1. Omolwashike kaatu na okukala twa kumwa sho aantu oyendji kunena ye uvite kutya itaya vulu okwiinekela kehe gumwe?

 AANTU muuyuni mbuka waSatana kaye shi kutya olye taya vulu okwiinekela. Ohaya yematekwa olundji keihumbato lyaanangeshefa, lyaanapolotika nosho wo kaawiliki yomalongelokalunga. Oyendji ohaya kala wo yu uvite kutya itaya vulu okwiinekela ookuume kawo, aashiinda nokuli naakwanezimo yawo. Ihe shoka inashi tu kumitha. Ombiimbeli oya hunganeka ya ti: ‘Momasiku gahugunina  . . .  aantu otaya ka kala . . . aakaanuudhiginini, . . . haya lundilathana . . . naakotokeli.’ Niitya yimwe, aantu otaya ka kala ya fa kalunga kuuyuni mbuka, ngoka itaa vulu okwiinekelwa nando okomuntu. — 2 Tim. 3:1-4, yelekanitha NW; 2 Kor. 4:4.

2. (a) Olye tatu vulu okukala twi inekela thiluthilu? (b) Yamwe otashi vulika yi ipule kombinga yashike?

² Tu li Aakriste, otu shi shi kutya otatu vulu okwiinekela Jehova thiluthilu. (Jer. 17:7, 8) Otwa tompwa kutya oku tu hole na ke na esiku a ‘ethe nando’ ookuume ke. (Eps. 9:10) Otatu vulu wo okwiinekela Jesus Kristus, molwaashoka okwa gandja omwenyo gwe omolwetu. (1 Pet. 3:18) Otwe shi mona wo monkalamwenyo yetu kutya Ombiimbeli ohayi gandja omayele ge shi okwiinekelwa. (2 Tim. 3:16, 17) Otu na omukumo kutya otatu vulu okwiinekela Jehova, Jesus nosho wo Ombiimbeli. Ihe yamwe otashi vulika yi ipule ngele otaya vulu ngaa okukala aluhe yi inekela aamwatate naamwameme megongalo. Ngele eyamukulo oeeno, omolwashike tatu vulu okukala twe ya inekela?

3. Uuthembahenda wuni wa dhenga mbanda tu na? (Markus 10:29, 30)

³ Jehova okwe tu hogolola tu kale oshitopolwa shuukwanegumbo waalongeli ye muuyuni awuhe. Dhiladhila owala kutya uuthembahenda mboka owi ikalekelwa shi thike peni nosho wo kutya uuwanawa wuni hawu eta! (Lesha Markus 10:29, 30.) Muuyuni awuhe omu na aamwatate naamwameme mboka ye hole Jehova nohaya kambadhala okuninga ngaashi taya vulu ya kale metsokumwe nomithikampango  dhe. Nonando omalaka, omihoko nosho wo okuzala kwetu okwa yoolokathana, otu ya hole nokuli nonando opo tatu ya tsakaneke oshikando shotango. Otu hole unene okukala pamwe nayo tatu tanga nokulongela Tate yetu omunahole.​—Eps. 133:1.

4. Omolwashike twa pumbwa aamwatate naamwameme?

⁴ Pethimbo ndika, otwa pumbwa okukala twa hangana naamwatate naamwameme shi vulithe nale. Oshoka omathimbo gamwe ohaye tu kwathele tu humbate omitenge dhetu. (Rom. 15:1; Gal. 6:2) Ohaye tu tsu wo omukumo tu kale tatu longele Jehova nokukala ookuume ke. (1 Tes. 5:11; Heb. 10:23-25) Dhiladhila owala kutya andola otatu ka kala tu uvite ngiini, ngele ihatu kwathelwa kegongalo tu kondjithe omutondi gwetu Satana Ondiyapoli nuuyuni we wa kolokosha. Satana naamboka ha longitha masiku otaya ka ponokela oshigwana shaKalunga. Ihe pethimbo ndyoka itatu ka kala tuu twa pandula sho aamwatate naamwameme taye ke tu kwathela!

5. Omolwashike omathimbo gamwe, yamwe haye shi mono oshidhigu okwiinekela aamwatate naamwameme?

⁵ Nonando ongawo, yamwe ohaye shi mono oshidhigu okwiinekela aamwatate naamwameme, tashi vulika molwaashoka omwiitaali omukwawo a popya oshiholekwa shawo puyalwe nenge inaa gwanitha po euvaneko lye. Nenge tashi vulika gumwe megongalo a popya sha nenge a ninga sha shoka she ya uvitha nayi noonkondo. Ngele shoka osha ningwa, otashi vulika tu shi mone oshidhigu okwiinekela yalwe. Oshike nduno tashi vulu oku tu kwathela tu inekele ishewe aamwatate naamwameme?

6. Ohole otayi vulu ngiini oku tu kwathela tu inekele yalwe? (1 Aakorinto 13:4-8)

⁶ Ohole oyo hayi tu inyengitha tu inekele yalwe. Aakorinto yotango ontopolwa 13 otayi popi iinima oyindji kombinga yohole mbyoka tayi vulu oku tu kwathela tu inekele nenge tu tameke  ishewe okwiinekela yalwe. (Lesha 1 Aakorinto 13:4-8.) Pashiholelwa, ovelise 4 otayi ti kutya “ohole ohayi idhidhimikile ayihe noyi na olukeno.” Jehova ohe tu idhidhimikile nokuli nonando ohatu yono kuye. Onkee ano, natse otatu vulu okukala hatu idhidhimikile aamwatate naamwameme ngele ohaya popi nenge haya ningi iinima mbyoka hayi tu ningile nayi nenge hayi tu uvitha nayi. Ovelise 5 otayi gwedha ko tayi ti: “Ihayi ningi omwenyo omwiinayi, ohole ihayi dhimbulukwa uuwinayi ye u ningilwa.” Onkee inatu hala tu kale hatu ‘dhimbulukwa uuwinayi twe wu ningilwa,’ ano tu kale hatu dhiladhila kiinima iiwinayi mbyoka twa ningilwa kaamwatate. Omuuvithi 7:9 otayi ti kutya ‘inatu uluma okugeya mombepo yetu.’ Onkee oshi li nawa tu tule miilonga omayele ngoka ge li mAaefeso 4:26 taga ti: “Inamu kala mwa geya esiku alihe”!

7. Omakotampango ngoka taga adhika muMateus 7:1-5 otaga vulu oku tu kwathela ngiini tu inekele yalwe?

⁷ Oshinima shimwe ishewe tashi vulu oku tu kwathela tu kale twa inekela aamwatate naamwameme, oku ya tala ko ngaashi Jehova he ya tala ko. Kalunga oku ya hole na iha kala taya yalula omayono gawo. Onkee ano, natse katu na oku shi ninga. (Eps. 130:3) Pehala lyokugandja eitulomo komapuko gawo, otu na okuninga ngaashi tatu vulu tu tale komaukwatya gawo omawanawa nokutala kuuwanawa mboka taya vulu okuninga. (Lesha Mateus 7:1-5.) Otu na einekelo kutya oya hala okulonga shoka oshiwanawa noinaya hala nando oku tu yemateka, molwaashoka ohole “otayi itaale.” (1 Kor. 13:7) Shoka inashi hala okutya Jehova okwa tegelela tu ya inekele nokaapu na etompelo lyasha ewanawa, ihe okwa hala tu ya inekele molwaashoka ya ulika kutya oye li aainekelwa. b

8. Ongiini to vulu okwiilonga okwiinekela aamwaho?

⁸ Ngaashi owala omuntu opo a kale a simanekwa kuyalwe e na oku shi ilongela, okwiinekelwa kuyalwe nako okwa pumbwa okwiilongelwa, naashoka ohashi pula ethimbo. Oshike to vulu okuninga opo wu kale wi inekela aamwaho? Konga oompito wu ya tseye nawa. Kala ho popi nayo pokugongala. Ninga elongekidho wu longe nayo miilonga yokuuvitha. Kala ho ya idhidhimikile moku ya pa ompito ya ulike kutya yo aainekelwa. Petameko, otashi vulika kuu lombwele omuntu ngoka opo to tseya nawa kombinga yiinima yoye ayihe yopaumwene. Ihe sho uukuume weni tawu ende tawu kolo, otashi vulika wu kale wu uvite wa manguluka oku mu lombwela omaiyuvo goye. (Luk. 16:10) Ihe oshike to vulu okuninga po ngele omumwatate gwontumba okwa popi oshiholekwa shoye puyalwe? Ino mu sa uunye nziya. Pehala lyaashono, etha pu pite ethimbo. Shimwe ishewe, ino etha eihumbato lyaantu owala aashonashona li ku ningithe kuu kale we wi inekela aamwaho. Moshinima shono ngawo, otatu ka tala koshiholelwa shoka twa tulilwa po kaapiya yontumba yaJehova aadhiginini, mboka nonando oya li ya uvithwa nayi kuyamwe, ya tsikile okukala yi inekela aantu yalwe.

9. (a) Hanna okwa kala i inekela ngiini melongekidho lyaJehova nonando yamwe yomaakalelipo ye oya li ya ningi omapuko? (b) Oshimoniwa shaHanna otashi ku longo shike kombinga yokwiinekela elongekidho lyaJehova? (Tala ethano.)

⁹ Mbela oshikando shimwe owa li wa uvithwa nayi keihumbato lyomukuluntugongalo gumwe? Ngele osho, oto ka mona mo uuwanawa moshiholelwa shaHanna. Pethimbo Eli oye a li Omuyambi Omukuluntu muIsraeli, aantu yaandjawo kaya li ya tula po oshiholelwa oshiwanawa. Oyanamati, mboka ya li aayambi oya li ye na eihumbato lya nyata noya li haya ningi iinima tayi sitha ohoni, ihe he ka li naanaa e ya pukulula. Jehova ka li a kutha Eli oshinakugwanithwa nziya shuuyambi. Ihe Hanna ka li a etha po elongekidho lyaKalunga lyoku ka longela Jehova ketsalihangano, hoka Eli oko a li ha yakula e li omuyambimukuluntu. Oshikando  shimwe sho Eli a mono Hanna ta galikana a nika oluhodhi noonkondo, okwa li a thiki pehulithodhiladhilo lya puka kutya Hanna okwa kolwa. Pehala lyokukonga tango uuyelele, okwa li a ula Hanna nayi ngoka a li a yemata lela. (1 Sam. 1:12-16) Nonando ongawo, Hanna okwa li a uvaneke kutya ngele okwa mono okanona okamati, ote ke ka fala ketsalihangano hoka taka ka silwa oshimpwiyu kuEli. (1 Sam. 1:11) Mbela oshiningwanima shoka sha li sha kwatela mo oyana yaEli osha li ngaa natango sha pumbwa okukatukilwa onkatu? Eeno, na Jehova okwa li a katuka onkatu pethimbo lya opala. (1 Sam. 4:17) Ihe manga shoka inaashi ningwa, Kalunga okwa pe Hanna okanona kokamati, Samuel. — 1 Sam. 1:17-20.

10. Omukwaniilwa David okwa tsikile ngiini okukala i inekela yalwe nonando aantu yamwe oya li ye mu kengelele?

¹⁰ Mbela opu na oshikando shimwe wa li wu uvite kutya owa kengelelwa kukuume koye kopothingo? Ngele osho, natu taleni kwaashoka sha li sha ningilwa omukwaniilwa David. Gumwe gwomookuume ke okwa li omulumentu gwedhina Ahitofel. Ihe omwanamati gwaDavid Absalom, sho a kambadhala okukutha he uukwaniilwa, Ahitofel okwa wayimine Absalom muunashipotha mboka. Shoka otashi vulika sha li sha uvitha nayi David noonkondo sho omwanamati nosho wo gumwe ngoka a li a tala ko kutya okuume ke ya etha po oku mu ambidhidha. Ihe nonando ongawo, David ina etha okukengelelwa hoka ku mu ningithe kaa kale a inekela yalwe. Okwa tsikile okukala a inekela kuume ke gulwe omudhiginini, Hushai, ngoka a li a tindi okuwayimina uunashipotha waAbsalom. David okwa li e na omatompelo omawanawa gokukala a inekela Hushai, oshoka okwa li a ulike kutya okuume e li nawa, nokuli okwa li a tula omwenyo gwe moshiponga opo a kwathele David.​—2 Sam. 17:1-16.

11. Omomukalo guni omupiya gumwe gwaNabal a li a ulike einekelo?

¹¹ Natu taleni wo koshiholelwa shimwe shoka twa tulilwa po komupiya gumwe gwaNabal. David naalumentu ye oya li ya gamene aapiya yomulumentu Omuisraeli gwedhina Nabal. Ihe lwanima, David okwa li a pula omulumentu ngoka omuyamba Nabal a pe aalumentu yaDavid iikulya, kehe shoka ta vulu oku ya pa. Ihe Nabal okwa tindi, naashoka osha li sha geyitha David noonkondo nokwa li a tokola nokuli okudhipaga kehe omulumentu gwomegumbo lyaNabal. Omupiya gumwe okwe shi lombwele omukulukadhi gwaNabal, Abigal. E li oshilyo shuukwanegumbo mboka, okwa li  e shi kutya Abigal ote mu hupitha kaa dhipagwe. Pehala lyokufadhuka po, okwa li e na einekelo kutya Abigal ota vulu okukandula po uupyakadhi mboka. Okwa li ta vulu okukala e na omukumo, molwaashoka Abigal okwa li e shiwike kutya ye omukiintu omunandunge. Shoka sha ka ningwa po, oshu ulike kutya okwa li e na omatompelo omawanawa gokwiinekela Abigal. Abigal okwa katuka nuulaadhi sho a keelele David kaa tsikile komeho nompangela ye. (1 Sam. 25:2-35) Okwa li e na einekelo kutya David ota ka katuka pandunge.

12. Jesus okwa li a ulike ngiini kutya okwi inekela aalongwa ye nonando oya li ya ningi omapuko?

¹² Jesus okwa li a inekela aalongwa ye nonando oya li ya ningi omapuko. (Joh. 15:15, 16) Oshikando shimwe sho Jakob naJohannes ye mu pula e ya pe oondondo dhi ikalekelwa mUukwaniilwa, Jesus ka li e ya limbililwa kutya omolwashike taya longele Jehova nenge e ya kuthe oshinakugwanithwa shawo shuuyapostoli. (Mark. 10:35-40) Konima yethimbo, aalongwa ye ayehe oya li ye mu thigi po ongulohi ndjoka a li a mangwa po. (Mat. 26:56) Nonando ongawo, Jesus okwa tsikile okukala e ya inekela. Okwa li e shi nawa kutya inaya gwanenena, ihe okwa kala e “ya hole sigo opehulilo.” (Joh. 13:1) Jesus sho a yumudhwa okwa li nokuli a pe aalongwa ye aadhiginini 11 oshinakugwanithwa sha simana shokukwatela komeho iilonga yokuninga aantu aalongwa noyokusila oshimpwiyu oonzi dhe. (Mat. 28:19, 20; Joh. 21:15-17) Okwa li e na omatompelo omawanawa gokwiinekela aalumentu mboka inaaya gwanenena. Ayehe oya li ya longele Jehova nuudhiginini sigo oosho ya mana oondjenda dhawo dhokombanda yevi. Onkee, Hanna, David, omupiya gwaNabal, Abigal nosho wo Jesus, oye tu tulila po oshiholelwa oshiwanawa shokwiinekela aantu inaaya gwanenena.

13. Oshike tashi vulu oku shi ningitha oshidhigu tu inekele yalwe?

¹³ Mbela oshikando shimwe owa li wa lombwele omumwatate gumwe oshiholekwa shontumba, nokonima owa ka mona kutya okwe shi lombwela yalwe? Shoka oshinima hashi vulu oku tu yemateka noonkondo. Omumwameme gumwe okwa li a lombwele omukuluntugongalo oshinima she shopaumwene. Esiku lya landula ko, omukulukadhi gwomukuluntugongalo ngoka okwa dhengele omumwameme e mu tse omukumo, noku na okukala a li e shi lela kutya oshinima shoka sha lombwelwa omusamane gwe, oshinima shopaumwene. Oshi shi okuuviwa ko sho omumwameme ngoka a tameke okukala e shi wete oshidhigu okwiinekela omukuluntugongalo ngoka. Ihe omumwameme okwa li a ningi shoka shi li mondjila nokupula ekwatho. Okwa yi ishewe komukuluntugongalo gulwe ngoka a li e mu kwathele a kale ishewe a inekela aakuluntugongalo.

14. Oshike sha kwathele omumwatate gumwe a kale ishewe a inekela yalwe?

¹⁴ Omumwatate gumwe okwa kala ethimbo nuule a geela aakuluntugongalo yaali mboka a kala e uvite kutya ina gwana oku ya inekela. Nonando ongawo, okwa tameke okudhiladhila kombinga yoshinima shimwe sha popilwe komumwatate ngoka a li a simaneka noonkondo. Okwa li a popi oohapu ndhika inaadhi kitakana, ihe otadhi ti sha lela, a ti: “Satana oye omutondi gwetu, ihe haamwatate.” Omumwatate ngoka okwa dhiladhila muule koohapu ndhoka, nokwa galikana kombinga yasho nolwahugunina okwa li a vulu okupanga ombili naakuluntugongalo mboka yaali.

15. Omolwashike tashi vulika shi kwate ethimbo okwiinekela ishewe yalwe? Gandja oshiholelwa.

¹⁵ Mbela opu na ethimbo limwe wa li wa kanitha uuthembahenda wontumba megongalo? Oshinima shoka ohashi vulu okuyemateka omuntu noonkondo. Omumwameme Grete nayina oya li Oonzapo oondhiginini pethimbo lyepangelo lyaNazi moNdowishi, mo 1930 nasha sho iilonga yetu ya li yi indikwa. Grete okwa li e hole uuthembahenda we wokutopatopela ooitaali ooyakwawo Ooshungolangelo. Ihe sho aamwatate ya uvu kutya he oku li ompinge noshili, oya kutha omumwameme ngoka uuthembahenda mboka, molwaashoka ya  tila kutya he ota ka lombwela aapataneki uuyelele kombinga yegongalo. Uupyakadhi waGrete inawu hulila owala mpoka. Momukokomoko aguhe gwIita Iitiyali yUuyuni, aamwatate kaya li haya pe Grete nayina oshinakugwanithwa shiileshomwa noya li haya tindi okupopya nayo uuna ye ya mono mepandaanda. Oshinima shoka osha li sha yemateke Grete noonkondo, nokwa ti kutya osha li sha pula ethimbo a dhimine po aamwatate mboka nokukala ishewe e ya inekela. Ihe mokweendela ko kwethimbo okwe ke shi zimina kutya Jehova oku na okukala e ya dhimina po, onkee naye oku na oku shi ninga. c

16. Omolwashike tu na okulonga nuudhiginini, opo tu ilonge okukala twa inekela aamwatate naamwameme?

¹⁶ Ngele nangoye owu na oshimoniwa sha faathana tashi ku yemateke, ilonga okukala wi inekela yalwe ishewe. Otashi vulika shi ku pule ethimbo, ihe oonkambadhala dhoye otadhi ke ku etela uuwanawa. Pashiholelwa, ngele otwa lile iikulya ya tulwa uuzigo, otatu ka kala twa kotokela lela shoka tatu li. Ihe, ngele iikulya ya tulwa uuzigo otwe yi li owala lumwe, shoka itashi tu ningitha tu ethe po okulya. Sha faathana, inatu etha oshinima shimwe oshiwinayi twe shi ningilwa shi nkundipaleke einekelo lyetu maamwatate naamwameme ayehe, mboka tu shi kutya oya valwa inaaya gwanenena. Ngele otwa kala ishewe twa inekela yalwe, otatu ka kala twa nyanyukwa notatu ka vula okugandja eitulomo kwaashoka tatu vulu okuninga, opo tu humithe komeho einekelathano megongalo lyetu.

17. Omolwashike okwiinekela yalwe kwa simana, na otatu ka kundathana shike moshitopolwa tashi landula?

¹⁷ Osha pumba okwiinekela yalwe muuyuni mbuka waSatana, ihe otatu vulu okwiinekela aamwatate naamwameme, molwaashoka otu ya hole nosho wo kutya oye tu hole. Einekelathano ndyoka ohali tu etele enyanyu notatu kala twa hangana ngashingeyi, notali ke tu gamena monakuyiwa sho tatu ka adhika komaupyakadhi. Oshike nduno wu na okuninga ngele gumwe okwe ku yemateka noino inekela we yalwe? Kambadhala okutala ko iinima ngaashi Jehova he yi tala ko, tula omakotampango gOmbiimbeli miilonga, ilonga okukala wu hole noonkondo aamwatate, e to ilongo wo kiiholelwa yomOmbiimbeli. Otatu vulu okukala ishewe tu uvite ombili ngele otwa yematekwa notatu ka kala ishewe twa inekela yalwe. Ngele osho twa ningi, otatu ka kala tu na ookuume oyendji ‘aadhiginini ye vule aamwayina’ yetu. (Omayel. 18:24) Ihe inashi gwana owala okukala twa inekela yalwe, nayo oye na wo okukala ye shi kutya otaya vulu oku tu inekela. Moshitopolwa tashi landula ko, otatu ka kundathana nkene tatu vulu okuulika kutya otwa gwana okwiinekelwa kaamwatate.