مطالعے دا مضمون نمبر 37
تُسی اپنے بھین بھراواں تے بھروسا کر سکدے او
محبت ساریاں گلاں تے یقین کردی اے، ساریاں شیواں دی اُمید رکھدی اے۔—1-کُرنتھیوں 13:4، 7۔
گیت نمبر 124: وفادار رہوو
مضمون تے اِک نظر *
1. سانوں ایہہ ویکھ کے حیرانی کیوں نئیں ہوندی کہ اَج کل بوہت سارے لوکاں نُوں دُوجیاں تے بھروسا کرنا مشکل لگدا اے؟
اَج دُنیا چ بوہت سارے لوکاں نُوں سمجھ نئیں آندا کہ اوہ کدے تے بھروسا کرن تے کدے تے نئیں۔ ایہدی اِک وجہ ایہہ وے کہ کاروباری لوک تے سیاسی تے مذہبی لیڈر اوہناں نُوں وار وار دھوکھا دیندے نیں۔ ایناں ای نئیں، بوہت سارے لوکاں نُوں ایہہ وی لگدا اے کہ اوہ اپنے دوستاں، گوانڈھیاں ایتھوں تک کہ اپنے گھر والیاں تے وی بھروسا نئیں کر سکدے۔ پر ایہہ سب ویکھ کے اَسی حیران نئیں ہوندے کیونکہ بائبل چ پہلاں توں ای دس دِتا گیا سی کہ اخیر زمانے چ لوک بےوفا، بدنامی کرن والے تے دھوکھےباز ہون گے۔ دُوجے لفظاں چ لوک ایس دُنیا دے خدا یعنی شیطان ورگے کم کر رہے نیں جدے تے کسے وی طریقے نال بھروسا نئیں کیتا جا سکدا۔—2-تیمُتھیُس 3:1-4؛ 2-کُرنتھیوں 4:4۔
2. (الف) اَسی کِنہاں تے پوری طرحاں بھروسا کر سکنے آں؟ (ب) کجھ لوک شاید کیہہ سوچن؟
2 یہوواہ دے بندیاں دے طور تے اَسی جاننے آں کہ اَسی اوہدے تے پورا بھروسا رکھ سکنے آں۔ (یرمیاہ 17:7، 8) سانوں ایس گل دا پورا یقین اے کہ اوہ سانوں پیار کردا اے تے سانوں کدی وی کلّا نئیں چھڈے گا۔ (زبور 9:10) اَسی یسوع مسیح تے وی پورا بھروسا رکھ سکنے آں کیونکہ اوہنے ساڈی خاطر اپنی جان دے دِتی۔ (1-پطرس 3:18) نالے اَسی آپ وی ایس گل دا تجربہ کیتا اے کہ بائبل چ جیہڑیاں وی ہدیتاں دِتیاں گئیاں نیں اَسی اوہناں تے پوری طرحاں بھروسا کر سکنے آں۔ (2-تیمُتھیُس 3:16، 17) ایس لئی اَسی یہوواہ تے یسوع مسیح تے پورا بھروسا رکھ سکنے آں۔ پر شاید کجھ لوک سوچن کہ کیہہ اَسی کلیسیا دے بھین بھراواں تے وی بھروسا کر سکنے آں؟ جے ہاں، تے اَسی اوہناں تے بھروسا کیوں کر سکنے آں؟
سانوں اپنے بھین بھراواں دی ضرورت اے
پوری دُنیا چ ساڈے ایہو جہے بھین بھرا نیں جیہڑے ساڈے وانگوں یہوواہ نال محبت کردے نیں تے اَسی اوہناں تے بھروسا کر سکنے آں۔ (پیراگراف نمبر 3 نُوں ویکھو۔)
3. سانوں کیہڑا شاندار شرف ملیا اے؟ (مرقس 10:29، 30)
3 یہوواہ نے سانوں اپنے خاندان چ شامل ہون لئی چُن لیا اے۔ ذرا سوچو کہ ایہہ کِنّاں وڈا شرف اے تے ایہدی وجہ توں سانوں کِنّیاں برکتاں مِلدیاں نیں۔ (مرقس 10:29، 30 نُوں پڑھو۔) پوری دُنیا چ ساڈے بھین بھرا یہوواہ نُوں پیار کردے تے اوہدے اصولاں مطابق زندگی گزارن دی کوشش کردے نیں۔ بھانویں کہ ساڈی زبان، رہنسہن تے لباس اِک دُوجے توں فرق اے پر فیر وی اَسی اِک دُوجے نال بوہت پیار کرنے آں۔ نالے اِک دُوجے دے نیڑے محسوس کرنے آں فیر بھانویں اَسی پہلی واری کیوں نہ مِل رہے ہوئیے۔ خاص کر کے سانوں اوہناں نال مِل کے اپنے پیارے اسمانی باپ یہوواہ دی وڈیائی کرنا تے اوہدی عبادت کرنا بوہت چنگا لگدے اے۔—زبور 133:1۔
4. سانوں اپنے بھین بھراواں دی ضرورت کیوں اے؟
4 اَج سانوں اپنے بھین بھراواں نال اِک مُٹھ رہن دی پہلاں توں کِتے زیادہ ضرورت اے۔ ایہدی وجہ ایہہ وے کہ اوہ مشکلاں دا بھار چُکن چ ساڈی مدد کردے نیں۔ (رومیوں 15:1؛ گلتیوں 6:2) نالے اوہ ساڈا حوصلہ ودھاندے نیں کہ اَسی جی جان نال یہوواہ دی خدمت کردے رہیے تے اوہدے نال اپنی دوستی نُوں مضبوط رکھیے۔ (1-تھسلُنیکیوں 5:11؛ عبرانیوں 10:23-25) سوچو کہ جے سانوں کلیسیا دے بھین بھراواں دا ساتھ نہ ملیا ہوندا تے اَسی اپنے دُشمناں یعنی شیطان تے ایس بھیڑی دُنیا نال کیویں لڑ پاندے۔ بوہت چھیتی شیطان تے اوہدا ساتھ دین والے لوک خدا دے بندیاں تے حملہ کرن گے۔ پر اَسی اوس ویلے بڑے شکرگزار ہوواں گے کیونکہ ساڈے بھین بھرا ساڈے نال ہون گے۔
5. کجھ بھین بھراواں نُوں کدی کدار اپنے ہمایماناں تے بھروسا کرنا مشکل کیوں لگدا اے؟
5 کدی کدار کجھ بھین بھراواں نُوں اپنے ہمایماناں تے بھروسا کرنا ایس لئی مشکل لگدا اے کیونکہ کسے نے اوہناں دا بھروسا توڑیا سی یاں فیر اپنے کسے وعدے نُوں پورا نئیں کیتا۔ یاں ہو سکدا اے کہ کلیسیا دے کسے بھین یاں بھرا دی کسے گل یاں کم دی وجہ توں اوہناں نُوں بوہت تکلیف پہنچی اے۔ جدوں اِنج ہوندا اے تے شاید سانوں دُوجیاں تے بھروسا کرنا مشکل لگے۔ پر کیہڑی چیز ساڈی مدد کرے گی تاکہ اَسی اپنے ہمایماناں تے بھروسا رکھیے؟
محبت بھین بھراواں تے بھروسا کرن چ ساڈی مدد کردی اے
6. محبت بھین بھراواں تے بھروسا کرن چ ساڈی مدد کیویں کردی اے؟ (1-کُرنتھیوں 13:4-8)
6 محبت بھروسے دی بنیاد ہوندی اے۔ 1-کُرنتھیوں 13 باب چ محبت بارے کجھ ایہو جہیاں گلاں دَسیاں گئیاں نیں جنہاں دی مدد نال اَسی اپنے بھین بھراواں تے بھروسا کر سکنے آں یاں فیر دُبارہ توں اوہناں تے اپنا بھروسا مضبوط کر سکنے آں۔ (1-کُرنتھیوں 13:4-8 نُوں پڑھو۔) مثال لئی، 4 ایت چ دَسیا گیا اے کہ محبت صبر کردی اے تے مہربان اے۔ یہوواہ اوہدوں وی ساڈے نال صبر نال پیش آندا اے جدوں اَسی اوہدے خلاف گُناہ کرنے آں۔ جے یہوواہ اِنج کردا اے تے سانوں وی اوہدوں اپنے بھین بھراواں نال صبر نال پیش آنا چاہی دا اے جدوں اوہناں دے کسے کم یاں گل دی وجہ توں ساڈا دل دُکھدا اے۔ 5 ایت چ دَسیا گیا اے کہ محبت غصے چ بھڑک نئیں اُٹھدی تے غلطیاں دا حساب نئیں رکھدی۔ سانوں اپنے بھین بھراواں دِیاں غلطیاں دا حساب نئیں رکھنا چاہی دا یعنی سانوں ایہہ بُھل جانا چاہی دا اے کہ ماضی چ اوہناں نے ساڈے خلاف کیہہ کیتا سی۔ واعظ 7:9 چ دَسیا گیا اے کہ سانوں کسے دی گل دا چھیتی بُرا نئیں منانا چاہی دا۔ ایس لئی ایہہ چنگا ہوئے گا کہ اَسی اِفسیوں 4:26 چ لکھی ایس نصیحت تے عمل کرئیے: سورج دے ڈُبن تک اپنا غصہ دُور کر لوو۔
7. متی 7:1-5 چ دِتے گئے اصول دُوجیاں تے بھروسا کرن چ ساڈی مدد کیویں کرن گے؟
7 اِک ہور گل جیہڑی بھین بھراواں تے بھروسا کرن چ ساڈی مدد کرے گی اوہ ایہہ وے کہ اَسی اوہناں نُوں اوسے نظر نال ویکھئے جیس نظر نال یہوواہ اوہناں نُوں ویکھدا اے۔ اوہ اوہناں نُوں پیار کردا اے تے اوہناں دِیاں غلطیاں دا حساب نئیں رکھدا۔ سانوں اوہدی مثال تے چلنا چاہی دا اے۔ (زبور 130:3) سانوں اپنے بھین بھراواں دِیاں خامیاں دی بجائے اوہناں دِیاں خوبیاں تے اوہناں کماں تے دھیان دینا چاہی دا اے جیہڑے اوہ کر سکدے نیں۔ (متی 7:1-5 نُوں پڑھو۔) سانوں ایس گل تے بھروسا رکھنا چاہی دا اے کہ ساڈے ہمایمان دِلوں چنگے کم کرنا چاہندے نیں کیونکہ محبت ساریاں گلاں تے یقین کردی اے۔ (1-کُرنتھیوں 13:7) پر ایہدا ایہہ مطلب نئیں کہ یہوواہ چاہندا اے کہ اَسی اَکھاں بند کر کے دُوجیاں تے بھروسا کر لئیے سگوں اوہ چاہندا اے کہ اَسی ایس لئی اِنج کرئیے کیونکہ اوہناں نے اپنے کماں توں ثابت کیتا اے کہ اوہناں تے بھروسا کیتا جا سکدا اے۔ *
8. اَسی اپنے بھین بھراواں تے بھروسا کرنا کیویں سکھ سکنے آں؟
8 عزت وانگوں بھروسا کمان چ وی وقت لگدا اے۔اَسی اپنے بھین بھراواں تے بھروسا کرنا کیویں سکھ سکنے آں؟ سانوں اوہناں نُوں چنگی طرحاں جانن دی کوشش کرنی چاہی دی اے۔ عبادتاں تے اوہناں نال گل بات کرو تے اوہناں نال مِل کے مُنادی کرو۔ اوہناں نال صبر نال پیش آؤ تے اوہناں نُوں وقت دَوو تاکہ اوہ اپنے آپ نُوں بھروسے دے لائق ثابت کر سکن۔ ہو سکدا اے کہ شروع شروع چ تُسی اپنے دل دی ہر گل اوہناں نُوں نہ دَسو۔ پر جیویں جیویں تواڈی دوستی مضبوط ہوندی جائے گی تواڈے لئی اوہناں نُوں اپنے دل دی گل دَسنا اسان ہوندا جائے گا۔ (لُوقا 16:10) پر جے کوئی بھین بھرا تواڈا بھروسا توڑ دیندا اے تے تُسی کیہہ کر سکدے او؟ فوراً اوہدے نال دوستی نہ توڑو تے معاملے نُوں تھوڑا وقت دَوو۔ کسے اِک بھین یاں بھرا دی وجہ توں دُوجے بھین بھراواں تے بھروسا کرنا نہ چھڈو۔ آؤ ایس بارے پاک کلام چوں خدا دے کجھ بندیاں دِیاں مثالاں تے غور کرئیے جنہاں نے اوس ویلے وی دُوجیاں تے بھروسا کرنا نئیں چھڈیا جدوں کجھ لوکاں دے کماں دی وجہ توں اوہناں نُوں مایوسی ہوئی۔
اوہناں لوکاں توں سکھو جنہاں نے دُوجیاں تے بھروسا کرنا نئیں چھڈیا
بھانویں کہ شروع چ عیلی نے حنّہ نال صحی طرحاں گل نئیں کیتی پر فیر وی حنّہ عبادت لئی یہوواہ دے بندوبست تے بھروسا کردی رہی۔ (پیراگراف نمبر 9 نُوں ویکھو۔)
9. (الف) حنّہ نے اوہدوں وی یہوواہ دے بندوبست تے بھروسا کیویں ظاہر کیتا جدوں خدا وَلّوں مقرر کیتے کجھ بندیاں نے غلطیاں کیتیاں؟ (ب) یہوواہ دے اِنتظام تے بھروسا کرن بارے تُسی حنّہ توں کیہہ سکھیا اے؟
9 ہو سکدا اے کہ کلیسیا چ ذمےداری رکھن والے کسے بھرا نے کوئی ایہو جیہا کم کیتا اے جدی وجہ توں تواڈا دل دُکھیا اے۔ ایہو جہے حالات چ توانوں حنّہ دی مثال تے غور کرن نال بوہت فائدہ ہو سکدا اے۔ حنّہ دے زمانے چ وڈا کاہن عیلی یہوواہ دی عبادت کرن چ بنیاِسرائیل دی رہنمائی کر رہیا سی۔ پر اوہدا گھرانہ دُوجیاں لئی چنگی مثال قائم نئیں کر رہیا سی۔ اوہدے پُتر وی کاہن سن پر اوہ بوہت سارے بھیڑے تے گندے کم کر رہے سن۔ اوہناں دے پیو عیلی نے اوہناں دی چنگی طرحاں درستی نئیں کیتی۔ پر فیر وی یہوواہ نے فوراً عیلی نُوں وڈے کاہن دے عہدے توں نئیں ہٹایا۔ فیر وی حنّہ نے ایہہ نئیں سوچیا کہ اوہ اوہدوں تک خیمۂاِجتماع چ جا کے یہوواہ دی عبادت نئیں کرے گی جدوں تک عیلی وڈا کاہن اے۔ تے بعد چوں جدوں حنّہ دُکھی ہو کے یہوواہ کولوں دُعا کر رہی سی تے عیلی نُوں لگیا کہ اوہ شراب دے نشے چ اے تے پوری گل جانے بغیر ای اوہ حنّہ نُوں بُرا بھلا کہن لگ پیا۔ (1-سموئیل 1:12-16) پر ایس سب دے باوجود حنّہ نے یہوواہ خدا نال وعدہ کیتا کہ جے اوہدا پُتر ہویا تے اوہ اوہنوں خیمۂاِجتماع چ خدمت کرن لئی دے دَوے گی جتھے اوس بچے نُوں عیلی دی نگرانی چ رہنا سی۔ (1-سموئیل 1:11) پر کیہہ عیلی دے پُتراں دی درستی کرن دی ضرورت نئیں سی؟ بالکل سی تے وقت آن تے یہوواہ نے اِنج کیتا وی۔ (1-سموئیل 4:17) پر ایہدے دوران ای یہوواہ نے حنّہ نُوں اوہدی دُعا دا جواب دِتا تے اوہنوں اِک پُتر دِتا جدا ناں سموئیل رکھیا گیا۔—1-سموئیل 1:17-20۔
10. کجھ لوکاں توں دھوکھا کھان دے بعد وی بادشاہ داؤد نے کیویں وکھایا کہ اوہ دُوجیاں تے بھروسا کردا اے؟
10 کیہہ توانوں کدی کسے قریبی دوست نے دھوکھا دِتا اے؟ جے ہاں تے بادشاہ داؤد دی مثال تے غور کرو۔ اوہدے اِک دوست دا ناں اخیتفل سی۔ جدوں ابیسلوم اپنے پیو داؤد دے تخت تے قبضہ کرن دی کوشش کر رہیا سی تے اخیتفل نے ایس بغاوت چ ابیسلوم دا ساتھ دِتا۔ ذرا سوچو کہ جدوں داؤد نُوں پتہ چلیا ہوئے گا کہ اوہدا دوست تے اوہدا پُتر اوہدے خلاف ہو گئے نیں تے اوہنوں کِنّاں دُکھ ہویا ہوئے گا۔ اینے قریبی لوکاں توں دھوکھا کھان دے باوجود وی داؤد نے دُوجیاں تے بھروسا کرنا نئیں چھڈیا۔ اوہ اپنے دوست حوسی تے بھروسا کردا رہیا جنہے بغاوت چ ابیسلوم دا ساتھ نئیں دِتا تے حوسی نے وی داؤد دے بھروسے نُوں ٹُٹن نئیں دِتا۔ اوہ اوہدا سچا دوست ثابت ہویا ایتھوں تک کہ اوہنے داؤد دی جان بچان لئی اپنی جان خطرے چ پا دِتی۔—2-سموئیل 17:1-16۔
11. نابال دے اِک نوکر نے کیویں بھروسا ظاہر کیتا؟
11 ذرا نابال دے اِک نوکر دی مثال تے وی غور کرو۔ داؤد تے اوہدے ساتھیاں نے نابال دے نوکراں دی حفاظت کیتی سی۔ پر بعد چوں جدوں داؤد نے اپنے ساتھیاں لئی نابال کولوں کھان پین دِیاں کجھ چیزاں منگیاں تے نابال نے اِنکار کر دِتا۔ ایہہ سُن کے داؤد اینے غصے چ آ گیا کہ اوہنے نابال دے گھرانے دے ہر مرد نُوں مارن دا فیصلہ کیتا۔ نابال دے اِک نوکر نے ایہہ ساری گل نابال دی بیوی ابیجیل نُوں دَسی۔ اپنی جان بچا کے بھجن دی بجائے اوس نوکر نے ابیجیل تے بھروسا کیتا کہ اوہ سب کجھ ٹھیک کر دَوے گی۔ اوہ نوکر ابیجیل تے ایس لئی بھروسا کر پایا کیونکہ ابیجیل اپنی سمجھداری لئی بڑی مشہور سی۔ تے بعد چ جو کجھ ہویا اوہدے توں ثابت ہو گیا کہ اوس نوکر نے ابیجیل تے بھروسا کر کے بالکل صحی کیتا اے۔ ابیجیل نے بڑی دلیری نال داؤد نُوں غلط قدم چُکن توں روک لیا۔ (1-سموئیل 25:2-35) اوہنوں پورا بھروسا سی کہ داؤد سمجھداری نال کم کرے گا۔
12. یسوع مسیح نے اپنے شاگرداں دِیاں غلطیاں دے باوجود وی اوہناں تے بھروسا کیویں ظاہر کیتا؟
12 ایہہ سچ اے کہ یسوع دے شاگرداں نے غلطیاں کیتیاں سن پر فیر وی یسوع اوہناں تے بھروسا کردا سی۔ (یوحنا 15:15، 16) جدوں یعقوب تے یوحنا نے یسوع مسیح کولوں درخاست کیتی کہ اوہ اپنی بادشاہی چ اوہناں نُوں وڈا رُتبہ دَوے تے یسوع نے ایہہ نئیں سوچیا کہ اوہ غلط نیت نال خدا دی خدمت کر رہے نیں تے نہ ای اوہناں نُوں رسولاں دے عہدے توں ہٹایا۔ (مرقس 10:35-40) بعد چوں جدوں یسوع نُوں گرفتار کر لیا گیا تے اوس رات اوہدے سارے شاگرد اوہنوں چھڈ کے بھج گئے۔ (متی 26:56) پر فیر وی یسوع نے اوہناں تے بھروسا کرنا نئیں چھڈیا۔ اوہ جان دا سی کہ اوہدے شاگرد عیبدار نیں تے اوہ آخر تک اوہناں نال محبت کردا رہیا۔ (یوحنا 13:1) یسوع نے تے مُردیاں چوں زندہ ہون دے بعد وی اپنے 11 وفادار رسولاں نُوں اِک بوہت خاص ذمےداری دِتی یعنی شاگرد بنان دے کم دی پیشوائی کرنا تے اوہدیاں قیمتی بھیڈاں دا خیال رکھنا۔ (متی 28:19، 20؛ یوحنا 21:15-17) ایہناں عیبدار بندیاں تے یسوع دا بھروسا بے کار نئیں گیا۔ ایہہ سارے رسول مردے دم تک وفاداری نال یہوواہ دی خدمت کردے رہے۔ بےشک حنّہ، داؤد، نابال دے نوکر، ابیجیل تے یسوع مسیح نے عیبدار انساناں تے بھروسا کرن دی بڑی ودھیا مثال قائم کیتی۔
اپنے بھین بھراواں تے فیر توں بھروسا کرو
13. سانوں کیہڑی وجہ توں دُوجیاں تے بھروسا کرنا مشکل لگ سکدا اے؟
13 کیہہ تواڈے نال کدی اِنج ہویا اے کہ تُسی کسے تے بھروسا کر کے اوہنوں راز دی کوئی گل دَسی اے پر بعد چ توانوں پتہ چلیا ہوئے کہ اوہنے تواڈا بھروسا توڑ دِتا اے؟ ایہہ بڑی دُکھ پونچان والی گل ہوندی اے۔ اِک وار اِک بھین نے کلیسیا دے اِک بزرگ تے بھروسا کر کے اوہنوں اپنے کسے معاملے بارے دَسیا۔ اگلے دن اوس بزرگ دی بیوی اوس بھین دا حوصلہ ودھان آئی جدا مطلب سی کہ اوس بزرگ نے اوس بھین دی گل اپنی بیوی نُوں دَس دِتی اے۔ اوس بزرگ تے اوس بھین دا بھروسا ختم ہو گیا سی۔ پر اوس بھین نے اِک بوہت چنگا کم کیتا۔ اوہنے ایس معاملے بارے اِک ہور بزرگ کولوں مدد لئی۔ اوہنے بھین دی مدد کیتی تاکہ اوہ دُبارہ توں اوس بھرا تے باقی بزرگاں تے اپنا بھروسا قائم کر سکے۔
14. دُوجیاں تے بھروسا کرن چ اِک بھرا نُوں مدد کیویں ملی؟
14 کافی عرصے توں اِک بھرا دا دل دو بزرگاں توں کھٹا ہو گیا سی۔ اوہنوں لگدا سی کہ اوہ اوہناں تے بھروسا نئیں کر سکدا۔ پر فیر اوہ اِک بھرا دی گل بارے سوچن لگ پیا جدی اوہ بوہت عزت کردا سی۔ اوس بھرا نے ایہہ زبردست گل کہی سی: ”شیطان ساڈا دُشمن اے، ساڈے بھین بھرا نئیں۔“ بھرا نے ایس گل تے بوہت سوچوچار کیتا تے یہوواہ توں دُعا کرن دے بعد آخر اوہنے اوہناں دونواں بزرگاں نال صلح کر لئی۔
15. دُوجیاں تے دُبارہ بھروسا کرن چ وقت کیوں لگ سکدا اے؟ اِک مثال دَوو۔
15 کیہہ تواڈے کولوں کدی یہوواہ دی خدمت چ کوئی ذمےداری واپس لئی گئی اے؟ ایس گل توں بوہت تکلیف پونچ سکدی اے۔ بھین گریٹا تے اوہناں دی امی جرمنی چ رہندے سن جتھے نازیاں دی حکومت سی۔ 1930 توں بعد جدوں ساڈے کم تے اوتھے پابندی لگی ہوئی سی تے اوہ دونویں بڑی وفاداری نال یہوواہ دی خدمت کر رہیاں سن۔ بھین گریٹا اپنے ہمایماناں لئی مینارِنگہبانی رسالے دِیاں کاپیاں ٹائپ کردی سی تے اوہنوں ایہہ کم کر کے بڑی خوشی مِلدی سی۔ پر جدوں بھراواں نُوں پتہ چلیا کہ بھین گریٹا دے ابو سچائی دے خلاف نیں تے اوہناں نے بھین گریٹا کولوں ایہہ شرف لے لیا کیونکہ اوہناں بھراواں نُوں ڈر سی کہ بھین گریٹا دے ابو مخالفاں نُوں کلیسیا بارے معلومات دے دین گے۔ پر بھین گریٹا دِیاں مشکلاں ایتھے ای ختم نئیں ہوئیاں۔ جدوں دُوجی عالمی جنگ چل رہی سی تے اوس سارے عرصے دے دوران بھرا اوہنوں یاں اوہدی ماں نُوں مینارِنگہبانی دی کوئی کاپی نئیں دیندے سن تے جے ایہہ بھیناں اوہناں نُوں گلی چ مِلدیاں سن تے بھرا اوہناں نُوں بلاندے وی نئیں سن۔ ایس سب دی وجہ توں بھین گریٹا دا دل ایناں دُکھیا کہ اوہ اِک لمے عرصے تک اوہناں بھراواں نُوں معاف نئیں کر پائی تے اوہناں تے بھروسا نئیں کر پائی۔ پر وقت گزرن دے نال نال اوہ ایہہ سمجھ گئی کہ یہوواہ نے اوہناں بھراواں نُوں معاف کر دِتا ہوئے گا تے اوہنوں وی ہُن ایہناں بھراواں نُوں معاف کر دینا چاہی دا اے۔
”شیطان ساڈا دُشمن اے، ساڈے بھین بھرا نئیں۔“
16. سانوں اپنے بھین بھراواں تے بھروسا کرن لئی سخت کوشش کیوں کرنی چاہی دی اے؟
16 جے تواڈے نال وی اوہی کجھ ہویا اے جو بھین گریٹا دے نال ہویا سی تے بھین بھراواں تے بھروسا کرن دی پوری کوشش کرو۔ اِنج کرن لئی شاید توانوں کجھ وقت لگے پر یاد رکھو کہ ایہناں کوششاں دا توانوں بوہت فائدہ ہوئے گا۔ ایہدے لئی ذرا اِک مثال تے غور کرو۔ جے کوئی چیز کھان دی وجہ توں تواڈا پیٹ خراب ہو جاندا اے تے تُسی کھان پین چ تھوڑی احتیاط ضرور کرو گے۔ پر ایس وجہ توں تُسی کھانا پینا نئیں چھڈو گے۔ ایسے طرحاں جے ساڈا بھروسا توڑیا گیا اے تے فیر وی سانوں بھین بھراواں تے بھروسا کرنا چھڈ نئیں دینا چاہی دا کیونکہ اَسی سارے عیبدار آں۔ جدوں اَسی فیر توں اپنے بھین بھراواں تے بھروسا کراں گے تے اَسی پہلاں توں زیادہ خوش رہ سکاں گے تے ایس گل تے ہور وی زیادہ دھیان دے پانواں گے کہ اَسی کیہہ کر سکنے آں تاکہ اَسی کلیسیا چ بھین بھراواں تے بھروسا کر سکئے۔
17. دُوجیاں تے بھروسا کرنا ایناں ضروری کیوں اے تے اگلے مضمون چ اَسی کیہہ سکھاں گے؟
17 شیطان دی دُنیا چ بوہت گھٹ لوکاں تے بھروسا کیتا جا سکدا اے۔ پر اَسی اپنے بھین بھراواں تے بھروسا کر سکنے آں کیونکہ ساڈے بھروسے دی بنیاد محبت اے۔ ایس بھروسے دی وجہ توں اَسی نہ صرف ہُن خوش رہ سکنے آں تے ساڈا ایکا مضبوط رہندا اے سگوں اَسی آن والے وقت چ وی مشکلاں دا سامنا کر سکاں گے۔ پر اوہدوں توانوں کیہہ کرنا چاہی دا اے جے کسے نے تواڈا دل دُکھایا اے تے اوہدے تے توانوں بھروسا کرنا مشکل لگ رہیا اے؟ معاملے نُوں یہوواہ دی نظر نال ویکھن دی کوشش کرو، بائبل دے اصولاں تے عمل کرو، بھین بھراواں لئی اپنے دل چ گہری محبت پیدا کرو تے پاک کلام چ دَسیاں خدا دے بندیاں دِیاں مثالاں تے عمل کرو۔ اِنج اَسی اپنے دل چوں ناراضگی کڈھ پانواں گے تے فیر توں اپنے بھین بھراواں تے بھروسا کرن لگ پوواں گے۔ فیر سانوں ایہو جہے بےشمار دوست مِلن گے جیہڑے بھرا توں ودھ محبت وکھاندے نیں۔ (امثال 18:24) پر دُوجیاں تے بھروسا کرنا کافی نئیں اے سگوں سانوں آپ وی بھروسے دے لائق بننا چاہی دا اے۔ اگلے مضمون چ اَسی ایس بارے گل کراں گے کہ اَسی کیویں ثابت کرسکنے آں کہ ساڈے تے بھروسا کیتا جا سکدا اے۔
گیت نمبر 106: سچی محبت وکھاؤ
^ سانوں اپنے بھین بھراواں تے بھروسا کرنا چاہی دا اے۔ پر کدی کدار اِنج کرنا مشکل ہوندا اے کیونکہ شاید کسے نے ساڈے بھروسے نُوں توڑیا اے۔ ایس مضمون چ اَسی ویکھاں گے کہ پاک کلام دے اصولاں تے عمل کرن تے خدا دے بندیاں دِیاں مثالاں تے غور کرن نال ساڈی مدد کیویں ہوئے گی تاکہ اَسی اپنے ہمایماناں تے بھروسا کر سکئے یاں اوہناں بھین بھراواں تے دُبارہ بھروسا کر سکئے جنہاں نے ایہنوں توڑ دِتا سی۔
^ بائبل چ سانوں خبردار کیتا گیا اے کہ شاید کلیسیا چ کجھ لوک بھروسے دے لائق نہ ہون۔ (یہوداہ 4) اِنج بوہت گھٹ ہوندا اے پر ہو سکدا اے کہ کلیسیا چ کجھ لوک سچائی نُوں توڑ مروڑ کے پیش کرن دی کوشش کرن۔ (اعمال 20:30) سانوں ایہو جہے لوکاں تے نہ تے بھروسا کرنا چاہی دا اے تے نہ ہی اوہناں دی گل سننی چاہی دی اے۔
