ບົດຄວາມສຶກສາທີ 37
ເຈົ້າສາມາດໄວ້ໃຈພີ່ນ້ອງໄດ້
“ຄວາມຮັກ . . . ເຊື່ອໃນທຸກສິ່ງ ຫວັງໃນທຸກສິ່ງ.”—1 ກຣ. 13:4, 7
ເພງ 124 ສັດຊື່ຕະຫຼອດໄປ
ໃຈຄວາມສຳຄັນ a
1. ເປັນຫຍັງເຮົາຈຶ່ງບໍ່ແປກໃຈທີ່ຫຼາຍຄົນໃນທຸກມື້ນີ້ບໍ່ໄວ້ໃຈກັນ?
ໃນໂລກທີ່ຊາຕານປົກຄອງຜູ້ຄົນບໍ່ຮູ້ວ່າຈະໄວ້ໃຈຜູ້ໃດ ຍ້ອນເຂົາເຈົ້າເຄີຍຜິດຫວັງກັບການກະທຳຂອງພວກຜູ້ນຳທາງການເມືອງ ພວກພໍ່ຄ້າ ແລະພວກຫົວໜ້າສາສະໜາ. ຫຼາຍຄົນໃນທຸກມື້ນີ້ຍັງຮູ້ສຶກບໍ່ໄວ້ໃຈໝູ່ ເພື່ອນບ້ານ ແລະບໍ່ໄວ້ໃຈແມ່ນແຕ່ຄົນໃນຄອບຄົວ. ເຮົາທີ່ເປັນຄລິດສະຕຽນບໍ່ແປກໃຈໃນເລື່ອງນີ້ ເພາະຄຳພີໄບເບິນບອກວ່າ: “ໃນສະໄໝສຸດທ້າຍ . . . ຜູ້ຄົນຈະບໍ່ພັກດີ . . . ມັກໃສ່ຮ້າຍຄົນອື່ນ . . . ເປັນຄົນທໍລະຍົດ.” ທີ່ເປັນແບບນີ້ກໍຍ້ອນວ່າຜູ້ຄົນເຮັດຄືກັບຊາຕານເຊິ່ງເປັນຜູ້ປົກຄອງໂລກນີ້ທີ່ໄວ້ໃຈບໍ່ໄດ້.—2 ຕມ. 3:1-4; 2 ກຣ. 4:4
2. (ກ) ໃຜທີ່ເຮົາສາມາດໄວ້ໃຈໄດ້ຢ່າງເຕັມທີ? (ຂ) ບາງຄົນອາດສົງໄສເລື່ອງຫຍັງ?
2 ເຮົາທີ່ເປັນຄລິດສະຕຽນແທ້ ເຮົາຮູ້ວ່າເຮົາສາມາດໄວ້ໃຈພະເຢໂຫວາໄດ້ຢ່າງເຕັມທີ. (ຢເຣ. 17:7, 8) ເຮົາໝັ້ນໃຈວ່າພະເຢໂຫວາຮັກເຮົາແລະເພິ່ນ “ຈະບໍ່ມີທາງປະຖິ້ມ” ໝູ່ຂອງເພິ່ນ. (ເພງ. 9:10, ລ.ມ.) ເຮົາຍັງສາມາດໄວ້ໃຈພະເຢຊູໄດ້ຍ້ອນວ່າເພິ່ນໄດ້ມາສະລະຊີວິດເພື່ອພວກເຮົາ. (1 ປຕ. 3:18) ແລະເຮົາກໍໄດ້ຮຽນຮູ້ຈາກປະສົບການຂອງເຮົາເອງວ່າຫຼັກການໃນຄຳພີໄບເບິນໄວ້ໃຈໄດ້. (2 ຕມ. 3:16, 17) ເຫັນໄດ້ວ່າ ເຮົາສາມາດໄວ້ໃຈພະເຢໂຫວາ ພະເຢຊູ ແລະຫຼັກການໃນຄຳພີໄບເບິນ. ແຕ່ບາງຄົນອາດສົງໄສວ່າ ເຮົາສາມາດໄວ້ໃຈພີ່ນ້ອງໃນປະຊາຄົມໄດ້ບໍ? ແລະເປັນຫຍັງເຮົາຈຶ່ງໄວ້ໃຈເຂົາເຈົ້າໄດ້?
ເຮົາຕ້ອງມີພີ່ນ້ອງ
ຢູ່ທົ່ວໂລກ ເຮົາມີພີ່ນ້ອງທີ່ໄວ້ໃຈໄດ້ເຊິ່ງຮັກພະເຢໂຫວາຄືກັນກັບເຮົາ (ເບິ່ງຂໍ້ 3)
3. ເຮົາມີສິດທິພິເສດຫຍັງ? (ມາຣະໂກ 10:29, 30)
3 ພະເຢໂຫວາເຊີນເຮົາໃຫ້ເຂົ້າມາຢູ່ໃນຄອບຄົວຂອງເພິ່ນທີ່ຢູ່ທົ່ວໂລກ. ລອງຄິດເຖິງສິດທິພິເສດແລະປະໂຫຍດທີ່ເຮົາໄດ້ຮັບເມື່ອໄດ້ຢູ່ໃນຄອບຄົວນີ້! (ອ່ານມາຣະໂກ 10:29, 30) ຢູ່ທົ່ວໂລກເຮົາມີພີ່ນ້ອງທີ່ຮັກພະເຢໂຫວາຄືກັນກັບເຮົາແລະໃຊ້ຊີວິດຕາມຫຼັກການຂອງເພິ່ນ. ເຖິງວ່າເຮົາອາດຈະມີພາສາ ວັດທະນະທຳ ແລະການແຕ່ງຕົວທີ່ຕ່າງກັນ ແຕ່ເຮົາກໍຮູ້ສຶກຮັກແລະໃກ້ຊິດກັບເຂົາເຈົ້າຕັ້ງແຕ່ເທື່ອທຳອິດທີ່ໄດ້ພົບກັນ. ແລະເຮົາກໍມັກນະມັດສະການແລະສັນລະເສີນພະເຢໂຫວາຮ່ວມກັນກັບເຂົາເຈົ້າ!—ເພງ. 133:1
4. ເປັນຫຍັງເຮົາຕ້ອງມີພີ່ນ້ອງ?
4 ຕອນນີ້ເຮົາຕ້ອງເປັນນ້ຳໜຶ່ງໃຈດຽວກັນກັບພີ່ນ້ອງຫຼາຍກວ່າແຕ່ກ່ອນ ເພາະບາງເທື່ອເຂົາເຈົ້າກໍຊ່ວຍແບກພາລະຂອງເຮົາ. (ຣມ. 15:1; ຄລຕ. 6:2) ນອກຈາກນັ້ນ ເຂົາເຈົ້າຍັງຊ່ວຍກະຕຸ້ນເຮົາໃຫ້ມີຄວາມຫ້າວຫັນໃນວຽກປະກາດແລະມີຄວາມເຊື່ອເຂັ້ມແຂງ. (1 ທຊ. 5:11; ຮຣ. 10:23-25) ລອງຄິດເບິ່ງວ່າ ຈະເປັນແນວໃດຖ້າບໍ່ມີພີ່ນ້ອງຊ່ວຍເຫຼືອເຮົາຕອນທີ່ເຈິບັນຫາຈາກຊາຕານ. ອີກບໍ່ດົນ ຊາຕານແລະຜູ້ທີ່ຢູ່ຝ່າຍມັນຈະໂຈມຕີປະຊາຊົນຂອງພະເຈົ້າ. ແຕ່ເຮົາຈະຮູ້ສຶກດີໃຈຫຼາຍທີ່ມີພີ່ນ້ອງຢູ່ຄຽງຂ້າງເຮົາໃນຕອນນັ້ນ!
5. ເປັນຫຍັງບາງເທື່ອຈຶ່ງຍາກທີ່ຈະໄວ້ໃຈພີ່ນ້ອງ?
5 ບາງຄົນຮູ້ສຶກຍາກທີ່ຈະໄວ້ໃຈພີ່ນ້ອງ. ບາງເທື່ອອາດເປັນຍ້ອນພີ່ນ້ອງເຫຼົ່ານັ້ນບໍ່ຮັກສາຄວາມລັບຫຼືບໍ່ຮັກສາສັນຍາທີ່ໃຫ້ໄວ້ກັບເຂົາເຈົ້າ. ຫຼືບາງຄົນໃນປະຊາຄົມອາດຈະເວົ້າຫຼືເຮັດບາງຢ່າງທີ່ເຮັດໃຫ້ເຂົາເຈົ້າເສຍໃຈ. ຈາກປະສົບການເຫຼົ່ານີ້ອາດຈະເຮັດໃຫ້ເຮົາຮູ້ສຶກຍາກທີ່ຈະໄວ້ໃຈຄົນອື່ນ. ແລ້ວສິ່ງໃດຈະຊ່ວຍເຮົາໃຫ້ໄວ້ໃຈພີ່ນ້ອງໄດ້?
ຄວາມຮັກຊ່ວຍເຮົາໃຫ້ໄວ້ໃຈພີ່ນ້ອງ
6. ຄວາມຮັກຊ່ວຍເຮົາໃຫ້ໄວ້ໃຈຄົນອື່ນແນວໃດ? (1 ໂກຣິນໂທ 13:4-8)
6 ຄວາມຮັກເປັນພື້ນຖານຂອງຄວາມໄວ້ໃຈ. ໃນ 1 ໂກຣິນໂທບົດ 13 ອະທິບາຍແງ່ມຸມຕ່າງໆຂອງຄວາມຮັກເຊິ່ງຈະຊ່ວຍເຮົາໃຫ້ໄວ້ໃຈຄົນອື່ນ. (ອ່ານ 1 ໂກຣິນໂທ 13:4-8) ຕົວຢ່າງເຊັ່ນ ໃນຂໍ້ 4 ບອກວ່າ: “ຄວາມຮັກກໍອົດກັ້ນແລະເມດຕາກະລຸນາ.” ພະເຢໂຫວາອົດທົນກັບເຮົາເຖິງວ່າເຮົາຈະເຮັດຜິດຕໍ່ເພິ່ນ. ດັ່ງນັ້ນ ເຮົາກໍຕ້ອງອົດທົນກັບພີ່ນ້ອງຖ້າເຂົາເຈົ້າເວົ້າຫຼືເຮັດບາງຢ່າງທີ່ເຮັດໃຫ້ເຮົາເສຍໃຈ. ໃນຂໍ້ 5 ຍັງບອກວ່າ: “[ຄວາມຮັກ] ບໍ່ໃຈຮ້າຍງ່າຍ ບໍ່ຈົດຈຳເລື່ອງທີ່ເຮັດໃຫ້ເຈັບໃຈ.” ນີ້ໝາຍຄວາມວ່າເຮົາຈະບໍ່ຈື່ເລື່ອງທີ່ພີ່ນ້ອງເຮັດໃຫ້ເຮົາເຈັບໃຈ. ໃນຜູ້ເທສະໜາປ່າວປະກາດ 7:9 ກໍບອກວ່າເຮົາບໍ່ຄວນ “ຄຽດງ່າຍ.” ແລະເຮົາກໍຄວນເຮັດຕາມຄຳແນະນຳທີ່ຢູ່ໃນເອເຟໂຊ 4:26 ທີ່ບອກວ່າ: “ຢ່າໃຈຮ້າຍຈົນຮອດຕາເວັນຕົກດິນ.”
7. ມັດທາຍ 7:1-5 ຊ່ວຍເຮົາໃຫ້ໄວ້ໃຈພີ່ນ້ອງແນວໃດ?
7 ອີກສິ່ງໜຶ່ງທີ່ຊ່ວຍເຮົາໃຫ້ໄວ້ໃຈພີ່ນ້ອງໄດ້ກໍຄື ການເບິ່ງພີ່ນ້ອງໃນແບບທີ່ພະເຢໂຫວາເບິ່ງ. ພະເຢໂຫວາຮັກພີ່ນ້ອງແລະບໍ່ຈື່ຄວາມຜິດຂອງເຂົາເຈົ້າ ເຮົາກໍຄວນເຮັດແບບນັ້ນຄືກັນ. (ເພງ. 130:3) ແທນທີ່ເຮົາຈະເບິ່ງແຕ່ຄວາມຜິດພາດຂອງເຂົາເຈົ້າ ເຮົາຄວນຈະຊອກເບິ່ງຈຸດດີໃນໂຕຂອງເຂົາເຈົ້າແລະສິ່ງດີທີ່ເຂົາເຈົ້າເຮັດ. (ອ່ານມັດທາຍ 7:1-5) ຍ້ອນຄວາມຮັກ “ເຊື່ອໃນທຸກສິ່ງ” ເຮົາຈຶ່ງເຊື່ອວ່າພີ່ນ້ອງຢາກເຮັດສິ່ງທີ່ດີແລະບໍ່ໄດ້ຕັ້ງໃຈເຮັດໃຫ້ເຮົາເສຍໃຈ. (1 ກຣ. 13:7) ນັ້ນບໍ່ໄດ້ໝາຍຄວາມວ່າພະເຢໂຫວາຢາກໃຫ້ເຮົາໄວ້ໃຈພີ່ນ້ອງໂດຍບໍ່ມີເຫດຜົນ ເພິ່ນຢາກໃຫ້ເຮົາໄວ້ໃຈຍ້ອນພີ່ນ້ອງສະແດງໃຫ້ເຫັນວ່າເຂົາເຈົ້າເປັນຄົນທີ່ໄວ້ໃຈໄດ້. b
8. ເຮົາຈະໄວ້ໃຈພີ່ນ້ອງຫຼາຍຂຶ້ນໄດ້ແນວໃດ?
8 ເພື່ອຈະໄວ້ໃຈຜູ້ໃດຜູ້ໜຶ່ງຕ້ອງໃຊ້ເວລາ. ແລ້ວເຮົາຈະໄວ້ໃຈພີ່ນ້ອງຫຼາຍຂຶ້ນໄດ້ແນວໃດ? ເຮົາຕ້ອງຮູ້ຈັກເຂົາເຈົ້າເປັນຢ່າງດີ. ໃຫ້ລົມກັບເຂົາເຈົ້າຕອນທີ່ເຂົ້າຮ່ວມການປະຊຸມແລະຈັດເວລາໄປປະກາດນຳກັນ. ນອກຈາກນັ້ນ ໃຫ້ອົດທົນກັບເຂົາເຈົ້າແລະໃຫ້ໂອກາດເຂົາເຈົ້າທີ່ຈະສະແດງໃຫ້ເຫັນວ່າເຂົາເຈົ້າເປັນຄົນທີ່ໄວ້ໃຈໄດ້. ທຳອິດ ເຈົ້າອາດບໍ່ກ້າເວົ້າເລື່ອງສ່ວນຕົວກັບພີ່ນ້ອງທີ່ເຈົ້າຫາກໍຮູ້ຈັກ ແຕ່ເມື່ອເຈົ້າສະໜິດກັບພີ່ນ້ອງຫຼາຍຂຶ້ນ ເຈົ້າກໍອາດຈະສະດວກໃຈທີ່ຈະບອກຄວາມຮູ້ສຶກຂອງເຈົ້າໃຫ້ພີ່ນ້ອງຮູ້. (ລກ. 16:10) ແຕ່ເຈົ້າຈະເຮັດແນວໃດຖ້າພີ່ນ້ອງເຮັດໃຫ້ເຈົ້າບໍ່ໄວ້ໃຈ? ຢ່າຟ້າວເຊົາຫຼິ້ນນຳລາວ ແຕ່ປ່ອຍໃຫ້ເວລານັ້ນຜ່ານໄປກ່ອນ. ແລະຖ້າບາງຄົນເຮັດໃຫ້ເຈົ້າຜິດຫວັງຫຼືເສຍໃຈ ກໍຢ່າຍອມໃຫ້ສິ່ງນັ້ນມາເຮັດໃຫ້ເຈົ້າບໍ່ໄວ້ໃຈພີ່ນ້ອງຄົນອື່ນ. ຕອນນີ້ໃຫ້ເຮົາມາເບິ່ງຕົວຢ່າງຂອງຜູ້ຮັບໃຊ້ທີ່ສັດຊື່ທີ່ເຄີຍຜິດຫວັງກັບບາງຄົນ ແຕ່ກໍຍັງໄວ້ໃຈຄົນອື່ນ.
ຮຽນຈາກຕົວຢ່າງຂອງຄົນທີ່ໄວ້ໃຈຄົນອື່ນ
ເຖິງວ່າໃນຕອນທຳອິດເອລີຈະເຂົ້າໃຈຮັນນາຜິດ ແຕ່ຮັນນາກໍຍັງໄວ້ໃຈການຈັດກຽມຂອງພະເຢໂຫວາ (ເບິ່ງຂໍ້ 9)
9. (ກ) ຮັນນາຍັງໄວ້ໃຈການຈັດກຽມຂອງພະເຢໂຫວາແນວໃດ ເຖິງວ່າຜູ້ທີ່ພະເຢໂຫວາແຕ່ງຕັ້ງຈະເຮັດຜິດ? (ຂ) ເຈົ້າໄດ້ບົດຮຽນຫຍັງຈາກເລື່ອງນີ້? (ເບິ່ງຮູບພາບ)
9 ເຈົ້າເຄີຍຜິດຫວັງກັບການກະທຳຂອງພີ່ນ້ອງທີ່ມີໜ້າທີ່ຮັບຜິດຊອບໃນປະຊາຄົມບໍ? ຖ້າເຄີຍ ເຈົ້າອາດຈະໄດ້ຮັບປະໂຫຍດຈາກຕົວຢ່າງຂອງຮັນນາ. ໃນຕອນນັ້ນ ປະໂລຫິດໃຫຍ່ເອລີເປັນຜູ້ນຳໜ້າໃນການນະມັດສະການພະເຢໂຫວາໃນອິດສະຣາເອນ. ແຕ່ຄອບຄົວຂອງລາວເປັນຕົວຢ່າງທີ່ບໍ່ດີ. ລູກຊາຍສອງຄົນຂອງເອລີທີ່ຮັບໃຊ້ຢູ່ເຕັ້ນສັກສິດໄດ້ເຮັດຜິດສິນລະທຳທາງເພດແລະເຮັດສິ່ງທີ່ໜ້າອັບອາຍຢູ່ເລື້ອຍໆ ແຕ່ເອລີພັດເຕືອນເຂົາເຈົ້າເບົາໆເທົ່ານັ້ນ. ເຖິງວ່າພະເຢໂຫວາບໍ່ໄດ້ປົດເອລີອອກຈາກຕຳແໜ່ງທັນທີ ແຕ່ຮັນນາກໍຍັງໄວ້ໃຈການຈັດກຽມຂອງພະເຢໂຫວາໂດຍມານະມັດສະການພະເຢໂຫວາຢູ່ເຕັ້ນສັກສິດເປັນປະຈຳ. ເມື່ອເອລີເຫັນຮັນນາອະທິດຖານດ້ວຍຄວາມທຸກໃຈ ລາວກໍບໍ່ໄດ້ຖາມຮັນນາເລີຍວ່າເກີດຫຍັງຂຶ້ນ ແຕ່ລາວພັດຕຳໜິຮັນນາແລະສະຫຼຸບແບບຜິດໆວ່າຮັນນາເມົາເຫຼົ້າ. (1ຊມ. 1:12-16) ເຖິງຈະເປັນແບບນັ້ນ ຮັນນາກໍສາບານວ່າຖ້າລາວມີລູກຊາຍ ລາວຈະໃຫ້ລູກມາຮັບໃຊ້ຢູ່ເຕັ້ນສັກສິດເຊິ່ງຢູ່ພາຍໃຕ້ການເບິ່ງແຍງຂອງເອລີ. (1ຊມ. 1:11) ແລ້ວເລື່ອງລູກຊາຍຂອງເອລີເດ ໄດ້ຮັບການແກ້ໄຂໃຫ້ຖືກຕ້ອງບໍ? ໄດ້ຮັບການແກ້ໄຂແທ້! ເພາະພະເຢໂຫວາລົງໂທດເຂົາເຈົ້າເມື່ອເຖິງເວລາ. (1ຊມ. 4:17) ແຕ່ໃນລະຫວ່າງນັ້ນ ພະເຢໂຫວາກໍໄດ້ໃຫ້ລາງວັນກັບຮັນນາໂດຍໃຫ້ລາວມີລູກຊາຍຊື່ຊາມູເອນ.—1ຊມ. 1:17-20
10. ເຖິງດາວິດຈະຖືກຫັກຫຼັງ ແຕ່ລາວຍັງໄວ້ໃຈຄົນອື່ນແນວໃດ?
10 ເຈົ້າເຄີຍຖືກໝູ່ສະໜິດຫັກຫຼັງບໍ? ຖ້າເຄີຍ ເຈົ້າຄືຊິໄດ້ປະໂຫຍດຈາກເລື່ອງຂອງກະສັດດາວິດ. ຕອນທີ່ອັບຊາໂລມລູກຊາຍຂອງດາວິດພະຍາຍາມຈະຍຶດບັນລັງເພື່ອຈະເປັນກະສັດແທນລາວ ອາຮີໂທເຟັນເຊິ່ງເປັນໝູ່ສະໜິດຂອງລາວໄດ້ຮ່ວມກະບົດກັບອັບຊາໂລມ. ດາວິດຄືຊິຮູ້ສຶກເສຍໃຈຫຼາຍແທ້ໆທີ່ລູກແລະໝູ່ສະໜິດຫັກຫຼັງລາວແບບນີ້. ເຖິງຈະເປັນແບບນັ້ນ ລາວກໍບໍ່ໄດ້ເຊົາໄວ້ໃຈຄົນອື່ນ. ລາວຍັງໄວ້ໃຈໝູ່ທີ່ພັກດີອີກຄົນໜຶ່ງຊື່ຮູຊາຍ ເຊິ່ງບໍ່ໄດ້ເຂົ້າຮ່ວມກັບການກະບົດນີ້. ດາວິດມີເຫດຜົນທີ່ຈະໄວ້ໃຈຮູຊາຍ ຍ້ອນຮູຊາຍໄດ້ສະແດງໃຫ້ເຫັນວ່າລາວເປັນໝູ່ທີ່ດີແລະເຖິງຂັ້ນສ່ຽງຊີວິດເພື່ອຊ່ວຍເຫຼືອດາວິດ.—2ຊມ. 17:1-16
11. ຜູ້ຮັບໃຊ້ຄົນໜຶ່ງຂອງນາບານໄດ້ສະແດງໃຫ້ເຫັນແນວໃດວ່າລາວໄວ້ໃຈຄົນອື່ນ?
11 ໃຫ້ເຮົາມາເບິ່ງເລື່ອງຂອງຜູ້ຮັບໃຊ້ຄົນໜຶ່ງຂອງນາບານ. ດາວິດແລະທະຫານຂອງລາວໄດ້ຊ່ວຍປົກປ້ອງຜູ້ຮັບໃຊ້ຂອງນາບານເຊິ່ງເປັນຄົນທີ່ຮັ່ງມີ. ຕໍ່ມາ ດາວິດກໍໃຫ້ຄົນຂອງລາວມາຂໍອາຫານກັບນາບານເທົ່າທີ່ນາບານຈະໃຫ້ໄດ້ . ເມື່ອນາບານບໍ່ຍອມໃຫ້ ດາວິດກໍໃຈຮ້າຍຫຼາຍແລະຕັດສິນໃຈຈະຂ້າຜູ້ຊາຍທຸກຄົນທີ່ຢູ່ໃນເຮືອນຂອງນາບານ. ຜູ້ຮັບໃຊ້ຄົນໜຶ່ງຂອງນາບານໄດ້ໄປບອກເລື່ອງນີ້ກັບອາບີກາຍເມຍຂອງນາບານ. ຍ້ອນເປັນຜູ້ຮັບໃຊ້ໃນເຮືອນນີ້ ລາວຈຶ່ງຮູ້ວ່າອາບີກາຍຈະຊ່ວຍຊີວິດລາວໄດ້. ແທນທີ່ລາວຈະແລ່ນໜີເອົາຊີວິດລອດຜູ້ດຽວ ລາວໝັ້ນໃຈວ່າອາບີກາຍຈະແກ້ໄຂບັນຫານີ້ໄດ້ເພາະອາບີກາຍເປັນຄົນທີ່ສະຫຼາດ. ແລ້ວລາວກໍເຮັດຖືກແທ້ໆທີ່ໄວ້ໃຈອາບີກາຍ ເພາະອາບີກາຍໄດ້ລົງມືເຮັດຢ່າງກ້າຫານໂດຍໂນ້ມນ້າວດາວິດໃຫ້ປ່ຽນໃຈໄດ້. (1ຊມ. 25:2-35) ແລະອາບີກາຍກໍໝັ້ນໃຈວ່າດາວິດເປັນຄົນທີ່ມີເຫດຜົນ.
12. ພະເຢຊູສະແດງໃຫ້ເຫັນແນວໃດວ່າເພິ່ນຍັງໄວ້ໃຈພວກລູກສິດເຖິງວ່າເຂົາເຈົ້າຈະເຮັດໃຫ້ເພິ່ນຜິດຫວັງ?
12 ພະເຢຊູ ຍັງໄວ້ໃຈພວກລູກສິດຂອງເພິ່ນເຖິງວ່າເຂົາເຈົ້າຈະເຮັດໃຫ້ເພິ່ນຜິດຫວັງ. (ຢຮ. 15:15, 16) ຕອນທີ່ຢາໂກໂບແລະໂຢຮັນມາຂໍຕຳແໜ່ງພິເສດກັບພະເຢຊູໃນການປົກຄອງຂອງເພິ່ນ ເພິ່ນກໍບໍ່ໄດ້ສົງໄສເຈຕະນາທີ່ເຂົາເຈົ້າຮັບໃຊ້ພະເຢໂຫວາ ຫຼືບໍ່ໄດ້ຕັດເຂົາເຈົ້າອອກຈາກການເປັນອັກຄະສາວົກ. (ມຣກ. 10:35-40) ແລະເຖິງວ່າຕໍ່ມາພວກລູກສິດຂອງເພິ່ນທຸກຄົນຈະປະຖິ້ມເພິ່ນໃນຄືນທີ່ເພິ່ນຖືກຈັບ ແຕ່ເພິ່ນກໍຍັງໄວ້ໃຈເຂົາເຈົ້າຢູ່. (ມທ. 26:56) ເພິ່ນຮູ້ວ່າເຂົາເຈົ້າບໍ່ສົມບູນແບບ ແຕ່ເພິ່ນກໍຍັງ ‘ຮັກເຂົາເຈົ້າຕໍ່ໄປຈົນເຖິງທີ່ສຸດ.’ (ຢຮ. 13:1) ຫຼັງຈາກຄືນມາຈາກຕາຍ ພະເຢຊູກໍໄດ້ມອບວຽກທີ່ສຳຄັນໃຫ້ອັກຄະສາວົກທັງ 11 ຄົນໂດຍໃຫ້ເຂົາເຈົ້ານຳໜ້າໃນວຽກສອນຄົນໃຫ້ເຂົ້າມາເປັນລູກສິດແລະເບິ່ງແຍງຝູງແກະຂອງເພິ່ນ. (ມທ. 28:19, 20; ຢຮ. 21:15-17) ພະເຢຊູຄິດຖືກແລ້ວທີ່ໄວ້ໃຈອັກຄະສາວົກທີ່ບໍ່ສົມບູນແບບເຫຼົ່ານີ້ ເພາະເຂົາເຈົ້າທຸກຄົນໄດ້ຮັບໃຊ້ຢ່າງສັດຊື່ຕະຫຼອດຊີວິດຂອງເຂົາເຈົ້າ. ເຮົາເຫັນວ່າຮັນນາ ດາວິດ ຜູ້ຮັບໃຊ້ຄົນໜຶ່ງຂອງນາບານ ອາບີກາຍ ແລະພະເຢຊູເປັນຕົວຢ່າງທີ່ດີແທ້ໆໃນການໄວ້ໃຈຄົນທີ່ບໍ່ສົມບູນແບບ.
ໄວ້ໃຈພີ່ນ້ອງອີກເທື່ອໜຶ່ງ
13. ເປັນຫຍັງຈຶ່ງເປັນເລື່ອງຍາກທີ່ຈະໄວ້ໃຈຄົນອື່ນ?
13 ເຈົ້າເຄີຍໄວ້ໃຈພີ່ນ້ອງແລ້ວເລົ່າຄວາມລັບໃຫ້ລາວຟັງບໍ ແຕ່ຕໍ່ມາກໍຮູ້ວ່າລາວບໍ່ໄດ້ເກັບຄວາມລັບຂອງເຈົ້າ? ນີ້ຄືຊິເຮັດໃຫ້ເຈົ້າຜິດຫວັງຫຼາຍແທ້ໆ. ເລື່ອງນີ້ໄດ້ເກີດຂຶ້ນກັບພີ່ນ້ອງຍິງຄົນໜຶ່ງ. ລາວໄດ້ເລົ່າເລື່ອງສ່ວນຕົວໃຫ້ຜູ້ດູແລຄົນໜຶ່ງຟັງ ແລະມື້ຕໍ່ມາເມຍຂອງຜູ້ດູແລຄົນນັ້ນກໍໄດ້ໂທມາໃຫ້ກຳລັງໃຈລາວ. ລາວຈຶ່ງຄິດວ່າຜູ້ດູແລຄົນນັ້ນເວົ້າເລື່ອງຂອງລາວໃຫ້ເມຍຟັງ ນີ້ເຮັດໃຫ້ລາວເລີ່ມບໍ່ໄວ້ໃຈຜູ້ດູແລຄົນນັ້ນ. ແຕ່ລາວກໍຍັງເຮັດສິ່ງທີ່ຖືກຕ້ອງແລະບໍ່ເຊົາໄວ້ໃຈຄົນອື່ນ. ລາວໄດ້ໄປຂໍຄວາມຊ່ວຍເຫຼືອຈາກຜູ້ດູແລອີກຄົນໜຶ່ງ ແລ້ວຜູ້ດູແລຄົນນີ້ກໍຊ່ວຍລາວໃຫ້ກັບມາໄວ້ໃຈພວກຜູ້ດູແລອີກເທື່ອໜຶ່ງ.
14. ສິ່ງໃດຊ່ວຍພີ່ນ້ອງຊາຍຄົນໜຶ່ງໃຫ້ກັບມາໄວ້ໃຈພີ່ນ້ອງອີກ?
14 ພີ່ນ້ອງຊາຍຄົນໜຶ່ງໄດ້ຄຽດໃຫ້ຜູ້ດູແລສອງຄົນເປັນເວລາຫຼາຍປີ ເພາະລາວຮູ້ສຶກວ່າຜູ້ດູແລສອງຄົນນັ້ນໄວ້ໃຈບໍ່ໄດ້. ແຕ່ເມື່ອລາວຄິດເຖິງຄຳເວົ້າຂອງພີ່ນ້ອງຊາຍຄົນໜຶ່ງທີ່ລາວນັບຖືກໍຊ່ວຍລາວໄດ້ຫຼາຍ ພີ່ນ້ອງຄົນນັ້ນບອກວ່າ: “ສັດຕູຂອງເຮົາແມ່ນຊາຕານ ບໍ່ແມ່ນພີ່ນ້ອງ.” ລາວກໍໄດ້ເກັບເອົາຄຳເວົ້ານີ້ມາຄິດດີໆ ແລ້ວອະທິດຖານໃຫ້ພະເຢໂຫວາຊ່ວຍ. ໃນທີ່ສຸດລາວກໍໄດ້ກັບໄປຄືນດີກັບຜູ້ດູແລສອງຄົນນັ້ນ.
15. ເປັນຫຍັງອາດຕ້ອງໃຊ້ເວລາເພື່ອຈະກັບມາໄວ້ໃຈພີ່ນ້ອງອີກ? ຂໍໃຫ້ຍົກຕົວຢ່າງ.
15 ເຈົ້າເຄີຍສູນເສຍສິດທິພິເສດໃນປະຊາຄົມບໍ? ນັ້ນຄືຊິເຮັດໃຫ້ເຈົ້າເຈັບປວດໃຈຫຼາຍແທ້ໆ. ເກຣເຕແລະແມ່ຂອງລາວເປັນພະຍານພະເຢໂຫວາທີ່ສັດຊື່ໃນສະໄໝນາຊີເຢຍລະມັນກ່ອນສົງຄາມໂລກຄັ້ງທີ 2 ເຊິ່ງຕອນນັ້ນວຽກອົງການຂອງເຮົາຖືກສັ່ງຫ້າມ. ເກຣເຕມີສິດທິພິເສດໄດ້ພິມດີດສຳເນົາຫໍສັງເກດການໃຫ້ພີ່ນ້ອງ. ແຕ່ເມື່ອພີ່ນ້ອງຮູ້ວ່າພໍ່ຂອງລາວຕໍ່ຕ້ານຄວາມຈິງ ເຂົາເຈົ້າເລີຍໃຫ້ລາວເຊົາເຮັດວຽກນີ້ເພາະຢ້ານວ່າພໍ່ຂອງລາວຈະເອົາຂໍ້ມູນຂອງພີ່ນ້ອງໃນປະຊາຄົມໄປບອກພວກຜູ້ຕໍ່ຕ້ານ. ເກຣເຕຍັງເຈິບັນຫາອີກຢ່າງໜຶ່ງ. ໃນລະຫວ່າງສົງຄາມໂລກຄັ້ງທີ 2 ພີ່ນ້ອງບໍ່ໄດ້ເອົາສຳເນົາຫໍສັງເກດການໃຫ້ລາວກັບແມ່ ແຖມຍັງບໍ່ເວົ້າກັບລາວຕອນທີ່ເຈິກັນ. ນີ້ເຮັດໃຫ້ລາວຮູ້ສຶກເຈັບປວດໃຈຫຼາຍແທ້ໆ. ລາວບອກວ່າ ຕ້ອງໃຊ້ເວລາບັກດົນໆເພື່ອຈະໃຫ້ອະໄພແລະໄວ້ໃຈພີ່ນ້ອງອີກ. ໃນທີ່ສຸດ ລາວກໍຮູ້ວ່າລາວຄວນໃຫ້ອະໄພເຂົາເຈົ້າຄືກັບທີ່ພະເຢໂຫວາເຮັດ. c
“ສັດຕູຂອງເຮົາແມ່ນຊາຕານ ບໍ່ແມ່ນພີ່ນ້ອງ”
16. ເປັນຫຍັງເຮົາຕ້ອງພະຍາຍາມທີ່ຈະໄວ້ໃຈພີ່ນ້ອງ?
16 ຖ້າເຈົ້າເຄີຍເຈິເລື່ອງທີ່ເຮັດໃຫ້ເຈັບປວດໃຈແບບນີ້ ຂໍໃຫ້ເຈົ້າພະຍາຍາມທີ່ຈະກັບມາໄວ້ໃຈພີ່ນ້ອງອີກ. ເຈົ້າອາດຈະຕ້ອງໃຊ້ເວລາແລະຄວາມພະຍາຍາມ ແຕ່ມັນຈະຄຸ້ມຄ່າແນ່ນອນ. ລອງຄິດເຖິງຕົວຢ່າງນີ້: ຖ້າເຈົ້າເຄີຍກິນອາຫານເປັນພິດ ເຈົ້າກໍຄືຊິບໍ່ຢ້ານຈົນບໍ່ຢາກກິນຫຍັງເລີຍ ແຕ່ເຈົ້າຈະລະວັງການກິນຫຼາຍຂຶ້ນ. ຄ້າຍກັນ ເຮົາຮູ້ວ່າເຮົາທຸກຄົນບໍ່ສົມບູນແບບ. ດັ່ງນັ້ນ ເຮົາບໍ່ຄວນໃຫ້ການກະທຳທີ່ບໍ່ດີຂອງຄົນດຽວມາເຮັດໃຫ້ເຮົາບໍ່ໄວ້ໃຈພີ່ນ້ອງທຸກຄົນ. ຖ້າເຮົາພະຍາຍາມໄວ້ໃຈພີ່ນ້ອງອີກ ເຮົາກໍຈະມີຄວາມສຸກຫຼາຍຂຶ້ນ ແລະເຮົາກໍຈະເຮັດສິ່ງທີ່ເຮົາ ເຮັດໄດ້ເພື່ອຊ່ວຍເຫຼືອພີ່ນ້ອງໃນປະຊາຄົມໄວ້ໃຈກັນຫຼາຍຂຶ້ນ.
17. ເປັນຫຍັງຄວາມໄວ້ໃຈຈຶ່ງສຳຄັນ ແລະເຮົາຈະຮຽນຫຍັງໃນບົດຄວາມຕໍ່ໄປ?
17 ໃນໂລກຂອງຊາຕານຊອກຫາຄົນທີ່ໄວ້ໃຈໄດ້ຍາກ. ແຕ່ເຮົາສາມາດໄວ້ໃຈພີ່ນ້ອງໄດ້ຍ້ອນເຮົາຮັກກັນແລະກັນ. ຄວາມໄວ້ໃຈຈະຊ່ວຍເຮົາໃຫ້ມີຄວາມສຸກແລະເປັນນ້ຳໜຶ່ງໃຈດຽວກັນຕັ້ງແຕ່ຕອນນີ້ ແລະຈະຊ່ວຍປົກປ້ອງເຮົາເມື່ອເຈິບັນຫາໃນອະນາຄົດ. ເຈົ້າຈະເຮັດແນວໃດຖ້າບາງຄົນເຮັດໃຫ້ເຈົ້າຜິດຫວັງຫຼືເສຍໃຈ? ໃຫ້ເບິ່ງເລື່ອງນັ້ນຄືກັບພະເຢໂຫວາເບິ່ງ ເຮັດຕາມຫຼັກການໃນຄຳພີໄບເບິນ ຮັກພີ່ນ້ອງໃຫ້ຫຼາຍຂຶ້ນ ແລະຮຽນແບບຕົວຢ່າງຂອງຄົນໃນຄຳພີໄບເບິນ. ພະຍາຍາມທີ່ຈະບໍ່ເກັບຄວາມຄຽດໄວ້ ແລະໄວ້ໃຈຄົນອື່ນອີກເທື່ອໜຶ່ງ. ເມື່ອເຮົາເຮັດແບບນັ້ນ ເຮົາກໍຈະມີຄວາມສຸກທີ່ມີໝູ່ຫຼາຍຄົນເຊິ່ງ ‘ສະໜິດຫຼາຍກວ່າອ້າຍນ້ອງ.’ (ສຸພາ. 18:24) ເຮົາຕ້ອງບໍ່ພຽງແຕ່ໄວ້ໃຈຄົນອື່ນເທົ່ານັ້ນ ແຕ່ເຮົາຍັງຕ້ອງເຮັດໃຫ້ອື່ນໄວ້ໃຈເຮົານຳ. ໃນບົດຄວາມຕໍ່ໄປ ເຮົາຈະມາເບິ່ງວ່າເຮົາຕ້ອງເຮັດແນວໃດເພື່ອໃຫ້ຄົນອື່ນໄວ້ໃຈເຮົາ.
ເພງ 99 ພີ່ນ້ອງເປັນແສນເປັນລ້ານຄົນ
a ເຮົາຈຳເປັນຕ້ອງໄວ້ໃຈພີ່ນ້ອງ. ແຕ່ມັນກໍບໍ່ງ່າຍສະເໝີໄປ ຍ້ອນວ່າບາງຄັ້ງເຂົາເຈົ້າອາດຈະເຮັດໃຫ້ເຮົາຜິດຫວັງຫຼືເສຍໃຈ. ໃນບົດຄວາມນີ້ ເຮົາຈະມາເບິ່ງບາງຫຼັກການໃນຄຳພີໄບເບິນແລະເບິ່ງຕົວຢ່າງຂອງຜູ້ຮັບໃຊ້ໃນອະດີດເຊິ່ງຈະຊ່ວຍເຮົາໃຫ້ໄວ້ໃຈພີ່ນ້ອງຫຼາຍຂຶ້ນ ຫຼືຊ່ວຍເຮົາໃຫ້ໄວ້ໃຈເຂົາເຈົ້າອີກເຖິງວ່າເຂົາເຈົ້າຈະເຄີຍເຮັດໃຫ້ເຮົາເສຍໃຈ.
b ຄຳພີໄບເບິນເຕືອນວ່າບາງຄົນໃນປະຊາຄົມອາດຈະໄວ້ໃຈບໍ່ໄດ້. (ຢດ. 4) ໃນບາງກໍລະນີພີ່ນ້ອງຈອມປອມເຫຼົ່ານີ້ອາດຈະ “ເວົ້າບິດເບືອນຄວາມຈິງ” ເພື່ອໃຫ້ຄົນອື່ນມີຄວາມເຊື່ອແບບຜິດໆ. (ກຈກ. 20:30) ດັ່ງນັ້ນ ເຮົາຈຶ່ງບໍ່ຄວນໄວ້ໃຈພີ່ນ້ອງເຫຼົ່ານີ້ແລະບໍ່ຟັງເຂົາເຈົ້າ.
c ສຳລັບຂໍ້ມູນເພີ່ມເຕີມເລື່ອງຂອງເກຣເຕໃຫ້ເບິ່ງປຶ້ມປະຈຳປີຂອງພະຍານພະເຢໂຫວາປີ 1974 ໜ້າ 129-131 (ພາສາອັງກິດ).
