1. Yini lesenta singamangali kutsi sebancane bantfu lesingabetsemba kulelive?

 BANTFU abasetsembi muntfu kulelive laSathane. Bahlale badvunyatwa bosomabhizinisi, baholi bepolitiki nabaholi benkholo. Labanye badvunyatwa bangani babo, bomakhelwane babo, baze badvunyatwe ngisho nangemalunga emndeni. Loku akusimangalisi. LiBhayibheli latsi: ‘Emalangeni ekugcina . . . , bantfu . . . ngeke betsembeke, . . . batawunyundzela, . . . batsengise ngalabanye.’ Loku kusho kutsi bantfu batawufana naSathane, longunkulunkulu walelive longeke uze umetsembe.​—2 Thim. 3:1-4; 2 Khor. 4:4.

2. (a) Ngubani lesingametsemba ngalokuphelele? (b) Yini labanye labangahle batibute yona?

² Nobe kunjalo, njengobe singemaKhristu, siyati kutsi singametsemba ngalokuphelele Jehova. (Jer. 17:7, 8) Siyaciniseka kutsi uyasitsandza nekutsi ‘angeke aze abashiye’ bangani bakhe. (Hla. 9:10) Singametsemba naKhristu Jesu ngobe wanikela ngekuphila kwakhe ngenca yetfu. (1 Phet. 3:18) Ngetulu kwaloko, sitibonele ngewetfu kutsi liBhayibheli lisiniketa ticondziso lesingatetsemba. (2 Thim. 3:16, 17) Siyaciniseka kutsi singametsemba Jehova, Jesu kanye neliBhayibheli. Kodvwa kungenteka labanye bayatibuta kutsi bangahlale babetsemba yini bazalwane babo nabodzadze. Nangabe imphendvulo ingu-yebo, yini lengenta kutsi sibetsembe?

3. Yini Jehova lasentele yona? (Makho 10:29, 30)

³ Jehova usikhetsile kuze sibe yincenye yemndeni wakhe losemhlabeni wonkhe. Lena yintfo lenhle, futsi sitfola tibusiso letinyenti ngaloko! (Fundza Makho 10:29, 30.) Emhlabeni wonkhe, sinebazalwane nabodzadze labatsandza Jehova njengatsi futsi labenta konkhe lokusemandleni abo kuze baphile ngetimiso  takhe. Kungenteka lulwimi lesilukhulumako, emasiko etfu nendlela lesigcoka ngayo kwehlukile kunekwabo, kodvwa siyabatsandza ngisho sicala kubabona. Siyakutsandza kudvumisa Babe wetfu wasezulwini lositsandzako futsi simkhonte kanye kanye.​—Hla. 133:1.

4. Yini lesenta sidzinge bazalwane betfu nabodzadze?

⁴ Nyalo sikudzinga kakhulu kunakucala kuhlale simunye nebazalwane betfu nabodzadze. Ngalesinye sikhatsi, bayasisita nasinetinkinga. (Rom. 15:1; Gal. 6:2) Baphindze basikhutsate kutsi sihlale simatasatasa emsebentini waJehova futsi sihlale sibangani bakhe. (1 Thes. 5:11; Heb. 10:23-25) Cabanga nje kutsi ngabe siyini kube asivikelwa libandla, lelisisita kutsi silwe netitsa tetfu, lokunguSathane Develi nelive lakhe lelibi. Ngekushesha, Sathane nalabo labalawulako batawuhlasela bantfu baNkulunkulu. Sitawujabula kakhulu ngaleso sikhatsi kuba nebazalwane betfu nabodzadze labatawusisita!

5. Yini lengenta labanye bakutfole kumatima kwetsemba bazalwane babo nabodzadze?

⁵ Nobe kunjalo, labanye bakutfola kumatima kwetsemba bazalwane babo nabodzadze, mhlawumbe loko kubangelwa kutsi umzalwane nobe dzadze wasakata imfihlo lamtjela yona nobe kutsi wehluleka kugcina setsembiso. Kungenteka kunalotsite ebandleni lowasho intfo nobe wenta lokutsite lokwamvisa buhlungu kakhulu. Loko kungenta kutsi kube matima kwetsemba labanye. Kodvwa yini lengasisita kuze siphindze sibetsembe bazalwane betfu nabodzadze?

6. Lutsandvo lungasisita njani kutsi sibetsembe labanye? (1 KubaseKhorinte 13:4-8)

⁶ Lutsandvo lungasisita kutsi sibetsembe labanye. Incwadzi yaKubaseKhorinte bekucala sehluko 13, ikhuluma ngetintfo letinyenti letentiwa lutsandvo letingasisita kuze sibetsembe  labanye futsi siphindze sibetsembe nangabe bebasidvumatile. (Fundza 1 KubaseKhorinte 13:4-8.) Sibonelo nje, vesi 4 utsi “lutsandvo luyabeketela futsi lunemusa.” Jehova uyasibeketelela nasona ngako natsi kufanele sibabeketelele bazalwane nabodzadze nabasho nobe nabenta tintfo letisiphatsa kabi nobe letisivisa buhlungu. Vesi 5 uchubeka atsi: “[Lutsandvo] alucansuki. Lute emagcubu.” Ngako asifuni kubambela bazalwane betfu nabodzadze “emagcubu,” sikugcine engcondvweni loko labasente kona kwasivisa buhlungu. Umshumayeli 7:9 utsi akukafaneli ‘sisheshe sitfukutsele.’ Kungasisita kusebentisa neseluleko lesiKubase-Efesu 4:26, lesitsi: “Lilanga alingashoni nisetfukutsele”!

7. Timiso letitfolaka kuMatewu 7:1-5 tisisita njani kutsi sibetsembe labanye?

⁷ Lokunye lokungasisita kutsi sibetsembe bazalwane betfu nabodzadze kutsi sibabuke ngendlela Jehova lababuka ngayo. Nkulunkulu uyabatsandza futsi tono tabo akatigcini engcondvweni. Natsi kufanele sente lokufanako. (Hla. 130:3) Kunekutsi sinake emaphutsa abo, kufanele setame kubuka buntfu babo lobuhle futsi sicabange ngekutsi basengakhona kwenta lokuhle. (Fundza Matewu 7:1-5.) Siyetsemba kutsi bayafuna kwenta lokuhle nekutsi abafuni kusivisa buhlungu ngobe lutsandvo “lukholwa ngito tonkhe tintfo.” (1 Khor. 13:7) Loko akusho kutsi Jehova ulindzele kutsi simane nje sibetsembe labanye, kunaloko ufuna sibetsembe ngobe bakhombisile kutsi singabetsemba. *

8. Yini longayenta kuze wetsembe bazalwane bakho nabodzadze?

⁸ Njengekuhlonishwa, kuze bantfu bakwetsembe, kudzingeka wente lokutsite futsi loko kutsatsa sikhatsi. Yini longayenta kuze ubetsembe bazalwane bakho nabodzadze? Bati kahle. Coca nabo emihlanganweni yelibandla futsi ushumayele nabo. Babeketelele, ubanikete litfuba lekutsi bakhombise kutsi ungabetsemba. Ekucaleni, ungahle ungamtjeli konkhe lokumayelana nawe umuntfu losandza kumati. Kodvwa njengobe bungani benu bukhula, ungahle utive ukhululekile kumtjela indlela lotiva ngayo. (Luk. 16:10) Kodvwa yini longayenta nangabe umzalwane nobe dzadze akwenta ungasametsembi? Ungasheshi ufune kucedza bungani benu, kunaloko tinikete sikhatsi sekutsi uphole. Ungavumi kutsi loko lokwentiwe ngulabambalwa kukwente ungasabetsembi bonkhe bazalwane bakho nabodzadze. Mayelana naloku, ase sicoce ngaletinye tinceku taJehova letetsembekile letachubeka tibetsemba labanye ngisho nobe betidvunyatwe ngulabanye.

9. (a) Hana wachubeka njani akhonta Jehova nanobe labo lebebammelele bebenta emaphutsa? (b) Loku lokwenteka kuHana kukufundzisani mayelana nekuchubeka ukhonta Jehova nanobe labanye bakudvumata? (Buka sitfombe.)

⁹ Uke wadvunyatwa yini yindlela umzalwane lowenta imisebenti letsite ebandleni lenta ngayo tintfo? Nangabe kunjalo, kungakusita kucabanga ngesibonelo saHana. Ngaleso sikhatsi, Eli uMphristi Lophakeme bekahola ekukhonteni Nkulunkulu ka-Israyeli. Kodvwa umndeni wakhe bewungasiso sibonelo lesihle. Emadvodzana akhe labaphristi, bekenta tintfo letilihlazo futsi bekatiphatsa kabi; nobe kunjalo, kute lokunganani lebekwentiwa ngubabe wawo kuze awekhute. Jehova akazange amyekelise ngekushesha Eli kuba ngumphristi. Nobe kunjalo, Hana akazange ayekele kukhonta Nkulunkulu ethendeni lekukhontela ngesikhatsi Eli asengumphristi lophakeme. Ngesikhatsi Eli abona Hana lobekakhatsatekile athantaza,  wefika esiphetfweni lesingasiso, watsi udzakiwe. Kunekutsi afune onkhe emaciniso endzaba, wamsola lomfati lebekacindzetelekile. (1 Sam. 1:12-16) Nanobe kunjalo, Hana wafunga watsi nakangatfola indvodzana, utayiletsa ethendeni lekukhontela kuze yente umsebenti waJehova, futsi beyitawunakekelwa ngu-Eli. (1 Sam. 1:11) Bekudzinga kulungiswa yini loku bekwentiwa ngemadvodzana a-Eli? Yebo, futsi Jehova wakulungisa ngesikhatsi lesifanele. (1 Sam. 4:17) Kusengakenteki loku, Nkulunkulu wabusisa Hana ngendvodzana, lokunguSamuweli.​—1 Sam. 1:17-20.

10. Yini leyakhombisa kutsi iNkhosi Davide yachubeka ibetsemba labanye nanobe beyidvunyatwe ngulabanye bantfu?

¹⁰ Uke wadvunyatwa yini ngumngani wakho lomkhulu? Nangabe kunjalo, cabanga ngalokwenteka eNkhosini Davide. Lomunye umngani wayo bekungu-Ahithofeli. Kodvwa ngesikhatsi Absalomu, indvodzana yaDavide etama kutsatsa bukhosi kubabe wakhe, Ahithofeli wasekela Absalomu kulokuvukela. Kungenteka Davide weva buhlungu kakhulu ngekulahlwa yindvodzana yakhe nayindvodza lebekacabanga kutsi ingumngani wakhe! Davide akazange akuvumele loko kutsi kumente angasabetsembi labanye. Wachubeka nekwetsemba Hushayi lebekangumngani wakhe lowetsembikile, lowala kuba yincenye yalokuvukela. Davide wenta kahle ngekwetsemba Hushayi. Hushayi wakhombisa kutsi ungumngani sibili, wabeka ngisho nekuphila kwakhe engotini kuze asite Davide.​—2 Sam. 17:1-16.

11. Lesinye sisebenti saNabali sakhombisa njani kutsi siyabetsemba labanye?

¹¹ Cabanga nangalokwentiwa ngulesinye sisebenti saNabali. Davide nemadvodza lebekahamba nawo bavikela tisebenti talenye indvodza lengumIsrayeli lokutsiwa nguNabali. Ngekuhamba kwesikhatsi, Davide wacelela yena kanye nalamadvodza lebekanawo kudla kulendvodza lenjingile, wacela kutsi ibaphe nobe yini lenayo. Ngesikhatsi Nabali ala kubapha, Davide watfukutsela kakhulu kangangekutsi wancuma kubulala onkhe emadvodza lebekasemndenini waNabali. Lesinye sisebenti sabikela Abigayili, umfati waNabali ngalendzaba. Njengobe naso besililunga lalomndeni, besati kutsi kuphila kwaso kusetandleni ta-Abigayili.  Kunekutsi sibaleke, besetsemba kutsi Abigayili utasilungisa lesimo. Besiciniseka ngaloku ngobe Abigayili bekatiwa ngekutsi ungumfati lohlakaniphile. Loko lokwenteka kwakhombisa kutsi senta kahle ngekumetsemba. Abigayili waba nesibindzi ngekubonisana naDavide kutsi angakwenti loku bekahlele kukwenta. (1 Sam. 25:2-35) Beketsemba kutsi Davide utawenta sincumo lesihlakaniphile.

12. Jesu wakhombisa njani kutsi bekabetsemba bafundzi bakhe nanobe bebawenta emaphutsa?

¹² Jesu bekabetsemba bafundzi bakhe nanobe bebawenta emaphutsa. (Joh. 15:15, 16) Ngesikhatsi Jakobe naJohane bacela kutsi Jesu abanikete tikhundla eMbusweni, Jesu akazange asole tizatfu tabo tekukhonta Jehova nobe abayekelise kuba baphostoli. (Mak. 10:35-40) Ngekuhamba kwesikhatsi, bonkhe bafundzi baJesu bamshiya ngebusuku laboshwa ngabo. (Mat. 26:56) Nobe kunjalo, Jesu bekasolo abetsemba. Bekawati kahle emaphutsa abo; kodvwa “wabatsandza kwaze kwaba sekugcineni.” (Joh. 13:1) Ngemuva kwekuvuswa kwakhe, waniketa labaphostoli labetsembekile labangu-11 umsebenti lobalulekile wekuhola emsebentini wekwenta bafundzi newekutsi banakekele timvu takhe letiligugu. (Mat. 28:19, 20; Joh. 21:15-17) Akazange advumateke ngekwetsemba lamadvodza lanesono. Onkhe achubeka asebenta ngekwetsembeka kwaze kwaba lilanga lafa ngalo. Hana, Davide, sisebenti saNabali, Abigayili kanye naJesu basibekela sibonelo lesihle sekwetsemba bantfu labanesono.

13. Yini lengenta kube matima kutsi sibetsembe labanye?

¹³ Uke wamtjela yini umzalwane imfihlo yakho, kodvwa wabese uyakudvumata ngekuhamba kwesikhatsi? Loko kungakuvisa buhlungu kakhulu. Lomunye dzadze watjela lomdzala welibandla imfihlo yakhe. Ngakusasa, umfati walomzalwane wamshayela kuze amkhutsate, lokukhombisa kutsi besekayivile lendzaba yakhe lebekumele ibe yimfihlo. Kwaba matima kutsi lodzadze aphindze ametsembe lomzalwane. Kodvwa lodzadze wenta intfo lenhle ngekutsi acele lusito. Wakhuluma nalomunye lomdzala welibandla futsi wamsita kutsi aphindze abetsembe labadzala belibandla.

14. Yini leyasita lomunye umzalwane kutsi aphindze abetsembe labanye?

¹⁴ Bese kuphele sikhatsi lesidze lomunye umzalwane atfukutselele labanye labadzala belibandla lababili lebekangabetsembi. Nobe kunjalo, wacabangisisa ngalokunye lokwashiwo ngulomunye umzalwane lebekamhlonipha kakhulu. Lomzalwane watsi: “NguSathane sitsa setfu, hhayi bazalwane betfu.” Loko kwenta lomzalwane wacabangisisa ngalamavi futsi wathantaza ngalendzaba, ngekuhamba kwesikhatsi wakha kuthula nalabazalwane lababili.

15. Yini leyenta kutsi kutsatse sikhatsi kuphindze sibetsembe labanye? Niketa sibonelo.

¹⁵ Uke wayekeliswa yini kwenta umsebenti lotsite ebandleni? Loku kungaba buhlungu kakhulu. Grete namake wakhe bebaboFakazi labetsembekile ngesikhatsi semaNazi eJalimane ngabo-1930 ngesikhatsi umsebenti wetfu uvinjelwe. Grete bekasebenta ku-typer Sicongosekulindza. Kodvwa ngesikhatsi bazalwane beva kutsi babe wakhe umelene neliciniso, bamyekelisa kwenta lomsebenti ngobe bebesaba kutsi kungenteka babe wakhe akhiphe timfihlo telibandla. Tinkinga taGrete atigcinanga lapho. Kuso sonkhe lesikhatsi seMphi Yelive Yesibili, bazalwane bebangakhululeki ngekunika Grete namake wakhe magazini futsi bebangabakhulumisi nabahlangana nabo esitaladini. Loko kwaba buhlungu kakhulu! Kwamvisa buhlungu kakhulu Grete kangangekutsi kwaphela  sikhatsi lesidze solo angabacoleli labazalwane futsi angabetsembi. Ngekuhamba kwesikhatsi, wabona kutsi kungenteka Jehova ubacolele ngako naye bekufanele abacolele. *

16. Yini leyenta sitimisele kutsi siphindze sibetsembe bazalwane betfu nabodzadze?

¹⁶ Nangabe uke wabhekana nesimo lesibuhlungu njengalesi, yetama kuphindze ubetsembe labanye. Kungenteka kutsatse sikhatsi, kodvwa ngeke utisole ngekwenta njalo. Nasi sibonelo, nangabe wake wadla kudla lokwabese kuyakugulisa, kungenteka ukunake kakhulu loko lokudlako esikhatsini lesitako. Kodvwa loko angeke kukwente kutsi ubese uyayekela kudla. Ngendlela lefanako, akukafaneli sivumele intfo lembi leyenteka isente singasabetsembi bonkhe bazalwane betfu nabodzadze, lesati kahle kutsi banesono. Nangabe siphindze sibetsemba bazalwane betfu nabodzadze, sitawujabula kakhulu futsi loko kutawufaka sandla kuze kwetsenjwane ebandleni.

17. Kubaluleke ngani kutsi sibetsembe labanye, futsi yini lesitawucoca ngayo esihlokweni lesilandzelako?

¹⁷ Bantfu abasetsembani kulelive laSathane, kodvwa tsine singabetsemba bazalwane betfu nabodzadze ngobe siyabatsandza futsi nabo bayasitsandza. Loku kusenta sijabule futsi sibe nebunye, ngetulu kwaloko, kutasivikela nasibhekana netimo letimatima esikhatsini lesitako. Kodvwa yini lesingayenta nangabe lotsite asidvumatile, wenta sangasametsembi? Yetama kubuka tintfo njengaJehova, sebentisa timiso letiseBhayibhelini, batsandze kakhulu bazalwane bakho nabodzadze futsi ufundze etibonelweni letiseBhayibhelini. Singabuncoba buhlungu lesabuva futsi siphindze sibetsembe labanye. Nasenta njalo, sitawuba nebangani labanyenti ‘labasondzela kakhulu kwengca banaketfu bengati.’ (Taga 18:24) Kodvwa akukeneli kwetsemba labanye, nabo kufanele basetsembe. Esihlokweni lesilandzelako, sitawucoca ngekutsi singakhombisa njani kutsi bazalwane betfu bangasetsemba.