1. Lamo sopakoke nkamɔ djɛ nyɛna djɛ anto wal’andja wanɛ wapalekɔ anto wokokaso ndjilela oloko?

 ANTO wal’andja wa Satana wanɛ wapewe onto wɔkɔna w’okokawɔ ndjilela oloko. Wangokiyanake efula má nanghedji djɛ ananghi y’epoto, ewandji wɛ pɔlitikɛ, la wɛ ntolo. Anto efula ndawokaka djɛ wapakoke ndjilela kaanga tolongo tɔwɔ, ansukanyi wawɔ, la kaanga ase nkfumbo yɛwɔ oloko. Nkambo djɛsɔ mpakoke ntokamoyɛ. Bible ntepelaka ante: ‘L’etsho w’ekomo . . . , anto wangoyala . . . la osambo wɔ nkɔmano, . . . emamanyɛ, . . . amfungi.’ Kɛsɔ nsakisolaka ente, anto wangokola Satana, ndjambe kɛ nkfumbo dj’akambo djɛnɛ kanga yopakoke ndjilela oloko.​—2 Ti. 3:1-4; 2 Kɔ. 4:4.

2. a) Anto wakɔna w’okokaso ndjilela oloko wɔso onkfumɔ? b) Kɛkɔnge k’anto amɔtshi okokawɔ ndawopola?

² Koko etengo oyɛso Akristo, iso ndjewaka ente iso nkoka ndjilela Yehova oloko wɔso onkfumɔ. (Jɛr. 17:7, 8) Tolekɔ l’eshikikelo ente nde ntɔkɔpaka edjinge nde ‘apakadjɛki kaanga ndambo daambi’ tolongo tɔnde. (Yee. 9:10) Iso nkoka lonkina ndjilela Kristo Yeso oloko ladjikɛnde nde alambolaka lowiko lɔnde lá nkambo djɛso. (1 Pɛ. 3:18) Tekaka lonkina má akambo watokomela ente Bible ntɔpɛyɛka ɛlɔndjɛlɔ kɛ nsɔsɔlɔ k’okokaso ndjilela oloko. (2 Ti. 3:16, 17) Tolekɔ l’eshikikelo kenkfumɔ ente iso nkoka ndjilela Yehova, Yeso, la Bible oloko. Koko anto amɔtshi nkoka ndawopola ntsha iwɔ nkokaka ndjilela wananyɔ l’ankaana yel’otshumano oloko. Ntsha nsakiso oyɛwɔnde ee, iya lamo okokaso ndawilela oloko?

3. Mpeyi k’ekekete kɛkɔnge k’okotshɛso? (Marko 10:29, 30)

³ Yehova ambɔtɔsɔná dj’iso ndɔsa opiko lá nkfumbo kel’andja w’otondo k’antɛmɔdji yɛnde. Ɔsɔ alekɔ nsɔsɔlɔ mpeyi ketoyakala ɛtshɔkɔ efula! (Wala Marko 10:29, 30.) L’andja w’otondo tolekɔ la wananyɔ l’ankaana yoka Yehova ngandji etengo iso la yenangha  la wolo djɛ mbika lá yopo y’okana l’ɛlɛmbɛ wɛnde. Otepela wɔso, nkfumbo djɛso, la ɔlɔtɔ wɔso nkoka ntshikitana la wɔwɔ, koko iso ndaakɔpaka kaanga winá w’opomanaso isawɔ mbala kɛ ntondo. Iso nkɔpaka ndjala esanga lawɔ pekapeka djɛ numɛ la ntɛmɔla Papa kɛso kɛ ngandji kel’olongo.​—Yee. 133:1.

4. Lamo oyɛso la djonyi djɛ wananyɔ l’ankaana yɛso?

⁴ Winá wɔsɔ ndeke somboleka ndjala la djonyi, djɛ ntshikala iwoke imɔ iso la wananyɔ l’ankaana yɛso ndeka ntondo. Lá mbamba imɔtshi, iwɔ ntokotshɛka djɛ ndongela ekakasano wɛso. (Ɔrɔ. 15:1; Nga. 6:2) Iwɔ ntokembɛka lonkina djɛ nkindjɛ ndapɛyɛ l’olemo wɔ Yehova la djɛ nkindjɛ ndjala la lonyuma lɔ wolo. (1 Te. 5:11; Heb. 10:23-25) Kokanela wopo w’otayalaso ntsha topawa elamelo kem’otshumano ketokotshɛ́ isankfumɔ djɛ mpikama lá ntondo k’antonyi waso, ntepela ente Satana Djabolo l’andja wande wa nyɛtshi. Lako ilá, Satana nya anto w’ɔlɔndjɛnde wakɔpa nanyɛ enkambi wɛ Ndjambe. Kokanela osasa wongoyala laso djɛ ndjala la wananyɔ l’ankaana yɛso l’ompandju wɔso!

5. Lamo anto amɔtshi okokawɔ ndjala l’okakasano wɔ ndjilela wananyɔ l’ankaana yɛwɔ oloko?

⁵ Koko, anto amɔtshi ndjalaka l’okakasano wɔ ndjilela wananyɔ l’ankaana yɛwɔ oloko, mbala imɔtshi ladjikɛnde wɔnanyɔ wɔnde atakotshɛ elako kɛnde kana ananghaka nkambo mɔtshi dj’otshindisa djɛ nde nsamba ndowilela oloko. Kana mbala imɔtshi, onto ɔmɔtshi wɔ l’otshumano atepelaka kana ananghaka nkambo mɔtshi dj’akiyanyisa efula. Akambo wa nghɔsɔ nkoka nkomɛ onto djɛ ndjala l’okakasano wɔ ndjilela anto ankina oloko. Iya kɛkɔnge kekoka ntokotshɛ djɛ nkalɔ ndjilela wananyɔ l’ankaana yɛso oloko?

6. Wopo wɔkɔnge ngandji okokawɔ ntokotshɛ́ djɛ ndjilela anto ankina oloko? (1 Kɔrɛtɔ 13:4-8)

⁶ Ngandji k’okaso onto ndeke lototshindaka djɛ ndowilela oloko. Lá 1 Kɔrɛtɔ  shapitrɛ 13 numolaka wekeka efula walendana la ngandji wakoka ntokotshɛ́ djɛ ndjilela kana nkalɔ ndjilela anto ankina oloko. (Wala 1 Kɔrɛtɔ 13:4-8.) Ndjɔmbɔmba, vɛrse 4 ntepelaka djɛ ‘ngandji alekɔ la balentshitshi edjinge wɔlɔ.’ Yehova ndjalaka la balentshitshi teso kaanga winá w’onanghelaso mpekanto. Djɛkondeke, iso nkoka ndjala la balentshitshi te wananyɔ waso ntsha wambotepela kana wambonangha nkambo mɔtshi djembotokiyanyɛ. Vɛrse 5 akotshɛ ante: ‘[Ngandji] apokaka nkɛlɛ lankeke. Apawale akambo wapɔlɔ w’onanghelawɔ.’ Topakombola mbala ‘akambo wapɔlɔ wotonanghelawɔ,’ ntepela ente nkindjɛ mvungɔ akambo wapɔlɔ watonanghelisá wananyɔ waso. Losanghanyɛ 7:9 ntepelaka ante ‘toyalake entshupa djɛ nyomala.’ Angoyala wɔlɔ efula nkamba l’etepela w’otanaso lá Ɛfɛsɛ 4:26: ‘Nyotatshikalake la nkɛlɛ tii winá ndjila’!

7. Wopo wɔkɔnge ikfɔ y’otanaso lá Mateo 7:1-5 otokotshɛwɔ djɛ ndjilela anto ankina oloko?

⁷ Nkambo nkina djekoka ntokotshɛ́ djɛ ndeka ndjilela wananyɔ l’ankaana yɛso oloko nde ndawɔsa etengo Yehova awɔsande. Ndjambe ndakɔpaka edjinge apakindjɛ mvungɔ mpekanto yɛwɔ. Nghɔsɔ ndeke oyɛso ladjɛ nangha. (Yee. 130:3) L’edjena kɛ mpika wiso waso ngo l’evunga wɛwɔ, iso ladjɛ nangha la wolo djɛ ndjila yimba lá wekeka wawɔ wa wɔlɔ la ndjawola ente iwɔ walekɔ l’akoka wa nangha kɛnɛ kelekɔ́ wɔlɔ. (Wala Mateo 7:1-5.) Iso ndjawolaka ente iwɔ nkɔpaka nangha kɛnɛ kelekɔ́ wɔlɔ la wapakombola ntokiyanyɛ, ladjikɛnde ngandji ‘ndjawolaka akambo ankfumɔ.’ (1 Kɔ. 13:7) Etepela wɛsɔ wepasakisola ente Yehova ntɔlɔmbaka djɛ ndjilela anto ankina oloko lodjipa wiso, koko, nde nkongaka dj’iso ndawilelaka oloko ladjikɛnde wambɛnyɛ má nanghedji djɛwɔ ambɔ walekɔ anto wɛdje djɛ ndawilela oloko. *

8. Wopo wɔkɔnge w’okokɛ ndjeka djɛ ndjilela wananyɔ wako oloko?

⁸ Ngo ngete dilɛmɛlɔ, onto wokokaso ndjilela oloko ladjɛ nyɛnyɛ ante nde ɛdje djɛ ndowilela oloko, edjinge nkambo djɛsɔ ndɔmbaka winá. Wopo wɔkɔnge w’okokɛ ndjeka djɛ ndjilela wananyɔ wako oloko? Nangha la wolo djɛ ndalembetela wɔlɔ. Sawolaka nyawɔ lá nsanghanyɛ yel’otshumano. Longhanyɛ djɛ mposaka nyawɔ t’olemo w’ipoposanyɛ. Yala la balentshitshi tewɔ, pɛyɛwɔ mbamba k’iwɔ nyɛnyɛ ambɔ walekɔ anto wɛlama djɛ ndawilela oloko. Má bango, okoka nsɔna akambo wokokɛ nshimela onto wɔngombewa ngo bango. Winá wɔ djokanelo djɛnyo yotakembe, okoka ndoyala l’akoka wa ndodjipola oloko. (Luka 16:10) Ko kɛkɔnge kokokɛ nangha ntsha wɔnanyɔ ambonangha nkambo mɔtshi djekoshimba djɛ wɛ ndowilela oloko? Toyalake entshupa djɛ ndjopa djokanelo nyande. L’edjena kɛ nangha nghɔsɔ, pɛyɛnde ndambo kɛ winá. Edjinge tawolake djɛ nanghedji djɛnde nkotshinda djɛ wɛ ntshika ndjilela wananyɔ ankina oloko. Lá nkambo djɛsɔ tongoshishima ndjɔmbɔmba yetotshikelisá enkambi wɛ Yehova ɛmɔtshi wɛ nkɔmano wekindjisá ndjilela anto ankina oloko, kaanga anto amɔtshi iyatshutshumadjɛ.

9. a) Wopo wɔkɔnge Hana ndakindjɛ ndawɛkɛ tá olonghanyelo wɔ Yehova kaanga ndɛnaka evunga w’anto amɔtshi walɔndjɛki? b) Olakanyelo wɔkɔnge wɔ ngombowa má ndjɔmbɔmba kɛ Hana lá kɛnɛ kelendana la ndawɛkɛ t’olonghanyelo wɔ Yehova? (Lenda ntshango.)

⁹ Ombokiyanaka lofu lɔmɔtshi má enanghedji kɛ wɔnanyɔ ɔmɔtshi wolekɔ́ l’edjito? Ntsha oyɛwɔ nde nghɔsɔ, mbɔ okoka mba wapɔ má nshishima ndjɔmbɔmba kɛ Hana. Onto wɔlɔndjɛki enkambi wɛ Ndjambe l’Isariyɛlɛ l’etsho wɛsɔ nde Nkfundji k’Ekekete Eli. Koko ase nkfumbo kɛnde watapɛyɛki ndjɔmbɔmba kɛ wɔlɔ. Wana wande w’ampame wayalaki ankfundji, wananghaki mbala la mbala akambo wa nsɔnyi, la wa mbindo,  koko papa kɛwɔ atápangolaki lá yopo yɛ wɔlɔ. Yehova atimɛ Eli mbala kɛkɔ kɛmɔ má mpipo kɛnde. Koko, Hana atapɛyɛ nonghanyi kɛ Ndjambe ɔkɔngɔ má ntona djɛ ntɔtɛmɔlá lá tabɛrnaklɛ l’ilá kenkfumɔ kɛ Eli ndayalaká nkfundji k’ekekete. Winá wɔ Eli ndɛnyi Hana alɔmba la yɛnyi y’efula, mbala kɛkɔ kɛmɔ, nde okanelaka nyɛtshi ante ovɔnde nde waaná. Ipa la nkanela ndambo djɛ mpona nsɔsɔlɔ kɛ nkambo, nde ɔnyɔlaka omoto woyalaki la yɛnyi y’efula wɔsɔ. (1 Sa. 1:12-16) Kaanga iyayale nghɔsɔ, Hana ananghaka elako ante ntsha ambowota wɔna mpame, angootshika djɛ ndokamba lá tabɛrnaklɛ má ɛlɔndjɛlɔ kɛ Eli. (1 Sa. 1:11) Akambo wananghaki wana wa Eli walɔmbamaka nsembolama? Ee, ekomo ekomo Yehova ápɛyɛka dilanyɛ. (1 Sa. 4:17) Koko, Ndjambe atshɔkɔlaka Hana nya wɔnande, Samwɛlɛ.​—1 Sa. 1:17-20.

10. Wopo wɔkɔnge Nkfumi Davidɛ ndakindjɛ ndjilela anto ankina oloko kaanga anto ankina iyahone ndokapa?

¹⁰ Ilongo yɛko imɔtshi ambokonanghelaká nkambo mɔtshi djɛ nyɛtshi efula? Ntsha oyɛwɔ nde nghɔsɔ, koshishima nkambo djekomelisá Nkfumi Davidɛ. Nde ayalaki l’ilongo imɔtshi yɛ mpame y’iyetaka Ahitɔfɛlɛ. Koko winá wɔ Abisalɔma wɔna Davidɛ ndahone nkita papa kɛnde la wolo lá yɛɛkɔ yɛ lowandji, Ahitɔfɛlɛ ingelaka l’ɔtɔmbɔkwɛlɔ wɔ Abisalɔma. Ape l’ehamo ntshutshɛ́ osukɔ wɔ wɔnande la wɔ mpame kɛ ndɔsaka etengo ilongo yɛnde kɛsɔ akiyanyɛka Davidɛ efula! Koko, Davidɛ atawola djɛ nkambo djɛsɔ ndoshimba djɛ ndjilela anto ankina oloko. Nde akindjɛka ndjilela Hushai, ilongo yɛnde inkina yɛ nkɔmano yetonisá ndjingela l’ɔtɔmbɔkwɛlɔ wɔsɔ oloko. Davidɛ ayalaka la donga djɛ wɔlɔ djɛ ndjilela Hushai oloko. Hushai ɛnyɛka ante alekɔ ilongo yɛ wɔlɔ la awolaka ndjila kaanga lowiko lɔnde lá mbalaka djɛ nkotshɛ́ Davidɛ.​—2 Sa. 17:1-16.

11. Lá wopo wɔkɔnge onkambi wɔ Nabala ɔmɔtshi ndɛnyɛ djɛ nde ndjilelaka anto ankina oloko?

¹¹ Tokoshishima lonkina ndjɔmbɔmba ketotshikelisá onkambi ɔmɔtshi wɔ Nabala. Davidɛ nya anto wande walamaka ase olemo w’ose Isariyɛlɛ ɔmɔtshi wetawɔ Nabala. Ndambo m’ɔkɔngɔ, Davidɛ alɔmbaka Nabala mpame k’okfudji efula kɛsɔ djɛ nkotshɛ́ enkambi wɛnde w’ampame la ndambo kɛ nkete djɛ ndɛ, djɛ ndakoke ndapɛyɛ. Winá wɔ Nabala ndatone lɔlɔmbɔ lɔ Davidɛ lokama papoo lɔsɔ, Davidɛ omalaka efula ko ɔsaka nkano djɛ ndjaka Nabala nde ny’anto ankfumɔ walekɔ́ lá mvulu kɛnde. Onkambi ɔmɔtshi ashimelaka Abigayɛlɛ, wadjɛ Nabala nkambo djɛsɔ. Etengo ndayalaka ose mvulu kɛnde, nde  ewaki ante lowiko lɔnde lolekɔ l’ɛwɔ wɛ Abigayɛlɛ. L’edjena kɛ nde ndota nyɔmɛlɛ, nde ilelaka Abigayɛlɛ oloko ante alekɔ l’akoka wa nsembola nkambo djɛsɔ. Ntsha nde ayawɛkɛka nghɔsɔ tende nde, ladjikɛnde anto ankfumɔ wewaki ambɔ Abigayɛlɛ alekɔ omoto wɔ balo efula. Kɛnɛ kenanghemisá m’ɔkɔngɔ kɛnyɛka djɛ nde ayalaka l’elonga kɛ ndjilela Abigayɛlɛ oloko. Abigayɛlɛ ananghaka akambo l’oloko wolo má ndjawoyɛ Davidɛ djɛ ntshikitanyɛ ikanyi yɛnde. (1 Sa. 25:2-35) Nde awolaki ante Davidɛ angonangha akambo la balo.

12. Wopo wɔkɔnge Yeso ndɛnyɛ ante nde ilelaki ambeki wande oloko kaanga iyananghaka evunga?

¹² Yeso ilelaki ambeki wande oloko kaanga iyananghaka evunga. (Dj. 15:15, 16) Winá wɔ Djakɔbɔ nya Djɔanɛ iyalɔmbɛ Yeso djɛ ndapɛyɛ mpipo kɛ djonyi l’Onkfumi, Yeso atakanela ante okambelawɔ Yehova nde m’ɔtɛ w’ekoma wɛ nyɛtshi, kana ndɔsa nkano djɛ ndawimɛ apɔstɔlɔ. (Marko 10:35-40) M’ɔkɔngɔ wɔ lasɔ, l’otsho w’iyavunde Yeso, ambeki wande ankfumɔ w’olotaka. (Mat. 26:56) Koko, Yeso atatshiká ndawilela oloko kaanga ndambo daambi. Nde ewaki evunga wɛwɔ, koko nde ‘ákɔpaka tii l’ekomo.’ (Dj. 13:1) M’ɔkɔngɔ w’ekfundwelo kɛnde, Yeso apɛyɛka ambeki wande wa nkɔmano 11 odjito w’ekekete wɔ ndɔndjɛ olemo wɔ nkfumba anto ambeki la nama ɛnkɔkɔ wɛnde wɛ ntshó. (Mat. 28:19, 20; Dj. 21:15-17) Nde ayalaki la donga djɛ wɔlɔ djɛ ndjilela ampame yɛ ntshamba djɛ djɔ yɛsɔ oloko. Iyankfumɔ kɛwɔ wakambaka la nkɔmano tii l’ekomo kɛ lowiko lɔwɔ le lá looko. Lá nsɔsɔlɔ, Hana, Davidɛ, onkambi wɔ Nabala, Abigayɛlɛ, la Yeso watotshikelaka ndjɔmbɔmba kɛ wɔlɔ kɛ ndjilela anto wa ntshamba djɛ djɔ oloko.

13. Nkambo djɛkɔnge djekoka ntokomɛ dj’iso nsamba ndjilela anto ankina oloko?

¹³ Wɛ ilelaka wɔnanyɔ ɔmɔtshi oloko má ndoshimela iseke imɔtshi, ko m’ɔkɔngɔ wɛ ndewa ente ambotisola le onto ɔmɔtshi? Nkambo djɛsɔ nkoka ndjala nyɛtshi efula. Lofu lɔmɔtshi, nkaana kɛmɔtshi ashimelaka ikokolo iseke yɛnde imɔtshi. Lofu lɔwɔlamisá, wadjɛ ikokolo yɛkɔ etaka nkaana kɛsɔ djɛ ndokembɛ, ɛnamaka etengo nde ewaka iseke y’iyashimela womɛnde. Lá nsɔsɔlɔ, nkaana kɛsɔ ayalaka l’okakasano wɔ ndjilela ikokolo yɛsɔ oloko lonkina. Koko l’onkoko wɔnde, nkaana kɛsɔ ahonaka okotshɔ. Nde asawolaka nya ikokolo inkina nkambo djɛsɔ, ko ikokolo yɛsɔ okotshɛka djɛ nde nkalɔ ndjilela ikokolo yɛ ntondo oloko.

14. Kɛkɔnge kekotshisá wɔnanyɔ ɔmɔtshi djɛ nkalɔ ndjilela anto ankina oloko?

¹⁴ Ayalaka ilá efula, wɔnanyɔ ɔmɔtshi ayalaka l’okakasano nya tokokolo tope, tɔ ndakanelaka ante wapɛlama nde ndawilela oloko. Koko, nde awangaka ntɔnɔla lá nkambo mɔtshi djetepelisá wɔnanyɔ ɔmɔtshi wɔ ndalɛmɛyɛka efula. Etepela wɛ wɔdju koko welekɔ́ la nkfulu efula wɛsɔ yayale nde: “Satana ndeke ontonyi wɔso, koko ape wananyɔ waso.” Wɔnanyɔ wɔsɔ atɔnɔlaka efula l’etepela wɛsɔ, alɔmbaka Yehova djɛ ndokotshɛ́, edjinge ekomo ekomo, ɔsaka nkano djɛ ndjila vu nya tokokolo tope tɔsɔ.

15. Lamo okokawɔ ndɔsa winá efula djɛ ndokalɔ ndjilela anto ankina oloko? Pɛyɛ ndjɔmbɔmba.

¹⁵ Ombotshutshɛká odjito ɔmɔtshi l’otshumano? Ɔsɔ nkoka ndjala nkambo djɛ yɛnyi efula. Grete nya nyɔ kɛnde wayalaki Ewakɛ wɛ Yehova wɛ nkɔmano l’ɛnɔnyi wɛ 1930 winá w’olemo wɔso yashimbama lá Nazi l’ɛlɔndjɛlɔ kɛ ase Allemagne. Grete akɔpaki odjito wɔnde wɔ yɔpɛyɛ wɔ nsangolá wananyɔ l’ankaana yɛnde kɔpi k’Etange k’Olami. Koko winá wɔ wananyɔ iyewe ambɔ papa kɛnde ananyɛ akambo wa nsɔsɔlɔ, wopapolaka odjito wɔsɔ la wɔma w’ente, papa kɛnde atookapa otshumano le antonyi. Ohemba wɔ Grete wotakoma ngo lasɔ. Lá Mbandji k’ape kel’andja w’otondo, wananyɔ watonaka mpɛyɛ Grete nya nyɔ kɛnde kɔpi yɛ periodikɛ yɛso la watakɔpaki kaanga nsawola lawɔ winá w’iyapomanaka  lawɔ lá mboka. Nkambo djɛsɔ dj’akiyanyɛka nsɔsɔlɔ efula! Wakiyanaka efula, edjinge Grete atepelaka ante ayalaka ilá efula djɛ lemi mvungɛ nkambo djɛsɔ la djɛ ndilelá wananyɔ wasɔ oloko lonkina. Koko, m’ɔkɔngɔ w’etsho efula nkaana kɛso kɛsɔ asipisoyɛka ante Yehova awimeyɛka, lasɔ edjinge nde ladjɛ nangha wopo wɔk’ɔmɔ. *

16. Lamo oyɛso ladjɛ mvukola enkeka enkfumɔ wetoshimba djɛ ndjilela anto ankina oloko?

¹⁶ Ntsha edjinge wɛ opomanaka l’akambo wa yɛnyi wa nghɔsɔ, nangha la wolo djɛ nkalɔ ndjilela anto ankina oloko. Kɛsɔ nkoka nkɔlɔmba winá efula, koko wapɔ wɛ ngongowa wengoleka welo w’ilɛ. Tɔkɔsa ndjɔmbɔmba kɛnɛ, ntsha lofu lɔmɔtshi tɔlɛka nkete dj’iyasenge, tongoyala l’okoso efula lá kɛnɛ kelendana la nkete dj’okokaso ndɛ. Koko, nkete dj’iyasenge djɛsɔ djepangototshinda dj’iso ntshika ndɛ. Wopo wɔk’ɔmɔ ndeke, totawolake djɛ nkambo djɛ nyɛtshi djepomanisá laso ntoshimba djɛ ndjilela wananyɔ l’ankaana yɛso yewotshwisá ase ntshamba djɛ djɔ oloko. Winá wonanghaso la wolo djɛ nkalɔ ndjilela anto ankina oloko, tongoyala l’osasa edjinge l’akoka wa mpika wiso lá kɛnɛ k’okokaso nangha djɛ nsuka ikanyi yɛ ndjilelana oloko l’otshumano wɔso.

17. Lamo oyɛwɔ djonyi ndjilela anto ankina oloko, ko kɛkɔnge kɛ songoshishima lá djamba djeyaye?

¹⁷ L’andja wa Satana wanɛ, alekɔ okakasano ndjilela anto ankina oloko, koko iso nkoka ndjilela wananyɔ l’ankaana yɛso oloko ladjikɛnde iso ndakɔpaka edjinge iwɔ ntɔkɔpaka. Nangha nghɔsɔ angotokotshɛ dj’iso ndjala l’osasa la ndjala iwoke imɔ má winá wɔsɔ edjinge nkambo djɛsɔ djengoyala itondo y’elamelo winá wɔ songopomana l’ekakasano l’etsho weyaye. Iya kɛkɔnge k’okokɛ nangha ntsha onto ɔmɔtshi akokiyanyɛka ko omboyala l’okakasano wɔ ndowilela oloko lonkina? Nangha la wolo djɛ nyɛna akambo etengo Yehova ɛnande, kamba la tɔkfɔ telá Bible, yala la ngandji k’efula te wananyɔ wako, la waka olakanyelo má ndjɔmbɔmba yela Bible. Iso nkoka ndongela yɛnyi yɛso edjinge nkalɔ ndjilela anto ankina oloko. Winá wɔ songhonanghaka nghɔsɔ tongoyala l’osasa wɔ ndjala la tolongo tekesanela laso ‘ndeka kaanga wɔnanyɔ wowotshwisá laso nkfundu mmɔ.’ (Woo. 18:24) Koko, topakoke nkoma ngo lá ndjilela anto ankina oloko toko, edjinge iwɔ ladjɛ ndjewa ntsha iwɔ nkoka ntilela oloko. Lá djamba djeyaye, tongoshishima wopo w’okokaso nyɛnyɛ ente tɛdje djɛ wananyɔ waso ntilela oloko.