1. ¿Nda̱chun va̱ása ndákanda̱-iniyó ña̱ íxayo̱ʼvi̱ña xíʼin na̱ yiví ña̱ kandíxana inkana?

 NU̱Ú ñuyǐví ta̱ Ndi̱va̱ʼa yóʼo, na̱ yiví va̱ása kúnda̱a̱-inina ndáana kandíxana. Ixayo̱ʼvi̱níña xíʼinna kandíxana na̱ chíñu, na̱ íxi̱kó ta saátu na̱ níʼi yichi̱ nu̱úna ti̱xin veʼe-ñu̱ʼu. Saátu íxayo̱ʼvi̱níña xíʼinna kandíxana na̱ migona, na̱ íyo yatin xíʼinna ta saátu na̱ veʼena. Ta va̱ása ndákanda̱-iniyó xíʼin ña̱yóʼo, saáchi tu̱ʼun Ndióxi̱ káʼa̱nña “ña̱ ki̱vi̱ nu̱ú ndíʼi”, na̱ yiví va̱ása nda̱kú koo inina, ka̱ʼa̱nna tu̱ʼun síkí ta xi̱kótáʼanna. Na̱yóʼo keʼéna nda̱a̱ táki̱ʼva kéʼé ta̱ Ndi̱va̱ʼa, ta̱ xáʼndachíñu nu̱ú ñuʼú yóʼo (2 Tim. 3:1-4; 2 Cor. 4:4).

2. a) ¿Ndáana kivi kandíxayó? b) ¿Ndáaña kivi ndakanixi̱níyó?

² Soo miíyó na̱ ndásakáʼnu Jehová kúnda̱a̱-iniyó ña̱ kivi kandíxaníyóra (Jer. 17:7, 8). Kándíxaníyó ña̱ kúʼvi̱-inira xínira miíyó ta va̱ása sandákoondaʼa̱ra miíyó (Sal. 9:10). Saátu kivi kandíxayó ta̱ Jesucristo chi ni̱xi̱ʼi̱ra xa̱ʼa̱yó (1 Ped. 3:18). Ta kúnda̱a̱-iniyó ña̱ va̱ʼaní consejo va̱xi nu̱ú tu̱ʼun Ndióxi̱ ña̱kán kándíxaníyóña (2 Tim. 3:16, 17). Ta xa̱ʼa̱ ña̱yóʼo kándíxaníyó Jehová, ta̱ Jesús ta saátu ña̱ va̱xi nu̱ú Biblia. Soo savayó kivi ndakanixi̱níyó á ndiʼi tiempo kivi kandíxayó na̱ hermanoyó. Ña̱kán ná kotoyó á kivi kandíxayóna.

3. ¿Ndáaña va̱ʼaní ta̱xi Jehová ndaʼa̱yó? (Marcos 10:29, 30).

³ Iin ña̱ va̱ʼaní kúú ña̱ ta̱xi Jehová ña̱ ná kuñuʼuyó ti̱xin ñuura. Ta xa̱ʼa̱ ña̱yóʼo ku̱a̱ʼání ña̱ va̱ʼa ndákiʼinyó (kaʼvi Marcos 10:29, 30). Iníísaá ñuyǐví íyo na̱ hermano na̱ kúʼvi̱ní-ini xíni Jehová ta chíka̱a̱na ndee̱ ña̱ keʼéna ña̱ kúni̱ra. Sana va̱ása  inkáchiví tu̱ʼun káʼa̱nyó, costumbre ña̱ kúúmiíyó xíʼin ki̱ʼva ña̱ ndíxiyó xíʼin na̱ hermanoyó, soo tá xínitáʼanyó xíʼinna xáa̱yó kúʼvi̱ní-iniyó xíniyóna. Ta kúsi̱íní-iniyó ndásakáʼnuyó Jehová xíʼin na̱ hermanoyó (Sal. 133:1).

4. ¿Nda̱chun xíniñúʼuyó na̱ hermanoyó?

⁴ Tiempo vitin kúú ña̱ xíniñúʼu viíníka kutáʼanyó xíʼin na̱ hermanoyó. Sava yichi̱ na̱ hermanoyó chíndeétáʼanna xíʼinyó yáʼayó nu̱ú tu̱ndóʼo (Rom. 15:1; Gál. 6:2). Saátu chíndeétáʼanna xíʼinyó ña̱ ndakundeéyó kachíñuyó nu̱ú Jehová ta ndakú koo iniyó xíʼinra (1 Tes. 5:11; Heb. 10:23-25). Ná ndakanixi̱níyó ndáaña kundoʼoyó tá kǒo na̱ hermanoyó ña̱ chindeétáʼanna xíʼinyó ña̱ nda̱kú koo iniyó xíʼin Ndióxi̱ nu̱ú ta̱ Ndi̱va̱ʼa xíʼin na̱ kítáʼan xíʼinra. Si̱lóʼoní kúma̱ní ta ta̱ Ndi̱va̱ʼa xíʼin na̱ kítáʼan xíʼinra ixandi̱va̱ʼana xíʼinyó. Ta tá ná kuu ña̱yóʼo kusi̱íní-iniyó chi koo na̱ hermanoyó ña̱ chindeétáʼanna xíʼinyó.

5. ¿Nda̱chun íxayo̱ʼvi̱ña xíʼin savayó kandíxayó na̱ hermanoyó?

⁵ Soo savayó kivi ixayo̱ʼvi̱ña xíʼinyó ña̱ kandíxayó na̱ hermanoyó. ¿Nda̱chun? Chi sana na̱túʼunyó xíʼin iin na̱ hermanoyó xa̱ʼa̱ iin ña̱ʼa ta na̱yóʼo na̱túʼunnaña xíʼin inkana. A sana iintu na̱ hermanoyó ki̱ndoona xíʼinyó ña̱ keʼéna iin ña̱ʼa soo va̱ása nísaxínunaña. Á iintu na̱ hermanoyó ni̱ka̱ʼa̱nna á ke̱ʼéna iin ña̱ʼa ña̱ sa̱xóʼvi̱ní-iniyó. Ña̱kán, ¿ndáaña chindeétáʼan xíʼinyó ña̱ kandíxayó na̱ hermanoyó?

6. Ña̱ kúʼvi̱-iniyó xíniyó na̱ hermanoyó, ¿ndáa ki̱ʼva chíndeétáʼanña xíʼinyó kandíxayóna? (1 Corintios 13:4-8).

⁶ Ña̱ kúʼvi̱-iniyó xíniyó na̱ hermanoyó kúú ña̱ chindeétáʼan xíʼinyó kandíxayóna. 1 Corintios capítulo 13 va̱xi ku̱a̱ʼá ña̱ kivi chindeétáʼan xíʼinyó ña̱ kandíxakayó na̱ hermanoyó, ta chindeétáʼantuña xíʼinyó ña̱ ndikó tukuyó  kandíxayóna ta íyo iin ña̱ ke̱ʼéna xíʼinyó (kaʼvi 1 Corintios 13:4-8). Tá kúú, versículo 4 káchiña “na̱ kúʼvi̱-ini xíni inkana va̱ása kamaní-inina ta va̱ʼaní-inina”. Jehová kúee íyo inira xíʼinyó ni ku̱a̱kiʼviyó ku̱a̱chi nu̱úra. Ña̱kán saátu miíyó xíniñúʼu kúee koo iniyó xíʼin na̱ hermanoyó tá kéʼéna á káʼa̱nna iin ña̱ʼa ña̱ sásáa̱ miíyó á ña̱ sákusuchí-iniyó. Ta saátu ña̱ versículo 5 káchiña ña̱ na̱ kúʼvi̱-ini xíni inkana “va̱ása kamaní sáa̱na” ta “va̱ása ndákaʼánna xa̱ʼa̱ ña̱ kéʼé inkana xíʼinna”. Ña̱kán miíyó va̱ása kúni̱yó ndakaʼányó xa̱ʼa̱ ndiʼi ña̱ va̱ása va̱ʼa kéʼé na̱ hermanoyó xíʼinyó. Eclesiastés 7:9 káʼa̱nña xíʼinyó ña̱ va̱ása xíniñúʼu kamaní sa̱a̱yó. Ta iin ña̱ va̱ʼaní kúúña tá ná kundiku̱nyó ña̱ káʼa̱n Efesios 4:26 ña̱ káchi: “va̱ása sa̱a̱ndó iníísaá ki̱vi̱”.

7. ¿Ndáa ki̱ʼva chíndeétáʼan consejo ña̱ va̱xi nu̱ú Mateo 7:1-5 xíʼinyó ña̱ kandíxayó na̱ hermanoyó?

⁷ Inka ña̱ chindeétáʼan xíʼinyó ña̱ kandíxayó na̱ hermanoyó kúú ña̱ kotoyóna nda̱a̱ táki̱ʼva xíto Jehová na̱yóʼo. Ta̱kán kúʼvi̱ní-inira xínirana ta va̱ása ndákaʼánra xa̱ʼa̱ ku̱a̱china. Ta saátu xíniñúʼu keʼé miíyó (Sal. 130:3). Nu̱úka ña̱ kotoyó ña̱ va̱ása va̱ʼa kéʼéna, va̱ʼaka ná chika̱a̱yó ndee̱ kotoyó ña̱ va̱ʼa ña̱ kéʼéna ta ná kandíxayó ña̱ kiviva xa̱a̱na keʼéna ku̱a̱ʼání ña̱ va̱ʼa (kaʼvi Mateo 7:1-5). Ta xa̱ʼa̱ ña̱ kúʼvi̱-iniyó xíniyóna, va̱ása xíka-iniyó xa̱ʼa̱na chi kándíxanívayóna (1 Cor. 13:7). Jehová káʼa̱nra xíʼinyó ña̱ kandíxayó na̱ hermanoyó chi xíʼin ña̱ kéʼéna náʼa̱na ña̱ kiviva xa̱a̱yó kandíxayóna. *

8. ¿Ndáaña kivi keʼún ña̱ va̱ʼa kandíxakaún inkana?

⁸ Su̱ví xa̱a̱ ndi̱ku̱n kamaví xáa̱yó kándíxayó na̱ hermanoyó, chi ku̱a̱ʼá tiempo yáʼa tasaáví xáa̱yó kándíxayóna. ¿Ndáaña kivi keʼún ña̱ va̱ʼa kandíxaún na̱ hermano? Xíniñúʼu xa̱ún kuxini̱ va̱ʼúnna. Natúʼun táʼan xíʼinna tá ku̱a̱ʼún reunión. Tavá tiempo ña̱ kutáʼún xíʼinna tá ku̱a̱ʼa̱nndó natúʼunndó xa̱ʼa̱ Ndióxi̱. Kúee koo iniún xíʼinna ta taxi ná na̱ʼa̱na ña̱ kiviva kandíxaúnna. Tá sa̱kán xi̱nitáʼún xíʼin iin na̱ hermano, sana va̱ása kivi natúʼun xíʼinna xa̱ʼa̱ ndiʼi ña̱ ndóʼún. Soo tá xa̱a̱ ku̱a̱ʼá tiempo kítáʼún xíʼinna sana natúʼún xíʼinna xa̱ʼa̱ ña̱ ndóʼún (Luc. 16:10). Soo, ¿ndáaña kivi keʼéyó tá iin na̱ hermanoyó va̱ása nda̱kú níxi̱yo inina xíʼinyó? Ná va̱ása sandákooyó ña̱ kitáʼanyó xíʼinna. Tá ná va̱ása taxiyó kasi ña̱yóʼo nu̱úyó ña̱ kandíxayó inkana. Iin ña̱ chindeétáʼan xíʼinyó kúú ña̱ kaʼviyó xa̱ʼa̱ na̱ xi̱ndasakáʼnu Ndióxi̱ na̱ ni̱xi̱yo xi̱naʼá, na̱ nda̱kundeé ka̱ndíxa inkana ni sa̱ndákavana-inina.

9. a) ¿Ndáaña ke̱ʼé ñá Ana ni xi̱kunda̱a̱-iniñá ña̱ va̱ása va̱ʼa íyo ña̱ xi̱keʼé na̱ xi̱kachíñu ti̱xin tabernáculo? b) ¿Ndáaña sákuaʼún xíʼin ña̱ ke̱ʼé ñá Ana? (Koto na̱ʼná).

⁹ ¿Á nda̱kava-iniún i̱xaa iin na̱ hermano na̱ kúúmií iin chiñu ña̱ ndáyáʼvi ti̱xin congregación? Tásaá ke̱ʼéna xíʼún, ña̱ ndo̱ʼo ñá Ana kivi chindeétáʼanña xíʼún. Ta̱ Elí xi̱kuumiíra iin chiñu ña̱ ndáyáʼviní ti̱xin ñuu Israel, chi xi̱kuura su̱tu̱ káʼnu. Soo sava na̱ veʼera kǒo ña̱ va̱ʼa níxi̱keʼéna. Tá kúú na̱ se̱ʼera, ni xi̱kuuna su̱tu̱ soo xi̱kiʼvina ku̱a̱chi kini ta va̱ása níxi̱ka̱ʼa̱nra xíʼinna xa̱ʼa̱ ña̱ va̱ása va̱ʼa xi̱keʼéna. Soo va̱ása ndi̱ku̱n kama níkindaa Jehová chiñu ndaʼa̱ ta̱ Elí. Ta, ¿ndáaña ke̱ʼé ñá Ana? Ñáyóʼo va̱ása nísandákooñá ku̱ʼu̱nñá ti̱xin tabernáculo ña̱ va̱ʼa ndasakáʼnuñá Jehová, ni xi̱kuukava ta̱ Elí su̱tu̱ káʼnu. Ta tá ndíka̱a̱ñá káʼa̱nñá xíʼin Jehová ti̱xin tabernáculo, ta̱ Elí ni̱ka̱ʼa̱nra xíʼinñá ña̱ xíʼiñá ta va̱ása to̱ʼó níka̱ʼa̱nra xíʼinñá (1 Sam. 1:12-16). Soo ni ndo̱ʼoñá ndiʼi ña̱yóʼo ni̱ka̱ʼa̱nñá xíʼin Jehová ña̱ tá ná taxira koo iin se̱ʼeñá, ta taxiñá ta̱yóʼo ña̱  kachíñura ti̱xin tabernáculo ta ta̱ Elí kiʼin kuenta xíʼin ta̱yóʼo (1 Sam. 1:11). ¿Á xi̱niñúʼu ndatiin Jehová ku̱a̱chi xíʼin na̱ se̱ʼe ta̱ Elí? Xi̱niñúʼu keʼévaraña, ta ke̱ʼéraña mií tiempo ña̱ xi̱niñúʼu keʼéraña (1 Sam. 4:17). Ta Jehová ta̱xira ña̱ ná koo se̱ʼeñá Ana ta chi̱naníñara Samuel (1 Sam. 1:17-20).

10. Xa̱ʼa̱ ndiʼi ña̱ ndo̱ʼo ta̱ David, ¿á sa̱ndákoora ña̱ kandíxara inkana?

¹⁰ ¿Á xa̱a̱ sa̱ndákava iin na̱ migoún iniún? Tá saá, ndakanixi̱ní xa̱ʼa̱ ña̱ ndo̱ʼo ta̱ rey David. Tá xi̱kuni̱ se̱ʼera ta̱ Absalón nduura rey nu̱úra, iin ta̱ xi̱kuu migo ta̱ David ta̱ xi̱naní Ahitofel chi̱ndeétáʼanra xíʼin ta̱ Absalón ña̱ keʼéra ña̱yóʼo. Sana ku̱suchíníva-ini ta̱ David xa̱ʼa̱ ña̱ ke̱ʼé ta̱ Absalón ta saátu xa̱ʼa̱ ña̱ ke̱ʼé iin ta̱ xi̱kuu migora. Soo va̱ása nísasi ña̱yóʼo nu̱ú ta̱ David ña̱ kandíxara inkana. Chi nda̱kundeévara ka̱ndíxara iin ta̱ va̱ʼaní xi̱kuu migora ta̱ xi̱naní Husái, saáchi ta̱kán va̱ʼaní chi̱ndeétáʼanra xíʼinra. Ta nda̱a̱ ni̱xi̱yo tu̱ʼvara ña̱ kuvira xa̱ʼa̱ra (2 Sam. 17:1-16).

11. ¿Ndáa ki̱ʼva ni̱na̱ʼa̱ iin ta xi̱kachíñu nu̱ú ta Nabal ña̱ xi̱kandíxara inkana?

¹¹ Ná ndakanixi̱níyó xa̱ʼa̱ iin ta̱ xi̱kachíñu nu̱ú ta̱ Nabal, ta̱ David va̱ʼaní ni̱xi̱yo inira xíʼin na̱ xi̱kachíñu nu̱ú ta̱ Nabal ta chi̱ndeétáʼanra xíʼinna. Tá ni̱ya̱ʼa loʼo tiempo, ta̱ David ndu̱kúra loʼo ña̱ kuxura xíʼin na̱ ta̱a na̱ kítáʼan xíʼinra nu̱ú ta̱ Nabal. Soo ta̱yóʼo va̱ása níxiinra taxira ña̱ kuxuna, xa̱ʼa̱ ña̱kán ta̱ David ndeéní ni̱sa̱a̱ra ta ni̱ka̱ʼa̱nra ña̱ kaʼníra ndiʼi na̱ xi̱kachíñu nu̱ú ta̱ Nabal. Ta iin ta̱ xi̱kachíñu nu̱ú ta̱kán, na̱túʼunra xíʼin ñá Abigaíl ñá síʼi ta̱ Nabal xa̱ʼa̱ ndiʼi ña̱ ku̱u yóʼo. Chi xi̱kunda̱a̱-inira ña̱ ndaka̱xin ñá Abigaíl keʼéñá kúú ña̱ kivitu sáka̱ku miívara, ña̱kán va̱ása níxinura ku̱ʼu̱nra. Ka̱ndíxavara ña̱ kuchiñuva ñá Abigaíl ndasaviíñá ku̱a̱chi yóʼo chi ndiʼina xi̱kunda̱a̱-ini ña̱ iin ñaʼá ñá ndíchiní xi̱kuuñá. Ta va̱ʼaníva ke̱ʼéra ña̱ ka̱ndíxara ña̱ ndasavií ñá Abigaíl ku̱a̱chi. Saáchi ñáyóʼo ndakúní ni̱xi̱yo iniñá ta ni̱xa̱ʼa̱nñá ni̱ka̱ʼa̱nñá xíʼin ta̱ David ña̱ ná va̱ása keʼéra ña̱ xi̱kuni̱ra keʼéra (1 Sam. 25:2-35). Ta xi̱kunda̱a̱va-iniñá ña̱ kandíxava ta̱ David keʼéra ña̱ ndukúñá nu̱úra.

12. ¿Ndáa ki̱ʼva ni̱na̱ʼa̱ ta̱ Jesús ña̱ xi̱kandíxara na̱ discípulora ni sava yichi̱ va̱ása vií níxi̱keʼéna sava ña̱ʼa?

¹² Ta̱ Jesús xi̱kandíxavara na̱ discípulora ni  sava yichi̱ va̱ása vií níxi̱keʼéna sava ña̱ʼa (Juan 15:15, 16). Tá kúú tá ni̱ka̱ʼa̱n ta̱ Santiago ta saátu ta̱ Juan xíʼin ta̱ Jesús ña̱ ná taxira koo yatinna xíʼinra tá ná kaʼndachíñura, va̱ása níka̱ʼa̱nra xíʼinna á xa̱ʼa̱ ña̱kán kúú ña̱ ndásakáʼnuna Jehová, saátu va̱ása níka̱ʼa̱nra xíʼinna ña̱ ná sandákoona ña̱ koona apóstolra (Mar. 10:35-40). Ta ñuú tá ti̱inna ta̱ Jesús, na̱ discípulora sa̱ndákoonara ta xi̱nuna ku̱a̱ʼa̱nna (Mat. 26:56). Soo va̱ása nísandákoora ña̱ kandíxarana. Ni xi̱kunda̱a̱-inira ña̱ ni̱xi̱yo sava ña̱ xi̱ ixayo̱ʼvi̱ xíʼinna, kǒo nísandákoora ña̱ kuʼvi̱-inira kunirana (Juan 13:1). Ta tá nda̱takura, ni̱ka̱ʼa̱nra xíʼin na̱ 11 apóstolra ña̱ ná ku̱ʼu̱nna iníísaá ñuyǐví ta sanáʼa̱na na̱ yiví ña̱ ná kundiku̱nnara ta saátu ná kiʼinna kuenta xíʼinna (Mat. 28:19, 20; Juan 21:15-17). Ta va̱ʼaníva ke̱ʼéra ña̱ ka̱ndíxarana, saáchi ni xi̱kuuna na̱ yiví ku̱a̱chi va̱ʼaní ke̱ʼéna chiñu ña̱ sa̱ndákoora ndaʼa̱na. Ta nda̱kú ni̱xi̱yo inina ndiʼi tiempo ña̱ xi̱takuna. Nda̱a̱ táki̱ʼva sa̱kuaʼayó, ñá Ana, ta̱ David, ta̱ xi̱kachíñu nu̱ú ta̱ Nabal, ñá Abigaíl xíʼin ta̱ Jesús, ka̱ndíxana na̱ yiví ku̱a̱chi. Ña̱ ke̱ʼé na̱yóʼo chíndeétáʼanña xíʼinyó ña̱ keʼéyó nda̱a̱ táki̱ʼva ke̱ʼéna.

13. ¿Nda̱chun kivi ixayo̱ʼvi̱ña xíʼinyó kandíxayó inkana?

¹³ ¿Á na̱túʼún xa̱ʼa̱ iin ña̱ʼa ña̱ va̱ása xíniñúʼu kunda̱a̱-ini inkana xa̱ʼa̱, ta tándi̱ʼi na̱yóʼo na̱túʼunna xa̱ʼa̱ña xíʼin inkana? Va̱ása va̱ʼaví kúniyó tá kúu táʼan ña̱yóʼo. Iin yichi̱, iin ñá hermana na̱túʼunna xíʼin iin ta̱ anciano xa̱ʼa̱ iin ña̱ʼa ña̱ va̱ása xíniñúʼu kunda̱a̱-ini inkana xa̱ʼa̱. Soo tá inka ki̱vi̱ ñá síʼi ta̱yóʼo ni̱ka̱ʼa̱nñá xíʼin teléfono xíʼinñá ña̱ va̱ʼa chika̱a̱ñá ndee̱ xíʼinñá. Soo, ¿nda̱chun ke̱ʼéñá saá? Saáchi na̱túʼunva yiíñá xíʼinñá. Xa̱ʼa̱ ña̱yóʼo i̱xayo̱ʼvi̱ña xíʼin ñá hermana kán kandíxañá ta̱ anciano yóʼo. Soo ñá hermana kán va̱ʼaní ke̱ʼéñá chi ndu̱kúñá na̱ chindeétáʼan xíʼinñá. Ni̱ka̱ʼa̱nñá xíʼin inka ta̱ anciano ta ta̱kán chi̱ndeétáʼanra xíʼinñá ña̱ ndikó tukuñá kandíxañá na̱ anciano.

14. ¿Ndáaña chi̱ndeétáʼan xíʼin iin ta̱ hermano ña̱ ndi̱kó tukura ka̱ndíxara na̱ anciano?

¹⁴ Ku̱a̱ʼání tiempo iin ta̱ hermano xi̱sa̱a̱ra xíʼin u̱vi̱ na̱ anciano, saáchi xi̱ndakanixi̱níra ña̱ va̱ása kívi kundaa-inirana. Soo nda̱kaʼánra xa̱ʼa̱ iin ña̱ ni̱ka̱ʼa̱n iin ta̱ hermano ta̱ xi̱ ixato̱ʼóníra. Ña̱yóʼo kúú ña̱ ni̱ka̱ʼa̱n ta̱ hermano kán: “Ta̱ sáa̱-iniyó xíniyó kúú ta̱ Ndi̱va̱ʼa, ta su̱ví na̱ hermanoyó”. Ta̱ hermano kán nda̱kaniníxi̱níra xa̱ʼa̱ tu̱ʼun yóʼo ta na̱túʼunra xíʼin Jehová xa̱ʼa̱ ña̱ ndóʼora. Tá ni̱ya̱ʼa tiempo, nda̱kutáʼan viíra xíʼin na̱ anciano kán.

15. ¿Ndáa xa̱ʼa̱ kúú ña̱ kivi ya̱ʼa ku̱a̱ʼá tiempo tasaá ndikó tukuyó kandíxayó inkana? Ka̱ʼa̱n xa̱ʼa̱ ña̱ ndo̱ʼo ñá Grete.

¹⁵ ¿Á xa̱a̱ ni̱ka̱ʼa̱nna xíʼún ña̱ sandákoún keʼún iin chiñu ti̱xin congregación? Kúsuchíva-iniyó tá kúu ña̱yóʼo. Ná kotoyó ña̱ ndo̱o ñá Grete xíʼin siʼíñá, náyóʼo nda̱kúní ni̱xi̱yo ininá xíʼin Jehová tá ku̱i̱ya̱ 1930. Náyóʼo chí Alemania xi̱ndooná, ta tiempo saá na̱ nazi va̱ása níxi̱taxina natúʼunna xa̱ʼa̱ Ndióxi̱. Chiñu ña̱ xi̱keʼé ñá Grete kúú ña̱ xi̱taváñá copia tutu La Atalaya ña̱ kaʼvi na̱ hermano. Soo na̱ hermano na̱kunda̱a̱-inina ña̱ va̱ása nítaxika yivá ñá Grete sakúaʼañá xa̱ʼa̱ Ndióxi̱. Ta xa̱ʼa̱ ña̱yóʼo na̱ hermano xi̱yiʼvína ña̱ natúʼunra xíʼin na̱ chíñu xa̱ʼa̱ na̱ hermano congregación, ña̱kán ni̱ka̱ʼa̱nna xíʼin ñá Grete ña̱ va̱ása keʼékañá chiñu kán. Ñá Grete ni̱ya̱ʼañá nu̱ú inkaka tu̱ndóʼo. Saáchi tá xi̱ndika̱a̱ Segunda Guerra Mundial, na̱ hermano va̱ása níxi̱taxikana revista ndaʼa̱ siʼíñá ta saátu ndaʼa̱ miíñá ta ni va̱ása níxi̱chindeénañá tá xi̱ndakitáʼanna xíʼinñá chí calle, chi va̱ása níxi̱kandíxanañá. Ku̱suchíníva-ini ñá Grete xa̱ʼa̱ ña̱yóʼo, ta ku̱a̱ʼání tiempo ni̱ya̱ʼa ta saáví i̱xakáʼnu-iniñá xa̱ʼa̱ na̱  hermano ta saátu ña̱ ndikó tukuñá kandíxañána. Tá ni̱ya̱ʼa ku̱i̱ya̱, ni̱xa̱a̱ñá na̱kunda̱a̱-iniñá ña̱ i̱xakáʼnuva-ini Jehová xa̱ʼa̱na, ta saátu xi̱niñúʼu keʼé miíñá. *

16. ¿Nda̱chun xíniñúʼu chika̱a̱níyó ndee̱ ña̱ kandíxayó na̱ hermanoyó?

¹⁶ Tá ndo̱ʼún táʼan ña̱ ndo̱ʼo na̱ hermano na̱ xa̱a̱ ni̱ka̱ʼa̱nyó xa̱ʼa̱ yóʼo, chika̱a̱ ndee̱ ña̱ ndikó tukún kandíxaún na̱ hermano. Sana ku̱a̱ʼáva tiempo ya̱ʼa tasaá kivi keʼúnña, soo iin ña̱ va̱ʼaní kúúña tá ná chika̱ún ndee̱ keʼúnña. Ná ndakanixi̱níyó xa̱ʼa̱ ña̱yóʼo: tá iin comida ke̱ʼéña kue̱ʼe̱ xíʼinyó, sana kiʼinníkavayó kuenta ndáaña kuxuyó, ta su̱ví xa̱ʼa̱ ña̱yóʼo sandákooyó ña̱ kuxuyó. Ta ki̱ʼva saátu xíniñúʼu keʼéyó tá iin na̱ hermano ke̱ʼéna iin ña̱ va̱ása níkutóoyó, ná va̱ása taxiyó kasi ña̱yóʼo nu̱úyó ña̱ sandákooyó ña̱ kandíxayó na̱ hermanoyó, chi kúnda̱a̱va-iniyó ña̱ na̱ yiví ku̱a̱chi kúúna. Kusi̱íníva-iniyó tá ná ndikó tukuyó kandíxayó na̱ hermanoyó ta chika̱a̱níkayó ndee̱ ña̱ vií kutáʼanyó ti̱xin congregación tasaá kúú ña̱ va̱ʼaníka kandíxayóna.

17. a) ¿Nda̱chun ndáyáʼviní kandíxayó na̱ hermanoyó? b) ¿Ndáaña sakúaʼayó nu̱ú inka artículo?

¹⁷ Nu̱ú ñuyǐví ta̱ Ndi̱va̱ʼa yóʼo, va̱ása kándíxa táʼanka na̱ yiví. Soo ti̱xin ñuu Jehová kándíxaníyó na̱ hermanoyó, saáchi kúʼvi̱ní-iniyó xínitáʼanyó. Ta xa̱ʼa̱ ña̱ kándíxa táʼanyó, si̱íní ndóoyó ta va̱ʼaní kítáʼanyó. Ta ña̱yóʼo chindeétáʼanníña xíʼinyó kundeé-iniyó nu̱ú tu̱ndóʼo ña̱ xa̱a̱ ku̱yatinní kixaa̱. Soo, ¿ndáaña keʼéyó tá iinna ke̱ʼéna ña̱ va̱ása kútóoyó ta va̱ása kándíxakayóna? Kiviva ndikóyó kandíxayóna tá ná chika̱a̱yó ndee̱ ña̱ ndakanixi̱níyó nda̱a̱ táki̱ʼva ndákanixi̱ní Jehová, ta saátu tá ná kundiku̱nyó consejo ña̱ va̱xi nu̱ú Biblia. Ta inka ña̱ chindeétáʼan xíʼinyó kúú ña̱ kuʼvi̱-iniyó kuniyó na̱ hermanoyó ta saátu tá ná ndakanixi̱níyó xa̱ʼa̱ ña̱ ke̱ʼé na̱ xi̱ndasakáʼnu Jehová tiempo xi̱naʼá. Tásaá ná keʼéyó, ku̱a̱ʼání ña̱ va̱ʼa ndakiʼinyó ta koo ku̱a̱ʼání na̱ migoyó na̱ va̱ʼaní kitáʼan xíʼinyó (Prov. 18:24). Va̱ása kundatuyó ña̱ nda̱saa na̱ hermanoyó xíniñúʼu chika̱a̱ ndee̱ ña̱ va̱ʼa kándíxayóna, chi saátu miíyó xíniñúʼu chika̱a̱yó ndee̱ ña̱ va̱ʼa kandíxana miíyó. Nu̱ú inka artículo sakúaʼayó ndáa ki̱ʼva keʼéyó ña̱yóʼo.