1. Mwahaya bwaddi iyo nihitikinaga ohuroromeleya waathu?

 ELABO ela enasugweriwa ni Saddana kahi yokweya ororomelana mmodha ni mukwaye. Makalelo anamalaba, mapolitiku ni anamasogolela gereja eneriwana dhithudha enowathukulela athu ohiroromelanaga mmodha ni mukwaye. Mwaha wa yeyo amodha enowoga yegi: “Mwanddamani, mukwawo obe mmudhaawo kanaroromeleya”. Mbwenye kanitikine Mwaha wi Bibiliya ahiwoga wihina dherege wereya. Teto Bibliya ahiwoga wi: ‘Malabo ookuthula . . . , athuya kiyakale . . . Ororomeleya . . . yere okala owopiha . . . ni owoota.’ Aliwa newene kiyaroromeleyege ninga Saddana mulugu a elabo ela. — 2 Tim. 3:1-4; 2 Cor. 4:4.

2. a) Nnamuroromele pamadhene aani? b) Makoho baani athu eneweriwana?

² Mbwenye iyo nili makiristawu nnomuroromela vanlubale Yehova. (Jer. 17:7, 8) Iyo nihikanna ebaribari wihina oliye anonidhivela ni ‘kanadha aninyanyala.’ (Sal. 9:10) Teto iyo nnomuroromela Yesu mwaha ohuvelela egumaye wi anobole. (1 Ped. 3:18) Ni iyowa kannanganyedha wihina mBibliyani dhihikalamo dholaga dhororomeleya. (2 Tim. 3:16, 17) Mwebaribarene nikanna ebaribari wi podi omuroromela Yehova, Yesu ni Bibiliya. Mbwenye amodha podi wikohaga: Miyo podi waroromelaga addibila ammulogoni mudhidhi wamutene? Yowakulaya sowi, hee! Mbwenye ginakanne addi ebaribari?

3. Ethu baani enathabwa onihagalasa? (Mar. 10:29, 30)

³ Iyo nnothabwa ohagalala vanlubale mwaha Yehova onisakula wi nikose epaddi ya emudhi yaye yapele elabo yatene. Ala mareeliho manlubale! (Omwileri Marcos 10:29, 30.) Nihikanna addibila ni arogola mwilaboni yatene, enamudhivela Yehova ni enilibihedha okalawo mowiwanana ni efunelo yaye. Podi wera  mweddelo wehu, ekalelo yehu ni makalelo ehu owaabala ehihiyana. Mbwenye iyo nnowadhivela vanlubale addibilihu, naaleya nanonnihu movaneneve. Sapama okala vamodha naaddibilihu thabwathabwa nafunaga omwebedha Mulugu ehu Yehova. — Sal. 133:1.

4. Mwahaya bwaddi nigahowela addibilihu vamodha naarogolihu?

⁴ Mudhidhi yola nnakalihu nnohowela vanlubale olibiha wandana wehu ni wiwanana naaddibila vamodha naarogola. Malabo owinjhivene aliwa enonikavihera owanana makathamiho ehu. (Rom. 15:1; Gál. 6:2) Teto aliwa enonikavihera wawenjhedhedha mabasa ehu oomulabela Yehova ni odhowagave nunnuwelagavo epaddi yomuzimuni. (1 Tes. 5:11; Heb. 10:23-25) Kabiha wubuwela makalelo yakaliwa yorusa owana ni Saddana vamodha ni elabwaaye nahere nahikanna nikavihero na mulogo nubareleya. Sapama ohidduwala wi Saddana vamodha naale enamukavihera enere ovolowela nlogo na Mulugu. Dhithu dhatedhene ndha dhaapadduwaga enere okala yapama okanna addibilihu epaddi yehu!

5. Mwahaya bwaddi athu amodha egarusaga waroromela addibila ammulogoni?

⁵ Mbwenye amodha enowarusa vanlubale waroromela addibila ammulogoni. Eyo podi opadduwa akala muthu eere onvuwiha muselu awaddelaga athu amodha obe akala kakwanihedhe ethu apaganyiye. Obe ere otakaleliwa mwaha ethu muthu mmodhaya eriliyena obe awogiliye. Dhapadduwa dhithu ninga dhendha, enorusa waroromela athu amodha. Mbwenye enaanikavihere ddi waroromela addibila ammulogoni?

6. Odhivela winanikavihera addi waroromela addibila? (1 Coríntios 13:4-8)

⁶ Ethu enanthukulela iyo waroromela addibilihu fudhivela. Livuru na 1 Coríntios kapitulu  13 nnowoga makalelo odhivela winanikaviheriwa waroromela athu amodha obe ohogolowela omuroromela muthu uwukunle. (Omwileri 1 Coríntios 13:4-8.) Motajhiha, versu 4 anihina ‘odhivela winoovilela ni fwapama.’ Yehova onovilela ni iyo, naarive nithegaga. Bumwahaya ni iyowa nnohowela okala ovilela naaddibilihu yerana ethu nahidhiveliwihu obe enipihile murima. Versu 5 anowogave egihina: ‘[Odhivela] kunapujha. Ni kunna ntxiga.’ Mwaha odhivela ‘kannakoya ntxiga’ obe kanubuwelege dhoviriganiha addibila enerenliwa. Eclesiastes 7:9 anihina ‘kaninyanyuwege bure-bure.’ Ohiya onyanyuwaga bure-bure nnohowela ohara ele anawoga Efésios 4:26: ‘Mwatakaleliwa kamutheege; kamuhiye nduwa omothelamo mugari oonyanyuweene!’

7. Mowiwanana ni Mateus 7:1-5, enaanikavihere ddi odhowagave naroromelaga addibilihu?

⁷ Ethu enaanikavihere iyo waroromela addibilihu fuwawona ni makalelo Yehova anawoniye. Yehova onowadhivela addibilihu, bumwahaya kanathabwa osugwa dhothega dhewa. Ni iyowa nnohowela werana emodhave. (Sal. 140:3) Ohiya osugweraga dhoviriganiha dhewa nnohowela osugwa dhikalelo dhapama enniwana ni dhithu dhatedhene dhapama eneriwana. (Omwileri Mateus 7:1-5.) Odhivela ‘winorumedha dhithu dhatedhene’ bumwahaya nigarumedha wi addibilihu enofuna werana dhithu dhapama ni wihina kinaaviriganiha efunaga. (1 Cor. 13:7) Eyo kinatapulela wihina Yehova anajheha wihina naroromelege athu aatene, ohiya eyo, oliye anajheha wihina naroromelege ale enoniha wihina enofwanelela ororomeliwa. *

8. Onande addi waroromela addibila?

⁸ Ororomeleya winohowela osayeliwa ninga nriho. Wihina nande werana eyo onohoweleya mudhidhi wowinjhivene. Ki onande aavi waroromela addibila? Vobajha, onohowela wanona pama. We podi othapanya naaliwa mwakala omutugumanoni. Obe odhowa mmalaleyelo vamodha. Okale oovilela ni wahiye wi yuwonihe wihina boororomeleya. Omabajhowene podi okala ethu yorusa othapanya wodhela dhithu dhamwigumini mwawo ni muthu ohumunonniwe pama. Mudhidhi munandaniyu pama kunakannege manyazo omwaddela dhithu dhamwigumini mwawo. (Luc. 16:10) Mbwenye onere ddi ddibila mmodha ooniha wi kanaroromeleya? Kuwaguve omariha wandana munninyuna, okale oovilela. Teto kuhiye wihina mwaha muthu mmodha ohukala oororomeleya ohiye waroromela athu aatene. Wihina enikavihere kabeni noone dhotajhiha dha adhaari akale yadidenle waroromela athu amodhaya naarive efwanyiwaga makathamiho.

9. a) Naarive amodha yahili oororomeleya, Ana oonihe aavi wi omuroromela Yehova? b) Yotajhiha ya Ana enanikavihera aavi ororomela makalelo Yehova aneriyena dhithudha?

⁹ Onowukuuwaga mwaha ethu erilena ddibila anna mutholo mmulogoni? Akala eyo enowupadduwelaga enere okala yapama opendda yotajhiha ya Ana. Mudhidhi yole Wizarayeli, Namakutha Eli daali Namaholela. Mbwenye anaaye kiyaali yotajhiha yapama, ni yaali anamakutha. Mudhidhi wamutene aliwa yawerana mararuwo ni dhothega dhimodha, teto baabiwa Eli kaasinyusa. Naarive dhigari ndo Yehova kamwakinhe Eli mutholo wokala namakutha. Teto Ana naarive aganonne wihina namakuthaya aali Eli kahiyile omwebedha Yehova otabernakulu. Eli numoona Ana alobelaga nuuviheya,  oliye ubuwela wihina Ana eere ong’wa. Eli ahawerana makoho owinjhiva, ahoonelagamo dhithudha dhampadduwela. (1 Sam. 1:12-16) Naarive dhigari ndo, Ana ahipaganya wihina ahere ambala mwanamulobwana eere onvelela wihina aaparege mabasa otabernakulu, anonaga wi di Eli amusamalelege mwanaye. (1 Sam. 1:11) Ki amwaana Eli yohowela osinyusiwa? Hee yohowela, Yehova aherana eyo mudhidhi wofwanelela. (1 Sam. 4:17) Mudhidhi yoyo Yehova ahimureeliha Ana wodhela okanna mwaana, ithaniwa Samuweli. — 1 Sam. 1:17-20.

10. Naarive Davidi agukuuliwe, ethu baani ahiseleliye werana?

¹⁰ Onowukuuliwaga ni mukwawo? Akala enowupadduwelaga, kasugwa epadduwe ni Mwene Davidi. Oliye ahikanna mukwaye ithaniwa Ayitofeli. Mbwenye mwaana Davidi, Abisalawu nuuthoma omwaaka baabe omwene, Ayitofeli ahimukavihera Abisalawu wodhela yothomaye. Podi wera ele yampadduwele Davidi yahimukuula vanlubale mbwenye eyo kiyamuhihe Davidi waroromela athu amodha! Oliye odhowave amuroromelaga Uzayi mukwaye oororomeleya aakoddile okavihera mubuwelo ole. Teto Davidi ahikanna dhithu dhowinjhiva dhamuthukulela omuroromela mukwaye Uzayi. Oliye ahoniha wi muthu apama ofiyedha ovelela egumaye wihina amukavihere Davidi.— 2 Sam. 17:1-16.

11. Nimakalelo baani mudhaari mmodha a Nabale oonihiliye wi oomuroromela Abigayili?

¹¹ Kasugwa yapadduwe ni mudhaari mmodha a Nabale. Davidi ni anamahara aye nuudhivela yahabarela adhaari amwizarayelita dhaala ithaniwa Nabale aali ooreela. Nuuvira mudhidhi Davidi nalobwanaye yahimuloba Nabale wi aakavihere aavahaga yoojha obe ethu-siithu aakanniyena. Yoloba ela yaali yokweya mbwenye Nabale ahikoodda, vano Davidi onyanyuwa othoma odhowa waapa adhaari aatene a vade va Nabale. Mudhaari mmodha odhowa othapanya ni Abigayili mwadha Nabale. Mwaha okala mudhaari a Nabale egumaye yaali vangovini teto oliye ahinona wi Abigayili eere wakavihera. Ohiya othawa oliye ahimurororomela Abigayili wihina eere werana ethu-siithu wihina aakavihere. Oliye omuroromela vanlubale Abigayili mwaha ahinona wi Abigayili  anoniwe ninga muhiyana anna thotho. Epadduwile vasogolova enowoniha pamadhene mwahaya bwaddi mudhaari ole adhe amuroromelege Abigayili. Abigayili ahiliba murima ni owoga ni Davidi wi ahiye yothomele afuniye werana. (1 Sam. 25:2-35) Oliye ahimuroromela Davidi wi eere werana ele eli yapama.

12. Yesu oonihe addi wi owaroromela anamahara aye naarive eviriganihaga?

¹² Yesu aharoromela anamahara aye naarive ehili oologomana. (João 15:15, 16) Tiyagu ni Juwawu numuloba Yesu wihina ekanne mburo wathima Mumweneni wa Mulugu, Yesu kakohile mwahaya bwaddi edhe yubuwelege ndo newene kakooddile ninga arumiwi. (Mar. 10:35-40) Nuuvira mudhidhi anamahara aatene a Yesu omuthawa emahiyu amagiwiye. (Mat. 26:56) Naari dhigalive ndo, Yesu kanahiyege waroromela. Yesu ahinona wi aliwa kahiyo oologomana, bumwahaya ‘owadhivela ofiyedha okwa waye.’ (João 13:1) Nuvenyihiwa muukwani Yesu wavaha anamaharaye owakwana 11 mutholo wathima wokavihera mabasa oolaleya ni wosamalela mambila aye. (Mat. 28:19, 20; João 21:15-17) Nroromelo Yesu anniyena wa alobwana ala ohilogomana nowoneleyamo, mwaha yahikala oororomeleya ofiyedha okwa wewa. Mohanganyedha Ana, Davidi, mudhaari a Nabale, Abigayili ni Yesu ehihiya yotajhiha yapama wodhela waroromela athu ohilogomana.

13. Ethu baani enanthukulele woonaga ninga ethu yorusa waroromela athu amodha?

¹³ Enowupadduwelaga we omwaddela ddibila muselu vano we onona wi ohumwaddela muthu mmodhaya? Muthu di muthu kadhiveliwe nuwiwa muselu yola. Nlabo dhaala murogola dhaala omwaddela namaholela mulogo muselu ni ororomela wi kaddeliwe muthu mmodha. Mbwenye labo noharela, mwadha namaholela mulogo ole omuligarela murogola ole wihina amulibihe, eyo yahoniha wihina mamune kaakoyile museluya. Eyo enowoniha wihina murogola ole ahikanna makathamiho omuroromela namaholela mulogo ole dila yanabili. Vano murogola ole osayela nikavihero na namaholela mmodha. Oliye omwaddela yampadduwele, vano namaholela mulogo ole omukavihera wihina ahogolowe waroromela anamaholela mulogo.

14. Emukavihere ddibila dhaala waroromela addibila ddi?

¹⁴ Mudhidhi wowinjhivene ddibila dhaala ahitakaleliwa ni anamaholela mulogo abiili ofiyedha wubuwela wi kahowela waroromela. Nlabo dhaala amwasistirigi porogarama a JW Broadcasting^® ddibila a Nikuru Nolamulela wawoga madhu ookweya mbwenye athima, oliye owoga egihina: “Mwiddani ehu di Saddana, ohiya addibilihu.” Ddibila ole wubuwela vanlubale wodhela muselu yoyo ni dhego ahoweliye werana. Nuulobela wa Yehova alobaga nikavihero oliye ohogolowela wandana ni anamaholela ale abiili.

15. Mwahaya bwaddi ohogolowela omuroromela muthu podi ohoweleyaga ovira mudhidhi wowinjhivene? Owoge yotajhiha.

¹⁵ Onoyelelaga mutholo mmulogoni? Eyo podi okala ethu yorusa mwigumini mwawo. Yaka ya 1930 Walemanya Nazista mabasihu yera okoddihiwa mbwenye murogola Grete ni amaye yahikalave oororomeleya. Grete ahakela mutholo woleba kopiya ya Namasugwera wihina aavahe addibila. Vano addibila nunona wi apapaye Grete yowaharahara mabasa ale aliwa othoma wihina ahiye mutholo ole yovaga wihina babe Grete eere wawaddela anamathonga wodhela muselu dha mmulogoni, eyo kiyathabwile ompiha mbani. Mbwenye mudhidhi koddo yanabili nubajha addibila kiyanvaha Grete naamaye kopiya dha marevista teto  yagumanana newene kiyalojhela. Eyo yahimpiha vanlubale mbani Grete! Ni wahivira mudhidhi wowinjhivene wihina ande walevelela addibila ni ohogolowela waroromela. Nuuvira mudhidhi oliye wonelamo wihina akala Yehova ohalevelela addibila ale nuliyeya ohowela werana emodhave. *

16. Mwahaya bwaddi nigahowelaga ohudhera waroromela addibila a mmulogoni?

¹⁶ Akala onofwanyiwaga makathamiho mamodhave wilibihedhe wihina waroromele athu amodha. Podi wera onere ovira mudhidhi wowinjhivene wi wande werana eyo. Mbwenye sapama wilibihedha. Kabiha wubuwela yopadduwa ela, wahere ojha ethu yovudda ohufunaga, vano wutota mbani, were ddi? Mwebaribarene onere okala pasope ni dhithu onajhegiwe. Teto eyo kinatapulela wi mwaha woojha ethu modha yabure kunadha ojhaga dhithu dhimodha. Nimakalelo mamodhave, kanihiye wi mwaha ddibila mmodha onikwerebeyiha nihiye waroromela addibila aatene, mbwenye nihinona wi aatene iyo kanilogomane. Nahogolowela waroromela addibilihu nnothabwa ohagalala ohiya eyo nnowanda woona dhithu nnahowelihu werana wihina nlibihe muzimu wororomelana mmulogoni.

17. Mwahaya bwaddi waroromela addibila ekala ethu yathima, ki ohudhera winaharela nnaasuze ddi?

¹⁷ Elabo ela enasugweriwa ni Saddana, waroromela athu amodha ethu enarusa. Mbwenye iyo podi waroromela addibilihu mwaha nnowadhivela teto aliwa enonidhivela. Makalelo ala oororomelana enonaddameliha malabo ala nnakalihu ni enere okala nikavihero nnanibarele makathamiho osogolo yanifwanya. Mbwenye ki akala muthu eere wuwukula ni kunanda omuroromela muthu yoyo? Enohoweleya woona dhithudha ninga Yehova anooniye. Enohoweleya waparihedha mabasa malagano a mBibliyani, wenjhedhedha odhivela naaddibila ni ohudhere ni dhotajhiha dha mBibliyani. Iyo podi ohogolowela waroromela athu amodha naarive nifwanyiwaga makathamiho. Naparihedhaga mabasa dhithu ndho, nnere woona ohagalala mwaha wokanna akwihu owinjhiva ‘enandhivela okwaranya ddibilihu.’ (Prov. 18:24) Mbwenye nnohowela werana epaddiihu, addibilihu enohowela onona wi aliwa podi oniroromela. Ohudhera winaharela nnere woona makalelo owaroromela addibilihu.