1. Σόσκε να κερέλα αμένγκε εντύπωση σο μπουτ τζενέ αντιβές ναστί ντένα μπέσα ο εκ ι γιαβερέσκε;

 Ο ΤΖΕΝΕ κο ντουνιάς κι Μπενγκέσκο να τζανένα κάσκε τι ντεν μπέσα. Μπουτ φαρ πφανγκιόλα λένγκο γκι κατά έμποροι, κατά πολιτικοί ντα κατά θρησκεία. Ντα ναστί ντένα μπέσα αμαλένγκε, γειτονένγκε, ατζέ-ντα τζενένγκε πουμαρέ φαμιλιάταρ. Ανταβά δεν πρέπει τι κερέλ αμένγκε εντύπωση. Η Αγία Γραφή βακερντάας: «Κο τελευταία ντιβεσά . . . ο τζενέ . . . να κα αβέν αφοσιωμέ, . . . κα κατηγορίνεν με ψεύτικα λάφια ι γιαβερέν, κα αβέν . . . προδότες». Ανταβά μανγκέλα τι βακερέλ ότι ο τζενέ κα μοιάζενας κο Μπενγκ, κο ντεβέλ ανταλέ ντουνιάσκο, σο ναστί ντάσα λέσκε μπέσα.​—2 Τιμ. 3:​1-4· 2 Κορ. 4:4.

2. (α) Κάσκε μπορίνασα τι ντας σαρί αμαρί μπέσα; (β) Σο μπέκιμ πουτσένα-πες μερικά τζενέ;

² Σαρ Χριστιανοί όμως τζανάσα ότι μπορίνασα τι ντας σαρί αμαρί μπέσα κο Ιεχωβά. (Ιερ. 17:7, 8) Ισινάμ σίγουροι ότι μανγκέλα-αμέν ντα ότι “να κα μουκχέλ ποτές” πι αμαλέν. (Ψαλμ. 9:​10) Μπορίνασα τι τθεράς μπέσα ι Ιησού Χριστόσκε-ντα σόσκε ντινάς πι ζωή αμένγκε. (1 Πέτρ. 3:​18) Ντα ντικχλάμ αμαρέ γιακχίντζαρ ότι η Γραφή ντέλα λατσσέ συμβουλές. (2 Τιμ. 3:​16, 17) Ισινάμ σίγουροι ότι μπορίνασα τι ντας μπέσα κο Ιεχωβά, κο Ιησούς ντα κι Γραφή. Αλλά ισί τζενέ σο μπέκιμ πουτσένα-πες άμα μπορίνενα πάντα τι ντεν μπέσα ι πφραλένγκε ντα ι πφενίνγκε κι κχανγκιρί. Άμα η απάντηση ισί βα, σόσκε μπορίνασα τι ντας λένγκε μπέσα;

3. Καβά μπαρό προνόμιος τθεράσα; (Μάρκος 10:​29, 30)

³ Ο Ιεχωβά τραμπιντάς-αμέν τι αβάς αντρέ λέσκε φαμιλιάτε σο ισί σαρό κο ντουνιάς ντα ντέλα-λες λατρεία. Ανταβά ισί εκ μπουτ μπαρό προνόμιος ντα κερέλα αμένγκε λατσσιπέ! (Διαβάνεν Μάρκος 10:​29, 30) Σαρό κο ντουνιάς, τθεράσα πφραλέν ντα πφενίν σο μανγκένα ι Ιεχωβάς σαρ αμέν ντα σο μαρένα-πες  τι κερέν λέσκε κανόνες πουμαρέ ζωγιάτε. Αμαρί τσσιπ, η κουλτούρα ντα ο ιριαϊπέ μπέκιμ τι ισί γιαβέρσοϊ, αλλά μανγκάσα-λεν ατζέ-ντα άμα ντικχάσα-λεν πρώτη φαρ. Μπεϊντίνασα μπουτ τι ντας δόξα ντα λατρεία αμαρέ Νταντές, ι Ιεχωβάς, σο μανγκέλα-αμέν.​—Ψαλμ. 133:1.

4. Σόσκε χρειαζίντιβασα αμαρέ πφραλέν ντα πφενίν;

⁴ Ακανά πο μπουτ από ποτές, χρειαζίντιβελα τι ατσσάς ενωμέ αμαρέ πφραλέντζαρ ντα πφενίντζαρ. Μπουτ φαρ βοηθίνενα-αμέν τι βάντας αμαρό πφαριπέ. (Ρωμ. 15:1· Γαλ. 6:2) Επίσης, ντένα-αμέν ζορ για μα τι τσσιναβάς τι κεράς μπουτ πράγματα ι Ιεχωβάσκε ντα τι αβάς λέσκε αμαλά. (1 Θεσ. 5:​11· Εβρ. 10:​23-25) Ανέν τουμαρέ γκοντιάτε σαρ κα νιωθίναας άμα να τθεράας ο αρακχαϊπέ ι κχανγκιριάκο για τι βοηθίνελ-αμέν τι τζας κόντρα αμαρέ ντουσμανίντε​—κο Μπενγκ ντα λέσκε πφιρνέ ντουνιάστε. Ο Μπενγκ ντα οντουλά σο ισί λέσκε βαστέστε ατζεχάνικ κα τσσουβέν-λεν ι Ντεβλέσκε υπηρετόντζαρ. Αλλά αζομάν κα τθεράς μπαρί εκτίμηση σο αμαρέ πφραλά ντα πφενιά κα αβέν πασ’ αμέντε!

5. Σόσκε μπάζιμα ισί δύσκολος μερικέ τζενένγκε τι ντεν μπέσα πουμαρέ πφραλένγκε ντα πφενίνγκε;

⁵ Μερικοί όμως δυσκολίντιβενα τι ντεν μπέσα πουμαρέ πφραλένγκε, σόσκε εκ πφραλ μπέκιμ μουτθαντάς κάτι σο βακερντέας λέσκε ή να ατσσικιαρντάς πο λάφι εκχέ πραγμάσκε. Ή εκ πφραλ κι κχανγκιρί μπέκιμ βακερντάς ή κερντάς κάτι σο πφανγκλάς μπουτ λένγκο γκι. Άμα αβιλό αμένγκε κάτι ασακό, μπέκιμ ισί δύσκολος τι ντας μπέσα ι γιαβερένγκε. Άρα, σο κα βοηθίνελ-αμέν τι μπαριαράς αμαρί μπέσα κο πφραλά ντα κο πφενιά;

6. Σαρ βοηθίνελα-αμέν ο μανγκιπέ τι μπαριαράς αμαρί μπέσα; (1 Κορινθίους 13:​4-8)

⁶ Για τι ντας μπέσα ι γιαβερένγκε πρέπει τι μανγκάς-λεν. Κι Πρώτη Κορινθίους, κο κεφάλαιος 13, ντικχάσα ότι ο μανγκιπέ σικάντιβελα  μπουτέ τροπόντζαρ. Ανταλά τρόποι βοηθίνενα-αμέν τι μπαριαράς αμαρί μπέσα ι γιαβερένγκε ή τι ντας λένγκε πάλι μπέσα. (Διαβάνεν 1 Κορινθίους 13:​4-8) Για παράδειγμας, ο εδάφιος 4 βακερέλα ότι «ο μανγκιπέ κερέλα υπομονή ντα σικαβέλα λατσσιπέ». Ο Ιεχωβά κερέλα υπομονή αμέντζαρ, ατζέ-ντα κάνα αμαρτίνασα κόντρα λέστε. Οτθάρ, πρέπει αμέν-ντα τι κεράς υπομονή αμαρέ πφραλέντζαρ άμα βακερένα ή κερένα πράγματα σο νευριάνενα-αμέν ή πφανγκένα αμαρό γκι. Ο εδάφιος 5 βακερέλα: «[Ο μανγκιπέ] να νευριάνελα. Να ατσσικιαρέλα χολί κάνα αβέλα-πες κάτι κακός». Να κα αβέλας σωστός τι “ατσσικιαράς χολί κάνα αβέλα-πες κάτι κακός”, δηλαδή τι τθεράς αμαρέ γκοντιάτε οντουλά σο κερντέ αμαρέ πφραλά ντα τι ατσσικιαράς-λεν γιαβερέ ντιβεσέσκε. Ο εδάφιος Εκκλησιαστής 7:9 βακερέλα ότι δεν πρέπει τι “σιγκιαράς τι προσβαλίντιβας”. Ισί μπουτ πο λατσσό τι κεράς ο λάφια ι εδαφιόσκε Εφεσίους 4:​26: «Τι νασκιαρέν τουμαρί χολί πριν τι περέλ ο κχαμ»!

7. Σαρ βοηθίνενα-αμέν ο αρχές σο ισί κο εδάφια Ματθαίος 7:​1-5 τι μπαριάς αμαρί μπέσα;

⁷ Κάτι γιαβέρ σο βοηθίνελα-αμέν τι μπαριαράς αμαρί μπέσα ισί τι ντικχάς ι πφραλέν ντα ι πφενίν σαρ ντικχέλα-λεν ο Ιεχωβά. Ο Ντεβέλ μανγκέλα-λεν ντα να ατσσικιαρέλα χολί λένγκε αμαρτιένγκε. Αμέν-ντα δεν πρέπει τι κεράς-λες ανταβά. (Ψαλμ. 130:3) Αντίς τι ντικχάς λένγκε ελαττώματα, πρέπει τι μαράς-αμέν τι ντικχάς λένγκε λατσσέ ιδιότητες ντα τι σκεφτίνας ο λατσσέ πράγματα σο μπορίνενα τι κερέν. (Διαβάνεν Ματθαίος 7:​1-5) Πακιάσα ότι μανγκένα τι κερέν ο λατσσιπέ ντα να μανγκένα τι πφανγκέν αμαρό γκι σόσκε ο μανγκιπέ «πακιάλα-λεν σαρέ». (1 Κορ. 13:7) Ανταβά λάφι να μανγκέλα τι βακερέλ ότι ο Ιεχωβά μπεκλεντίνελα τι ντας μπέσα ι γιαβερένγκε πφαντέ γιακχίντζαρ. Αλλά μπεκλεντίνελα τι ντας λένγκε μπέσα σόσκε σικαντέ ότι ισί μπεσαλήδες. *

8. Σαρ μπορίνενα τι μπαριαρέν τουμαρί μπέσα ι πφραλένγκε;

⁸ Η μπέσα, σαρ ο σεβασμός-ντα, κερδίντιβελα, ντα ανταβά μανγκέλα σαάτι. Σαρ μπορίνενα τι μπαριαρέν τουμαρί μπέσα ι πφραλένγκε; Σικλιόν-λεν λατσσές. Κερέν λέντζαρ λάφι κο συναθροίσεις. Νικιόν λέντζαρ κο έργος. Σικαβέν λένγκε υπομονή, καζόμ ντένα-λεν ι ευκαιρία τι σικαβέν ότι ισί μπεσαλήδες. Κι αρχή μπέκιμ τι τραμπίνεν μα τι μουτθαβέν εκχέ τζενέσκε, σο σικλιλέν-λες ακανά, σαρέ οντουλά σο τθερένα τουμαρέ γκοντιάτε ντα τουμαρέ γκίστε. Καζόμ σικλιόνα-λες πο λατσσές, μπέκιμ νιωθίνενα πο άνετα τι βακερέν λέσκε σο τθερένα τουμαρέ γκίστε. (Λουκ. 16:​10) Αλλά σο μπορίνενα τι κερέν άμα εκ πφραλ σο ντένας λέσκε μπέσα προδοντάς-τουμέν; Μα σιγκιαρέν τι κερέν-λες πέρα. Μουκχέν τι νακχέλ χάνικ βακίτι. Ντα μα μουκχέν οντουλά σο κερένα μερικοί τι κερέν-τουμέν τι χασαρέν ι μπέσα σο τθερένα τουμαρέ πφραλένγκε. Οπράλ ανταλέστε, κα ντικχάς ο παράδειγμας σο μουκχλέ μερικοί πιστοί υπηρέτες ι Ιεχωβάσκε. Βον, παρόλο σο πφανγκιλό λένγκο γκι μερικέ τζενένταρ, να τσσιναντέ τι ντεν μπέσα ι γιαβερένγκε.

9. (α) Σαρ ατσσικιαρντάς η Άννα πι μπέσα οντουλέντε σο τραμπιντάας ο Ιεχωβά τι αβέν υπεύθυνοι κι λατρεία παρόλο σο κερένας λάθη; (β) Σο σικλιόνα τουμέν κατά παράδειγμας ι Αννάκο; (Ντικχέν ι φωτογραφία)

⁹ Πφανγκιλό ποτές τουμαρό γκι οντουλένταρ σο κερντάς εκ υπεύθυνος πφραλ; Άμα βα, μπέκιμ τι βοηθίντιβεν κατά παράδειγμας ι Αννάκο. Αζομάν, ο αρχιερέας Ηλεί ισινέ υπεύθυνος κι  λατρεία κι Ιεχωβάσκι κο Ισραήλ. Αλλά λέσκι φαμιλί να ισινέ λατσσό παράδειγμας. Λέσκε τσσαβέ, σο ισινέ ιερείς, μπουτ φαρ κερένας μπίλατζανε ντα λουμνικανέ πράγματα. Όμως, λένγκο ντατ να κερντάς ο πο λατσσό για τι διορθώνελ-λεν. Ο Ιεχωβά να νασκιαρντάς σουγκό ι Ηλείς λέσκε θεσιάταρ. Αλλά η Άννα να τσσιναντάς τι ντελ λατρεία ι Ιεχωβάς κι σκηνή της μαρτυρίας καζόμ ισινέ ο Ηλεί αρχιερέας. Κάνα ο Ηλεί ντικχλάς ι Αννά τι προσευχίντιβελ ντιπ πφανγκέ γκίσκι, κερντάς λάθος ντα αμντισάλο ότι ισινέ ματί. Χωρίς τι ντικχέλ άμα ισινέ μπαγιά ανταβά, κριντάς ι Αννά σο τθερέλας κερκιπέ πι γκίστε. (1 Σαμ. 1:​12-16) Όμως, η Άννα ντινάς πο λάφι ότι άμα κα κερέλας τσσαβές, κα ντέλας-λες τι υπηρετίνελ κι σκηνή της μαρτυρίας, σο οτθέ κα κερέλας κουμάντος ο Ηλεί. (1 Σαμ. 1:​11) Χρειαζίντιβελας τι διορθώντιβεν ο τσσαβέ ι Ηλείσκε; Βα, ντα ο Ιεχωβά κερντάς-λες ανταβά αζομάν σο έπρεπε. (1 Σαμ. 4:​17) Μέχρι τι αβέλας-πες ανταβά, ευλογιντάς ι Αννά εκχέ τσσαβέσαρ, ι Σαμουηλίσαρ.​—1 Σαμ. 1:​17-20.

10. Σόσκε να τσσιναντάς ο βασιλιάς Δαβίδ τι ντελ μπέσα ι γιαβερένγκε παρόλο σο μερικοί προδοντέας-λες;

¹⁰ Προδοντάς-τουμέν ποτές εκ λατσσό αμάλ; Άμα βα, ανέν τουμαρέ γκοντιάτε οντουβά σο αβιλό-πες κο βασιλιάς Δαβίδ. Εκ κατά πο λατσσέ αμαλά λέσκε, ισινέ ο Αχιτόφελ. Αλλά κάνα ο τσσαβό ι Δαβιδίσκο, ο Αβεσσαλώμ, μανγκλάς τι αβέλ βοβ βασιλιάς, ο Αχιτόφελ τσσιντιντάς κατά Αβεσσαλώμ κι κόντρα σο τζάλας ι Δαβιδίσαρ. Σο μπαρί ντουκχ πρέπει τι αντάς ι Δαβιδίσκε σο τσσιναντάς τι τσσίντελ λέσταρ εμ λέσκο τσσαβό εμ εκ τζενό σο αμντίνελας-λες πο αμάλ! Ο Δαβίδ όμως να μουκχλάς ανταγιά προδοσία τι κερέλ-λες τι τσσιναβέλ τι ντελ μπέσα ι γιαβερένγκε. Συνεχιντάς τι ντελ μπέσα εκχέ γιαβερέ πιστέ αμαλέσκε, ι Χουσαΐσκε, σο να μανγκλάς τι τζαλ λέσαρ κόντρα. Ο Δαβίδ τθερέλας λόγους τι ντελ μπέσα κο Χουσαΐ. Ο Χουσαΐ σικαντάς ότι ισινέ λατσσό αμάλ. Τσσουντάς ατζέ-ντα σε κίνδυνος πι ζωή για τι βοηθίνελ ι Δαβιδίς.​—2 Σαμ. 17:​1-16.

11. Σαρ σικαντάς μπέσα εκ υπηρέτης ι Ναβαλίσκο;

¹¹ Ανέν τουμαρέ γκοντιάτε επίσης ο παράδειγμας σο μουκχλάς εκ υπηρέτης ι Ναβαλίσκο. Ο Δαβίδ ντα λέσκε μουρσά αρακχαντέας λατσσιμάσαρ ι υπηρετόν σο τθερέλας εκ Ισραηλίτης, ο Νάβαλ. Πο σοράν, ο Δαβίδ μανγκλάς κατά χουλανό Νάβαλ χαμπίματα πι μουρσένγκε,  οντουβά σο μπορίνελας τι ντελ-λες. Κάνα ο Νάβαλ να ντινάς ανταβά λογικός πράγμας σο μανγκλάς, ο Δαβίδ χολιασάλο αζόμ μπουτ σο αποφασιντάς τι μουνταρέλ σαρέ ι μουρσέν κι φαμιλί κι Ναβαλίσκι. Εκ υπηρέτης, βακερντάς-λεν σαρέ κι Ναβαλίσκι ρομνί, κι Αβιγαία. Τζουβντιόλας αντρέ κι φαμιλί, ντα τζανέλας ότι λέσκι ζωή ισινέ κο βαστά κι Αβιγαιάκε. Αντίς τι νασέλ τι σώνελ-πες, ντινάς μπέσα κι Αβιγαία, σόσκε ισινέ σίγουρος ότι βόι κα μπορίνελας τι διορθώνελ οντουβά σο αβιλό-πες. Ο υπηρέτης πακιάλας-λες ανταβά, σόσκε σαρέ τζανένας ότι η Αβιγαία ισινέ εκ γκοντιαβέρ τζουβέλ. Οντουλέσαρ σο αβιλό-πες σοράν, σικαντάς ότι τθερέλας λόγους σο ντινάς λάκε μπέσα. Η Αβιγαία μπίνταρανες κερντάς ι Δαβιδίς τι αλλάνελ γνώμη. (1 Σαμ. 25:​2-35) Βόι ντινάς μπέσα κο Δαβίδ, σόσκε τζανέλας ότι βοβ κα κερέλας ο σωστός.

12. Σαρ σικαντάς ο Ιησούς ότι ντέλας μπέσα πι μαθητένγκε παρόλο σο κερένας λάθη;

¹² Ο Ιησούς ντέλας μπέσα πι μαθητένγκε παρόλο σο κερένας λάθη. (Ιωάν. 15:​15, 16) Κάνα ο Ιάκωβος ντα ο Ιωάννης μανγκλέ κατά Ιησούς σημαντικές θέσεις κι Βασιλεία, ο Ιησούς να βακερντάς ότι να μανγκένας ι Ιεχωβάς ούτε ότι κα τσσιναβένας τι αβέν απόστολοι. (Μάρκ. 10:​35-40) Πο σοράν, σαρέ ο μαθητές ι Ιησούσκε μουκχλέ-λες ι ιράτ σο ασταρντέ-λες. (Ματθ. 26:​56) Όμως, ο Ιησούς ποτές να τσσιναντάς τι πακιάλ λέντε. Τζανέλας λατσσές λένγκε λάθη, αλλά «μανγκλάς-λεν μέχρι κο τέλος». (Ιωάν. 13:1) Ατζέ, ο αναστημέ Ιησούς ντινάς πι 11 πιστέ αποστολόντε ι σημαντική ευθύνη τι κερέν μαθητέν ντα τι αρακχαβέν λέσκε πολύτιμε μπρακέν. (Ματθ. 28:​19, 20· Ιωάν. 21:​15-17) Τθερέλας λατσσέ λόγους τι ντελ μπέσα οντουλέ ατελείς μουρσένγκε. Σαρέ υπηρετιντέ πιστά μέχρι σο μουλέ. Σίγουρα, η Άννα, ο Δαβίδ, ο υπηρέτης ι Ναβαλίσκο, η Αβιγαία ντα ο Ιησούς μουκχλέ λατσσό παράδειγμας κάνα ντινέ μπέσα ατελείς τζενένγκε.

13. Σο μπορεί τι δυσκολίνελ-αμέν τι ντας μπέσα ι γιαβερένγκε;

¹³ Αβιλό τουμένγκε ποτές τι μουτθαβέν εκχέ πφραλέσκε κάτι επειδή ντένας λέσκε μπέσα ντα σοράν τι αγαβέν ότι προδοντάς-τουμέν; Ανταβά ανέλα μπαρί ντουκχ. Εκ φαρ, εκ πφεν μουτθαντάς εκχέ πρεσβυτερόσκε κάτι σο τθερέλας τι κερέλ λάσαρ ντα ντέλας λέσκε μπέσα ότι να κα βακερέλας-λες γιαβερτθέ. Ο γιαβέρ ντιβές, η ρομνί ι πρεσβυτερόσκι λιντάς τηλέφωνος κι πφεν για τι ντελ-λα ζορ, ντα ανταλέσαρ σικαντάς ότι τζανέλας σο μουτθαντάας λάκε ρομέσκε. Σαρ αγαβάσα, η πφεν ναστί ντέλας μπέσα οντουλέ πρεσβυτερόσκε. Όμως, μπουτ σωστά, η πφεν μανγκλάς βοήθεια. Κερντάς λάφι εκχέ γιαβερέ πρεσβυτερόσαρ ανταλέσκε, ντα βοβ βοηθιντάς-λα τι ντελ πάλι μπέσα ι πρεσβυτερόνγκε.

14. Σο βοηθιντάς εκχέ πφραλές τι ντελ πάλι μπέσα;

¹⁴ Εκ πφραλ ισινέ χολιαμέ μπουτ βακίτι ντουέ πρεσβυτερόνγκε σο αμντίνελας ότι ναστί ντέλας λένγκε μπέσα. Όμως, αρχισάλο τι σκεφτίνελ εκ λάφι σο βακερντάας εκ πφραλ σο σεβάνελας-λες μπουτ. Ανταβά απλός αλλά πφερντό νόημας λάφι ισινέ: «Ο Μπενγκ ισί ο ντουσμάνι, όχι αμαρέ πφραλά». Ο πφραλ σκεφτιντάς μπουτ λατσσές ανταβά λάφι. Σοράν, κερντάς προσευχή κο Ιεχωβά τι βοηθίνελ-λες ντα μπορισάλο τι αρακχέλ-λεν ι ντουέ-ντα πρεσβυτερόντζαρ.

15. Σόσκε μπέκιμ τι χρειαζίντιβελα βακίτι για τι ντας πάλι μπέσα ι γιαβερένγκε; Βακερέν εκ παράδειγμας.

¹⁵ Χασαρντέν ποτές εκ προνόμιος; Ανταβά μπορεί τι ανέλα μπουτ ντουκχ. Η Γκρέτε ντα λάκι ντάι ισινέ αφοσιωμέ Μάρτυρες ι Ιεχωβάσκε κι ναζιστική Γερμανία κάνα αμαρό έργος τσσινάντιλο. Η Γκρέτε τθερέλας ο προνόμιος τι λατσσαρέλ περιοδικά Σκοπιά ι πφραλένγκε ντα ι πφενίνγκε. Αλλά κάνα ο πφραλά σικλιλέ ότι λάκο ντατ τζάλας κόντρα κι αλήθεια, λιντέ λάταρ ανταβά προνόμιος σόσκε νταρένας ότι  λάκο ντατ κα προδόνελας ι κχανγκιρί οντουλέντε σο τζάνας λέντζαρ κόντρα. Να τθερέλας σάντε ανταβά πρόβλημας η Γκρέτε. Σαρό κο βακίτι σο αβέλας-πες ο Δεύτερος Παγκόσμιος Πόλεμος, ο πφραλά να ντένας κι Γκρέτε ντα λάκε νταγιάτε περιοδικά ντα ούτε κερένας λέντζαρ λάφι κάνα ντικχένας-λεν κο ντρομ. Ανταβά πφανγκλάς μπουτ λένγκο γκι! Η ντουκχ ισινέ μπουτ μπαρί, ντα η Γκρέτε βακερντάς ότι έπρεπε τι νακχέλ μπουτ βακίτι για τι μπορίνελ τι συγχωρίνελ οντουλέ πφραλέν ντα τι ντελ λένγκε πάλι μπέσα. Τελικά όμως αγαντάς ότι ο Ιεχωβά πρέπει τι συγχωριντάς-λεν, οτθάρ βόι-ντα έπρεπε τι κερέλ-λες ανταβά. *

16. Σόσκε πρέπει τι κεράς ο πο λατσσό για τι σικλιάς τι ντας μπέσα αμαρέ πφραλένγκε ντα πφενίνγκε;

¹⁶ Άμα τουμέν-ντα νακχλέν κάτι σο πφανγκλάς αζόμ μπουτ τουμαρό γκι, κερέν ο πο λατσσό για τι ντεν πάλι μπέσα ι γιαβερένγκε. Μπέκιμ τι χρειαζίντιβελ βακίτι, αλλά αξίνελα τι κερέν ο πο λατσσό. Για παράδειγμας, άμα καέκ φαρ παθισάλαμ δηλητηρίαση εκχέ χαμπέσταρ, μπέκιμ προσοχίνασα πο μπουτ σο χάσα. Αλλά να κα τσσιναβάς ντιπ τι χας σάντε επειδή εκ φαρ χαλάμ εκ χαλαντό χαμπέ. Αντικάς, δεν πρέπει τι μουκχάς κάτι μπέτι σο νακχλάμ τι κερέλ-αμέν τι χασαράς αμαρί μπέσα σαρέ κο πφραλά ντα κο πφενιά σο τζανάσα ότι μπιάντιλε ατελείς. Κάνα κα ντας λένγκε πάλι μπέσα, κα αβάς πο ευτυχισμέ ντα κα τθεράς αμαρέ γιακχά πο μπουτ οντουλέντε σο μπορίνασα τι κεράς αμέν για τι υπαρχίντιβελ κι κχανγκιρί μπέσα.

17. Σόσκε ισί αζόμ σημαντική η μπέσα, ντα σο κα ντικχάς κο γιαβέρ μάθημας;

¹⁷ Κι Μπενγκέσκο ντουνιάς, ισί μπουτ δύσκολος τι υπαρχίντιβελ μπέσα. Αλλά ντάσα μπέσα αμαρέ πφραλένγκε ντα πφενίνγκε σόσκε μανγκάσα ο εκ ι γιαβερές. Ανταγιά μπέσα βοηθίνελα τι αβάς χαρούμενοι ντα ενωμέ ακανά ντα κα αρακχαβέλ-αμέν κο δύσκολα ντιβεσά σο τθεράσα ανγκλ’ αμέντε. Σο αβέλα-πες άμα εκ τζενό σο ντένας λέσκε μπέσα προδοντάς-τουμέν; Κερέν ο πο λατσσό για τι ντικχέν ο πράγματα σαρ ντικχέλα-λεν ο Ιεχωβά, κερέν ο αρχές ι Γραφιάκε, μπαριαρέν τουμαρί αγάπη ι πφραλένγκε ντα σικλιόν κατά παραδείγματα ι Γραφιάκε. Μπορίνασα τι νακχαβάς ι ντουκχ σο τθεράσα αμαρέ γκίστε ντα τι ντας πάλι μπέσα ι γιαβερένγκε. Κάνα κεράσα-λες ανταβά, κα ευλογίντιβας άλι αμαλέντζαρ σο κα αβέν “πο πιστοί ατζέ-ντα εκχέ πφραλέσταρ”. (Παρ. 18:​24) Αλλά να ερεσέλα τι ντας μπέσα ι γιαβερένγκε, πρέπει ο γιαβερά-ντα τι τζανέν ότι μπορίνενα τι ντεν αμένγκε μπέσα. Κο γιαβέρ μάθημας, κα ντικχάς σαρ μπορίνασα τι σικαβάς ότι αξίνελα τι ντεν αμένγκε μπέσα αμαρέ πφραλά.