŋndo o nda niŋ te. Kɛ mbo kandu yiyaŋndo a nyɛ puaapilɛnɔ ndoo nɔ bɛɛleŋ tau le ndu wo dimi wo. Mi puaapilɛnɔ koŋ dimi aa: “Setana cho yaamɔɔnɔ naa ni, o cho puaapiliaa naa le.” Mɛɛ puaapilɛnɔɔ yiyaŋ o diomnda laŋ choo, nduyɛ mbo piɛi o Chɛhowa lo a ndi okɔɔ, mi keŋ mala ndu o pɔmpɔmbɔ le mbo miiŋgu o kɔl nyulu niŋ a bɛnduaa kundaa kaŋ.

15. Le yɛɛ o chua yɛ teleŋ vilɛi, le miŋ miiŋgu tiindaŋndo dɔwɔɔ o acheleŋnda niŋ? Chɔmndɔ tamaseliiyo.

¹⁵ Baa dikeŋnaŋndo hɛluŋ num niŋ pa? Mi hei tɛɛmbuu num kɔllo tau. Ndepilɛnɔ pilɛ diolaŋ Kilɛti nda kala ndɔ, Seiyaa Chɛhowaa nda wa o Naasi Chamani niŋ ni, tuupa mi Chɔu Chieeŋ Diiŋ Ndɔɔ kanduŋ. Nduyɛ a teleŋ koŋ, wali naa wa o kuunaa bɛŋgu o lɛŋnde leŋ niŋ. Kilɛti ndoo nɔ dikeŋnaŋndo le yaula Bandu Mɛŋgɛlaa poonyiaa, okoŋ mbo yoo chaaŋaa nduaa laalaŋnda. Nduyɛ mi ndoo tuei wallo hoo yeela tau. Kɛ mɛɛ puaapiliaa sina maa finya ndɔ simul tonyaa, ma puu ndu dikeŋnaŋ koŋ o ba. Kanifuule a wa siooŋnde maa, finya ndɔ cho lakɔ wanaa wa nda simullo wa dimul a kundaa okɔɔ. O cho ko hei le ndii yɔŋnuŋ a ndu le. Haaa mi Chɔu Chieeŋ Diiŋ Ndɔɔ chuu, puaapiliaa ndaa ke lɛ ndu nda kala ndɔ yaulaŋ  le ma yoo puaapiliaa le. Nduyɛ pɛŋ, ma kɛɛ suɛi o nda lo. Mi hei tɛɛmbuu Kilɛti kɔllo tau! Nduyɛ mbo chua teleŋ vilɛi le mbo mal puaapiliaa kaŋ haki vɛlɛ mbo miiŋgu tiindaŋndo dɔwɔɔ o nda niŋ. Mɛɛ teleŋ tiŋ hiou, mbo dimi maa Chɛhowa mal nda haki, mɛɛ ndu bɛɛ nɔ mbo mal nda haki. *

16. Le yɛɛ naŋ nɔ yɛ miŋ kindiŋ kpoke le miŋ miiŋgu vɛlɛ tiindaŋndo dɔwɔɔ o puaapiliaa a ndepiliaa naa niŋ?

¹⁶ Te suɛi waa nuaa yɔŋnuŋ num pɛ, kindiŋ ma dɔu vɛlɛ tiindaŋndo o acheleŋnda niŋ. Naapum teleŋndo tau yeemaŋ niŋ ni. Kɛ sɛmbɛ ŋ cho dɔwɔɔ le ndi tosaa wo, ve niŋ fondo fuu le. Le tamaseliiyo, te o yɔŋ pɛ maa a de niŋ nyɛdiaa nda wou pɔsɔnioo wo lepilɛ, ma wa niŋ yekeŋ le nyɛdiaala cheleŋndaŋ dioo. Kɛ keŋ sim nuaa maa, a di lɛ nyɛdiaa kposoŋ te le. O nɛi pilɛ koŋ choo, ŋ nɔ miŋ chɛl mi nyɛ yɔŋnuŋ naa wo kuuna naa tiindaŋndo dɔwɔɔ o puaapiliaa a ndepiliaa naa niŋ te. Kanifuule, ŋ sina maa wanaa lahakiaa nda cho ni. Te ŋ miiŋgu pɛ tiindaŋndo dɔwɔɔ o acheleŋnda niŋ, keŋ cho tosa miŋ wa a kɔl kɛndɛ. Nduyɛ i cho vɛlɛ tosa miŋ handu kɔllo o nyɛ naŋ nɔ miŋ tosa, le mi wana o wana o kundaa niŋ dɔu tiindaŋndo o acheleŋnda niŋndo choo.

17. Le yɛɛ i cho yɛ suɛi sɔvɛ le miŋ dɔu tiindaŋndo o acheleŋnda niŋ, nduyɛ yɛɛ naŋ cho yɛ yaasiaa o buŋgɛi cho lachi ve niŋ?

¹⁷ O chieeŋ Setanaa niŋ, o kendu ko mi waŋnda dɔu tiindaŋndo o acheleŋnda niŋ. Kɛ ŋ tiuba miŋ dɔu tiindaŋndo o puaapiliaa a ndepiliaa naa niŋ kanifuule ŋ kaala nda, nduyɛ nda bɛɛ kaala naa. Hei tosa miŋ wa a nyaale, vɛlɛ miŋ wa o diompilɔɔ niŋ suŋ suŋ. I nɔla vɛlɛ mi i manda naa, te sɔɔŋ kindilaŋ komal naa pɛ o chilaŋ niŋ. Te o yɔŋ yɛ maa waŋndo tɛɛmbuu num niŋ kɔllo, nduyɛ mi keŋ tosa a dou lɛ tiindaŋndo o ndu niŋ te? Kindiŋ ma che suɛi keŋ mɛɛ Chɛhowa che ndi yɛ. Dɔu sawala mandaala Baabuiyo o wali niŋ. Nɔ kaala yiŋgoloŋndo le puaapiliaa numnda, nduyɛ ma pɛɛku tau o tamaseliila cho o Baabuiyo niŋndaŋ. Ŋ tiuba miŋ soliŋ sɔɔŋ wɔɔŋ acheleŋnda tosal naa woŋ o kɔl, vɛlɛ miŋ miiŋgu tiindaŋndo dɔwɔɔ o nda niŋ. Te ŋ tosa keŋ pɛ, ŋ cho salala bɔɔbɔɔ tueiyɔɔ yeela le mɛɛ naŋ nɔ chaŋyaŋ yɛ. Nduyɛ chaŋyaŋ naŋ muŋ ŋpum ‘hiou wanayɛi.’ (Pulɔ. 18:​24) O cho ko naa le nɔ miŋ dɔu tiindaŋndo o acheleŋnda niŋ te. Kɛ nda bɛɛ nɔ ma dɔu tiindaŋndo o naa niŋ. O buŋgɛi cho lachi ve niŋ, ŋ cho yaasiaa nyɛ naŋ nɔ miŋ tosa le mi puaapiliaa naa dɔu tiindaŋndo o naa niŋndo.