1. Ke ka baka la’ng re sa makale ge re bona batho ba sa tshepane mo lefaseng?

 MO LEFASENG le le bušwago ke Sathane batho ga ba tsebe gore ba tshepe bomang. Ba nyamišwa ke tsela yeo bo rakgwebo, baetapele ba dipolotiki le baetapele ba bodumedi ba itshwarago ka yona. Ba bangwe ba ikwa eka ba ka se kgone go tshepa bagwera ba bona, baagišane ba bona le ba leloko. Se ga se sa swanela go re makatša. Beibele e boletše e sa le pele gore: “Mehleng ya bofelo . . . , Batho e tla ba . . . ba go se botege, . . . bathomeletši, . . . baeki.” Ka mantšu a mangwe batho ba be ba tla bontšha dika tša Sathane e lego modimo wa lefase le yo a sa tshepagalego.—2 Tim. 3:1-4; 2 Bakor. 4:4.

2. (a) Ke mang yo re swanetšego go mo tshepa ka mo go feletšego? (b) Ba bangwe ba ka ipotšiša eng?

² Ka ge re le Bakriste re swanetše go tshepa Jehofa ka mo go feletšego. (Jer. 17:7, 8) Re kgodišegile gore o a re rata le gore a “ka se tlogele” bagwera ba gagwe. (Ps. 9:10) Re ka tshepa le Jesu Kriste ka gobane o re hwetše. (1 Pet. 3:18) Le gona re ithutile go tšwa diphihlelong tša rena gore Beibele e re nea tlhahlo yeo re ka e tshepago. (2 Tim. 3:16, 17) Re kgodišegile gore re ka tshepa Jehofa, Jesu le Beibele. Eupša ba bangwe ba ipotšiša ge e ba ba ka tshepa bana babo bona le dikgaetšedi ka phuthegong. Ge e ba karabo e le gore re swanetše go dula re ba tshepa, ke ka baka la’ng re swanetše go ba tshepa?

3. Re na le tokelo efe e kgahlišago? (Mareka 10:29, 30)

³ Jehofa o re kgethile gore re be karolo ya lapa la gagwe le legolo. Ye ke tokelo e kgolo kudu e bile e tlo re tlišetša ditšhegofatšo! (Bala Mareka 10:29, 30.) Lefaseng ka moka re na le bana babo rena le dikgaetšedi bao ba ratago Jehofa le go leka go phela ka melao ya gagwe. Le ge re fapana ka maleme, ditšo  goba tsela yeo re aparago ka yona, re ikwa re batamelane le ge e le la mathomo re kopana. Re rata go ba le bona ge re rapela le go tumiša Tatago rena wa legodimong!—Ps. 133:1.

4. Ke ka baka la’ng re hloka bana babo rena le dikgaetšedi?

⁴ Gona bjale re swanetše go dula re le ngatana e tee le bana babo rena le dikgaetšedi go feta le ge e le neng pele. Ka dinako tše dingwe ba re thuša go kgotlelela. (Baroma 15:1; Bagal. 6:2) Le gona ba re thuša gore re be le mafolofolo ge re dutše re hlankela Jehofa le gore re dule re le bagwera ba gagwe. (1 Bathes. 5:11; Baheb. 10:23-25) Nagana gore re be re tlo ikwa bjang ge nkabe phuthego e sa re thekge ge re dutše re lwantšhana le Sathane Diabolo lefaseng le le lebe. Sathane le batho ba bangwe bao a ba bušago e se kgale ba tlo hlasela batho ba Modimo. Go tlo thabiša kudu ge bana babo rena le dikgaetšedi ba re thekga!

5. Ke ka baka la’ng ba bangwe ba ka thatafalelwa ke go tshepa bana babo bona le dikgaetšedi?

⁵ Ba bangwe ba ka thatafalelwa ke go tshepa bana babo bona le dikgaetšedi ka ge ba ile ba utolla ditaba tša bona go ba bangwe, goba ba se phethagatše dilo tšeo ba di tshepišitšego. Mohlomongwe yo mongwe ka phuthegong o dirile goba o boletše selo seo se ba kwešitšego bohloko kudu. Ge dilo tše di direga, go ka ba thata gore re tshepe ba bangwe. Bjale re ka thušwa ke eng gore re tshepe bana babo rena le dikgaetšedi?

6. Lerato le ka re thuša bjang gore re tshepe ba bangwe? (1 Bakorinthe 13:4-8)

⁶ E le gore re tshepe ba bangwe, re swanetše go ba rata pele. Bakorinthe ba Pele kgaolo 13 e bolela ka dika tšeo di tšweletšwago ke lerato tšeo di ka re thušago gore re tshepe ba bangwe. (Bala 1 Bakorinthe 13:4-8.) Ka  mohlala temana ya 4 e re: “Lerato ga le fele pelo e bile le botho.” Jehofa ga a re felele pelo le ge re mo direla dibe. Le rena ga se ra swanela go fela pelo ge bana babo rena ba dira dilo goba ba bolela dilo tšeo re sa di ratego goba tšeo di re kwešago bohloko. Temana ya 5 e oketša ka gore: “[Lerato] ga le rumolege. Ga le boloke pego ya bobe.” Ga re nyake go ‘boloka pego ya bobe,’ e le gore re fele re gopotša bana babo rena le dikgaetšedi ka phošo yeo ba ilego ba re direla yona. Mmoledi 7:9 e re re se ke ra “akgofela go kgopišega.” Go bohlokwa gore re diriše mantšu ao a lego go Baefeso 4:26 ao a rego: “Letšatši le se ke la sobela le galefile”!

7. Melao ya motheo yeo e lego go Mateo 7:1-5 e re thuša bjang gore re tshepe ba bangwe?

⁷ Re ka ithuta go tshepa bana babo rena le dikgaetšedi ge e ba re ba lebelela ka tsela yeo Jehofa a ba lebelelago ka yona. Modimo o a ba rata e bile ga a boloke dibe tšeo ba di dirilego. Le rena ga se ra swanela go di boloka. (Ps. 130:3) Go e na le gore re lebelele diphošo tša bona re swanetše go lebelela dika tša bona tše dibotse le dilo tše dibotse tšeo ba nyakago go di dira. (Bala Mateo 7:1-5.) Re swanetše go tshepa gore ba nyaka go dira dilo tše dibotse ka gobane lerato le “dumela tšohle.” (1 Bakor. 13:7) Temana ye ga e bolele gore Jehofa o letetše gore re no tshepa batho ka ntle le mabaka. Eupša o letetše gore re ba tshepe ka gobane ba iponagaditše ba tshepagala. *

8. O ka dira’ng gore o tshepe bana beno?

⁸ Go swana le tlhompho, go tshepa batho ba bangwe go tšea nako. O ka dira’ng gore o tshepe bana beno? Leka go ba tseba gabotse. Bolela le bona ge le le dibokeng. Rulaganya go sepela le bona tšhemong. O se ke wa ba felela pelo, ba nee sebaka sa gore ba go bontšhe gore ba a tshepagala. Mathomong o ka no se lokologe go botša motho ditaba tša gago ka moka. Eupša ge le dutše le tsebana o tlo lokologa go mmotša kamoo o ikwago ka gona. (Luka 16:10) Bjale o swanetše go dira’ng ge e ba ngwaneno a tšama a botša ba bangwe ditaba tšeo o mmoditšego tšona? O se ke wa akgofela go fediša segwera sa lena, dumelela gore go fete nako pele. Le gona o se ke wa dumelela batho ba bangwe ba dira gore o se sa tshepa bana beno. Ga bjale a re boneng mehlala ya bahlanka ba Jehofa bao ba botegago bao ba ilego ba tšwela pele ba tshepa ba bangwe le ge ba ile ba kwešwa bohloko.

9. (a) Hanna o dirile eng go bontšha gore o tshepa tokišetšo ya Jehofa le ge batho bao ba bego ba etelela pele ba dira diphošo? (b) Mohlala wa Hanna o go ruta eng ka go tshepa tokišetšo ya Jehofa? (Bona seswantšho)

⁹ Na o ile wa nyamišwa ke maitshwaro a ngwanabo rena yo a eteletšego pele? Ge e ba go le bjalo o ka thušwa ke mohlala wa Hanna. Motho yo a bego a eteletše pele Isiraele ka nako yeo e be e le Moperisita yo a Phagamego Eli. Eupša ba lapa la gagwe ba be ba sa bee mohlala o mobotse. Barwa ba gagwe bao le bona ba bego ba hlankela taberenakeleng, ba be ba dira dilo tšeo di lešago dihlong eupša tatago bona a sa ba kgalemele. Jehofa ga se a no thoma ka go tloša Eli boemong bja gagwe. Eupša Hanna ga se a tlogela go rapela taberenakeleng a re ka gobane Eli e sa le Moperisita yo a Phagamego moo. Ge Eli a bona Hanna a rapela, o ile a mo latofatša ka gore o tagilwe. O ile a ahlola mosadi yoo yo a bego a kwele bohloko ka ntle le go tseba ditaba ka  moka. (1 Sam. 1:12-16) Le ga go le bjalo, Hanna o ile a ikana gore ge a ka ba le morwa, o tlo mo tliša gore a hlankele taberenakeleng ka tlase ga tlhokomelo ya Eli. (1 Sam. 1:11) Na barwa ba Eli ba be ba swanetšwe ke go phošollwa? Ee, Jehofa o ile a tsena ditaba gare ka nako ya maleba. (1 Sam. 4:17) Le gona Modimo o ile a putsa Hanna ka morwa yo a bitšwago Samuele.—1 Sam. 1:17-20.

10. Ke eng seo Kgoši Dafida o ilego a se dira go bontšha gore o sa tshepa ba bangwe le ge a ile a kwešwa bohloko?

¹⁰ Na o ile wa kwešwa bohloko ke mogwera wa gago wa kgauswi? Ge e ba go le bjalo, nagana ka mohlala wa Kgoši Dafida. Yo mongwe wa bagwera ba gagwe e be e le Ahithofele. Eupša ge morwa wa Dafida e lego Abesalomo a be a leka go ba kgoši, Ahithofele o ile a thekga Abesalomo. Dafida o swanetše go ba a ile a kwešwa bohloko ke gore morwa wa gagwe le monna yo a bego a nagana gore ke mogwera wa gagwe ba be ba se sa mo thekga. Eupša Dafida ga se a ka a dumelela se se mo dira gore a se sa tshepa batho ba bangwe. O ile a tšwela pele a tshepa mogwera wa gagwe yo a botegago e lego Hushai yoo a ilego a gana go hlanogela Dafida. Dafida o be a na le mabaka a kwagalago a go mo tshepa. Hushai o bontšhitše gore ke mogwera yo mobotse ka go bea bophelo bja gagwe kotsing e le gore a thuše Dafida.—2 Sam. 17:1-16.

11. Mohlanka yo mongwe wa Nabala o ile a bontšha bjang gore o a tshepagala?

¹¹ Nagana ka mohlala wa mohlanka yo mongwe wa Nabala. Dafida le banna bao a bego a sepela le bona ba ile ba šireletša bahlanka ba monna wa Moisiraele yo a bitšwago Nabala. Ka morago ga nakwana, Dafida o ile a kgopela monna wa mohumi e lego Nabala dijo tšeo a ka kgonago go ba nea tšona gore a nee banna bao a bego a sepela le bona. Ge Nabala a gana kgopelo yeo, Dafida o ile a galefa kudu mo a ilego a phetha ka gore o tlo bolaya banna ka moka ba lapeng la gagwe. Mohlanka yo mongwe o ile a begela mosadi wa Nabala e lego Abigaile ka taba ye. E be e le setho sa lapa leo e bile a tseba gore Abigaile a ka phološa bophelo bja gagwe. Go e na le gore a tšhabe, o be a tshepa gore Abigaile o tlo lokiša boemo bjoo. Mohlanka yoo o be a kgodišegile ka se, ka  gobane batho ka moka ba be ba tseba gore ke mosadi yo bohlale. Seo se diregilego ka morago se bontšhitše gore o be a na le mabaka a kwagalago a go tshepa Abigaile. Abigaile o ile a bontšha sebete ka go thibela Dafida gore a se bolaye banna bao. (1 Sam. 25:2-35) O be a tshepa gore Dafida o tla dira dilo ka bohlale.

12. Jesu o bontšhitše bjang gore o tshepa barutiwa ba gagwe go sa šetšwe diphošo tša bona?

¹² Jesu o be a tshepa barutiwa ba gagwe go sa šetšwe diphošo tšeo ba di dirilego. (Joh. 15:15, 16) Ge Jakobo le Johane ba be ba kgopela maemo a phagamego Mmušong, Jesu ga se a ka a belaela maikemišetšo a bona a go hlankela Jehofa goba a re ba se sa ba baapostola ba gagwe. (Mar. 10:35-40) Ka morago barutiwa ka moka ba Jesu ba ile ba mo tlogela bošegong bjoo a ilego a swarwa ka bjona. (Mat. 26:56) Eupša Jesu ga se a tlogela go ba tshepa. O be a tseba gore ba na le mafokodi eupša “o ba ratile go fihla bofelong.” (Joh. 13:1) Ka morago ga gore Jesu a tsošwe bahung o ile a nea baapostola ba gagwe ba 11 bao ba botegago boikarabelo bjo bohlokwa bja go hlokomela modiro wa go dira barutiwa le go hlokomela dinku tša gagwe. (Mat. 28:19, 20; Joh. 21:15-17) O be a na le mabaka a kwagalago a go tshepa banna bao ba bego ba se ba phethagala. Ka moka ga bona ba ile ba botega go fihla mafelelong a bophelo bja bona bja mo lefaseng. Hanna, Dafida, mohlanka wa Nabala, Abigaile le Jesu ba re beetše mohlala o mobotse wa gore re ka tshepa batho bao ba sego ba phethagala.

13. Ke eng seo se ka dirago gore go be thata gore re tshepe ba bangwe?

¹³ Na o ile wa botša ngwaneno ditaba tša gago ke moka ka morago wa hwetša gore o di boditše ba bangwe? Seo se ka go nyamiša kudu. Kgaetšedi o ile a botša mogolo ditaba tša gagwe. Letšatši le le latelago mosadi wa mogolo o ile a founela kgaetšedi yoo gomme a mo kgothatša. Go molaleng gore mogolo yoo o be a boditše mosadi wa gagwe ditaba tšeo e bego e swanetše go ba sephiri. Kgaetšedi yoo o ile a se sa tshepa mogolo yoo gabotse. Eupša kgaetšedi yoo o ile a dira selo se sebotse ka go kgopela thušo. O ile a bolela le mogolo yo mongwe ke moka mogolo yoo a mo thuša gore a boele a tshepe bagolo.

14. Ngwanabo rena yo mongwe o ile a thušwa ke eng gore a boele a tshepe ba bangwe?

¹⁴ Ngwanabo rena yo mongwe o ile a fetša nako e telele a sa kwane le bagolo ba bangwe moo a ilego a nagana gore a ka se tsoge a ba tshepile. Eupša o ile a thoma go nagana ka selo se sengwe seo se boletšwego ke ngwanabo rena yo a bego a mo hlompha kudu. Ngwanabo rena yoo o boletše gore: “Sathane ke lenaba la rena, e sego bana babo rena le dikgaetšedi.” Ngwanabo rena o ile a nagana ka mantšu ao kudu ke moka a rapela, ka morago o ile a dira khutšo le bagolo bao.

15. Ke ka baka la’ng go ka re tšea nako gore re boele re tshepe bao ba ilego ba se re sware gabotse? Nea mohlala.

¹⁵ Na o ile wa tšeelwa ditokelo ka phuthegong? Se se ka ba se ile sa go nyamiša. Grete le mmagwe e be e le Dihlatse tšeo di botegago ka bo 1930 nakong ya ge ma-Nazi a thibetše modiro wa rena kua Jeremane. Grete o be a na le tokelo yeo a e thabelago ya go thaepela bana babo dikgatišo tša Morokami. Eupša ka morago ga gore Bakristegotee le yena ba tsebe gore tatagwe o ganetša ditherešo, ba ile ba mo tšeela tokelo yeo ka ge ba be ba tšhaba gore tatagwe o tla diriša dikgatišo tšeo gampe. Bjoo ga se bothata bo nnoši bjo Grete a bego a swanetše ke go bo kgotlelela. Nakong  ya Ntwa ya Bobedi ya Lefase bana babo rena le dikgaetšedi ba be ba sa nyake go nea Grete le mmagwe dikgatišo e bile ba sa ba bolediše ge ba kopana le bona tseleng. Seo se be se nyamiša kudu! Grete o be a kwele bohloko kudu, o re go ile gwa mo tšea nako gore a lebalele bana babo le go ba tshepa gape. Ge nako e dutše e eya o ile a bona gore Jehofa o ba lebaletše ke moka le yena a ba lebalela. *

16. Ke ka baka la’ng re swanetše go šoma ka thata gore re tshepe bana babo rena le dikgaetšedi?

¹⁶ Ge e ba o ile wa kopana le bothata bjo bo swanago, šoma ka thata gore o tshepe bana beno le dikgaetšedi gape. Le ge go ka tšea nako eupša o tla ba o dira selo se sebotse. Ka mohlala ge e ba re ka ja dijo tšeo di nago le mpholo, re ka thoma go hlokomela dijo tšeo re di jago. Eupša seo se ka se re thibele go ja. Ka mo go swanago ga se ra swanela go dumelela diphošo tšeo bana babo rena le dikgaetšedi bao ba sego ba phethagala ba di dirago di dira gore re se sa ba tshepa. Ge e ba re ka ba tshepa gape, re tlo thaba e bile re tlo bona gore re ka dira’ng gore ba bangwe ka phuthegong ba tshepane.

17. Ke ka baka la’ng go tshepa ba bangwe go le bohlokwa, gona re tlo ithuta’ng sehlogong se se latelago?

¹⁷ Batho ga ba tshepane lefaseng le leo le bušwago ke Sathane, eupša re tshepa bana babo rena le dikgaetšedi ka gobane re a ba rata le bona ba a re rata. Ge re tshepa bana babo rena re tlo thaba e bile ra ba batee le gona re tlo šireletšana ge re kopana le mathata nakong e tlago. O swanetše go dira eng ge motho yo mongwe a ile a dira gore o se sa mo tshepa? Leka go lebelela dilo ka tsela yeo Jehofa a di lebelelago ka yona, diriša melao ya motheo, rata bana beno ka mo go tseneletšego gomme o ithute ka mehlala ya ka Beibeleng. Re ka se sa nyama gomme re tlo boela re tshepe batho bao gape. Ge re dira bjalo re tlo thabela tšhegofatšo ya go ba le bagwera bao ba “kgomarelago motho go phala ngwanabo.” (Die. 18:24) Eupša ga se gwa lekana gore re tshepe bana babo rena le dikgaetšedi. Le bona ba swanetše go tseba gore ba ka re tshepa. Sehlogong se se latelago re tlo boledišana ka dilo tšeo re ka di dirago gore bana babo rena le dikgaetšedi ba re tshepe.